XCHANOBIL 7
Li kʼusi xchapanoj Jeova ta sventa li buchʼu oy yabtel ta tsobobbaile
«Jaʼ jolil ta stojolal tsobobbail li Kristo ti jaʼ la skolta li bekʼtalil taje» (EFES. 5:23).
KʼEJOJ 137 Antsetik ti tukʼ chtunike
LI KʼUSI TA JCHANTIKE *
1. ¿Kʼusi jaʼ jtos srasonal ti jmoj noʼox oyik li yutsʼ yalal Jeovae?
¿MI MU jechuk ti xijmuyubaj tajek ti te tsakal jkʼoplaltik li ta yutsʼ yalal Jeovae? Jtos srasonal ti kʼu yuʼun jun koʼontontik xchiʼuk ti jmoj tsobolutike jaʼ ti jkotoltik chkakʼtik persa chkichʼtik ta mukʼ li kʼusi xchapanoj Jeova ta sventa li buchʼutik yichʼoj yabtelike. Ti melel xkaltike, mi mas laj kaʼibetik smelolal taje, mas me tsobol oyutik.
2. ¿Kʼusi ta jtakʼtik batel li ta xchanobil liʼe?
2 Li ta xchanobil liʼe, jaʼ chkalbetik skʼoplal li buchʼutik yichʼoj yabtelik ta tsobobbaile. Ta jtakʼtik xtok li sjakʼobiltak liʼe: ¿kʼusi oy ta sbaik spasel li ermanaetike xchiʼuk mi jaʼ jolil yuʼunik skotol li ermanoetike? xchiʼuk, li moletike, ¿mi jaʼ jech tspasik ta mantal li ermanoetik xchiʼuk ermanaetik jech kʼuchaʼal tspas ta mantal yajnil xchiʼuk xnichʼnab li jun totile? Baʼyel kaltik kʼu yelan skʼan xkiltik li ermanaetike xchiʼuk li kʼusi sbainojik spasele.
¿KʼU YELAN SKʼAN XKILTIK LI ERMANAETIKE?
3. ¿Kʼusi tskoltautik sventa masuk to ep sbalil xkiltik li kʼusi tspas li ermanaetike?
3 Li kuni ermanatike staik-o kʼupil kʼoptael ta skoj ti tskʼel li yutsʼ yalalike, chcholik mantal xchiʼuk tskoltaik li ermanoetik ta tsobobbaile. Pe mas to ep sbalil chkiltik mi ta jnopbetik skʼoplal kʼu yelan ch-ilatik yuʼun Jeova, Jesus xchiʼuk ti kʼu yelan tsakatik ta venta yuʼun li jtakbol Pabloe.
4. ¿Kʼuxi chakʼ ta ilel ta Vivlia ti koʼol sbalil ch-ilatik yuʼun Jeova li viniketik xchiʼuk antsetike?
4 Li Vivliae chal ti koʼol sbalil ch-ilatik yuʼun Jeova li viniketik xchiʼuk antsetike. Kalbetik junchibuk skʼelobil. Li ta baʼyel sigloe, li Jeovae laj yakʼbe xchʼul espiritu viniketik xchiʼuk antsetik sventa spasik skʼelobiltak juʼelal, jech kʼuchaʼal ti chkʼopojik ta yan kʼopetike (Ech. 2:1-4, 15-18). Li jtsop krixchanoetik ti tʼujbilik sventa jmoj x-ajvalilajik xchiʼuk Kristoe te kapal skʼoplal viniketik xchiʼuk antsetik (Gal. 3:26-29). Jaʼ noʼox jech ek, li Jeovae chakʼbe xkuxlejal sbatel osil ta balumil li viniketik xchiʼuk antsetike (Apok. 7:9, 10, 13-15). Li Jesus eke laj yalbe viniketik xchiʼuk antsetik ti akʼo xcholik li lekil aʼyejetike (Mat. 28:19, 20). Jech kʼuchaʼal liʼe, li ta slivroal Echose chalbe skʼoplal Prisila xchiʼuk smalal ti Akila sbi ti la skoltaik li Apolos ti lek chaneme, yuʼun «lek jamal laj yalbeik smelolal» li mantale (Ech. 18:24-26).
