1. Parché che ghen’è union nela fameia de Geovà?

TUTI restemo contenti de far parte dela fameia de Geovà parché ghen’è pace e union intrà de noantri. Ma parché che la so fameia la ze cossita? Questo sucede par causa de tante robe. E una de queste robe la ze parché noantri femo el meio che podemo par rispetar a tuti quei che Geovà el ghe ga dato autorità. La fameia de Geovà la resta cada volta pi unida quando tuti i capisse ben la autorità che Geovà el ga dato a cada un.

2. Cossa che ndaremo imparar in questo stùdio?

² In questo stùdio, ndaremo imparar sora la autorità che Geovà el ga dato a cada un nela congregassion. Noantri gavaremo le risposte a queste domande: Che laoro Geovà el ga dato ale sorele nela congregassion? Sarà che i fradei dela congregassion i ga autorità sora le sorele come i paroni de fameia i ga? Sarà che i ansiani e i paroni de fameia i ga la medèsima autorità? Prima, parlemo un pochetin sora le sorele.

3. Cossa che ndarà giutarne a amar ancora de pi le nostre sorele?

³ Tuti noantri ghe demo tanto valor ale sorele che le tende dela so fameia e che le fà el so meio nela predicassion e nela congregassion. In questo stùdio, ndaremo ricordarse de quel che Geovà e Gesù i pensa sora le sorele e anca come che Paolo  le tratea. Studiar sora questo ndarà giutarne a amar ancora de pi le nostre care sorele.

4. Come che savemo che Geovà el dà valor a òmini e done?

⁴ La Bìblia la mostra che Geovà el dà tanto valor a òmini e done. Nela època dei apòstoli, òmini e done i ga ricevesto spìrito santo de Geovà par far tante robe, come parlar in diverse léngue. (Ati 2:1-4, 15-18) Òmini e done i ze stati scoliesti par viver nel cielo con Cristo. (Gàl. 3:26-29) Òmini e done anca i podarà viver par sempre nela Tera. (Apo. 7:9, 10, 13-15) E tuti due anca i fà la predicassion e i insegna sora la Bìblia. (Mat. 28:19, 20) Par esémpio, nel libro de Ati, ghen’è el bel esémpio dela sorela Prissila. Prissila e Àchila i ga giutà a Apolo, che el savea tanto dela Bìblia, a cognosser ancora meio la verità. — Ati 18:24-26.

5. De acordo con Luca 10:38, 39, 42, cossa che Gesù el pensea dele done?

⁵ Gesù el tratea le done con rispeto. I farisei dela so època i pensea che le done le era manco importante che i òmini. Par esémpio, lori no i parlea cole done in meso de altre persone e gnanca i parlea sora la Bìblia con lore. Ma Gesù el tratea le done con rispeto e el parlea sora importante verità con òmini e done. * (Ledi Luca 10:38, 39, * 42. *) Gesù anca el assea le done ndar insieme de lu quando el viaiea par predicar. (Luc. 8:1-3) E quando Gesù l’è stato ressussità, lu el ga dito par le done ndar contar questo ai apòstoli. — Gioani 20:16-18.

6. Come che el apòstolo Paolo el ga mostrà che el ghe dea valor ale done?

⁶ El apòstolo Paolo el ga ricordà a Timòteo che el gavea de dar valor ale done. Lu el ga dito a Timòteo che el gavea de tratar le done de età come se le fusse mare e quele gióvene come se le fusse sorele. (1 Tim. 5:1, 2) Paolo el ga insegnà tante robe a Timòteo, ma lu el savea che la so mare e so nona le ze state le prime a insegnarghe sora le Scriture. (2 Tim. 1:5; 3:14, 15) Paolo el ga anca parlà el nome de tante sorele nela so carta ai romani. Lu el vedea quel che queste sorele le fea e gavea caro de lodarle. — Rom. 16:1-4, 6, 12; Fil. 4:3.

7. Cossa che ndaremo studiar adesso?

⁷ Fin qua, ghemo imparà che la Bìblia la mostra che Geovà el dà tanto valor ale done. Tuti i resta contenti de gaver sorele amorose e generose nela congregassion. Anca i ansiani i resta contenti parché le sorele le giuta che ghen sìpia pace e union nela congregassion. Ma ghen’è arquante robe che volemo ancora capir. Parché che dele volte una dona la ga de querzer la testa? Quanta autorità i ansiani e i servi ministeriai i ga sora le sorele nela congregassion?

8. De acordo con Efesi 5:23, sarà che i fradei dela congregassion i ze paroni dele sorele? Spiega.

⁸ Nela fameia, el sposo el ga autorità sora la so sposa. Cossita, un fiol che l’è batesà no’l deventa el paron dela so mare. (Efe. 6:1, 2) Nela congregassion, i ansiani i ga autorità par far dessision, ma lori no i pol comandar i fradei. (1 Tes. 5:12; Ebr. 13:17) Alora, sarà  che i fradei dela congregassion i ze paroni dele sorele? Nò! Par esémpio, pensa nte una sorela no maridada e che no la ze pi de star coi so genitori. Ela la ga de rispetar i so genitori e i ansiani, ma come tuti i altri nela congregassion, el so paron l’è el Cristo. — Ledi Efesi 5:23. *

9. Parché che dele volte le sorele le ga de querzer la testa?

⁹ Geovà el vol che le robe nela congregassion le sìpie fate de maniera organisada. Alora, lu el ga dato autorità a Gesù sora i òmini, e ai òmini la autorità par tender dela congregassion. Ma lu no’l ga dato questa autorità ale done. (1 Tim. 2:12) Par quela, Geovà el domanda par le sorele querzer la testa quando le fà un laoro che saria fato par un fradel. * (1 Cor. 11:4-7) Cossita, le ga la oportunità de mostrar rispeto par la autorità che Geovà el ga dato ai òmini. Ma questo no vol dir che le done le ga manco valor che i òmini. Dopo de capir questo, ndemo veder che autorità i paroni de fameia i ga e che autorità i ansiani i ga.

