1-2. Mikitini Matay 5:11, wa samaan ko pinengneng ita to sapalifet?

MIKIˈOKAY ci Yis to nisawawaan, wa mahela nangra ko soˈlinay a lipahak. Roma i, patalipaˈelalay cingra to maolahay cingraanan a tamdaw, wa tahalifa to sapalifet. (Matay 10:22, 23; Luka 6:20-23 ato roma pihongyak.) Ngaˈay kita malo nisawawaan ni Kristo, tada o kahemekanto. Kawra, maharateng misafelit ko paro no lomaˈ, sapalak no mikowanay, anca miroero ko cafay matayal cafay micudad papidemak to mararaway a demak, wa samaan ko harateng ita hani? Ano macariraw kita, o matatodongay koni.

² Miharateng ko kalo a tamdaw, tahacada to sapalak cowa ko kalipahakan a demak, kawra sowal no Fangcalay Cudad, pairaen ita ko mahaenay a harateng. Tinakoen, sowal no nisawawaan ci Yakop, tahalifa to sapalifet i hamaan matoled ko falocoˈ, o kalipahakan a demak konini han ko pinengneng. (Yakop 1:2, 12 ato roma pihongyak.) Mihaenay ko sowal ni Yis, soˈlin tahacada kita to sapalak, iraay ko sapalemed, o kalipahakan konini. (ˈOsien ko Matay 5:11.) Tahalifa to sapalifet i, sasamaan kita padadotoc a lipahak hani? Mikitini tikami ni Yakop to saka cecay hahekalan a Krisciyang, wa adihay ko mananamay ita. Dotoc nengnengen ita, o manan ko masiˈayaway no Krisciyang itiya a sapalifet.

3. Malo Krisciyang ci Yakop caka halafin, mifekaday ko maanan a demak?

³ Malo Krisciyang ko safa ni Yis ci Yakop, caka halafin i, misatapangay micada to pakidemay a sapalak ko Yirusalimay a Krisciyang. (Dmak 1:14; 5:17, 18) Ikor no mapatay ci Stifano, milaliway ko ˈalomanay Krisciyang to Yirusalim, ‘maliwasakay  tayra i Yutiya ato Samariya a kilac,’ o roma tamdaw tayraay i Sayprus ato Antiok. (Dmak 7:58-8:1; 11:19) Pasangaray kita miharateng, hakowaay ko malifaay no Krisciyang itiya pasangaray. Kawra, ano talacowato cangra, fanekfekay a milasil to ngaˈayay lihaf, telocto, adihayay ko mapatirengay a faelohay kasakopang itini i pala no Loma. (1 Pitiro 1:1) Nikawrira, pasangaray romiˈad iraayho i kaˈayaw.

4. Saka 1 hahekalan a Krisciyang tahalifaayho to maanan sapalifet?

⁴ Ikor, soˈlinay tahalifa ko Krisciyang to masakenaay a sapalifet. Tinakoen, itini i kongyen 50 miheca, o hongti no Loma ci Krautius, papiliyasay to Yutaya a tamdaw to Loma, o Yutaya a Krisciyang mapacieciay miliyas to lomaˈ no niyah, malinah tayra i roma a pala. (Dmak 18:1-3) Masowalay no tikami ni Pawlo itini i kongyen 61 miheca, mapakangodoay ko salikaka i ˈaˈayaw no ˈalomanay tamdaw, mipalitan, miˈafasan ko hafay. (Hipray 10:32-34) Mahecaday to roma tamdaw ko Krisciyang, wa miemem to nikaw ato pisemsem to adada.—Loma 15:26; Filipi 2:25-27.

5. Oniya lalakaw wa pacaˈof to maanan a salicay?

⁵ Mitilid ci Yakop to Yokop a cudad, itini i ˈayaw no Kongyen 62 miheca i, cipinangay to malifaay no salikaka masakenaay sapalifet. Itini sakayat ni Yihofa, mihadakay cingra to ciepocay a sapaini i tikami, padama to salikaka soˈlin misiˈayaw to sapalifet, wa ngaˈay padadotoc a lipahak. Dotoc, forforen ita ko lalakaw no Yakop ato pacaˈof to laenoay a salicay: O milengoan ni Yakop o masamanay a lipahak? O manan ko papalahdaw to lipahak no Krisciyang? O taneng, pakasoˈlinay falocoˈ ato timolo misamaan padama kitaanan miremo to masakenaay a sapalifet, padadotoc a lipahak?