5. Jech kʼuchaʼal chal Lukas 10:38, 39 xchiʼuk 42, ¿kʼu yelan laj yil antsetik li Jesuse?
5 Li Jesuse la stsak ta mukʼ li antsetike. Mu jechuk stalelal kʼuchaʼal li jfariseoetike, yuʼun li stukike spʼajojik li antsetike, muʼyuk chchiʼinik ta loʼil ta yeloval li epal krixchanoetike mi jaʼuk skʼan xloʼilaj xchiʼukik ta sventa li kʼusi chal Tsʼibetike. Pe li Jesuse laj yalbe viniketik xchiʼuk antsetik li kʼusitik tsotsik skʼoplal ta sventa Diose (kʼelo Lukas 10:38, 39, 42). * Jech xtok, laj yakʼ ti xbat chiʼinatuk yuʼun epal antsetik kʼalal la xchol mantale (Luk. 8:1-3). La stunes junantik antsetik xtok sventa xbat yalbe jtakboletik ti chaʼkuxiem xae (Juan 20:16-18).
6. ¿Kʼuxi laj yakʼ ta ilel jtakbol Pablo ti la stsak ta mukʼ li antsetike?
6 Li jtakbol Pabloe laj yalbe Timoteo ti akʼo stsak ta mukʼ li antsetike. Laj yalbe ti jechuk xil kʼuchaʼal smeʼ li antsetik ti mas xa oy sjabilalike xchiʼuk ti jechuk xil kʼuchaʼal xvix o yixlel li tsebal antsetike (1 Tim. 5:1, 2). Li Pabloe ep onoʼox la skolta Timoteo sventa stsatsub li xchʼunel yoʼontone, pe laj yal ti jaʼ koltaat yuʼun smeʼ xchiʼuk syaya sventa xchan li chʼul Tsʼibetike (2 Tim. 1:5; 3:14, 15). Jech xtok, kʼalal la stakbe batel karta li ermanoetik ta Romae, li Pabloe laj yalbe sbi jayvoʼuk ermanaetik xchiʼuk laj yalbe ti chabanikuke. Laj yakʼ venta ti tsots ch-abtejike xchiʼuk laj yal ti ep sbalil chilbe li yabtelike (Rom. 16:1-4, 6, 12; Filip. 4:3).
7. ¿Kʼusitik ta jtakʼtik batel?
7 Jech kʼuchaʼal laj xa jchantik tale, li Vivliae muʼyuk chakʼ ta aʼiel ti jaʼ mas jutuk sbalil li ermanaetik kʼuchaʼal li ermanoetike. Li ermanaetike toj ep chkoltavanik ta tsobobbail ta skoj ti lek yoʼontonik xchiʼuk ti snaʼ xakʼ li kʼusi oy yuʼunike. Jech xtok, xuʼ skoltaik li moletik sventa junuk yoʼontonik xchiʼuk ti tsoboluk noʼox li ermanoetike. Pe ta to jtakʼtik batel li sjakʼobiltak liʼe: ¿kʼu yuʼun chkʼanbatik yuʼun Jeova li ermanaetik ti akʼo smak sjolik bakʼintike? xchiʼuk, ta skoj ti jaʼ noʼox xuʼ xkʼot ta moletik xchiʼuk siervo ministerial li viniketike, ¿mi jaʼ skʼan xal ti chkʼotik ta jolil yuʼun skotol li ermanaetike?
LI ERMANAETIKE, ¿MI JAʼ JOLIL YUʼUNIK SKOTOL LI ERMANOETIKE?
8. Li ermanoetike, ¿kʼu yuʼun maʼuk chkʼotik ta jolil yuʼun skotol li ermanaetik jech kʼuchaʼal chal ta Efesios 5:23?
8 Ta jpʼelchaʼpʼel noʼoxe, jaʼ ti moʼoje. Yuʼun jaʼ noʼox sjolik Kristo skotol li ermanaetike (kʼelo Efesios 5:23). Li ta jun utsʼ alalile, li malalile jaʼ tsventain li yajnile, pe li jun keremil ti yichʼoj voʼe maʼuk me jolil chkʼot ta stojolal li smeʼe (Efes. 6:1, 2). Li ta tsobobbail eke, li moletike oy noʼox spajeb ti bu kʼalal xuʼ sventainik li ermanoetik xchiʼuk ermanaetike (1 Tes. 5:12; Ebr. 13:17). Jech xtok, li jun tsebal ermana ti muʼyuk xa te nakal xchiʼuk li stot smeʼe chichʼ-o ta mukʼ, pe muʼyuk xa chventainat yuʼun li stote. Yichʼoj ta mukʼ li moletik ta tsobobbaile, pe jaʼ noʼox jolil yuʼun li Jesus jech kʼuchaʼal jaʼ jolil yuʼunik ek li ermanoetike.
