1. Иегованың өг-бүлезинде демниг чоруктуң сайзырап турарынга чүү дузалап турар?

БИС Иегованың өг-бүлезиниң кежигүнү болганывыска өөрүүр бис. Бистиң өг-бүлевисте амыр-тайбың биле демниг чорук чүге сайзырап турарыл? Оларның бир чылдагааны дээрге бис Иегованың тургузуп каан башкарылга дүрүмүн сагыырын кызып турар бис. Ол дүрүмнү эки билип-ле турар болзувусса, бистиң аравыста демниг чорук быжыгып орар.

2. Бо статьяга кандыг айтырыгларны сайгарар бис?

² Чыышта башкарылга дүрүмүн канчаар сагыырын бо статьяга сайгарар бис. Оон ыңай дараазында айтырыгларның харыызын көөр бис: Иегова чыышта угбаларывыска кандыг рольду берген? чыышта акый бүрүзү кады бүзүрээн угбаларга баштың бооп болур бе? өг-бүлениң баштыңы кадайы биле ажы-төлүн чагырары ышкаш, удуртукчулар акы-угбаларны база шак ынчаар чагырар эргези бар бе? Баштай кады бүзүрээн угбаларывыска кандыг хамаарылгалыг болурувусту сайгарыптаалыңар.

3. Угбаларывыстың кылып турар ажыл-херээн үнелээринге биске чүү дузалаар?

³ Өг-бүлези дээш сагыш човап, суртаалдап, чыышта акы-угбаларга дузалажыр дээш хөйнү кылып, суртаалдап турар эргим угбаларывысты үнелээр бис. Иегова биле Иисустуң  оларга кандыг хамаарылга көргүзүп турарын ханы боданыр болзувусса, оларны оон-даа артык үнелээр бис. Оон аңгыда, Павел элчинниң херээжен улуска хамаарылгазындан база хөй чүүлге өөренип алыр бис.

4. Иегова херээжен-даа, эр-даа улусту үнелеп турар деп Библияда канчаар көргүскен?

⁴ Библиядан алырга, Иегова херээжен-даа, эр-даа улусту үнелеп турар. Бирги векте Иегова эр-даа, херээжен-даа улуска ыдыктыг сүлдезин берип турган. Чижээ, олар өске дылдарга чугааланып, кайгамчык ажылдарны кылып турган (Аж.-ч. 2:1—4, 15—18). Иисус-биле кады дээрге чагырар улустуң аразында кандыг-даа хиндиктиг улус бар (Гал. 3:26—29). Чер кырынга мөңге чурттаар арганы Иегова база-ла эр-даа, кыс-даа улуска берген (Ажыд. 7:9, 10, 13—15). Буянныг медээни суртаалдаар, өөреникчилер белеткээр даалгаларны чыышта акылар-даа, угбалар-даа кылып турар (Мф. 28:19, 20). Чижээ, Ажыл-чорудулга номунда бижээн Прискилла ашаа Акила-биле алыс шынны эки билип алырынга билии хөй Аполлоска дузалаан деп чугаалап турар (Аж.-ч. 18:24—26).

5. Лука 10:38, 39, 42-де Иисустуң херээжен улуска хамаарылгазының дугайында чүнү бижээн?

⁵ Иисус херээжен улусту хүндүлеп чораан. Фарисейлер херээжен улусту куду көрүп, олар-биле улус аразынга чугаалашпайн, безин Бижилгени оларга өөретпес турган. Оларга бодаарга, Иисус алыс шынны херээжен-даа, эр-даа улуска чугаалап чораан *. (Номчуптуңар: Лука 10:38, 39, 42.) Оон ыңай Иисус-биле кады элээн каш херээжен улус база суртаалдап турган (Лк. 8:1—3). Иисус бодунуң дирлип келгениниң дугайында элчиннерге дамчыдар алдар-хүндүнү херээжен улуска берген (Ин. 20:16—18).

6. Павел элчин херээжен улусту хүндүлеп турарын канчаар көргүскен?

⁶ Павел элчин Тимофейге херээжен улусту хүндүлээрин чугула деп бижээн. Ол Тимофейге: «Кырган кадайларга — аваңга дег, а аныяк херээженнерге — кыс дуңмаларыңга дег... хамаарылгалыг бол» — деп бижээн (1 Тим. 5:1, 2). Тимофей Бурган-биле быжыг хамаарылгалыг болзун дээш, Павел хөйнү кылган. Ынчалза-даа Тимофейни бир дугаарында Ыдыктыг Бижилге-биле ооң авазы база кырган-авазы таныштырган деп, ол билип турган (2 Тим. 1:5; 3:14, 15). Павел элчин Римде христианнарга чагаазынга угбаларның аттарын адавышаан, байырын чедирип турган. Оларның Бурганга бараалгалындан аңгыда, ол угбаларны мактап база турган (Рим. 16:1—4, 6, 12; Флп. 4:3).

