1. ¿Xiñee nuu familia stiʼ Jehová tobi si?

NUUNU nayecheʼ purtiʼ nácanu parte de familia stiʼ Jehová. Cumu rúninu stipa pur guni respetarnu autoridad ni maʼ gudixhe Jehová la? nuunu nayecheʼ ne nuunu tobi si. Nga runi, ra jma guiénenu modo gudixhe Jehová autoridad jma ziuʼnu tobi si.

2. ¿Xi pregunta zacábinu lu artículo riʼ?

² Lu artículo riʼ zazíʼdinu xi autoridad maʼ gudixhe Jehová ndaaniʼ congregación. Laaca zacábinu ca pregunta riʼ: ¿xi dxiiñaʼ napa ca hermana ndaaniʼ congregación?, ¿ñee dxandíʼ guiráʼ hermanu nga xaíque stiʼ guiráʼ hermana la?, ¿ñee biaʼca autoridad napa ca ancianu luguiáʼ ca hermanu ne ca hermana cásica autoridad napa ti hombre ndaaniʼ familia stiʼ la? Primeru guidúʼyanu xi dxiiñaʼ napa ca hermanu ne ximodo naquiiñeʼ guidúʼyanu laacabe.

3. ¿Xi zacané laanu jma gusisácanu ni runi ca hermana stinu?

³ Nabé rusisácanu guiráʼ ni runi ca hermana purtiʼ rápacaʼ familia sticaʼ, runi predicarcaʼ ne racanecaʼ ca hermanu de congregación. Peru pa guiníʼ íquenu ximodo ruuyaʼ Jehová ne Jesús ca hermana stinu ne ximodo biʼniʼ tratar apóstol Pablo laacabe la? jma zusisácanu laacabe.

4. ¿Ximodo rusihuinni Biblia biaʼca risaca hombre ne gunaa para Jehová?

 ⁴ Biblia ná biaʼca risaca hombre ne gunaa para Jehová. Ruzeeteʼ ni lu primé siglu bidii Jehová espíritu santu stiʼ hombre ne gunaa para guni milagru ne guiníʼ gadxé gadxé diidxaʼ (Hech. 2:1-4, 15-18). Ne cabí Jehová hombre ne gunaa para guni mandarné Cristu guibáʼ (Gál. 3:26-29). Laaca zudii Jehová guendanabani ni qué zaluxe lu Guidxilayú riʼ hombre ne gunaa (Apoc. 7:9, 10, 13-15). Ne biʼniʼ mandar Jesús hombre ne gunaa guni predicar ne gusiidiʼ ca noticia galán stiʼ Reinu (Mat. 28:19, 20). Guzéʼtenu ti ejemplu, libru stiʼ Hechos ruzeeteʼ ni de ti hermana láʼ Priscila. Laabe ne xheelabe Áquila, «bisiene chaahuicaʼ» Apolos neza stiʼ Dios (Hech. 18:24-26).

5. Casi ná Lucas 10:38, 39, 42, ¿ximodo biʼyaʼ Jesús ca gunaa?

⁵ Biʼniʼ respetar Jesús ca gunaa. Qué ñácabe casi ca fariseu, purtiʼ bíʼnicaʼ menu ca gunaa, qué rinacaʼ guiníʼnecaʼ laacabe nezalú stale binni ne qué niníʼnecaʼ laacabe de Stiidxaʼ Dios. Peru maʼ gadxé guca Jesús, purtiʼ laa bisiidiʼ hombre ne gunaa de Stiidxaʼ Dios (biindaʼ Lucas 10:38, 39, 42). * Laaca bidii Jesús lugar chinanda caadxi gunaa laa dxi biʼniʼ predicar (Luc. 8:1-3). Ne caadxi gunaa nga gúdxibe chitídxicaʼ ca apóstol stibe maʼ biásabe de lade gueʼtuʼ, ti privilegiu guizáʼ risaca (Juan 20:16-18).

6. ¿Ximodo bisihuinni Pablo runi respetar ca gunaa?

⁶ Biʼniʼ mandar apóstol Pablo Timoteo guni respetar ca gunaa. Gúdxibe laa guni tratar ca gunaa ni maʼ huaniisi casi jñaabe ne ca ni jma nahuiiniʼ gúʼyabe laacaʼ casi bizáʼnabe (1 Tim. 5:1, 2). Neca guizáʼ gucané Pablo Timoteo para iguidxi fe stiʼ, gúnnabe jñaa ne jñaabiidaʼ Timoteo nga gucané laa guiziidiʼ «ni cá lu Stiidxaʼ Dios» (2 Tim. 1:5; 3:14, 15). Ne lu carta ni bicaa Pablo para ca hermanu de Roma, biseenda diuxi para caadxi hermana ne bizeeteʼ lácabe. Bidiibe cuenta guizáʼ runi ca hermana que dxiiñaʼ ne bisisácabe ni rúnicaʼ (Rom. 16:1-4, 6, 12; Filip. 4:3).

