1. Ginihe nga ndupai sa nasa ga Yekova aboro i du ni kodikodi yo?

ANI na ngbarago kadu ni papara ga Yekova aboro. Tipagine du ani ti ni na zereda na ni kodikodi rani? Ndupai sa nga, ani dunduko namangapai na omerani dunduko tipa ka yugo irisa fu agu aboro Yekova nafu bete pagbia fuyo. Ni rengo, ho ani arugatirani ni na gu mbakadapai du tipa pagbia, gu kodatise du dagbarani nakio kina kumbatayo.

2. Gini asanahe ani nika karagapai kuti ni rogo gi kekeapai re?

² Rogo gi kekeapai re, ani nika sakapai tipa ada du na pagbia rogo dungurati. Ani nika karagapai a kuti agu asanahe nga: Ga agu awirina nga adee sunge nga gine rogo dungurati? Ya mo rengo du nga, agu awirina dunduko nga akumba du rogo dungurati du ni rii agu awirina dunduko nga adee? Ya mo gu pagbia du abaakumba na ni kurii awirina wa sa na gu pagbia du bariikporo na ni kurii diako gbiati awiriko? Ni bambataha, ani sakingo pai tipa gu bipai si aida ani du na ni koyo du agu awirina ni nga adee.

3. Ginipai nika undo rani ani naabi gu sunge agu awirinarani nga adee amangaha na nyanyakipaha gbe?

³ Ani nabi agu awirina nga adee na nyanyakipa yo nga aguyo namangasunge nyanyaki ka ngerafuo gayo aborokporo, ka tungusa wene pangbanga na ka songoda dungurati. Ani rengbe ka biyo na nyanyakipa yo berewe gbe ka ani berẽpa wai aYekova na Yesu abiyo. Ani nika wirika wai rengbe ani kaa mangapai na  adee ni bi ani wai gu mokedi nangia Pauro amangipai na yo.

4. Waigu Ziazia Kekeapai ayugo gupai nga Yekova nabi adee na akumba na nyanyakipa yo?

⁴ Ziazia Kekeapai nayugo gupai nga, Yekova nabi adee gbiati akumba na nyanyakipa yo. Ni kpiapai, si nayugo gupai nga rogo bambata sa kama agarã, Yekova afu gako ziazia toro fu adee wa sa na akumba na ki fu ome fuyo i mangi iiriwoapai wa gu nga kaa fura rogo ngbatunga afugo ni bakiakia. (Amo. 2:1-4, 15-18) Ziazia toro sia adee wa sa na akumba na i nika zogarago na Kristo. (Gara. 3:26-29) Adee wa sa na akumba nika gbia gu mosoro nga ga raka nyeanye kindi auru kpotosende. (Yugo. 7:9, 10, 13-15) Na i fu gu sunge fu akumba na adee dunduko nga ga tungusa wene pangbanga na kini yuguhe. (Mt. 28:19, 20) Ni kpiapai, gu kitabu nga Amokedi nafura tipa wirina du rimori nga Purisekira, ri na kumbari nga Akuira asaki rogo rengo yo ziazia fu Aporo nga gu ko nangia ira inohe.—Amo. 18:24-26.

5. Waigu Ruka 10:38, 39, 42 ayugo gupai nga Yesu aduadu na irisa koyo du adee ni?

⁵ Yesu ayugu irisa fu adee. Ko aapeka nga sino aFarusi nga agu yo naabi adee na payo kusende te, i anaafuranga na adee ku barabangiri aboro te, na i anaasaka nga Ziazia Kekeapai na yo te. Ono tie, Yesu asaki nyanyakipa arengo fu adee wa sa na akumba. * (Oni gedi Ruka 10:38, 39, 42.) Ko ambu adee a i naata na ko gene gako sunge tungusapai yo. (Rk. 8:1-3) Na Yesu afu gu momu fuyo nga, i ndu ka pe gupai fu gako abawiriki nga ko ima zinga be kpio.—Yo. 20:16-18.

6. Wai du gu mokedi nangia Pauro ayugu gupai nga ko anaairisa adee airisa?

⁶ Gu mokedi nangia Pauro atingidi Timoteo na gupai nga ko naairisa adee. Pauro ape gupai fuko nga ko niimangi pai na ‘gbinza ade wa anako’ na kini bi “paranga ade wa adawiriko.” (1 Tim. 5:1, 2) Wa vura duhe nga Pauro aima manga bakere asadatise ka undo Timoteo tipa ko du na nyanyaki idapase, Pauro aima rugatiko na gupai nga navungu Timoteo gbiati titako du nayugu “Ziazia Kekeapai” fuko ni bambataha. (2 Tim. 1:5; 3:14, 15) Rogo gu ga Pauro waraga yo ko akehe fu aRomo, ko afu sene fu agu awirina nga adee ti rimo yo. Pauro abi gupai agi awirina nga adee re aamangaha na ki pe gupai nga ko adu na tambuahe tipa gu sunge i aamangaha.—Rom. 16:1-4, 6, 12; Frp. 4:3.

