1-2. Nimakere ku Matayo 5:11, wacikara nibedo ku nen ma kani iwi ragedo?

YESU ung’olo ni julub pare nia gibinwang’u anyong’a mandha. Re eyero bende igi nia juceke m’umare, jubinyayu ragedo i kumgi. (Mat. 10:22, 23; Lk. 6:20-23) Watie kud anyong’a nibedo julub pa Kristu. Dong’ wacopo bedo ku nen ma kani tek wedi mwa man gavmenti ubenyayu ragedo i kumwa, kunoke jurutic wadwa man awiya wadwa mi somo gibecwaluwa watim lembe ma rac? I andha, lembe maeno copo ketho wabedo kud adieng’acwiny.

² Dhanu ma pol ung’eyo nia ragedo tie ngo lembe ma ketho jubedo kud anyong’a. Ento Lembe pa Mungu uwacu ngo kumeno. Yakobo ugoro nia mito ngo wabed kud adieng’acwiny tek wabenwang’ara ku peko, ento wakwane iwa ni mutoro. (Yak. 1:2, 12) Yesu bende uwacu nia ukwayu wabed kud anyong’a, kadok kinde ma jubenyayu ragedo i kumwa de. (Som Matayo 5:11.) Wacopo medara asu nibedo kud anyong’a nenedi kinde ma jubenyayu ragedo i kumwa? Wabiponjo lembe dupa kinde ma wabiweco iwi paru moko ma nok ma nwang’ere i waraga ma Yakobo ugoro ni Jukristu mi rundi ma kwong’a. Dong’ wakecak ku neno peko ma Jukristu eno ginwang’iri ko.

3. Lembang’o m’utimere, nyanok i ng’ei ma Yakobo udoko jalub?

³ Nyanok i ng’ei ma Yakobo m’umin Yesu udoko jalub ci, ragedo ma dit unyai i kum Jukristu mi Yerusalem. (Tic. 1:14; 5:17, 18) Man kinde ma junego jalub ma Stefano, Jukristu  ma dupa giringo kud i Yerusalem man “julalugi nge nge i ng’om Yahudi man Samaria,” i Kupro, man i Antiokia bende. (Tic. 7:58–8:1; 11:19) Kepar pi peko ma julub ginwang’iri ko saa maeno! Re kadok kud i kind peko maeno de, gimediri asu nirweyo lembanyong’a kaka ceke ma ginwang’iri i ie, man lembuno uketho cokiri uwotho nyai mbamba i the bimobim mi Roma. (1 Pet. 1:1) Re i ng’eye, gidok ginwang’iri ku peko mange de dupa.

4. Jukristu mi rundi ma kwong’a ginwang’iri ku peko mange ma kani?

⁴ Jukristu mi rundi ma kwong’a ginwang’iri kud ayi peko ma tung’ tung’. Ku lapor, i kum oro 50 R.M., Klaudio ma jabim mi Roma ung’olo ya Juyahudi ceke giai kud i Roma. Lembuno uketho Juyahudi ma gitie Jukristu giringo giweko pacu migi. (Tic. 18:1-3) I kum oro 61 R.M., jakwenda Paulo ukiewo barua nia juyanyu Jukristu wadi, jubologi i kol, man juyaku piny migi. (Ebr. 10:32-34) Pieno, calu dhanu mange, Jukristu de gidoko jucan man gicaku nwang’iri ku remo ma tung’ tung’.​—Rum. 15:26; Flp. 2:25-27.

5. Wabidwoko wang’ penji ma kani i thiwiwec maeni?

⁵ Kinde ma Yakobo ukiewo waraga pare i wang’ oro 62 R.M., nwang’u eng’eyo cuu dit pi peko m’umego ku nyimego gibino nwang’iri ko. Yehova uketho Yakobo ukiewo lembe ma copo konyo Jukristu maeno kara gibed kud anyong’a kadok gibenwang’iri ku peko de. Dong’ wakenyemu i lembe m’ekiewone, man wadwoku wang’ penji ma e: Anyong’a ma Yakobo ukiewo pire, utie kit anyong’a ma nenedi? Lembang’o ma copo kabu anyong’a pa Jakristu? Rieko, yioyic man tegocwiny copo konyowa nenedi kara wabed kud anyong’a kadok wabenwang’ara ku peko?