7. ¿Xi pregunta chiguicábinu?

⁷ Casi maʼ bidúʼyanu, qué rusiidiʼ diʼ Biblia jma huaxiéʼ risaca ca hermana que ca hermanu. Guizáʼ racané ca hermana ndaaniʼ congregación ne laaca racanécabe ca ancianu para chuʼ congregación tobi si. Peru caquiiñeʼ guicábinu ca pregunta riʼ: ¿xiñee nuu biaje runi mandar Jehová ca hermana ca guchiicaʼ íquecaʼ? Ne cumu ca hombre nga maʼ gudíxhebe gaca ancianu ne siervu ministerial, ¿ñee riníʼ nga ca hermanu nga xaíque stiʼ guiráʼ ca hermana la?

8. Casi ná Efesios 5:23, ¿xiñee cadi ca hermanu nga xaíque stiʼ guiráʼ hermana?

⁸ Coʼ, purtiʼ Cristu si nga xaíque stiʼ guiráʼ hermana ni nuu ndaaniʼ congregación (biindaʼ Efesios 5:23). Ndaaniʼ ti familia, hombre nga xaíque stiʼ xheelaʼ, peru pa nuu ti hombrehuiiniʼ ni maʼ guyuunisa ndaaniʼ familia ca la? qué zanda diʼ gácabe xaíque stiʼ jñaabe (Efes. 6:1, 2). Ne ndaaniʼ congregación,  maca nexheʼ padede rugaanda autoridad stiʼ ca ancianu luguiáʼ ca hermana ne ca hermanu (1 Tes. 5:12; Heb. 13:17). ¿Xi zanda guininu de ti hermana ni caʼruʼ guichaganáʼ ni maʼ cadi nabeza ra nuu bixhoze ne jñaa yaʼ? Runi respetarbe laacaʼ, peru maʼ cadi bixhózebe nga autoridad stibe. Runi respetarbe ca ancianu, peru cásica guiráʼ hombre ni nuu ndaaniʼ congregación, Jesús nga xaíque stibe.

9. ¿Pora nga nuu biaje naquiiñeʼ guchii ti hermana ique?

⁹ Maʼ gudixhe Jehová sániru ca hombre ndaaniʼ congregación ne cadi ca gunaa (1 Tim. 2:12). Laaca maʼ gudíxhebe Jesús nga gaca xaíque stiʼ guiráʼ hombre, ¿xiñee yaʼ? Para chuʼ orden ndaaniʼ congregación. Nga runi, pa chiguni ti hermana dxiiñaʼ ni runi ti hermanu ndaaniʼ congregación la? rinabaʼ Jehová laabe guchiibe íquebe (1 Cor. 11:4-7). * Rinabaʼ Jehová ndiʼ ca hermana, cadi para guni menu laacabe, sínuque para guni respetárcabe autoridad ni maʼ gudixhe Jehová ndaaniʼ congregación. Yanna guicábinu pregunta riʼ: ¿pabiáʼ autoridad napa ca ni naca xaíque ndaaniʼ familia ne ca ancianu?

10. ¿Xi zándaca guiníʼ ique ca ancianu de congregación?

¹⁰ Nadxii ca ancianu Cristu ne laaca nadxiicabe ca dendxuʼ ni maʼ bidii Jehová ne Jesús laacabe gápacabe (Juan 21:15-17). Peru zándaca guni sentir ti  ancianu laa nga bixhoze ca hermanu de congregación, zándaca guiníʼ íquebe sicaríʼ: «Pa xaíque stiʼ ti familia riguixhe xi guni familia stiʼ para gapa laacabe, ti ancianu laaca zanda quixheʼ xi guni ca dendxuhuiiniʼ stiʼ Dios para gapa laacabe». Ne nuu hermanu ne hermana riníʼ ique zanda guicaa ca ancianu decisión pur laacaʼ. Peru ¿ñee ngueca autoridad napa ca ancianu ne ca ni naca xaíque ndaaniʼ familia la?

11. ¿Xiñee nuu biaje ngueca dxiiñaʼ runi ca ancianu ne ni naca xaíque ndaaniʼ ti familia?

¹¹ Bisiene apóstol Pablo nuu biaje ngueca dxiiñaʼ runi ti xaíque stiʼ ti familia ne ti ancianu (1 Tim. 3:4, 5). ¿Xiñee yaʼ? Guzéʼtenu ti ejemplu, racalaʼdxiʼ Jehová guzuubaʼ ti familia stiidxaʼ xaíque stiʼ ne laaca racaláʼdxibe guzuuba ca hermanu de congregación stiidxaʼ ca ancianu (Col. 3:20). Ribeza Jehová gacané ti hombre familia stiʼ gaca fe stiʼ naguidxi, gannaxhiibe laacaʼ ne gudiibe ni caquiiñecaʼ. Laaca ngaca racaláʼdxibe guni ca ancianu ndaaniʼ congregación (Sant. 2:15-17). Laaca ribézabe gacanecaʼ familia sticaʼ ne ca hermanu gúnicaʼ ni ná Dios ne  cadi gúnicaʼ ni maʼ cadi cá lu Stiidxaʼ Dios (1 Cor. 4:6).

