1. Eaha te tahi tumu mea tahoê ai te utuafare o Iehova?

 TE OAOA nei tatou i te riro ei mero o te utuafare o Iehova. No te aha e utuafare tahoê e te hau to tatou? Te tahi tumu, no te mea te tutava paatoa nei tatou i te faatura i te feia ta Iehova i maiti ei upoo no tatou. Rahi atu â tatou i te haapao i te faanahoraa a Iehova, rahi atu â tatou i te tahoê.

2. Eaha te mau uiraa ta tatou e pahono i roto i teie tumu parau haapiiraa?

² I roto i teie tumu parau haapiiraa, e hiˈopoa tatou o vai ta Iehova i farii ia amo i te hopoia i roto i te amuiraa. E pahono atoa tatou i teie mau uiraa: Eaha te tuhaa a te mau tuahine i roto i te amuiraa? Parau mau anei o te mau taeae te upoo o te mau tuahine atoa? Hoê â anei hopoia ta te mau matahiapo e ta te mau upoo utuafare? Na mua râ, e hiˈopoa mai tatou eaha to tatou manaˈo i te mau tuahine e tia ˈi.

3. E nafea tatou e mauruuru roa ˈtu ai i te ohipa a te mau tuahine?

³ Te haafaufaa nei tatou i te ohipa rahi ta te mau tuahine e rave nei no te aupuru i to ratou utuafare, no te poro i te parau apî oaoa e no te turu i te amuiraa. E mauruuru roa ˈtu â tatou ia ratou a hiˈopoa ˈi i to Iehova e to Iesu manaˈo i te mau tuahine. E haapiiraa atoa ta tatou e huti mai i te huru o te aposetolo Paulo i nia i te mau vahine.

4. Mea nafea te Bibilia e faaite ai mea faufaa te tane e te vahine atoa no Iehova?

⁴ Te faaite ra te Bibilia mea faufaa te tane e te vahine atoa no Iehova. I te tau o te mau aposetolo, ua ninii Iehova  i to ˈna varua moˈa i nia i te mau tane, oia atoa i nia i te mau vahine. E ua nehenehe ratou e faatupu i te mau ohipa faahiahia mai te paraparauraa na roto i te mau reo ěê. (Ohi. 2:1-4, 15-18) E ua faatavai-atoa-hia te tane, oia atoa te vahine, no te faatere e te Mesia i te raˈi. (Gal. 3:26-29) E fanaˈo atoa te vahine e te tane i te ora mure ore i nia i te fenua. (Apo. 7:9, 10, 13-15) Mai te mau tane, te poro e te haapii atoa nei te mau vahine i te parau apî oaoa. (Mat. 28:19, 20) Te faahitihia ra i roto i te buka Ohipa, ua tauturu te tuahine Perisila i ta ˈna tane o Akuila ia faataa i te parau mau ma te tano atu â i te hoê taata mea ite atoa i te mau Papai o Apolo te iˈoa.—Ohi. 18:24-26.

5. Mea nafea te Luka 10:38, 39, 42 e faaite ai mea faatura na Iesu te vahine?

⁵ Ua haafaufaa e ua faatura Iesu i te mau vahine. Aita oia i rave mai te mau Pharisea tei haafaufaa ore na i te mau vahine. Eita ratou e paraparau i te vahine i te vahi taata e no nia i te mau Papai. Area Iesu, ua faaô mai ïa i te mau vahine i roto i ta ˈna mau aparauraa no nia i te Atua. * (A taio i te Luka 10:38, 39, 42.) Ua farii atoa oia ia apee te tahi mau vahine ia ˈna i roto i to ˈna mau tere no te poro i te Faatereraa arii a te Atua. (Luka 8:1-3) Hau atu â, o te mau vahine ta Iesu i tono no te faaite i ta ˈna mau aposetolo ua faatiahia mai o ˈna mai te pohe mai.—Ioa. 20:16-18.

6. Mea nafea te aposetolo Paulo i te faaiteraa mea faatura na ˈna te vahine?

⁶ Ua haamanaˈo maitai te aposetolo Paulo ia Timoteo ia faatura i te mau vahine. Ua parau atu Paulo ia faariro i “te vahine paari aˈe mai te metua vahine, e te vahine apî aˈe mai te tuahine.” (Tim. 1, 5:1, 2) Mea rahi ta Paulo i rave no te tauturu ia Timoteo ia riro ei Kerisetiano feruriraa paari. Ua parau maitai râ o ˈna na te metua vahine o Timoteo e to ˈna mama ruau i haapii na mua roa ia ˈna i te mau Papai moˈa. (Tim. 2, 1:5; 3:14, 15) Ua haapopou atoa Paulo i te mau tuahine ma te faahiti roa i to ratou iˈoa i roto i ta ˈna rata i to Roma. Ua ite Paulo i te ohipa ta te mau tuahine i rave e ua haapopou atu o ˈna no ta ratou turu i te ohipa pororaa.—Roma 16:1-4, 6, 12; Phil. 4:3.

