1. I yini lexi endlaka ndyangu wa Yehovha wu va ni vun’we?

HA TSAKA leswi hi nga xiphemu xa ndyangu wa Yehovha. I yini lexi endlaka leswaku ku va ni ku rhula ni vun’we endyangwini lowu wa hina? Hileswi hinkwerhu hi xiximaka vanhu lava Yehovha a va nyikeke vulawuri endyangwini wakwe. Loko hi xixima vanhu volavo, ndyangu wa hina wu ta tshama wu ri ni vun’we.

2. Hi swihi swivutiso leswi hi nga ta swi hlamula eka nhlokomhaka leyi?

² Nhlokomhaka leyi, yi vulavula hi ku va ni vulawuri evandlheni. Hi ta hlamula ni swivutiso leswi landzelaka: Hi wihi ntirho lowu vamakwerhu va xisati va wu endlaka? Xana i ntiyiso leswaku makwerhu un’wana ni un’wana wa xinuna i nhloko ya vamakwerhu va xisati hinkwavo? Xana vulawuri lebyi vakulu va nga na byona eka vamakwerhu, bya fana ni lebyi tinhloko ta mindyangu ti nga na byona eka vana ni vasati va tona? A hi rhangeni hi bula hi ndlela leyi hi faneleke hi va languta hayona vamakwerhu va xisati.

3. Hi nga swi kombisa njhani leswaku ha wu tlangela swinene ntirho lowu endliwaka hi vamakwerhu va xisati?

³ Ha tsaka leswi hi nga ni vamakwerhu va xisati lava waka va pfuka leswaku va khathalela mindyangu ya vona, va chumayela mahungu lamanene ni ku va kona etinhlengeletanweni ta vandlha. Ku ehleketa hi ndlela leyi Yehovha na Yesu va va tekaka  hayona vamakwerhu lava, swi ta endla hi tlangela ntirho wa vona. Nakambe, ku dyondza hi ndlela leyi muapostola Pawulo a a va khoma hayona vavasati swi ta hi pfuna swinene.

4. Bibele yi swi kombisa njhani leswaku Yehovha u teka vavasati va ri va nkoka ku fana ni vavanuna?

⁴ Bibele yi kombisa leswaku Yehovha u teka vavasati va ri va nkoka ku fana ni vavanuna. Hi xikombiso, yi kombisa leswaku enkarhini wa vaapostola, Yehovha u nyike vavasati swin’we ni vavanuna moya wo kwetsima leswaku va kota ku endla masingita, yo tanihi ku vulavula tindzimi to hambanahambana. (Mit. 2:1-4, 15-18) Hinkwavo va hlawuriwe hi moya wo kwetsima leswaku va ta ya fuma na Kreste. (Gal. 3:26-29) Vavanuna ni vavasati va ta kuma vutomi lebyi nga heriki laha misaveni. (Nhlav. 7:9, 10, 13-15) Nakambe, vavanuna ni vavasati va nyikiwe ntirho wo dyondzisa ni wo chumayela mahungu lamanene. (Mat. 28:19, 20) Buku ya Mitirho yi vulavula hi ntirho lowu endliweke hi makwerhu un’wana wa xisati loyi a a vuriwa Prisila ni nuna wakwe Akhwila, lava pfuneke Apolosi loyi a a ri xidyondzeki leswaku a twisisa ntiyiso.—Mit. 18:24-26.

5. Luka 10:38, 39, 42, yi swi kombisa njhani leswaku Yesu a a va xixima vavasati?

⁵ Yesu a a va xixima vavasati. A a nga fani ni Vafarisi hikuva a va teka vavasati va nga pfuni nchumu, a va nga va vulavurisi emahlweni ka vanhu hambi ku ri ku burisana na vona hi Matsalwa a swi yila. Kambe Yesu loko a burisana ni vadyondzisiwa vakwe hi Matsalwa ni vavasati a va ri kona. * (Hlaya Luka 10:38, 39, 42.) Nakambe, loko a ya eku chumayeleni u fambe ni vavasati. (Luka 8:1-3) U tlhele a rhuma vona va ya tivisa vaapostola vakwe leswaku u pfuxiwile eku feni.—Yoh. 20:16-18.

6. Muapostola Pawulo u swi kombise njhani leswaku u xixima vavasati?

⁶ Muapostola Pawulo u tsundzuxe Timotiya leswaku a xixima vavasati. U n’wi byele leswaku a khoma “vavasati lava kuleke tanihi vamanana” ni ku khoma “vanhwanyana tanihi vamakwavo va xisati.” (1 Tim. 5:1, 2) Hambileswi Pawulo a pfuneke Timotiya leswaku a va Mukreste loyi a wupfeke, u vule leswaku mana wa Timotiya ni kokwa wakwe hi vona vo sungula ku n’wi dyondzisa “matsalwa yo kwetsima.” (2 Tim. 1:5; 3:14, 15) Eka papila leri a ri tsaleleke Varhoma, Pawulo u xewete vamakwerhu va xisati hi mavito. A a wu teka wu ri wa nkoka ntirho wa vona naswona a a wu tlangela swinene.—Rhom. 16:1-4, 6, 12; Filp. 4:3.

