ALATIKE AKO 7
Te Pule ʼAe ʼe Maʼu e Te Kau Tagata ʼAfeā ʼi Te Kokelekasio
“Ko Kilisito ʼe ko te pule ʼo te kokelekasio, ʼae ʼe ko tona sino neʼe ina haofaki.”—EFE. 5:23.
KATIKO 137 Te ʼu Fafine Kilisitiano Agatonu
TE ʼU MANATU FAKANOUNOU *
1. Kotea he tupuʼaga ʼo te logo tahi ʼo te famili ʼo Sehova?
ʼE TOU fiafia ʼi te kau ki te famili ʼo Sehova. He koʼe ʼe maʼu te tokalelei mo te logo tahi ʼi totatou famili? Tafito he ʼe tou fakaʼapaʼapa kia natou ʼae neʼe foaki age e Sehova he faʼahiga pule. Kapau ʼe tou mahino lelei age ki te fakatuʼutuʼu ʼaia, pea ʼe toe lelei age anai tatatou logo tahi.
2. Ko te ʼu fehuʼi fea ʼae ka tou tali anai ki ai ʼi te alatike ʼaeni?
2 ʼE fakamahino anai ʼi te alatike ʼaeni pe ʼe ko ai ʼae ʼe pule ʼi te kokelekasio. ʼE tou toe tali anai ki te ʼu fehuʼi ʼaeni: Kotea te ʼu gaue neʼe foaki e Sehova ki te ʼu tuagaʼane? ʼE moʼoni koa te ui ʼae ʼe pule te ʼu tehina fuli ki te ʼu tuagaʼane fuli? ʼE tatau koa te pule ʼa te kau tagata ʼafeā ki te ʼu tehina mo tuagaʼane mo ʼae ʼa he tamai ki tona ʼohoana mo ʼana fanau? Kae tou vakaʼi muʼa pe ʼe tonu ke feafeaʼi tatatou aga ki ʼotatou tuagaʼane.
ʼE TONU KE FEAFEAʼI TATATOU AGA KI ʼOTATOU TUAGAʼANE?
3. Kotea ʼae ʼe feala ke tou fai ke lahi age tatatou fakafetaʼi ki ʼotatou tuagaʼane, ʼo ʼuhiga mo tanatou ʼu gaue?
3 ʼE tou ʼoʼofa lahi ki ʼotatou tuagaʼane. ʼE natou faiga malohi ke natou tokakaga lelei ki ʼonatou kiʼi famili, ke natou fakamafola te logo lelei, pea mo tokoni kia natou ʼo tanatou kokelekasio. Kae ʼe toe lahi age anai tatatou fakafetaʼi ki te ʼu tuagaʼane, mo kapau ʼe tou vakaʼi te manatu ʼa Sehova pea mo Sesu ʼo ʼuhiga mo natou. Pea ʼe toe ʼaoga anai ke tou vakaʼi pe neʼe feafeaʼi te aga ʼa te apositolo ko Paulo ki te hahaʼi fafine.
4. ʼE fakaha feafeaʼi mai ʼi te Tohi-Tapu ʼe maʼuhiga tatau te hahaʼi fafine mo te hahaʼi tagata kia Sehova?
Gaue 2:1-4, 15-18) Neʼe fakanofo natou ʼaki te laumalie maʼoniʼoni, ke natou kauga hau mo Kilisito. (Kal. 3:26-29) Pea ʼe ko he hahaʼi fafine pea mo tagata ʼae ka natou ʼamanaki maʼuʼuli anai ʼo heʼe gata ʼi te kele. (Fkha. 7:9, 10, 13-15) ʼO toe feia aipe, ʼe ko te hahaʼi tagata mo fafine ʼae ʼe natou fakamafola te logo lelei pea mo akoʼi te hahaʼi. (Mat. 28:19, 20) ʼE fakaha ʼi te tohi ʼo Gaue te faʼifaʼitaki lelei ʼa te tuagaʼane ko Pilisila. Ko ia mo tona ʼohoana ko Akila neʼe nā tokoni kia Apolose, ko he tagata neʼe ina iloʼi lelei te ʼu Tohi Taputapu, ke mahino lelei age ki te moʼoni.—Gaue 18:24-26.