7. Eaha te mau uiraa ta tatou e pahono i teie nei?

⁷ Mai ta tatou i ite mai i roto i te mau paratarafa na mua ˈtu, aita te Bibilia e parau ra mea haihai aˈe te tuahine i te taeae. E tuhaa faufaa ta te mau tuahine î i te here e te aau horoa noa i roto i te amuiraa e ua ite te mau matahiapo e tauturu ratou ia vetahi ê ia faatupu i te hau e ia tahoê. Teie nei râ, no te aha Iehova e faaue ai i te hoê tuahine ia tapoˈi to ˈna upoo i roto i te tahi mau tupuraa? I te mea o te mau taeae anaˈe te faatoroahia ei matahiapo e ei tavini tauturu, te auraa anei o ratou te upoo o te mau tuahine atoa o te amuiraa?

8. Ia au i te Ephesia 5:23, o te mau taeae anei te upoo o te mau tuahine i roto i te amuiraa? A faataa.

⁸ O te mau taeae anei te upoo o te mau tuahine i roto i te amuiraa? E ere, o te Mesia râ. (A taio i te Ephesia 5:23.) I roto i te utuafare, o te tane te upoo o ta ˈna vahine. Noa ˈtu ua bapetizohia o ˈna, e ere te tamaiti te upoo o to ˈna metua  vahine. (Eph. 6:1, 2) I roto i te amuiraa, ua horoahia te tahi mau hopoia i te mau matahiapo, e ere râ ratou te upoo o te mau taeae e tuahine. (Tes. 1, 5:12; Heb. 13:17) Ia faarue te hoê tuahine i te fare o to ˈna na metua e aita o ˈna i faaipoipohia, e tamau noa oia i te faatura ia raua e oia atoa i te mau matahiapo. Tera râ, to ˈna upoo, hoê â ïa e to te mau taeae o te amuiraa, oia hoi o Iesu.

9. No te aha e titauhia ˈi i te tuahine ia tapoˈi i to ˈna upoo i te tahi taime?

⁹ Parau mau, ua faatoroa Iehova i te mau tane no te haapii i te amuiraa e no te tauturu ia ratou ia tavini ia ˈna. Aita tera mau hopoia i horoahia i te mau vahine. (Tim. 1, 2:12) No te aha? Ia ravehia te mau mea atoa i roto i te amuiraa ma te naho maitai. No reira atoa Iehova i faatoroa ˈi ia Iesu ei upoo no te tane. Mai te peu i roto i te tahi tupuraa e rave te hoê tuahine i te hoê ohipa tei matauhia na te hoê taeae e rave, te ani ra Iehova i te tuahine ia tapoˈi i to ˈna upoo. * (Kor. 1, 11:4-7) Ua na reira Iehova ia nehenehe te mau tuahine e faaite i te faatura i te faanahoraa ta ˈna i rave i roto i te amuiraa, e ere râ no te faahaehaa ia ratou. A haamanaˈo noa ˈi i te reira, e pahono anaˈe i teie uiraa: Eaha te taa-ê-raa i roto i te hopoia a te hoê upoo utuafare e ta te hoê matahiapo?

10. No te aha paha te hoê matahiapo e hinaaro ai e horoa i te tahi taime i te faatureraa i roto i te amuiraa?

¹⁰ Te here ra te mau matahiapo i te Mesia e i te mau “mamoe” ta Iehova e Iesu i  tuu atu i roto i to ratou rima. (Ioa. 21:15-17) Ma te manaˈo maitai, e faariro paha te hoê matahiapo ia ˈna mai te hoê metua tane ra te huru no te amuiraa. E na ô paha o ˈna, ‘I te mea e tiaraa to te metua tane e horoa i te faatureraa no te paruru i to ˈna utuafare, e nehenehe atoa ïa te matahiapo e na reira no te paruru i te mau mamoe a te Atua.’ E nehenehe atoa te tahi mau taeae e tuahine e turai i te matahiapo ia haa mai te hoê upoo utuafare ma te ani atu ia rave i te faaotiraa no ratou. Hoê â anei râ hopoia ta te mau upoo utuafare e ta te mau matahiapo?

