1. Мар юрттэ Иеговалэн семьяяз ваньмызлы тупаса но огкылысь улыны?

 МИ ТУЖ шумпотӥськомы Иеговалэн семьяяз луыны. Мар юрттэ милемлы тупаса но огкылысь улыны? Ми вань кужмысьтымы тыршиськомы гажаны йыр луон сярысь возетэз, кудзэ Иегова сётӥз. Макем умойгес ми валаськомы та возетэз, сокем юнгес луозы вын-агайёсынымы но сузэр-апайёсынымы кусыпъёсмы.

2. Кыӵе юанъёсты ми эскеромы та статьяын?

² Та статьяын ми эскеромы, кызьы йыр луон сярысь возетэз кенешын уже кутоно. Ми эскеромы таӵе юанъёсты: кыӵе уж Иегова кенешын сузэр-апайёслы сётӥз? Кенешысь котькуд вын-агай котькуд сузэр-апайлы йыр луэ-а? Быгато-а тӧроос кивалтыны вын-агайёсын но сузэр-апайёсын озьы ик, кызьы семьяослэн йыръёссы кивалто кышноосынызы но нылпиосынызы? Нош нырысь ми эскеромы, кызьы учконо сузэр-апайёс шоры.

3. Мар юрттоз милемлы эшшо но золгес дунъяны сузэр-апайёслэсь тыршемзэс?

³ Ми туж дунъяськомы сузэр-апайёсмес, кудъёсыз туж тыршо, семьязы сярысь сюлмаськон понна, ӟеч иворез тодытон понна, озьы ик кенешысь вын-агайёслы но сузэр-апайёслы юрттон понна. Ми соосты эшшо но золгес дунъяломы, малпаськимы ке со сярысь, кызьы соос шоры учко Иегова но Иисус. Озьы ик ми тодомы, кызьы учконо сузэр-апайёс шоры, эскеримы ке, кызьы соос шоры учкиз апостол Павел.

4. Кызьы Библия возьматэ, Иегова пиосмуртъёсты но кышномуртъёсты одӥг кадь гажа но дунъя шуыса?

 ⁴ Библия верамъя, Иегова пиосмуртъёсты но кышномуртъёсты одӥг кадь гажа но дунъя. Кылсярысь, отын гожтэмын, нырысетӥ даурын Иегова святой духсэ пиосмуртъёслы но, кышномуртъёслы но сётӥз шуыса. Со соослы паймымон быгатонлыкъёс сётӥз, кудъёсызлы луыса соос пӧртэм кылъёсын вераськыны быгатӥзы (Ап. уж. 2:1—4, 15—18). Зырӟем христианъёс пӧлы, кудъёсыз Христосэн ӵош инмын кивалтозы, пиосмуртъёс но, кышномуртъёс но пыро (Гал. 3:26—29). Соосызлы но, таосызлы но Иегова рай музъем вылын пырак дауръёс ӵоже улыны луонлык кузьмаз (Усьт. 7:9, 10, 13—15). Со сяна, ӟеч иворез веран но дышетскисьёсты дасян уж вын-агайёслы но, сузэр-апайёслы но сётэмын (Матф. 28:19, 20). Кылсярысь, Апостолъёслэн ужъёссы книгаын верамъя, Прискилла сузэр Акила картэныз ӵош зэмлыкез умойгес валаны юрттӥз Аполлослы, умой дышетскем адямилы (Ап. уж. 18:24—26).

5. Кызьы Иисус учкиз кышномуртъёс шоры, Лукалэсь 10:38, 39, 42 верамъя?

⁵ Иисус кышномуртъёсты гажаз. Со ӧз учкы соос шоры, фарисейёс сямен, кудъёсыз кышномуртъёсты ултӥязы, адямиос азьын соосын ӧз вераське, Священной Гожтэмъёсты соосын ӧз эскере. Нош Иисус пиосмуртъёслы но кышномуртъёслы кулэ луись зэмлыкъёсты валэктылӥз b. (Лыдӟе Лукалэсь 10:38, 39, 42.) Озьы ик со лэзиз кышномуртъёслы тодытыкуз соин ӵош ветлыны (Лука 8:1—3). Со сяна, Иисус соослы дано уж сётӥз улӟемез сярысь апостолъёсызлы вераны (Иоанн 20:16—18).

6. Кызьы апостол Павел возьматӥз кышномуртъёсты гажамзэ?

⁶ Апостол Павел Тимофейлы тодаз вайытӥз, кышномуртъёсты гажаны кулэ шуыса. Павел солы вераз, арлыдо кышномуртъёс шоры анайёс шоры кадь учконо, нош егит кышномуртъёс шоры сузэръёс шоры кадь учконо шуыса (1 Тим. 5:1, 2). Павел трос лэсьтӥз Тимофейлэсь осконзэ юнматон понна. Озьы ик со валаз, Священной Гожтэмъёсын сое нырысь ик анаез но песянаез тодматӥзы шуыса (2 Тим. 1:5; 3:14, 15). Римъёслы гожтэтаз Павел нимысьтыз пусъе сузэръёсты, соослы нимзыя вазиськыса. Павел та сузэръёслэн ужан-тыршонын лэсьтэмзы сярысь гинэ уг вера, озьы ик соосты ушъя но (Рим. 16:1—4, 6, 12; Флп. 4:3).