6. Mikitini Luka 6:22, 23, tahalifa to sapalifet ko Krisciyang i, hano ngaˈayho lipahak hani?

⁶ Harateng no ˈalomanay tamdaw, ira ko tanoktokay tireng, hafay ato rihadayay a paro no lomaˈ ngaˈ, iraay ko lipahak sanay. Kawra o milengoan ni Yakop a lipahak o minaroˈan no fangcalay saocor, cowa ko pakayraan no tamdaw a maˈorip ko piˈarawan. (Kalatiya 5:22) Raheker a lipahak ko Krisciyang, o pakayniay noka pikotod to taˈarawan ni Yis, iraay ko pihayda ni Yihofa. (ˈOsien ko Luka 6:22, 23; Kolosay 1:10, 11) Itiniay i falocoˈ ko lipahak no Krisciyang, malecad mitahepoan a tinghoy, cowa ko mamafiyor no potalay a fali ato ˈorad. Mihaenay, soˈlin awa ko payci anca adada, o lipahak ita cowa ko mamalahdaw. Soˈlin safeliten ato likafen no paro no lomaˈ ato widang, o lipahak ita cowa ko mamalowan. Ano sapi ˈafasaw ko tao to lipahak ita, o lipahak no falocoˈ ita matongalay cowa ka lowan. Pakayni kita i pihakelongan tahalifa to sapalifet, misawacayay to o soˈinay Krisciyang kita. (Matay 10:22; 24:9; Yohani 15:20) Mankora, palimoˈotay ci Yakop kitaanan: ‘Salikakaaw ako, tahalifa kamo to masakenaay a sapalifet i, o kahemekan a demak han ko pinengneng tonini.’—Yakop 1:2.

7-8. O sapalifet hano patanektek to pakasoˈlinay falocoˈ ita hani?

⁷ Makahi mihadidi ko Krisciyang to pakidemay sapalifet, iraayho ko roma lalangian, sanay ci Yakop: ‘Ano tahalifa to sapalifet ko pakasoˈlinay faloco namo i, wa irato ko mihadidiay.’ (Yakop 1:3) O sapalifet, mahecaday misangaˈay to fonos. Pafaedeten pakietecen ko fonos, malo tanektekayto. Malecaday, ano padadotoc kita mihadidi i sapalifet, wa matongal ko tanektek no pakasoˈlinay falocoˈ. Mansa mihaen ko sowal ni Yakop: ‘Tahiraen i tolas ko pihadidi, ho malaˈosi ko demak namo, awa ko laliyaliyawen, awa ko kacangoˈotan.’ (Yakop 1:4) Maˈaraw ko pakasoˈlinay falocoˈ no niyah pakayni i sapalifet a malo tanektekay, ano misiˈayaw to sapalifet i, wa madolo to padadotoc lipahak.

⁸ Masowalay ni Yakop i tikami ningra, o pina pasangaray wa palahdaw to lipahak no tamdaw alatek. O manan koniya pasangaray? Sasamaan miremo hani?

9. Hano misaaliay kita to taneng hani?

⁹ Pasangaray: Caka fanaˈ to sasamaan ko demak. Tahalifa to sapalifet i, makalimay kita inaneng ko misaˈosian, pakahemek to Kawas, paira to haepoc no salikaka, ngaˈayho padama to niyah padadotoc a madimadi. (Yirimiya 10:23) Misaaliay kita to taneng ngaˈ mafanaˈ misaˈosi, ato sasamaan pacaˈof to misafelitay  kitaanan a tamdaw, ano caka fanaˈ sasamaan ko demak, wa matoled ko falocoˈ, telocto, wa kahenay malahdaw ko lipahak.

10. Sowal no Yakop 1:5, sapilifokaw to taneng sasamaan ko demak ita hani?

¹⁰ Hapakayraan: Pasayra ci Yihofaan micangacang to taneng. Sapadadotocaw lipahak i sapalifet, wa isalakatho kita mitolon ci Yihofaan, micangacang Cingraanan pafeli to taneng, ho inaneng ko misaˈosian. (ˈOsien ko Yakop 1:5.) Ano cowa ka tangsol ci Yihofa pacaˈof to satolon ita, ano saan kita miharateng i, sasamaan to hani? Sowal ni Yakop, wa ‘padadotoc kita micangacang.’ Mihaen ko demak ita, cowa ko mamaˈisang ko Kawas, cowa ko mamirikec kitaanan. Micangacang kita to sapafeli no kakarayan Wama a inaneng, misiˈayaw to sapalifet, wa ‘makahi Cingra padama.’ (ˈOlic 25:12, 13) Mafanaˈay Cingra to malifaay ita a sapalifet, ato roray ita, makalimay sapadamaaw kitaanan. Tada kalipahakanto konini! Mihaenay, wa samaan ci Yihofa pafeli to taneng kitaanan hani?