6. Nimakere ku Luka 6:22, 23, pirang’o mito Jakristu ubed kud anyong’a kinde m’enwang’ere kud amulaic?

⁶ Dhanu paru nia gicopo bedo kud anyong’a tek gitie ku leng’kum ma ber, gitie ku sente, man ka gikwo ma ber i ot migi. Ento kit anyong’a ma Yakobo ukiewo pire, utie ngo anyong’a m’ujengere iwi lembe ma ng’atini nwang’ere ko i kwo pare, ento etie acel mi theng nying’ tipo pa Mungu. (Gal. 5:22) Jakristu bedo kud anyong’a kunoke ku mutoro, nwang’u eng’eyo nia ebetimo lembe m’ubenyayu anyong’a i i Yehova man ebelubo lapor pa Yesu. (Som Luka 6:22, 23; Kol. 1:10, 11) Anyong’a mwa ubedo ve mac mi thala. Calu krauli gwoko mac m’uliel i thala kara yamu kunoke koth kud unege, wan bende wacopo medara asu nibedo kud anyong’a kadok wanwang’ara ku remokum kunoke ku can sente de. Anyong’ane thum ungo kinde ma wedi mwa kunoke dhanu mange gibenyutho jai iwa. Ento emedere ameda kinde ma jumange gimito gikabe. Amulaic ma wabenwang’u pi yioyic mwa, ubenyutho kamaleng’ nia watie julub pa Kristu. (Mat. 10:22; 24:9; Yoh. 15:20) Pi thelembe maeno re m’uketho Yakobo ukiewo nia: “Umego, tek wupodho i udul abidhe (kunoke amulaic), wukwane ceke ni mutoro.”​—Yak. 1:2.

7-8. Pirang’o yioyic mwa doko tek ka wanwang’ara kud amulaic?

⁷ Yakobo unyutho lembe mange ma ketho Jakristu bedo kud anyong’a kadok kinde m’ebenwang’ere ku peko. Ewacu kumae: “Mulo yioyic mu nyayu twiocwiny.” (Yak. 1:3) Amulaic ubedo ve mac m’ubogere ma juthiendho ko palamularu. Tek jufodo palamularune ku nyondo man tek ekwio, edoko ma tek. Kumeno bende, kinde ma wabeciro amulaic, yioyic mwa doko tek. Yakobo ugoro kumae: “Wek twiocwiny ubed ku tic pare ma ndhu cu, kara wubed ndhu cu man [zoo] de.” (Yak. 1:4) Ka wang’eyo nia amulaic copo dwoko yioyic mwa tek, eno ketho waciro amulaicne kud anyong’a.

⁸ I waraga ma Yakobo ukiewo, eweco bende iwi peko moko ma copo ketho wabayu anyong’a mwa. Gitie peko ma kani, man wacopo voyogi ke nenedi?

9. Pirang’o ukwayu wabed ku rieko?

⁹ Ang’o ma copo ketho wabayu anyong’a mwa? Ka wang’eyo ngo gin m’umaku watim. Kinde ma wanwang’ara ku peko, mito wakway kony i bang’ Yehova kara wamak yub ma foyo ie, ma mio kony ni umego ku nyimego mwa, man ma copo konyowa nigwoko bedoleng’ mwa ni Yehova. (Yer. 10:23) Ukwayu wabed  ku rieko kara wang’ei gin ma wacopo timo, man ma waromo yero ni dhanu m’ubenyutho iwa jai. Ka wang’eyo ngo gin ma waromo timo, cwinywa copo tur man wabayu anyong’a mwa pio pio.

10. Kara wanwang’ rieko, Yakobo 1:5 uyero nia watim ang’o?

¹⁰ Gin ma waromo timo: Kway rieko i bang’ Yehova. Kara wacir peko mwa kud anyong’a, mi kwong’o, wacikara nikwayu Yehova umi iwa rieko kara wamak yub ma cuu. (Som Yakobo 1:5.) Tek wanwang’u nia Yehova ubedwoko ngo wang’ rwo mwa ndhundhu, ukwayu watim ang’o? Yakobo uwacu nia wacikara ‘nikwayu Mungu.’ Ka wabemedara asu nikwayu rieko i bang’ Yehova, ng’eicwiny make ngo i kumwa, ento calu etie Wegwa m’i polo, ‘emio [iwa rieko] . . .  ku berocwinye’ kinde ma wakwaye ekonywa kara wacir peko mwa. (Zab. 25:12, 13) Kan eneno wabesendara, kisa nege i kumwa, man ebedo ayika nikonyowa. Lembuno ketho wabedo kud anyong’a! Dong’ Yehova mio iwa rieko nenedi?