7. Gini asanahe ani nika wisigopai tipaha?

⁷ Agu agene waraga nidu kusayo ni yugu gupai nga, Ziazia Kekeapai apenga gupai nga agu awirina nga adee na payo kusende ti agu awirina nga akumba te. Agi awirinarani nga adee re naundo dungurati ni bakerehe gbe, na abaakumba nakido kuti gayo undo tipa ka banda zereda na kodatise rogo dungurati. Ono kura asanahe gu duho si aida karagapai kuti ni. Ni kpiapai: Tipagine Yekova aida gu wirina nga dee vo ri ri na ũdadarii ti ni ti kura aregbo? Wa duhe nga kina agu awirina nga akumba i asia yo ni abaakumba na ni mounda abaakumba, ya mo agu awirina dunduko nga akumba du ni rii agu awirina dunduko nga adee du rogo dungurati?

8. Ringbisihe kuti AEfeso 5:23, ya mo agu awirina dunduko nga akumba du ni rii agu awirina dunduko nga adee? Oni sakingo rogoyo.

⁸ Ya mo agu awirina dunduko nga akumba du ni rii agu awirina dunduko nga adee du rogo dungurati? Karagapai nga Oó. (Oni gedi AEfeso 5:23.) Rogo ngbadimo kporo, kumba na pagbia kurii diako. Gu gude nga paranga naima zio bapatiza na pagbia kurii nako te. (Ef. 6: 1, 2) Na rogo dungurati, abaakumba na kina bete pagbia gbua kurii agu awirina nga adee na akumba. (1 Tesa. 5:12; Eb. 13:17) Na ginipai tigaha du tipa gu wirina nga nakuparanga nga gu ri arakanga na avungu ri berewe ya? Ri nandu kindi kumbatayo kaa irisa avungu ri ono ri berewe kutii gu pagbia nga ga bavungu ri te. Na ri nairisa abaakumba airisa, ono wakina agu awirina nga akumba du rogo dungurati, gu boro sa du nga riri nga Yesu.

9. Tipagine si aida agu awirina nga adee naadada riyo ti ni na ũdadarii ti kura aregbo?

⁹ Kina rengo du nga ha nga, Yekova ima maa akumba tipa i naangbembatayo rogo yugupai na irisombori rogo dungurati, na ko afunga gi pagbia re fu adee te. (1 Tim. 2:12) Tipagine? Tipa kina gu ndupai ko namoi Yesu ti ni ni rii kumba—nga ka sa apai si du ni tangaratangaraha rogo dungurati. Mbiko kura ndu apai ka si du nga si naida gu wirina nga dee mangi agu apai kina gu wirina nga kumba ninaamanga ha, Yekova naida gupai be ri nga ri dadi ri ri na ũdadarii. * (1 Kor. 11:4-7) Yekova naida agu awirina nga adee dadi riyo tipa ka yugo gayo irisa koyo du agu aboro ni ko nafu pagbia fuyo, angianga ka sa agu awirina nga adee i naabi tiyo nga i na payo kusende ya. Na agi apai re berãrani yo, ani gbianga karagapai awere kuti gu sanahe nga: “Gini pagbia du abariikporo gbiati abaakumba na ni?

10. Ginipai rengbe ka sa bakumba ti kura aregbo ko asadi ka maa andiko rogo dungurati?

¹⁰ Abaakumba ima kpinyemu Kristo na i ima kpinyemu agu “akandoro” aYekova na Yesu nasana yo tipa i naangerafuo ra. (Yo. 21:15-17) Mbiko gupai nga bakumba nangerafuo dungurati, ko ima rengba kaa berã gupai nga, ko wakina  ba agu aboro du rogo dungurati. Bakumba ima rengba ka berã gupai nga, ka si dunga bariikporo na rengo beni tipa kaa maa andiko tipa si naabanda gaani aborokporo, ni ima rengba a ka maa agu andiko ni aberãha nga si nika banda ga Mbori akandoro. Na kura awirina ima rengba ka ngarasa abaakumba tipa i mangi gipai re ni sanayo yo tipa i naamanga adiaberã fuyo. Ono ya mo abaakumba rogo dungurati gbiati abariikporo na bangisa pagbia be yo?

11. Gini awiratise du dagba gu pagbia du abariikporo na ni gbiati gu du abaakumba na ni?

¹¹ Gu mokedi nangia Pauro ayugu gupai nga, bete awiratise kinaho du dagba gu pagbia du bariikporo na ni gbiati gu du abaakumba na ni. (1 Tim. 3:4, 5) Ni kpiapai, Yekova naida aborokporo naagiasangba bariikporo. (Koro. 3:20) Na ko naida agu aboro du rogo dungurati nagiasangba abaakumba. Yekova naida gupai be abariikporo na abaakumba nga, i yugupai fu agu aboro i angerafuoyo tipa i kpinyemu Yekova. Si naida agu aboro du na pagbia bihe nga, agu aboro du kutii gayo pagbia nabihe abi nga i ima kpinyemu yo. Wakina wene abariikporo, abaakumba naundo agu aboro du rogo dungurati nga agu yo naida na undo ti regbo kpakaraapai. (Yak. 2:15-17) Kurigure, Yekova naida abaakumba gbiati abariikporo undo kura aboro tipa i gisangba gako arugute, na ko na  zayo a nga ka i “susi nga ri agu apai du ni keke he” rogo Ziazia Kekeapai yo ya.—1 Kor. 4:6.