Li tojol kerem tsebetik ti muʼyuk xa jmoj nakal xchiʼuk li stot smeʼike jaʼ xa chventainatik yuʼun li Jesuse. (Kʼelo parafo 8).
9. ¿Kʼu yuʼun skʼan smak sjol bakʼintik li ermanaetike?
9 Melel onoʼox ti jaʼ stʼujoj Jeova li viniketik sventa sbeiltasik li tsobobbaile, maʼuk li antsetike (1 Tim. 2:12). ¿Kʼu yuʼun ti jech spasoje? Jaʼ sventa lekuk chapal li tsobobbaile. Jech oxal, li Jeovae sbiiltasoj Jesus sventa xkʼot ta jolil yuʼun li vinike. Mi oy kʼusi tsbain spasel jun ermana ti jaʼ onoʼox yabtel jun ermanoe, ch-albat yuʼun Jeova ti akʼo smak li sjole (1 Kor. 11:4-7). * Maʼuk ti yuʼun muʼyuk sbalilik ti jech ch-albatike, yuʼun jaʼ sventa xakʼik ta ilel ti yichʼojik ta mukʼ li buchʼu oy yabtelike. Jtakʼtik batel li sjakʼobil liʼe: ¿bu to kʼalal smakoj li yabtel yichʼojik li joliletik ta utsʼ alalil xchiʼuk li moletik ta tsobobbaile?
LI YABTEL YICHʼOJ MALALILETIK XCHIʼUK MOLETIKE
10. ¿Kʼu yuʼun xuʼ van tsnop jun mol ta tsobobbail ti lek ti xalbe mantal li ermanoetike?
10 Li moletike skʼanojik li Kristoe xchiʼuk skʼanojik li chijetik ti jaʼ akʼbat sbainik yuʼun li Jeova xchiʼuk Xnichʼone (Juan 21:15-17). Jun mol ta tsobobbail xuʼ van snop ta slekil yoʼonton ti jaʼ xa xnichʼnab chil li ermanoetik ta stsobobbaile. Xuʼ van xi tsnope: «Mi oy sderecho li jun malalil sventa xakʼ mantal yoʼ xchabi li yutsʼ yalale, jaʼ jech oy sderecho li jun mol sventa xakʼ mantaletik yoʼ xchabibe li xchijtak Diose». Pe maʼuk noʼox, yuʼun xuʼ jech chakʼik ta aʼiel junantik ermanoetik xchiʼuk ermanaetik ek, taje jaʼo kʼalal tskʼanbeik vokol moletik ti akʼo x-albatik li kʼusi skʼan spasike. Pe ¿mi koʼol li yabtel yichʼojik li moletik xchiʼuk li joliletik ta utsʼ alalile?
Li moletike tskoltaik li ermanoetik sventa tsotsuk li xchʼunel yoʼontonike, ti kʼuxubinbiluk xchiʼuk ti kʼanbiluk xaʼi sbaike. Akʼbil yabtelik yuʼun Jeova sventa slokʼesik ta tsobobbail jun ermano mi mu sutes yoʼontone. (Kʼelo parafo 11, 12).
11. ¿Kʼusitik xkoʼolaj-o li yabtel yichʼoj jun malalil xchiʼuk li moletik ta tsobobbaile?
11 Li jtakbol Pabloe laj yal ti oy onoʼox kʼusitik xkoʼolaj-o li yabtel yichʼoj jun jolil ta utsʼ alalil xchiʼuk li jun mol ta tsobobbaile (1 Tim. 3:4, 5). Jech kʼuchaʼal liʼe, li Jeovae tskʼan ti xchʼunbat smantal yuʼun yutsʼ yalal li jun malalile xchiʼuk tskʼan ti xchʼunbat smantal yuʼun ermanoetik li jun mol ta tsobobbaile (Kol. 3:20). Jech xtok, koʼol kʼusi chkʼanbatik yuʼun Jeova li joliletik ta utsʼ alalil xchiʼuk li moletik ta tsobobbaile: jaʼ ti skʼanik, xkʼuxubinik xchiʼuk ti skoltaik yoʼ tsotsuk xchʼunel yoʼontonik li buchʼutik sbainojik skʼelele. Li moletike tskoltaik li ermanoetik kʼalal oy kʼusi chtun yuʼunik jech kʼuchaʼal tspas li jun jolil ta utsʼ alalile (Sant. 2:15-17). Li moletik ta tsobobbail xchiʼuk li joliletik ta utsʼ alalile ch-albatik yuʼun Jeova ti akʼo skoltaik yantik yoʼ xchʼunbeik li smantale xchiʼuk ch-albatik xtok ti jaʼuk noʼox xakʼik ta chanel li kʼusi tsʼibabil ta Vivliae (1 Kor. 4:6).