4 ʼE fakaha mai ʼi te Tohi-Tapu ʼe maʼuhiga tatau te hahaʼi fafine mo te hahaʼi tagata kia Sehova. Ohage la, ʼe fakaha ʼi te Tohi-Tapu neʼe foaki age e Sehova tona laumalie ki te ʼu ʼuluaki Kilisitiano, fafine mo tagata. Pea neʼe ina fakafealagia ke natou fai ni gaue fakaofoofo, ohage la ke natou palalau ʼi he tahi ʼu lea. (5. ʼE fakaha feafeaʼi mai ia Luka 10:38, 39, 42 neʼe fakaʼapaʼapaʼi e Sesu te hahaʼi fafine?
5 Neʼe fakaʼapaʼapaʼi e Sesu te hahaʼi fafine. Neʼe meʼa noaʼi e te kau Faliseo te hahaʼi fafine. Neʼe mole pe la natou palalau mo natou ʼi muʼa ʼo te hahaʼi. Pea neʼe mole natou palalau ʼi he temi mo te hahaʼi fafine ki te ʼu Tohi Taputapu. Kae ko Sesu ia, neʼe ina fakakau te hahaʼi fafine moka neʼe faipalalau mo ʼana tisipulo ki he ʼu manatu fakalaumalie. * (Lau ia Luka 10:38, 39, 42.) Pea neʼe ina fakagafua ki te ʼu fafine ke natou kauga olo mo ia ʼi tana faifakamafola. (Luka 8:1-3) Neʼe ina toe foaki ki te hahaʼi fafine te pilivilesio ʼae ke natou tala ki ʼana apositolo kua fakatuʼuake ia ia.—Soa. 20:16-18.
6. ʼE tou iloʼi feafeaʼi neʼe fakaʼapaʼapaʼi e te apositolo ko Paulo te hahaʼi fafine?
6 Neʼe toe fakamanatuʼi age e te apositolo ko Paulo kia Timoteo te maʼuhiga ʼae ke fakaʼapaʼapa ki te hahaʼi fafine. Neʼe ui age e Paulo ke hage kia ia ‘te ʼu finematuʼa ko hana ʼu faʼe’ pea mo ‘te ʼu finemui ko hona ʼu tokolua.’ (1 Tim. 5:1, 2) Neʼe tokoni lahi ia Paulo kia Timoteo ke liliu ko he Kilisitiano fotufotuʼa. Kae neʼe ina ui neʼe iloʼi lelei e Timoteo “te ʼu Tohi Taputapu” ʼuhi ko tana faʼe mo tana kui fafine. (2 Tim. 1:5; 3:14, 15) ʼI tana tohi ki te kau Loma, neʼe tala ʼofa ai ia Paulo ki he ʼu tuagaʼane, ʼo ina toʼo ʼonatou higoa. Neʼe mole ina tokagaʼi pe ʼanatou gaue lelei, kae neʼe toe fakafetaʼi kia natou.—Loma 16:1-4, 6, 12; Flp. 4:3.
7. Ko te ʼu fehuʼi fea ʼae ka tou tali anai ki ai?
7 Ohage ko tona fakaha ʼi te ʼu palakalafe ʼaeni kua ʼosi, ʼe mole ui ʼi te Tohi-Tapu ʼe malalo age te ʼu tuagaʼane ʼi te ʼu tehina. Ko ʼotatou tuagaʼane ʼae ʼe lotofoaki mo fonu ʼi te ʼofa, ʼe ko he tokoni lahi ki te kokelekasio. Pea ʼe falala te kau tagata ʼafea kia natou moʼo taupau te tokalelei mo te logo tahi ʼo te kokelekasio. Kae ʼe tonu ke tou toe tali ki te ʼu fehuʼi ʼaeni: He koʼe ʼe kole e Sehova ki te ʼu tuagaʼane ke natou pulouʼi ʼonatou ʼulu ʼi ʼihi aluʼaga? Mai tona aluʼaga ʼae ʼe ko he ʼu tehina pe ʼae ʼe fakanofo tagata ʼafeā peʼe tagata faifekau, ko tona fakaʼuhiga koa ʼe pule te ʼu tehina fuli ki te ʼu tuagaʼane fuli?
ʼE PULE KOA TE ʼU TEHINA FULI KI TE ʼU TUAGAʼANE FULI?
8. ʼO mulimuli kia Efeso 5:23, ʼe pule koa te ʼu tehina fuli ki te ʼu tuagaʼane fuli? Fakamahino.