12-13. A wa i nayuguhe rogo ARomo 7:2, waigu du gu pagbia du abariikporo na ni kia ti gu pagbia du abaakumba na ni?

¹² Ono tie, bakere kparakparaapai kinaho du dagba gu pagbia du bakumba na ni gbiati gu du bariikporo na ni. Ni kpiapai, Yekova ima fu gu sunge fu abaakumba nga i naamangasunge ni abasapungbanga, na ko ima fu gu pagbia fuyo a nga, i kusi agu aboro ingaapai kusayo rogo dungurati asanga gayo berã ya.—1 Kor. 5:11-13.

¹³ Ono tie, Yekova ima fu kura pagbia fu abariikporo nga gu ko afunga ha fu abaakumba ya. Ni kpiapai, ko ima fu pagbia fu bariikporo tipa ko naamaa andiko na kini sa gako aborokporo i pekefuoho. (Oni gedi ARomo 7:2.) Ni kpiapai, bariikporo na rengo beni ka manga diaberã tipa gini regbo si aida awirini naayego ti ni ku kporo. Ni a na pagbia beni ka fu mbusa fu gude ka ni zanga mangapai kuti gu ndiko re. (Ef. 6:1) Kina rengo du ngaha nga, mbata fu gu bariikporo du na nyemuse moi ndiko fu aborokporo, ko nasaka ha na diako bambiko i ue nga ‘boro sa.’ *—Mt. 19:6.

14. (a) Ginipai Marako 10:45 apehe nga gu nayugo gupai nga, si rẽarẽ Yekova moi Yesu ni rii dungurati? (b) Gini asunge du be Riigbu Bipasunge? (Oni bi gu sanduki nga, “ Agu Asunge du be Riigbu Bipasunge.”)

¹⁴ Vurube motumo tumorii, Yekova angbe gu unga nga ga agu aboro dunduko du rogo dungurati gbiati agu aboro dunduko du na idapase kuti Yesu. (Oni gedi Marako 10:45; Amo. 20:28; 1 Kor. 15:21, 22) Sidu, si rẽarẽ tie nga,  Yekova amoi Yesu naafu ungako tipa rani ni rii dungurati. Wa du Yesu ni barii dungurati, si du du ko na pagbia ti ni ka maa andiko fu aboro, aborokporo gbiati agu boro du rogo dungurati dunduko tipa gupai si aida i naamangaha, na ko na rengo beko ka sa aboro i naamangapai kuti agu andiko re. (Gara. 6:2) Ono kupati gu nga ga maa andiko, Yesu namanga kura dungu apai amanga. Ko nangerafuo rani wa du ani dunduko ni basasa na kini kpinyemu rani.—Ef. 5:29.

15-16. Ginipai mo awirikaha ti gupai gu wirina nga Marley na gu wirina nga Benjamin apehe?

¹⁵ Agu awirina nga adee nayugo irisa fu Kristo ni peka yo fuo agu arugapai agu akumba ko nasia yo i naangerafuo yo afuhe. Dungu agu awirina nga adee rengbe na ida kuti gupai gu wirina nga Marley apehe nga gu ri naraka Amerika yo, ri aya: “Mi nabi gi bangiriba nga ga du ni diakumba na kadu ni wirina rogo dungurati na nyanyakipaha, ti aregbo dunduko, mi naasonosa ruru bipai tipa gu ga Yekova mbakadapai nga ga pagbia. Ono kumbami gbiati agu awirina du rogo dungurati ima saha fere taata mbiko i nairisa re na kini yugu gayo tambuahe tipa agu apai mi amangaha.”

¹⁶ Agu awirina nga akumba nayugo gupai nga i ima rugatiyo na gu mbakadapai nga ga pagbia ni yugo yo irisa fu agu awirina nga adee. Benjamin, nga gu wirina naraka ringara aNgirisi yo aya: “Mi ima wirika badungu apai ti agu akaragapai agu awirina nga adee afuhe ba adunguratise yo. Aberãpai tipa wai ka tungusapai na ka yugopai wenengai. Mi nabihe nga gu sunge i amangaha na nyanyakipaha gbe.”

17. Tipagine si aida ani irisi gu mbakadapai ti ni nga ga pagbia?

¹⁷ Ho aboro dunduko rogo dungurati, akumba, adee, abariikporo gbiati abaakumba arugatiyo ni na gu rugute du tipa pagbia na kini irisihe, zereda nadu rogo dungurati. Gu nyakipaha gbe nga, ani nika ye na taarimo fu gu Barani du ngbangbaturũ yo nga boro nyemuse nga Yekova.—Tam. 150:6.