12, 13. Casi ná Romanos 7:2, ¿xiñee maʼ gadxé dxiiñaʼ ni runi ca ni naca xaíque ndaaniʼ ti familia ne ni runi ca ancianu?

¹² Maʼ gadxé nga dxiiñaʼ runi ca ancianu ndaaniʼ congregación que dxiiñaʼ ni runi ti xaíque ndaaniʼ familia stiʼ. Tobi de ca dxiiñaʼ maʼ bidii Jehová ca ancianu nga gácacaʼ juez ne guni expulsarcaʼ ti binni ni cadi cayaca arrepentir (1 Cor. 5:11-13).

¹³ Maʼ gudixhe Jehová caadxi dxiiñaʼ ni naquiiñeʼ guni ca xaíque stiʼ ti familia ni qué zanda guni ca ancianu. Tobi de laani nga quíxhecaʼ xi naquiiñeʼ guni familia sticaʼ ne gúʼyacaʼ gúnicabe ni (biindaʼ Romanos 7:2). Guzéʼtenu ti ejemplu, xaíque stiʼ ti familia nga napa derechu quixheʼ pora naquiiñeʼ chuʼ ca xiiñiʼ ra yoo ne laaca zanda uguu jneza ca xiiñiʼ pa qué guzuubacaʼ diidxaʼ (Efes. 6:1). Peru ante quíxhecabe xi naquiiñeʼ guni familia stícabe la? naquiiñeʼ guiniʼnécabe xheelacabe de laani purtiʼ «maʼ tobi si» laacabe (Mat. 19:6). *

14. a) Casi ná Marcos 10:45, ¿xiñee jneza nga biʼniʼ Jehová Jesús xaíque stiʼ congregación? b) ¿Xi dxiiñaʼ runi Grupu ni Zániru? (Biiyaʼ recuadru ni láʼ « Dxiiñaʼ ni runi Grupu ni Zániru»).

¹⁴ Ra bidii Jehová Xiiñiʼ gatiʼ pur laanu, casi ñaca guzíʼ xquendanabani ca ni nuu ndaaniʼ congregación ne ca binni ni gapa fe Jesús (biindaʼ Marcos  10:45; Hech. 20:28; 1 Cor. 15:21, 22). Cumu guti Cristu pur laanu la? jneza nga biʼniʼ Jehová laabe xaíque stiʼ congregación. Nga runi, Jesús si napa autoridad para quixhe xi guni cada binni, xi guni ca familia ne congregación, ne ruuyabe guni cumplir cani (Gál. 6:2). Peru qué riguixhe si Jesús xi naquiiñeʼ gúninu, rápabe ne rannaxhiibe cada tobi de laanu (Efes. 5:29).

15, 16. ¿Xi riziidiluʼ pur ni guníʼ Marley ne Benjamin?

¹⁵ Rusihuinni ca hermana runi respetarcaʼ autoridad stiʼ Cristu ora ruzuubacaʼ stiidxaʼ ca hombre ni maʼ gulibe para gapa congregación. Ti hermana láʼ Marley ni nabeza Estados Unidos guníʼ: «Cumu maʼ bichaganaʼyaʼ la? rusisacaʼ dxiiñaʼ napaʼ ndaaniʼ familia stinneʼ ne ndaaniʼ congregación. Caquiiñeruʼ guneʼ stipa para cadi gusaana de guneʼ respetar autoridad ni maʼ gudixhe Jehová. Ne racané xheelaʼ ne ca hermanu de congregación naa purtiʼ runi respetarcaʼ naa ne rusisácacaʼ dxiiñaʼ ni runeʼ». Nanna dxíchinu zacaca runi sentir stale hermana.

¹⁶ Rusihuinni ca hermanu rusisácacaʼ autoridad maʼ gudixhe Jehová ora runi respetarcaʼ ne rusisácacaʼ ca hermana. Ti hermanu ni nabeza Inglaterra ni láʼ Benjamin guníʼ: «Guizáʼ galán modo runi comentar ca hermana, nánnacaʼ guni estudiarcaʼ, guni predicarcaʼ ne gusiidicaʼ jneza. Nabé risaca dxiiñaʼ ni rúnicaʼ ne maʼ biziideʼ stale de laacaʼ».

17. ¿Xiñee naquiiñeʼ guni respetarnu autoridad ni maʼ gudixhe Jehová?

¹⁷ Ora runi respetar hombre, gunaa, xaíque stiʼ familia ne ca ancianu autoridad ni maʼ gudixhe Jehová, riuu congregación tobi si. Ne ni jma risaca la? rusisácanu Jehová, Bixhózenu ni nuu guibáʼ (Sal. 150:6).