8 Kailoa ia! Ko he tehina ʼe mole ko te pule ia ʼo te ʼu tuagaʼane fuli ʼo te kokelekasio. Kae ʼe ko Kilisito tonatou pule. (Lau ia Efeso 5:23.) ʼI te famili, ko te pule ʼo te fafine ʼe ko tona ʼohoana. Kae ko te tama ʼae kua papitema ʼe mole ko te pule ʼo tana faʼe. (Efe. 6:1, 2) Pea ʼi te kokelekasio ʼe fakatuʼakoi pe te pule ʼa te kau tagata ʼafeā ki te ʼu tehina mo tuagaʼane. (1 Tes. 5:12; Hep. 13:17) Kae ʼe feafeaʼi age ki he tuagaʼane selipatea ʼe mole kei nofo mo ʼana matuʼā? ʼE hoko atu pe tana fakaʼapaʼapa kia naua, kae ʼe mole kei pule tana tamai kia ia. ʼE toe fakaʼapaʼapa ki te ʼu tagata ʼafeā, kae ohage pe ko te ʼu tehina fuli, ko tona pule pe ʼe tahi ko Sesu.
9. He koʼe ʼi ʼihi temi ʼe tonu ai ki te ʼu tuagaʼane ke natou pulouʼi ʼonatou ʼulu?
9 Kae ʼe moʼoni foki, neʼe foaki e Sehova ki te hahaʼi tagata te maʼua ʼae ke natou fakatuʼutuʼu te ʼu gaue ʼae ʼo te tauhi, pea mo akoʼi te kokelekasio. Neʼe mole ina foaki te pule ʼaia ki te hahaʼi fafine. (1 Tim. 2:12) Kotea tona tupuʼaga? Koteʼuhi, ohage pe ko tana filifili ia Sesu ke pule ki te tagata fuli, ʼe loto e Sehova ke fai ia meʼa fuli ʼi te fakatokatoka ʼi tana kokelekasio. Kae kapau ʼi ʼihi aluʼaga ʼe tonu ke fai e he tuagaʼane he gaue ʼe tonu ia ke fai e he tehina, ʼe kole age e Sehova ke ina pulouʼi tona ʼulu. * (1 Ko. 11:4-7) ʼE kole age e Sehova te faʼahi ʼaia, ʼe mole ko honatou fakamalaloʼi. Kae ko he faigamalie ʼaia ke natou fakaha tanatou fakaʼapaʼapa kia natou ʼae neʼe foaki age e Sehova he faʼahiga pule. ʼI te lakaga leva ʼaeni tou tali ki te fehuʼi ʼaeni: Kotea te ʼu tuʼakoi ʼa te pule ʼa te kau pule famili mo ʼae ʼa te kau tagata ʼafeā?
TE PULE ʼAE ʼE MAʼU E TE PULE FAMILI MO ʼAE ʼA TE KAU TAGATA ʼAFEĀ
10. Kotea ʼae ʼe feala ke uga ai he tagata ʼafeā ke ina fakatuʼu he ʼu lekula maʼa te kokelekasio?
10 Ko te kau tagata ʼafea ʼe natou ʼoʼofa kia Kilisito. ʼE natou toe ʼoʼofa ki te ʼu “ovi” ʼa Sehova mo Sesu, pea ʼe natou tokakaga ki ai. (Soa. 21:15-17) ʼUhi ko te faʼahi ʼaia, ʼe feala ai ki he tagata ʼafeā ke pule ki te kokelekasio ohage ko he tamai ʼe pule ki tona kiʼi famili. ʼE lagi ina ui anai ʼe feala pe ke ina fakatuʼu ni lekula moʼo puipui te ʼu ovi ʼa te ʼAtua, ohage pe ko he fai ʼa he tamai moʼo puipui tona kiʼi famili. Pea ʼe feala ki ʼihi ʼi te kokelekasio ke natou uga ia ia ke ina fakahoko te faʼahi ʼaia, ʼaki tanatou kole age ke ina toʼo he ʼu tonu maʼa natou. Kae ʼe tatau koa te pule ʼae ʼe maʼu e te kau tagata ʼafeā mo ʼae ʼa te ʼu pule famili?