10. Cossa che un ansiano el pol scominsiar a pensar?

¹⁰ I ansiani i ama a Cristo e anca ai fradei. Geovà e Gesù i ghe ga domandà de tender dela congregassion. (Gioani 21:15-17) Ma fursi un ansiano el pol preocuparse tanto coi fradei che el scomìnsia a pensar che lu l’è un pare par la congregassion. E, cossita come un pare che el pol dir cossa che la so fameia la pol far o nò, lu el pensa che el pol far compagno nela congregassion. E arquanti  fradei sensa nicòrderse i giuta questo ansiano a pensar cossita parché, quando i ga de far una dessision, i domanda che quel ansiano el fae nel posto de lori. Ma sarà che la autorità che un ansiano el ga nela congregassion la ze la medèsima che un paron el ga nela so fameia?

11. Che robe i ansiani e i paroni de fameia i ga autorità de far?

¹¹ El apòstolo Paolo el ga dito che ghen’è robe compagne che i ansiani e i paroni de fameia i ga autorità de far. (1 Tim. 3:4, 5) Par esémpio, Geovà el vol che i fioi i obedisse el paron dela fameia. (Col. 3:20) E lu anca el vol che i fradei dela congregassion i sìpia obedienti ai ansiani. Geovà el speta che i paroni de fameia e i ansiani i giute quei che lori i tende a amar a Geovà, a sentirse amadi e a infrontar le dificoltà. (Tiago 2:15-17) Geovà anca el speta che i ansiani e i paroni de fameia i giute i altri a obedir ale so lege. Anca el speta che i fae le robe sempre de acordo con quel che la Bìblia la dise. — 1 Cor. 4:6.

12-13. De acordo con Romani 7:2, che difarense ghen’è intrà la autorità de un ansiano e de un paron de fameia?

¹² Ma ghen’è anca grande difarense intrà la autorità che un ansiano e un paron de  fameia el ga. Par esémpio, Geovà el ga dato ai ansiani la autorità de esser giuisi nela congregassion. Alora, quando una persona no la se ciama grama, lori i pol dirghe che no la fà pi parte dela congregassion. — 1 Cor. 5:11-13.

¹³ Ma Geovà el ga dato autorità ai paroni de fameia de far robe che i ansiani no i pol far. Par esémpio, un paron de fameia el pol dir quel che la so fameia la ga de far e el speta che la fae. (Ledi Romani 7:2. *) Una dele robe che el paron de fameia el pol dessider l’è la ora che i fioi i ga de rivar casa. Se lori no i obedisse mia, lu el ga la autorità de “tirarghe le récie”. (Efe. 6:1) Ma sicuro che vanti de dir ala so fameia quel che la ga de far, el ndarà parlar cola so dona, parché lori due i ze “una sol carne”. * — Mat. 19:6.

14. (a) De acordo con Marco 10:45, parché che l’è giusto che Gesù el sìpia el paron dela congregassion? (b) Cossa che el Corpo Governante el fà? (Vedi el quadro “ Cossa che el Corpo Governante el fà?”.)

¹⁴ Gesù el ga dato la so vita par tuti i umani. Cossita, Geovà el pol salvar a tuti i so servi e a tuti quei che i vol seghir al so Fiol. (Ati 20:28; 1 Cor. 15:21, 22) Par quela che l’è giusto che Geovà el gàpia scoliesto Gesù come el paron dela congregassion. (Ledi Marco 10:45 *) Alora, Gesù el dà comandamenti  ale persone, ale fameie e ala congregassion e tuti i ga de obedirlo. (Gàl. 6:2) Ma lu el ne dà anca quel che ne ocore par esser amighi de Geovà e el ne tende con tanto amor. — Efe. 5:29.

15-16. Cossa che te ghè imparà de quel che Marley e Benjamin i ga dito?

¹⁵ Cristo el ga dato ai òmini la responsabilità de tender dele sorele. Alora, quando le done le rispeta la autorità dei òmini, le ze drio rispetar la autorità de Cristo. Una sorela dei Stati Unidi, che la ga nome Marley, la ga parlà quel che ela e tante altre sorele le sente: “La responsabilità che mi go come sposa e come sorela la ze tanto importante par mi. Mi seito sforsarme par rispetar la autorità che Geovà el ga dato ai sposi e ai ansiani nela congregassion. Ma l’è fàcile far questo parché el me sposo e anca i fradei i me trata con rispeto e i me ringràssia par quel che mi fao.”

¹⁶ I fradei i dopera ben la autorità che i ga quando i trata le done con rispeto. Varda cossa che un fradel che el ga nome Benjamin, che l’è de star nela Inglatera, el ga dito: “Me piase tanto i comentari che le sorele le fà nele riunion. Lore le parla robe che le me giuta a studiar meio la Bìblia e anca a predicar meio. L’è tanto importante tuto quel che lore le fà.”

17. Parché che tuti i ga de rispetar la autorità che Geovà el ga dato a cada un?

¹⁷ Quando i òmini, le done, i paroni de fameia e i ansiani i capisse e i rispeta la autorità che Geovà el ga dato a cada un, ghen’è pace nela congregassion. Cossita, tuti noantri demo onor al nostro Pare Geovà. — Sal. 150:6.