11. Sapilifokaw to taneng, wa midemakho kita to maanan?

¹¹ Pakaynian ni Yihofa i kimad Ningra pafeli to taneng i kitaanan. (Taneng 2:6) Mihaenay, wa micekiw kita to Fangcalay Cudad ato mitepangan a cudad. Kawra, cowa ko pinanam aca to sifanaˈ, saka dademakenho ko minanaman. Sowal ni Yakop: ‘Saka dademaken namo ko kimad no Kawas, aka o pitengil aca.’ (Yakop 1:22) Misaka dademak kita to safalod no Fangcalay Cudad wa micowat to rihadayay, mangalef makahi a micaˈi, matongal ko siniˈadaay falocoˈ. (Yakop 3:17) O hatiniay a capeling papadama kitaanan miremo to masakenaay a sapalifet, padadotoc a lipahak.

12. Micalep a cipinang to Fangcalay Cudad hano tada kalimlaan hani?

¹² Mahecaday o dadingoan ko kimad no Kawas, ngaˈayay padama kitaanan mihapinang, o  manan ko pasangaray no niyah, ato sasamaan a misalof. (Yakop 1:23-25) Tinakoen, ikor no micekiw to Fangcalay Cudad, wa mahapinang ita wa miˈimer to keter no niyah. Itini sapadama ni Yihofa wa mananam ita, tano damsayay waywayan misiˈayaw to paketeray kitaanan a tamdaw ato demak. Ano mihaen i, wa madolo to kita miremo to saroero, ihkalto ko piharateng, ngaˈayto inaneng ko misaˈosian. (Yakop 3:13) Mankora, micalep a cipingan to Fangcalay Cudad tada kalimlaanto!

13. Misongilaˈ miharateng to tinakoan no tamdaw i Fangcalay Cudad, pakayni kitaanan iraay ko maanan a haepoc?

¹³ Latekay, ikor no mararaw kita ngaˈ mafanaˈay to cowa ka ngaˈay mihaen ko demak. Kawra, mikitini karorayan a minanam cowa ko ngaˈayay pakayraan, o ngaˈay a pakayraan i, mikitini nalifetan no tao minanam to sapasifanaˈ. Mihaenay i, pakalalokay ci Yakop kitaanan misongilaˈ a miharateng to tinakoan no Fangcalay Cudad, malecad ci Apraham, ci Rahap, Yupo aci Iliya. (Yakop 2:21-26; 5:10, 11, 17, 18) Oniya madimadiay a sikawdan ni Yihofa, soˈlin misiˈayaw to sapalifet, cowa ka lahdaw ko lipahak. O tinakoan nangra mitadtaday, ira ko sapadama ni Yihofa, o mamalaˈosi ko demak ita.

14-15. Hano mamisaysay kita to sasa no falocoˈ?

¹⁴ Pasangaray: Cowa ka saysay ko sasa no falocoˈ. Latekay, pasangaray cipinang to sowal no Fangcalay Cudad sanay kita miharateng, anca cowa pitoor ci Yihofa to mitokelan ita a pakayraan pacaˈof to satolon, telocto, cisasaay ko falocoˈ. Ano pakiyadi han ita, o hatiniay sasa wa mifasaw to pakasoˈlinay falocoˈ ita, mipalak to kalalaˈed ita ci Yihofaan, mangalef ecato pakasoˈlin kita to sakiˈok ni Yihofa.—Yakop 1:7, 8.

¹⁵ Patinakoan no tarokos ci Pawlo ko hatokel ita to ˈenor no tamina. (Hipray 6:19) O ˈenor no tamina, ngaˈay patanektek to tireng no tamina i taˈangayay fali, ho caka songtol no tamina ko fakeloh. Kawra, saka ciepocaw ko ˈenor no tamina, o makakafitay to ˈenor ato tireng no tamina a kadang, coka ngaˈay a mapelaˈ. Ano citaˈi ko kadang, wa maketon alatek. Malecaday, ano awa ko caˈof no sasa, wa mafasaw ko pakasoˈlinay falocoˈ. O cisasaay ko falocoˈ a tamdaw tahalifa to pisafelit, alatek cowato pakasoˈlin, to mamalaˈosi ko sakiˈok ni Yihofa. Malahdaway ko pakasoˈlinay falocoˈ a tamdaw, malahdaway ko hatokel. Sowal ni Yakop o hatiniay a tamdaw mahecaday ‘o mafiwfiway no fali a tapelik, maconaconay,’ cowato ka lipahak.—Yakop 1:6.