7. Кандыг айтырыгларны сайгарар бис?

⁷ Кырында абзацтардан көргенивис дег, Библияда херээжен улус эр улустан куду байдалда турар деп кандыг-даа бодал чок. Ынакшылдыг болгаш беримчелиг угбаларывыс чыышка улуг деткимчени көргүзүп чоруур. Олар удуртукчу акыларга дузалажып, чыыштың тайбың болгаш демниг чоруунче үлүүн киирип турарлар. Ынчалза-даа кезек айтырыгларның харыызын билип алыр болзувусса эки. Чижээ, Иегова чамдык байдалдарда угбалардан бажын шып алырын чүге негеп турар? Хуралдың удуртукчузу болгаш дузалакчызы кылдыр чүгле акыларны томуйлаар болганда, акылар бүрүзү чыышта угбаларывыска «баш» боор дээни ол бе?

8. Эфесчилерге 5:23-тен алырга, чыышта акылар угбаларга баштың боор деп чугаалап болур бе? Тайылбырлаптыңар.

⁸ Чыышта эр кижи бүрүзү угбаларга баштың бооп болур бе? Чок, чүге дизе оларның баштыңы — Христос. (Номчуптуңар: Эфесчилерге 5:23). Иегова херээжен кижиниң баштыңы кылдыр ашаан тургузуп каан. Сугга суктуруп алган оглу аңаа баштың болбас (Эф. 6:1, 2). Ол ышкаш удуртукчуларның чыышта акы-угбаларны чагырар эрге-чагыргазы кызыгаарлыг (1 Фес. 5:12; Евр. 13:17). Ада-иези-биле кады чурттавайн турар бот угбаларывыстың дугайында чүү деп болур? Олар удуртукчуларга-даа, ада-иезинге-даа хүндүткелдиг хамаарылгалыг. Акыларның ышкаш, оларның чаңгыс баштыңы — Иисус болур.

9. Угбаларывыс чамдыкта бажын чүге шып алыр ужурлуг?

⁹ Иегова хурал иштинде удуртулганы эр улуска берген. А херээжен улуска ол ындыг эргени бербээн (1 Тим. 2:12). Чүге? Чүге дээрге шак ынчаар Ооң өг-бүлезинге чурум турар. Эр улус Иисуска чагыртыр болза, өг-бүлези аас-кежиктиг боор. Ооң-биле дөмей, херээжен улус эр улуска чагыртыр болза, чыышка корум-чурум турар. Чамдык байдалдарда акыларның күүседир хүлээлгезин угбавыс кылыр апарган болза, ол бажын шып алыр ужурлуг (1 Кор. 11:4—7) *. Иегова угбаларны куду көөр дээш эвес, а харын-даа оларга башкарылга дүрүмүнге хүндүткелди көргүзер арганы берген. Ам бо айтырыгның харыызын көрүптээлиңер: «Хуралдың удуртукчулары биле өг-бүле баштыңнары кандыг эргелиг?»

10. Чамдык удуртукчуларның хурал иштинге дүрүмнер тургузар күзели чүге тыптып кээп болур?

¹⁰ Удуртукчулар Иегова биле Иисустуң сагыш човаар кылдыр бүзүреткен хойларынга ынак (Ин. 21:15—17). Чамдык удуртукчулар чыышта ха-дуңмазынга бодун ада кылдыр санаар. Олар чүгле экини күзээш, мынчаар боданып болур: «Өг-бүлениң баштыңы чоок улузун камгалаар дээш дүрүмнер тургузар эргелиг. Ынчаарга удуртукчулар база Иегованың бараалгакчыларын камгалаар дээш дүрүмнер тургузуп болур ышкажыл». Оон аңгыда, чамдык суртаалчылар бодунуң орнунга шиитпирни удуртукчулар хүлээзин дээш, оларны ындыг бодалче ыдалап болур. Ынчаарга хуралдың удуртукчузу биле өг-бүле баштыңының эргези дөмей бе?

11. Удуртукчулар биле өг-бүле баштыңнарының аразында ниити чүү бар?