Li malaliletike akʼbil yabtelik yuʼun Jeova yoʼ sbeiltasik li yutsʼ yalalike. Sventa xakʼ ta ilel ti tstsak ta venta li yajnile, baʼyel chchiʼin ta loʼil kʼalal oy kʼusi tsnop tspase. (Kʼelo parafo 13).
12, 13. Jech kʼuchaʼal chal Romanos 7:2, ¿kʼusitik jelel-o li yabtel yichʼojik li joliletik ta utsʼ alalil xchiʼuk li moletike?
12 Pe li yabtel yichʼoj jun mol ta tsobobbail xchiʼuk li jun jolil ta utsʼ alalile oy onoʼox kʼusitik jelel-o. Li kʼusi akʼbil sbainik yuʼun Jeova li moletik ta tsobobbaile jaʼ ti xchapanvanike xchiʼuk ti slokʼesik ta tsobobbail li jun ermano ti mu sutes yoʼontone (1 Kor. 5:11-13).
13 Li Jeovae oy kʼusitik yakʼojbe spas li joliletik ta utsʼ alalil ti jaʼ mu xuʼ jech spasik li moletik ta tsobobbaile. Jtose jaʼ ti xuʼ xakʼ mantaletik li ta yut snae xchiʼuk ti skʼel ti xchʼunike (kʼelo Romanos 7:2). Jech kʼuchaʼal liʼe, oy sderecho sventa xal jayib ora skʼan sutik tal ta snaik li xnichʼnabe xchiʼuk xuʼ stukʼibtas mi mu xchʼunik mantale (Efes. 6:1). Pe mi tstsakvan ta venta li jun malalile, baʼyel chchiʼin ta loʼil yajnil kʼalal mu to chakʼ mantale, yuʼun jun xa noʼox sbekʼtalik (Mat. 19:6). *
KICHʼTIK TA MUKʼ KRISTO TI JAʼ JOLIL TA TSOBOBBAILE
Li Jesuse akʼbil yabtel yuʼun Jeova sventa sbeiltas li tsobobbaile. (Kʼelo parafo 14).
14. 1) Jech kʼuchaʼal chal ta Markos 10:45, ¿kʼu yuʼun jaʼ tʼujat yuʼun Jeova li Jesus sventa xkʼot ta jolil li ta tsobobbaile? 2) ¿Kʼusi sbainoj li Jtsop Jbeiltasvaneje? (Kʼelo li rekuadro « ¿Kʼusi sbainoj li Jtsop Jbeiltasvaneje?»).
14 Kʼalal laj yakʼ ta matanal Xnichʼon li Jeovae, la smanbe xkuxlejal skotol li ermanoetik ta tsobobbail xchiʼuk li buchʼutik chakʼ xchʼunel yoʼontonik ta stojolal li Jesuse (kʼelo Markos 10:45; Ech. 20:28; 1 Kor. 15:21, 22). Ta skoj ti jaʼ cham ta jtojolaltik li Kristoe, jaʼ vaʼanat yuʼun Jeova sventa jaʼ xkom ta jolil li ta tsobobbailetike. Jaʼ yuʼun, li Jesuse yichʼoj yabtel sventa xal mantal kʼu yelan skʼan spas stalelalik skotol li krixchanoetike, li utsʼ alaliletike xchiʼuk skotol li ermanoetik ta tsobobbaile xchiʼuk ta skʼel ti xchʼunike (Gal. 6:2). Pe maʼuk noʼox ti naka mantal chakʼe, yuʼun tsmakʼlinutik xchiʼuk chkʼuxubinutik ta jujuntal (Efes. 5:29).