11. Eaha te tuatiraa e vai ra i roto i te hopoia a te upoo utuafare e ta te hoê matahiapo?

¹¹ Ua faaite te aposetolo Paulo te vai ra te tahi mau tuatiraa i roto i te hopoia a te hoê upoo utuafare e ta te hoê matahiapo. (Tim. 1, 3:4, 5) Mai ta ˈna e ani ra i te mau mero o te hoê utuafare, te titau ra Iehova i te amuiraa ia auraro i te mau matahiapo. (Kol. 3:20) Te ani ra Iehova i te mau upoo utuafare e te mau matahiapo ia tauturu i te feia i raro aˈe i ta ratou aratairaa ia here noa ia ˈna ma te haapapu atoa ˈtu mea herehia ratou. E mai te upoo utuafare maitai, e tauturu te mau matahiapo i te  mau taeae e tuahine i roto i te fifi. (Iak. 2:15-17) Hau atu â, te ani ra Iehova i te mau matahiapo e upoo utuafare ia haapao i ta ˈna mau ture aveia e ia ore “ia na nia ˈtu i tei papaihia” i roto i te Bibilia.—Kor. 1, 4:6.

12-13. Ia au i te Roma 7:2, e nafea te hopoia a te upoo utuafare e taa ê ai i ta te matahiapo?

¹² Tera râ, e taa-ê-raa rahi te vai ra i roto i te hopoia a te hoê matahiapo e ta te hoê upoo utuafare. Ua faatoroa Iehova i te mau matahiapo no te haava e no te tiavaru i rapae i te amuiraa te feia atoa o te rave i te hara e o te ore e tatarahapa.—Kor. 1, 5:11-13.

¹³ Aita râ Iehova i horoa i te mau matahiapo te tahi mau hopoia e amohia ra e te mau upoo utuafare. E tiaraa to te hoê metua tane ia haamau i te tahi mau ture i roto i to ˈna utuafare. (A taio i te Roma 7:2.) Ei hiˈoraa, e nehenehe o ˈna e faaoti eaha te hora e hoˈi mai ai te tamarii i te fare i te po. Na ˈna atoa te hopoia e aˈo i ta ˈna tamarii ia ore ratou e auraro i ta ˈna mau ture. (Eph. 6:1) Papu, hou te tane e haamau ai i te hoê ture no to ˈna utuafare, e ani oia i te manaˈo o ta ˈna vahine no te mea ua “hoê” raua. *—Mat. 19:6.

14. (1) Ia au i te Mareko 10:45, no te aha ua tano Iehova i te maitiraa ia Iesu ei upoo no te amuiraa? (2) Eaha te hopoia a te Tino aratai? (A hiˈo i te tumu parau “ Te hopoia a te Tino aratai.”)

¹⁴ Maoti te tusia taraehara o Iesu, ua hoo mai Iehova i te ora o te mero tataitahi o te amuiraa, e e nehenehe atoa e parau, to te taata atoa e faatupu i te faaroo  ia Iesu. (A taio i te Mareko 10:45; Ohi. 20:28; Kor. 1, 15:21, 22) Ua tano iho â ïa Iehova i te maitiraa ia Iesu ei upoo no te amuiraa, ua horoa hoi oia i to ˈna ora no tatou. Aita Iesu e horoa noa mai ra i te mau faaueraa, te faatamaa e te aupuru atoa ra râ oia i te mero tataitahi o te amuiraa.—Gal. 6:2; Eph. 5:29.

15-16. Eaha te haapiiraa e huti mai i te mau parau a te tuahine Marley e te taeae Benjamin?

¹⁵ E faatura te mau tuahine i te Mesia ma te pee i te aratairaa e horoahia e te mau taeae tei faaotoroahia no te aupuru ia ratou. E rave rahi tuahine te manaˈo ra mai ia Marley no Marite. Te parau ra oia: “Te oaoa nei au i te tuhaa ta ˈu e rave nei ei vahine faaipoipo e ei tuahine i roto i te amuiraa. Te tutava noa nei au i te faatura i ta ˈu tane e te mau matahiapo no te hopoia ta Iehova i horoa ia ratou. Te faatura e te mauruuru nei ratou i te ohipa ta ˈu e rave nei, mea ohie aˈe ïa no ˈu ia auraro ia ratou.”

¹⁶ Ua taa maitai i te mau taeae eaha te hopoia ta Iehova i horoa ia ratou. No reira ratou e haafaufaa e e faatura ˈi i te mau tuahine. Te na ô ra te taeae Benjamin no Beretane: “Mea rahi roa ta ˈu i haapii na roto i te mau pahonoraa a te mau tuahine, oia atoa na roto i ta ratou mau manaˈo tauturu no te rave i ta ˈu iho haapiiraa Bibilia, no te poro e no te haapii ia vetahi ê. Mea faufaa roa te ohipa ta ratou e rave nei!”

17. No te aha tatou e faatura ˈi i te feia ta Iehova i maiti no te amo i te hopoia?

¹⁷ Ia taa e ia faatura tatou paatoa, te mau tane, vahine, upoo utuafare e matahiapo, i te hopoia ta Iehova i horoa mai, e hau noa te amuiraa. Te mea faufaa roa ˈtu â, e arue tatou i to tatou Metua î i te here ra o Iehova.—Sal. 150:6.