7. Кыӵе юанъёсты ми али эскеромы?

⁷ Кызьы адӟиське лыдӟем абзацъёсысь, Библиын нокытын уг вераськы, сузэр-апайёс вын-агайёслэсь маин ке уродгес луо шуыса. Яратӥсь но шырыт сямо сузэр-апайёс кенешлы туж юртто. Озьы ик тӧроос тодо: соос юрттыны быгато кенешлы огкылысь но тупаса улыны. Но милемлы куд-ог юанъёслы валэктонъёс шедьтоно, кылсярысь: малы Иегова куре, куд-ог учыръёсын сузэр-апайёс йырзэс мед шобыртозы шуыса? Тӧро яке кенешлы юрттӥсь луыса вын-агайёс гинэ ужаны-тыршыны быгато бере, возьматэ-а со, кенешысь котькуд вын-агай котькуд сузэр-апайлы йыр луэ шуыса?

8. Ефесъёслы 5:23 лыдэ басьтоно ке, луэ-а вераны, кенешысь котькуд агай котькуд сузэрлы йыр луэ шуыса? Валэктэ.

⁸ Кенешысь котькуд агай котькуд сузэрлы йыр луэ-а? Шонерак верано ке, кенешысь  агай сузэръёслы йыр луыны уг быгаты, малы ке шуоно соослэн йырзы — Христос. (Лыдӟе Ефесъёслы 5:23.) Семьяын кышноен кивалтыны Иегова картлы гинэ лэзиз. Пылатӥськем пи анаезлы йыр луыны уг быгаты (Еф. 6:1, 2). Тӧроос кенешысь вын-агайёсын но сузэр-апайёсын кивалтыны быгато ке но, куд-ог удысъёсын соослэн ужпум кутэмзы уг луы (1 Фес. 5:12; Евр. 13:17). Нош мар вераны луоз бызьымтэ сузэръёс сярысь, кудъёсыз атаенызы но анаенызы уг уло ни? Соос гажало анай-атайёссэс но, тӧроосты но. Нош сыӵе сузэръёслы, озьы ик агайёслы но, Иисус гинэ йыр луэ.

9. Малы куд-ог учыръёсын сузэр-апайёслы йырзэс шобыртоно?

⁹ Иегова кенешын кивалтон ужез сётӥз пиосмуртъёслы, нош кышномуртъёслы сыӵе уж ӧз сёты (1 Тим. 2:12). Малы? Малы ке шуоно соку кенешын ваньмыз радъямын луоз. Та муген ик Иегова Иисусэз, пиосмуртъёслы йыр карыса, пуктӥз. Куке сузэрлы быдэсъяно луэ ужез, кудзэ огшоры дыръя агай быдэсъя, соку солы йырзэ шобыртоно (1 Кор. 11:4—7) c. Сыӵе курон-косон пуктыса, Иегова сузэр-апайёсты уг ултӥя. Озьы Инмар соослы луонлык сётэ возьматыны, соос йыр луон сярысь возетэз гажало шуыса. Нош табере ойдолэ эскеромы таӵе юанэз: кыӵе кивалтэт сётэмын семьяослэн йыръёссылы но тӧроослы?

10. Малы тӧроослэн мылкыдзы луыны быгатэ кенешлы кыӵе ке курон-косонъёс пуктыны?

¹⁰ Тӧроос ярато Христосэз но ыжъёсты, кудъёсыз сярысь сюлмаськыны соосты Иегова  но Иисус куризы (Иоанн 21:15—17). Тӧроос кенеш сярысь сюлмасько бере, соос малпаны быгато, вын-агайёслы но сузэр-апайёслы атай кадь луо шуыса. Соин ик куд-ог тӧроос малпало, дыр: семьялэн йырыз кышноезлы но нылпиосызлы курон-косонъёс пуктыны быгатэ бере, озьыен, тӧро но быгатэ агайёслы но сузэръёслы курон-косонъёс пуктыны, соосты утён понна. Асьсэды озьы возьыны тӧроослэсь мылкыдзэс ӝутыны быгато ивортӥсьёс но, куке куро тӧроез соос понна кыӵе ке ужпум кутыны. Но зэмзэ вераса, тӧроослы но семьяослэн йыръёссылы одӥг кадь кивалтэт сётэмын-а?

11. Мар огазея семьяослэсь йыръёссэс но тӧроосты?