7. Hi swihi swivutiso leswi hi nga ta swi hlamula sweswi?

⁷ Hilaha tindzimana leti hundzeke ti kombiseke hakona, a ku kona laha Matsalwa ma vulaka leswaku vamakwerhu va xisati a hi va nkoka loko va pimanisiwa ni vamakwerhu va xinuna. Vamakwerhu va xisati va pfuna swinene naswona vakulu va titshege hi vona leswaku ku va ni ku rhula evandlheni. Kambe ku ni swivutiso leswi tlakukaka. Hi xikombiso: Hikwalahokayini mikarhi yin’wana Yehovha a lava leswaku makwerhu wa xisati a ambala xo funengeta nhloko? Leswi vakulu ni malandza ya vutirheli ku nga vavanuna, xana leswi swi vula leswaku makwerhu un’wana ni un’wana wa xinuna i nhloko ya vamakwerhu va xisati hinkwavo evandlheni?

8. Hi ku ya hi Vaefesa 5:23, xana makwerhu un’wana ni un’wana wa xinuna, i nhloko ya vamakwerhu va xisati hinkwavo evandlheni? Hlamusela.

⁸ A swi tano! Makwerhu wa xinuna a hi nhloko ya vamakwerhu hinkwavo va xisati evandlheni; nhloko ya vandlha i Kreste. (Hlaya  Vaefesa 5:23.) Ekaya, nhloko ya wansati i wanuna. N’wana wa jaha loyi a khuvuriweke a hi nhloko ya mana wakwe. (Efe. 6:1, 2) Evandlheni vakulu hi vona va nga ni vulawuri ehenhla ka vamakwavo kambe vulawuri byebyo byi ni mindzilakano. (1 Tes. 5:12; Hev. 13:17) Vavasati lava nga tekiwangiki lava humeke miti, va ha ta tama va xixima vatswari va vona ni vakulu. Hambiswiritano, ku fana ni vamakwerhu va xinuna, nhloko ya vona i Yesu.

9. Hikwalahokayini mikarhi yin’wana vamakwerhu va xisati va fanele va ambala xo funengeta nhloko?

⁹ Evandlheni Yehovha u nyike vavanuna ntsena vutihlamuleri byo dyondzisa ni byo rhangela etimhakeni ta vugandzeri. (1 Tim. 2:12) Hikwalahokayini? Leswi a hlawuleke Yesu leswaku a va nhloko ya wanuna, u nyike vavanuna vutihlamuleri byo rhangela endyangwini wakwe leswaku swilo swi ta famba kahle. Loko swiyimo swi lava leswaku makwerhu wa xisati a endla mitirho leyi endliwaka hi vamakwerhu va xinuna, Yehovha u lava leswaku makwerhu yoloye wa xisati a ambala xo funengeta nhloko. * (1 Kor. 11:4-7) Yehovha a nga kombeli vavasati ku endla tano hileswi a va tekelaka ehansi kambe u lava va kombisa leswaku va xixima vulawuri lebyi a byi vekeke. Ha ha ri ni mhaka leyi emiehleketweni, a hi hlamuleni xivutiso lexi nge: Tinhloko ta mindyangu ni vakulu va nyikiwe vulawuri byo tanihi kwihi?

10. I yini lexi nga endlaka leswaku nkulu a vekela vandlha swinawanawana?

¹⁰ Vakulu va rhandza Kreste ni “tinyimpfu” leti Yehovha na Yesu va va nyikeke vutihlamuleri byo ti khathalela. (Yoh. 21:15-17) Leswi nkulu a rhandzaka vamakwavo, a nga sungula  ku titeka tanihi bava evandlheni. A nga tibyela leswaku leswi tinhloko ta mindyangu ti vekaka milawu emakaya leswaku ti sirhelela mindyangu ya tona, na yena a nga veka milawu evandlheni leswaku a sirhelela tinyimpfu ta Xikwembu. Vamakwerhu van’wana va nga endla leswaku vakulu va titeka tanihi va bava evandlheni hi ku va kombela va va tekela swiboho etimhakeni to karhi. Xana vakulu evandlheni va ni vulawuri byo fana ni lebyi tinhloko ta mindyangu ti nga na byona emakaya?

11. Vulawuri lebyi tinhloko ta mindyangu ti nga na byona byi yelana njhani ni lebyi vakulu va nga na byona?

¹¹ Muapostola Pawulo u vule leswaku vulawuri lebyi tinhloko ta mindyangu ti nga na byona, bya yelana ni lebyi vakulu va nga na byona. (1 Tim. 3:4, 5) Hi xikombiso, Yehovha u lava leswaku swirho swa ndyangu swi yingisa nhloko ya ndyangu. (Kol. 3:20) Hi hala tlhelo, u lava leswaku lava nga evandlheni va yingisa vakulu. Nakambe u lava leswaku tinhloko ta mindyangu ni vakulu va pfuna lava nga ehansi ka vona va va ni vuxaka lebyinene na yena. U lava leswaku va tlhela va khathala swinene hi vona. Ku fana ni tinhloko ta mindyangu, vakulu va fanele va pfuna vamakwavo hi nkarhi wa maxangu. (Yak. 2:15-17) Ku engetela kwalaho, u lava leswaku vakulu ni tinhloko ta mindyangu va pfuna lava nga ehansi ka vona va xixima milawu yakwe  naswona va “[namarhela] leswi tsariweke” eBibeleni.—1 Kor. 4:6.