11. Kotea ʼae ʼe tatau ai te pule ʼae ʼe maʼu e he pule famili mo ʼae ʼa he tagata ʼafeā?
11 Neʼe fakaha e te apositolo ko Paulo he ʼu faʼahi ʼe tatau ai te pule ʼae ʼe maʼu e he pule famili mo ʼae ʼa he tagata ʼafeā. (1 Tim. 3:4, 5) Ohage la, ʼe loto e Sehova ki he kiʼi famili ke natou fakalogo ki te pule famili. (Kol. 3:20) ʼO toe feia, ʼe loto e Sehova ki te ʼu tehina mo tuagaʼane ʼo te kokelekasio ke natou fakalogo ki te kau tagata ʼafeā. ʼE toe loto e Sehova ke tokakaga te ʼu pule famili mo te ʼu tagata ʼafeā ki te maʼuli fakalaumalie ʼo natou ʼae ʼe fakalogo kia natou, mo fakaha ʼe natou ʼoʼofa kia natou, pea mo tokoni kia natou moka natou tau mo ni fihifihia. (Sakp. 2:15-17) Pea ʼe fakamaʼua e Sehova ki te kau tagata ʼafeā pea mo te ʼu pule famili ke natou akoʼi ki ʼihi ʼana lekula mo lagolago ki ai. Kae ke natou tokakaga “naʼa natou fakalaka ʼi te ʼu meʼa ʼae kua ʼosi tohi” ʼi te Tohi-Tapu.—1 Ko. 4:6.
12-13. Kotea la he kehekehe ʼa te pule ʼae ʼe maʼu e he pule famili mo ʼae ʼa he tagata ʼafeā?
12 Kae ʼe ʼi ai pe he ʼu kehekehe ʼa te pule ʼae ʼe maʼu e he tagata ʼafeā mo ʼae ʼa he pule famili. Ohage la, neʼe hinoʼi e Sehova te kau tagata ʼafeā kae mole ko te ʼu pule famili ko ni tuʼi fakamau. Pea ʼe feala ai ke natou fakamavae ʼi te kokelekasio he tahi neʼe agahala pea ʼe mole fia fakahemala.—13 ʼI he tahi age faʼahi, neʼe fakafealagia e Sehova ki te ʼu pule famili ke natou fai he ʼu meʼa ʼe mole feala ke fai e te kau tagata ʼafeā. Ohage la, neʼe tuku e Sehova ki te ʼu pule famili te fealagia ʼae ke natou fakatuʼu ni lekula maʼa tonatou kiʼi famili, pea mo natou fakamaʼua ke natou mulimuli ki ai. (Lau ia Loma 7:2.) Koia, ʼe feala ki he pule famili ke ina fakatuʼu te hola ʼae ʼe tonu ai ki ʼana fanau ke natou toe liliu mai ki fale ʼi te poʼuli. Pea ʼe feala ke ina fakatuʼā natou moka ʼe mole natou fakaʼapaʼapa ki ai. (Efe. 6:1) ʼE mahino ia, ko he pule famili ʼe ʼofa ʼe felogoi muʼa mo tona ʼohoana ʼi muʼa ʼo tana fakatuʼu ni lekula maʼa tona kiʼi famili, he ʼe “kua nā liliu ko he kakano ʼe tahi.” *—Mat. 19:6.
FAKAʼAPAʼAPA KI TE PULE ʼA KILISITO ʼI TE KOKELEKASIO
14. (1) He koʼe neʼe lelei te fakanofo e Sehova ia Sesu ko te pule ʼo te kokelekasio, ʼo mulimuli kia Maleko 10:45? (2) Kotea te ʼu gaue ʼa te Kolesi Pule? (Vakaʼi te fakamatala ʼae ʼi te ʼa takai “ Te ʼu Gaue ʼa Te Kolesi Pule.”)
14 Neʼe totogi e Sehova te maʼuli ʼo natou ʼo te kokelekasio pea mo ʼae ʼa te hahaʼi fuli ʼaki te sakilifisio ʼa Sesu. (Lau ia Maleko 10:45; Gaue 20:28; 1 Ko. 15:21, 22) Koia, ʼe tou mahino ai leva ki te tupuʼaga ʼo te fakanofo e Sehova ia Sesu ko te pule ʼo te kokelekasio, he neʼe ina foaki tona maʼuli moʼo totogi ʼo tatou. Mai tona aluʼaga ʼae ko Sesu ʼe ko totatou pule, ʼe feala ai ke ina fakatuʼu ni lekula ʼo ʼuhiga mo te ʼu meʼa ʼae ʼe tonu ke fai e te hahaʼi, mo te ʼu famili, pea mo te kokelekasio katoa. Pea ʼe toe feala foki ke ina fakamaʼua ke natou fakaʼapaʼapa ki ai. (Kal. 6:2) Kae ʼe mole gata pe ki tana fakatuʼu ni lekula. ʼE ina toe fafaga mo tokaga lelei kia tatou.—Efe. 5:29.
15-16. Kotea te ako ʼe tou taʼofi mai te tala manatu ʼa te tuagaʼane ko Marley pea mo te tehina ko Benjamin?