¹¹ Павел элчин чагаазынга өг-бүле баштыңы биле удуртукчунуң аразында ниити чүүл бар деп бижээн (1 Тим. 3:4, 5). Чижээ, өг-бүлениң кежигүннери баштыңын, а  чыышта акы-угбалар удуртукчуларны дыңнаарын Иегова күзеп турар (Кол. 3:20). Оон аңгыда, Ол өг-бүле баштыңнары биле удуртукчулар оларга бүзүреткен улустуң Бурганга бүзүрелин быжыктырарын, сагыш-сеткил хереглелдерин хандырарын манап турар. Удуртукчулар, өг-бүлениң баштыңнары дег, берге байдалда улуска дузаны кадып чоруур (Иак. 2:15—17). Ол акылар Библияда бижээн дүрүмнерни сагып, оларның кызыгаарындан ажыр баспазын Иегова күзеп турар (1 Кор. 4:6).

12, 13. Римчилерге 7:2-ден алырга, удуртукчулар биле өг-бүле баштыңнарының эрге-чагыргазы канчаар ылгалып турар?

¹² Өг-бүле баштыңы биле удуртукчунуң эрге-чагыргазы аңгы. Чижээ, Иегова чыышта удуртукчуларны шииткекчилер кылдыр томуйлаан. Олар буруузун миннивес улусту чыыштан үндүрер эргелиг (1 Кор. 5:11—13).

¹³ Иегова өг-бүлениң баштыңнарынга удуртукчуларда ышкаш эргени бербээн. Чижээ, өг-бүлениң баштыңы өг-бүлезинге дүрүмнерни тургузуп болур. (Номчуптуңар: Римчилерге 7:2.) Ажы-төлүнүң кежээ каш шакта чанарын ол шиитпирлеп болур. А бир эвес олар чугаа дыңнавас болза, оларны кезедир эргези база бар (Эф. 6:1). Өг-бүлезинге ынак баштың дүрүмнер тургузар мурнунда кадайы-биле сүмележир, чүге дизе олар «чаңгыс мага-бот» болгай (Мф. 19:6) *.

14. а) Марк 10:45-тен алырга, Иегова чүге Иисусту чыыштың баштыңы кылдыр томуйлаан? б) Удуртукчу чөвүлелдиң хүлээлгелери кандыг? (« Удуртукчу чөвүлелдиң хүлээлгелери» деп көзенекти көрүңер.)

¹⁴ Иегова эргим Оглун бис дээш берген. Иисуска бүзүрей берген-даа кижиниң,  чыышта-даа улустуң чуртталгазы Иеговага хамааржыр. (Номчуптуңар: Марк 10:45; Аж.-ч. 20:28; 1 Кор. 15:21, 22.) Иисусту чыыштың баштыңы кылдыр томуйлап кааны чөп, чүге дизе ол бис дээш амы-тынын берген. Ол чыыштың баштыңы болганда, кижи бүрүзүнге, өг-бүлелерге, чыышка дүрүмнер тургузуп, оларның сагыттынып турарын хынаар эргелиг (Гал. 6:2). Иисус дүрүмнер тургузарындан аңгыда, бис дээш ынакшылдыы-биле эрге-чассыг сагыш човап чоруур (Эф. 5:29).

15, 16. Марли биле Бенджаминиң сөстеринден чүнү өөренип алыр бис?

¹⁵ Угбалар ашааның болгаш удуртукчуларның айтыышкыннарын сагып чорууру-биле Христосту хүндүлеп турар. Угбаларның хөй кезии АКШ-тан Марлиниң сөстери-биле чөпшээрежир: «Мен өг-бүлемде болгаш чыыжымда хүлээлгелеримни үнелээр мен. Башкарылга дүрүмүн сагыыры меңээ чамдыкта берге. Ынчалза-даа ашаам болгаш удуртукчулар мени хүндүлеп, кылган чүүлдерим дээш четтиргенин илередирге, оларга чагыртыры берге эвес».

¹⁶ Башкарылга дүрүмүн эки билип турар акылар угбаларны үнелээр боор. Англиядан Бенджамин дээр акывыс мынча дээн: «Угбаларның чыышта берип турар харыыларындан хөй чүвени билип ап турар мен. Оларның суртаал үезинде база библейжи кичээлдерде ажыглап турар аргаларын өөренип алыр чордум. Оларның бараалгалын дыка үнелээр мен».

17. Башкарылга дүрүмүн чүге сагыыр ужурлуг бис?

¹⁷ Чыышта акылар, угбалар, өг-бүле баштыңнары, хуралдың удуртукчулары башкарылга дүрүмүн эки билип, ону сагыыр болза, чыышка амыр-тайбың тергиидээр. А эң-не чугула чүүл, дээрде ынакшылдыг Адавыс Иегованы алдаржыдар бис! (Ыд. ыр. 150:6).