12-13. Hi ku ya hi Varhoma 7:2, vulawuri lebyi tinhloko ta mindyangu ti nga na byona byi hambana njhani ni lebyi vakulu va nga na byona?

¹² Ku ni ku hambana lokukulu exikarhi ka vulawuri lebyi tinhloko ta mindyangu ti nga na byona ni lebyi vakulu va nga na byona. Hi xikombiso, Yehovha u nyike vakulu vutihlamuleri byo va vaavanyisi ni byo susa vadyohi lava nga hundzukiki evandlheni.—1 Kor. 5:11-13.

¹³ Hi hala tlhelo, Yehovha u nyike tinhloko ta mindyangu vulawuri byo karhi lebyi a nga va nyikangiki vakulu. Hi xikombiso, u nyike tinhloko ta mindyangu vulawuri byo vekela mindyangu ya tona milawu ni ku tiyiseka leswaku milawu yoleyo ya landzeriwa. (Hlaya Varhoma 7:2.) Nhloko ya ndyangu yi ni mfanelo yo vekela vana va yona nkarhi wo vuya ekaya nimadyambu. Nakambe yi ni mfanelo yo va tshinya loko va nga yi yingisi milawu yoleyo. (Efe. 6:1) Loko nhloko ya ndyangu yi veka milawu yoloye, yi sungula hi ku burisana ni nsati hikuva havumbirhi bya vona i “nyama yin’we.” *—Mat. 19:6.

14. (a) Hi ku ya hi Marka 10:45, hikwalahokayini swi fanela ku va Yehovha a hlawule Yesu leswaku a va nhloko ya vandlha? (b) Hi wihi ntirho wa Huvo leyi Fumaka? (Vona bokisi leri nge, “ Ntirho Wa Huvo Leyi Fumaka.”)

¹⁴ Yehovha u tirhise nkutsulo leswaku a xava vutomi bya vanhu lava nga evandlheni ni bya vanhu hinkwavo lava kombisaka ripfumelo eka Yesu. (Hlaya Marka 10:45; Mit. 20:28; 1 Kor. 15:21, 22) Leswi Yesu a nyikeleke hi vutomi byakwe leswaku a hi kutsula, swa fanela  leswi Yehovha a hlawuleke yena a va nhloko ya vandlha. Leswi Yesu a nga nhloko, u ni vulawuri byo vekela mindyangu ni vandlha milawu. (Gal. 6:2) A ngo hi vekela milawu ntsena kambe wa hi wundla ni ku hi hlayisa.—Efe. 5:29.

15-16. U dyondza yini eka leswi vuriweke hi makwerhu wa xisati Marley na Makwerhu Benjamin?

¹⁵ Vamakwerhu va xisati va kombisa leswaku va xixima Kreste hi ku yingisa nkongomiso lowu va nyikiwaka wona hi vavanuna lava a va hlawuleke leswaku va va khathalela. Hi ku yimela vamakwerhu vo tala va xisati, Marley, loyi a tshamaka eUnited States, u ri: “Ndzi byi teka byi ri bya nkoka vutihlamuleri bya mina bya ku va nsati wa muti ni ku va makwerhu wa xisati evandlheni. Ndzi tikarhatela ku va ni langutelo lerinene hi vulawuri lebyi Yehovha a byi nyikeke nuna wa mina ni vakulu evandlheni. Leswi nuna wa mina ni vakulu evandlheni va ndzi xiximaka ni ku tlangela ntirho lowu ndzi wu endlaka, swi endla swi ndzi olovela ku va yingisa ni ku va xixima.”

¹⁶ Vamakwerhu va xinuna va kombisa leswaku va byi twisisa vulawuri lebyi va nyikiweke byona hi ku xixima vamakwerhu va xisati. Makwerhu Benjamin, loyi a tshamaka eNghilandhi, u ri: “Ndzi dyondze swo tala eka tinhlamulo ta vamakwerhu va xisati etinhlengeletanweni ta vandlha ni le ka switsundzuxo leswi va swi vulaka loko swi ta emhakeni ya ku va mudyondzisi lonene ensin’wini. Ntirho lowu va wu endlaka i wa nkoka swinene.”

17. Hikwalahokayini hi fanele hi xixima vulawuri?

¹⁷ Loko vandlha hinkwaro, vavanuna, vavasati, tinhloko ta mindyangu ni vakulu, va xixima vulawuri lebyi Yehovha a byi vekeke, ku ta va ni ku rhula evandlheni. Xa nkoka swinene, hi yisa ku dzuneka eka Tata wa hina wa le tilweni, ku nga Yehovha.—Ps. 150:6.