15 ʼE fakaha e te ʼu tuagaʼane tanatou fakaʼapaʼapa kia Kilisito, he ʼe natou fakalogo ki te ʼu tagata ʼae neʼe ina fakanofo ke tokakaga kia natou. Tokolahi te ʼu tuagaʼane ʼe natou manatu ohage ko Marley, ʼae ʼe maʼuli ʼi Amelika. ʼE ui fenei e te tuagaʼane ʼaia: “ ʼE maʼuhiga kia au ʼoku maʼua ʼi toku ʼuhiga fafine ʼohoana mo tuagaʼane ʼi te kokelekasio. ʼE tonu ke au faiga tuʼumaʼu ke au fakalogo ki te pule ʼae neʼe foaki e Sehova ki toku ʼohoana pea mo te kau tagata ʼafeā. Kae ʼe faigafua taku fakahoko te faʼahi ʼaia he ʼe fakaʼapaʼapa mai toku ʼohoana mo te ʼu tehina ʼo te kokelekasio, pea mo natou fakafetaʼi mai ki te ʼu gaue ʼae ʼe au fai.”
16 ʼE fakaha e te ʼu tehina tanatou mahino ki te fakaʼuhiga ʼo te pule, he ʼe natou fakaʼapaʼapa ki te ʼu tuagaʼane. ʼE ui fenei e te tehina ko Benjamin, ʼe maʼuli ʼi Pilitania: “ ʼE lahi te ʼu meʼa ʼae ʼe au ako mai te ʼu tali ʼa te ʼu tuagaʼane ʼi te ʼu fono. Neʼe lahi te ʼu tokoni neʼe natou foaki mai ke lelei age taku ako te Tohi-Tapu pea mo taku faifakamafola. ʼE maʼuhiga ʼaupito tanatou gaue.”
17. He koʼe ʼe tonu ke tou fakaʼapaʼapa ki te pule ʼae neʼe foaki e Sehova ki ʼihi?
17 Kapau ko te hahaʼi tagata, mo te hahaʼi fafine, mo te ʼu pule famili pea mo te kau tagata ʼafeā ʼo te kokelekasio ʼe natou mahino ki te fakaʼuhiga ʼo te pule, ʼe maʼu ai anai te tokalelei. Pea ko te meʼa ʼae ʼe maʼuhiga age, ʼe tou fakakololiaʼi ai ia Sehova, tatatou Tamai ʼofa ʼae ʼi selo.—Pes. 150:6.
KATIKO 123 Tou Agatonu Ki Te ʼu Tuʼutuʼuni Fakaʼatua
^ pal. 5 Kotea te ʼu gaue neʼe foaki e Sehova ki te ʼu tuagaʼane ʼi te kokelekasio? ʼE pule koa te ʼu tehina fuli ki te ʼu tuagaʼane fuli? ʼE tatau koa te pule ʼae ʼe maʼu e he tagata ʼafeā mo ʼae ʼa he pule famili? ʼI te alatike ʼaeni ʼe tou vakaʼi anai pe ʼe tali feafeaʼi te Tohi-Tapu ki te ʼu fehuʼi ʼaia.
^ pal. 5 Vakaʼi te palakalafe 6 ʼo te alatike “Fakalotomalohiʼi Te ʼu Fafine Kilisitiano” ʼo Te Tule Leʼo ʼo Sepetepeli 2020.
^ pal. 9 Vakaʼi te fakamatala ʼae ʼi te ʼa takai “ Ko Te ʼu Aluʼaga Fea ʼAe ʼe Tonu Ke Pulouʼi Ai e He Tuagaʼane Tona ʼUlu?”
^ pal. 13 ʼE feala pe ki he kiʼi famili ke natou fai te tonu ʼae ke natou fetogi kokelekasio. Ke iloʼi pe ʼe ko ai ka ina toʼo te tonu ʼaia, vakaʼi te ʼu palakalafe 17-19 ʼo te alatike “Ke Ke Fakaʼapaʼapa Kia Natou Fuli ʼo Te Kokelekasio ʼa Sehova” ʼo Te Tule Leʼo ʼo ʼAukusito 2020.
^ pal. 59 Kapau ʼe kotou fia maʼu he ʼu fakamahino lelei ʼo ʼuhiga mo te faʼahi ʼaia, vakaʼi te tohi “Kotou Haga Nonofo ʼi Te ʼOfa ʼo Te ʼAtua,” pasina 209-212.
^ pal. 64 Kapau ʼe kotou fia iloʼi he tahi ʼu fakamahino ʼo ʼuhiga mo te ʼu gaue ʼa te Kolesi Pule, vakaʼi Te Tule Leʼo ʼo te ʼaho 15 ʼo Sulio 2013, pasina 20-25.