11. Kara wabed ku rieko pa Mungu, wacikara nitimo ang’o mange?

¹¹ Yehova mio iwa rieko nikadhu kud i Biblia ma tie Lembe pare. (Rie. 2:6) Pi ninwang’u riekone, wacikara niponjo Lembe pa Mungu man girasoma mange m’ujengere iwi Biblia. Mito ngo wajik niponje aponja kende, ento watii bende ku juk m’i ie i kwo mwa. Yakobo ukiewo kumae: “Wubed jutim lembe, man juwinj awinja kende ngo.” (Yak. 1:22) Ka watio ku juk pa Mungu i kwo mwa, wabedo dhanu ma ketho kwiocwiny i kindjo, wakwo ma ber ku dhanu mange, man wabedo weg kisa. (Yak. 3:17) Kite maeno konyowa niciro peko moko ci m’umbe nibayu anyong’a mwa.

12. Pirang’o pire tie tek nia wang’ei lembe m’i Biblia cuu?

¹² Lembe pa Mungu ubedo calu kieu (maraya), ma konyowa ning’iyara man niyiko kaka  m’ukayu wayiki i kumwa. (Yak. 1:23-25) Ku lapor, kinde ma waponjo Lembe pa Mungu, wacopo nwang’u nia mito wanyuth jwigiri. Ku kony pa Yehova, wacopo ng’eyo kite m’umaku wabed ko yo kinde ma ng’atu moko kunoke lembe moko unyayu ng’eicwiny i iwa. Ka watie dhanu ma bedo yo, wabitimo lembe i ayi ma cuu kinde ma wabenwang’ara i wang’ lembe moko. Wabedo ku copo mi paru i lembe man mi maku yub de ma cuu. (Yak. 3:13) Eno tie bero ma wanwang’u ka wang’eyo lembe m’i Biblia cuu!

13. Pirang’o wacikara niponjo lapor ma tung’ tung’ ma nwang’ere i Biblia?

¹³ Saa moko ang’eyang’o wok i iwa nwang’u dong’ watimo lembe ma rac. Re eno tie ngo ayi ma cuu mi ng’eyo lembe. Yo ma cuu mi bedo ku rieko, utie nilar nwang’u ponji i kum lembe ma ber man ma rac ma jumange utimo. Eno re m’uketho Yakobo ukwayuwa nia walub lapor mi dhanu ma jukiewo pigi i Biblia; calu ve Abraham, Rahab, Yob, man Eliya. (Yak. 2:21-26; 5:10, 11, 17, 18) Jurutic maeno ma gigwoko bedoleng’ migi, giciro peko ma nwang’u copo ketho anyong’a migi thum. Lapor mi cirocir migi ubenyutho nia wan bende ku kony pa Yehova, wacopo bedo kud anyong’a kinde ma wabenwang’ara ku peko.

14-15. Pirang’o wacikara nikabu jiji cen kud i iwa?

¹⁴ Ang’o ma copo ketho wabayu anyong’a mwa? Ka watie ku jiji iwi yioyic mwa. Saa moko ebedo iwa tek ninyang’ i lembe ma Biblia ubeyero. Kunoke saa moko Yehova romo dwoko ngo wang’ rwo mwa calu ma nwang’u wageno. Lembe maeno copo nyolo jiji i iwa. Re ka waweko jijine umedere asu, ecopo kwio yioyic mwa man winjiri mwa ku Yehova de copo nyothere. (Yak. 1:7, 8) Ecopo ketho wabayu kadok genogen mwa mi nindo m’ubino.

¹⁵ Jakwenda Paulo uporo genogen mwa mi nindo m’ubino ku nanga. (Ebr. 6:19) Nanga ketho meli cungo kakare iwi pii kinde ma yamu ubekoto, man ecere kara kud ecidh etwang cana. Re nangane bimio kony tek nyoro ma jutwiye ko i kum meli utie ma tek. Calu ma munyali daru tego mi nyoro ma jutwiyo i kum nanga, jiji mwa de ka wakabe ngo, ecopo nyotho yioyic mwa. Man ka wabenwang’ara i peko moko, wabedo mbe ku yioyic nia Yehova bipong’o lembang’ola pare. Ka wabayu yioyic, e nwang’u wabayu genogen mwa de. Calu ma Yakobo uyero, jiji utie ve “mukura [mi nam] ma yamu leko ethore de.” (Yak. 1:6) Ng’atu m’ubenwang’ere i lembe ma kumeno, copo nwang’u ngo anyong’a!