16. Ano ira ko sasa ita, sasamaan ko hademak hani?

¹⁶ Hapakayraan: Misaysay to sasa, patanektek to pakasoˈlinay falocoˈ. Nohatiniho midemakto! Itini i lintad no pairasolay ci Iliya, cisasaay ko falocoˈ no finawlan ni Yihofa Cingranan, mansa mihaen ko sowal ni Iliya cangranan: ‘Tahacowa ko halafin ta maedeng kamo miketon to falocoˈ namo saw? Ano o Kawas ci Yihofa i, o tataˈongen Cingra, ano o kawas ci Paal i, tataˈongen cingra.’ (1 Hongti 18:21) Malecaday anini, wa micalep kita a micekiw, pakasoˈlin to o soˈlinay Kawas ci Yihofa, o kimad Ningra ko Fangcalay Cudad, o finawlan Ningra ko Misawacayay Tamdaw ni Yihofa. (1 Tisalonika 5:21) Mihaen ko demak ita, wa malahdawto ko sasa no falocoˈ, paˈicel to pakasoˈlinay falocoˈ no niyah. Roma i, wa ngaˈayho kita micangacang to sadama no malohemay malitengay. Sapadotocaw lipahak midoko ci Yihofaan, nohatiniho kalikien misaysay ko sasa!

17. Ano malahdaw ko timolo ita wa ira ko maanan a teloc hani?

¹⁷ Pasangaray: Matoled ko falocoˈ. Sowal no Fangcalay Cudad: ‘I kapadesan iso a romiˈad ano makokiˈ kiso i, wa malahdaw ko ˈicel iso.’ (Taneng 24:10) Mihongyakan itini ‘makokiˈ’ Hipray a sowal, iraay ko ‘malahdaw ko timolo’  a tatodong. Ano malahdaw ko timolo ita, wa kahenay malahdaw ko lipahak.

18. O mihadidiay o manan ko tatodong?

¹⁸ Hapakayraan: Tadiˈecen ci Yihofa, cangacangen Cingra pafeli to timolo padotoc a mihadidi. Saka tanektekaw a tomireng i sapalifet, kalimlaan ita ko timoloay. (Yakop 5:11) Itini Yakop a cudad, mihongyakan to ‘mihadidi’ a sowal, iraay ko ‘tanektek tomireng, caka ngiyangi’ a tatodong. Maharatengay ita ko sofitay, tanektekay mihimaw to niyaroˈ, timoloay a milood, soˈlin pakidem ko saˈodis cowa ka talalikor.

19. Mikitin taˈarawan ni Pawlo mananamay ita ko maanan?

¹⁹ Pakayni paihkal to timolo ato mihadidiay o mikiriwiˈay a taˈarawan ko tarokos ci Pawlo. Soˈlin nolatekay malonayay cingra, kawra mitadiˈecay cingra to sapafeli ni Yihofa a ˈicel, mansa padadotoc a tanektek. (2 Korinto 12:8-10; Filipi 4:13) Ano misapoener ko falocoˈ ita mihai misaaliay ko niyah to sadama ni Yihofa, wa milifok to mahecaday a ˈicel ato timolo miremo to sapalifet.—Yakop 4:10.

20-21. Wa ngaˈay kiso pakasoˈlin to maanan?

²⁰ Wa ngaˈay pakasoˈlin kita, o sapalifet cowa ko sapisayfang ni Yihofa kitaanan. Sowal ni Yakop: ‘Ano micada to sapalifet i, aka pasowal to: “Palifetay ko Kawas takowanan”. Samanen cowa ka ngaˈay mapalifet no tatiihay demak ko Kawas, cowa ka tano tatiihay demak a palifet Cingra to tamdaw.’ (Yakop 1:13) Ano pakasoˈlin kita tonini, wa matongal ko piingid toniya sidaˈitay a kakarayan Wama.—Yakop 4:8.

²¹ ‘Cowa ko mamafalic’ ci Yihofa. (Yakop 1:17) Padamaan Ningra ko saka 1 hahekalan a Krisciyang milakowit to sapalifet, wa kalacafay Cingra kitaanan milakowit to pasangaray. Mihaenay i, cangacangen ci Yihofa pafeli tisowanan to taneng, pakasoˈlinay falocoˈ ato timolo, wa pacaˈofen Ningra ko satolon iso. Wa ngaˈay pakasoˈlin kiso, ira ko sapadama Ningra, itini sapalifet wa ngaˈay kiso padadotoc lipahak!