15, 16. ¿Kʼusi chakʼ achan li kʼusi laj yalik Marley xchiʼuk Benjamine?
15 Li ermanaetik ti chchʼunik li beiltasel chakʼ ermanoetik ti jaʼ vaʼanbilik yuʼun li Kristoe jaʼ jech chakʼik ta ilel ti chichʼbeik ta mukʼ li yabtel Kristoe. Jun ermana ti nakal ta Estados Unidos ti Marley sbie xi chale: «Ep tajek sbalil chkil li kʼusi jbainoj spasel kʼuchaʼal ajnilalune xchiʼuk li ta tsobobbaile. Jech-o chkakʼ persa sventa xkichʼ ta mukʼ li kʼusi xchapanoj Jeova ta sventa li buchʼutik oy yabtelike. Pe mu vokoluk chkaʼi spasel, yuʼun li jmalal xchiʼuk li ermanoetik ta tsobobbaile tstsakikun ta mukʼ xchiʼuk chakʼbeikun kil ti ep sbalil chilik skotol li kʼusitik ta jpase». Jaʼ van jech chaʼi sba epal ermanaetik ek.
16 Li ermanoetike chakʼik ta ilel ti xaʼibeik smelolal li kʼusi xchapanoj Jeova kʼalal tstsakik ta venta li ermanaetike. Xi laj yal jun ermano ti te nakal ta Inglaterra ti Benjamin sbie: «Toj ep kʼusitik yakʼojik jchan kʼalal chakʼ sloʼilik ta tsobajel li ermanaetike, kʼalal chalik kʼuxi xuʼ xijchanunaj, kʼuxi xuʼ jcholtik mantal xchiʼuk ti masuk lek xijchanubtasvane. Toj ep sbalil li yabtelike».
17. ¿Kʼu yuʼun skʼan xkichʼtik ta mukʼ li kʼusi xchapanoj Jeova ta sventa li buchʼu yichʼoj yabtelike?
17 Kʼalal chichʼik ta mukʼ li kʼusi xchapanoj Jeova ta sventa li buchʼu oy yabtelik skotol li ermanoetik, ermanaetik, joliletik ta utsʼ alalil xchiʼuk moletike, oy me jun oʼontonal li ta tsobobbaile. Li kʼusi mas leke, yuʼun jech chkichʼtik-o ta mukʼ li jkʼanvanej Totil kuʼuntik Jeovae (Sal. 150:6).
KʼEJOJ 123 Kichʼtik ta mukʼ kʼusi xchapanoj Dios
^ par. 5 ¿Kʼusi oy ta sbaik spasel ta tsobobbail li ermanaetike xchiʼuk mi jaʼ jolil yuʼunik skotol li ermanoetike? ¿Mi koʼol yabtelik li moletik ta tsobobbail xchiʼuk li joliletik ta utsʼ alalile? Li ta xchanobil liʼe, ta jkʼeltik junantik skʼelobiltak ta Vivlia ti tstakʼ li sjakʼobiltak taje.
^ par. 5 Kʼelo li parafo 6 li ta mantal ti xi sbie: «Jkoltatik li kermanataktike» ti lokʼ li ta revista Li Jkʼel-osil ta toyol ta septiembre ta 2020.
^ par. 9 Kʼelo li rekuadro « ¿Bakʼin skʼan smak sjol li ermanaetike?».
^ par. 13 Li ta parafo 17 kʼalal ta 19 li ta mantal ti xi sbie: «Kichʼtik ta mukʼ li kermanotaktike» ti lokʼ li ta revista Li Jkʼel-osil ta toyol ta agosto ta 2020, te chalbe skʼoplal buchʼu tsnop bu tsobobbail chbatik li jun utsʼ alalile.
^ par. 59 Te me smakojbe skʼoplal mi te noʼox nopol oy kʼusi yakal tspas smalal o yan ermano ti yichʼoj voʼ ti xuʼ x-ilat o x-aʼiate. Te chchapbe mas smelolal li ta livro ‹Te oyanik-o li ta kʼanelal yuʼun Diose› ta pajina 209 kʼalal ta 212.
^ par. 64 Li revista Li Jkʼel-osil ta toyol ti lokʼ ta 15 yuʼun julio ta 2013 ta pajina 20 kʼalal ta 25 chalbe mas smelolal kʼusi sbainoj li Jtsop Jbeiltasvaneje.