16. Wacikara nitimo ang’o ka watie ku jiji?

¹⁶ Gin ma waromo timo: Wodh jiji cen kud i ii, man dwok yioyic peri tek. Tim pio m’umbe galu. I rundi pa jabila Eliya, dhanu pa Yehova gibino ku jiji iwi yioyic migi, uketho Eliya uwacu igi nia “wubikomo akoma i kind yioyic ario rokani? Tek Yehova en e Mungu, wulube; ento tek Bal, e wulube.” (1 Ub. 18:21) Tin bende etie lemandha nia, mito watim sayusac ma wanyang’ ko wan giwa nia Yehova tie Mungu, Biblia tie Lembe pare, man Jumulembe pa Yehova ke utie dhanu pare. (1 Tes. 5:21) Ka watimo lembe maeno, wabikabu jiji mwa cen, man yioyic mwa bidoko tek. Wacopo kwayu kony i bang’ jundong cokiri tek umitere nia wanwang’ kony pi nikabu jiji mwane. Mito ngo wagal nitimo lembuno kara wamedara nitimo ni Yehova kud anyong’a!

17. Lembang’o ma copo timere tek wabayu tegocwiny mwa?

¹⁷ Ang’o ma copo ketho wabayu anyong’a mwa? Turcwiny. Lembe pa Mungu uwacu kumae: “Tek ivoc i nindo mi ruvwa, nwang’u tego peri nok.” (Rie. 24:10) Wec mi dhu Juebrania ma juloko nia “nivoc” thelembene  moko tie “nibayu tegocwiny.” Kan ibayu tegocwiny, e ibayu anyong’a peri de pio pio.

18. Niciro thelembene tie ang’o?

¹⁸ Gin ma waromo timo: Jengiri iwi Yehova kara emi iri tegocwiny m’icir ko peko. Ukwayu wabed ku tegocwiny pi niciro peko ma wabenwang’ara ko. (Yak. 5:11) Wec ma Yakobo utio ko ma juloko nia “cirocir,” ubenyutho ng’atu m’ucungo ma tek kakare. Eno ubepoyo wiwa i kum jaskari m’ucungo ma tek i wang’ jukwoje, m’ebedok ungo ku ng’eye kadok kinde ma lwiny udoko tek de.

19. Lapor pa jakwenda Paulo ubemio iwa ponji ma kani?

¹⁹ Jakwenda Paulo uweko lapor ma ber mi nyutho tegocwiny man mi cirolembe. Saa moko enwang’ere nia tego pare voc. Ento ejengere iwi Yehova uketho enwang’u tego m’eciro ko peko pare. (2 Kor. 12:8-10; Flp. 4:13) Wan bende wacopo nwang’u kero man tegocwiny ma kumeno tek wajengara iwi Yehova pi ninwang’u kony.​—Yak. 4:10.

20-21. Ukwayu wabed ku genogen iwi lembang’o?

²⁰ Ukwayu wang’ei nia peko ma wabenwang’ara ko tin, utie ngo matira kunoke fod pa Yehova. Yakobo utielo cwinywa kumae: “Ng’atu moko tek abidhe betime kud ewac kumae, Mungu bebidha en; kum dubo copo bidho Mungu ngo, en de ebidho ng’atu moko ngo.” (Yak. 1:13) Ka wang’eyo nia eno tie lemandha, e wabicoro ceng’ini i vut Wegwa m’i polo ma Jamer.​—Yak. 4:8.

²¹ Yehova ‘lokere’ ngo. (Yak. 1:17) Egam ekonyo Jukristu mi rundi ma kwong’a i saa ma gibino nwang’iri ku peko, man ebikonyo ng’atuman m’i kindwa bende. Kway Yehova kud adundeni ceke kara emi iri rieko, yioyic, man tegocwiny. M’umbe jiji, ebidwoko wang’ rwo peri. Dong’ bed ku genogen nia Yehova bikonyi kara icir peko m’inweng’iri ko kud anyong’a!