¹¹ Апостол Павел одӥг гожтэтаз вераз, семьяослэсь йыръёссэс но кенешысь тӧроосты мар ке но огазея шуыса (1 Тим. 3:4, 5). Кылсярысь, Иеговалэн потэ, кышно но нылпиос семьялэн йырызлэсь мед кылзӥськозы, нош кенешысь вын-агайёс но сузэр-апайёс тӧроослэсь мед кылзӥськозы шуыса (Кол. 3:20). Инмарлэн потэ: семьяослэн йыръёссы но, тӧроос но Иеговаез яратыны дышетозы соосты, кинъёс сярысь соос сюлмасько, озьы ик юрттозы соослы умой мылкыдын улыны но шуг-секытъёссы пыр потыны (Иак. 2:15—17). Со сяна,  Иеговалэн потэ, семьяослэн йыръёссы но тӧроос мед чаклалозы, соос Библиысь курон-косонъёсъя уло-а, уг-а шуыса (1 Кор. 4:6).

12, 13. Маин пӧртэм луэ тӧролэн кивалтэтэз семьялэн йырызлэн кивалтэтэзлэсь, Римъёслы 7:2 верамъя?

¹² Озьы ке но семьяослэн йыръёссы но тӧроос маин ке пӧртэм луо. Кылсярысь, Иегова тӧроосты кенешлы судьяос карыса пуктӥз но соослы уж сётӥз ӧпкелисьтэм сьӧлыкасьёсты кенешысь поттыны (1 Кор. 5:11—13).

¹³ Мукет паласен учкыса, семьяослэн йыръёссылы Иегова сётӥз сыӵе правоос, кудъёсыз ӧвӧл тӧроослэн. (Лыдӟе Римъёслы 7:2.) Кылсярысь, соос быгато семьязылы курон-косонъёс пуктыны. Семьялэн йырыз ужпум кутыны быгатэ, кыӵе дыре ӝыт нылпиосыз бертыны кулэ, нош соос ӧз ке кылзӥське, соосты кыл кутытыны быгатэ (Еф. 6:1). Зэм но, семьялэн йырыз, кудӥз семьязэ яратэ, нырысь кышноеныз кенешоз, малы ке шуоно соин «одӥг лулмугор» луэ (Матф. 19:6) d.

14. а) Малы Иисус кенешлы тужгес но умой йыр луэ, Марклэсь 10:45 верамъя? б) Кыӵе ужъёсты быдэсъя Кивалтӥсь кенеш? (Озьы ик учке « Ужъёс, кудъёссэ быдэсъя Кивалтӥсь кенеш» рамкаез.)

¹⁴ Кенешысь христианъёсты но котькинэ, кин Иисуслы оскоз, Иегова мозмытӥз, аслэсьтыз дуно Пизэ курбонлы сётыса. (Лыдӟе Марклэсь 10:45; Ап. уж. 20:28; 1 Кор. 15:21, 22.) Инмар аслэсьтыз Пизэ кенешлы йыр карыса пуктӥз. Иисуслэсь умойгес та ужез нокин уз быдэсты, малы ке  шуоно со ми понна аслэсьтыз улонзэ сётӥз. Кенешлэн йырыз луыса солэн правоез вань кенешлы курон-косонъёс пуктыны: котькуд христиан муртлы, семьяослы но быдэс кенешлы (Гал. 6:2). Со сяна, солэн правоез вань чакланы, соос та курон-косонъёсты быдэсъяло-а, уг-а шуыса. Но курон-косонъёсты пуктэм сяна, Иисус ми пӧлысь котькудзэ яратэ но ми сярысь сюлмаське (Еф. 5:29).

15, 16. Малы тӥ дышетскыны быгатӥськоды Марли сузэрлэн но Бенжамин агайлэн кылъёсысьтызы?

¹⁵ Сузэръёс Христосэз гажамзэс возьмато, куке кылзӥсько пиосмуртъёслэсь, кудъёсыз соос сярысь сюлмаськыны кулэ. Тросэз сузэръёс соглаш кариськозы Огазеяськем Штатъёсысь Марли нимо сузэрен. Со вера: «Мон дунъясько ужъёсты, кудъёссэ Иегова мыным семьяын но кенешын сётӥз. Зэм но, мыным тыршоно луэ, котьку но йыр луон сярысь возетъя улон понна. Но мынам кадь картэным но тӧроосын со секыт ӧвӧл, малы ке шуоно соос монэ гажало но тыршеме понна котьку тау каро».

¹⁶ Вын-агайёс, кудъёсыз йыр луон сярысь возетэз умой валало, сузэр-апайёсты гажало но дунъяло. Тани мар вера Англиысь Бенжамин нимо агай: «Мон трос тунсыкозэ тодӥсько, куке сузэр-апайёс кенешлэн пумиськонъёсаз валэктонъёс сётъяло. Озьы ик лыдэ басьтӥсько амалъёсты, кудъёссэ соос уже куто тодытыкузы но адямиосын Библиез дышетыкузы. Мон туж дунъясько ваньзэ, мае сузэръёс лэсьто».

17. Малы милемлы йыр луон сярысь возетэз гажано?

¹⁷ Куке ми ваньмы — вын-агайёс, сузэр-апайёс, семьяослэн йыръёссы но тӧроос — валаськомы йыр луон сярысь возетэз, соку кенеш тупаса но огкылысь улоз. Нош тужгес но кулэез, озьы ми данъяськомы яратӥсь инмысь Атаймес, Иеговаез (Пс. 150:6).