1-2. Inoñnaga ni kaat Matéô 5:11, lelaa di nlama tehe mandutu?

YÉSU a bi bôn banigil bé le ba ga ba toi maséé. A béhe ki bo le ba ga boma mandutu. (Matéô 10:22, 23; Lukas 6:20-23) Di yé maséé ngandak i ba banigil ba Kristô. Ndi kii di yé le di nôgda i ngéda di nhoñol le bôt ba lihaa jés ni ngomin ba yé le ba kolba bés, tole solôñ yés i suklu ni i bôlô i yé le i tinde bés i boñ mam ma téé bé? Maliga ma yé le, i hoñol mam ma i yé le i lona bés nduña.

² Mut nye ki nye a ta bé le a ba maséé ikété mandutu. Ndi, hala nyen Bibel i mbat bés le di boñ. Kiki hihéga, nnigil Yakôbô a tila le i ngéda di mboma manoodana, iloole hala a tééñga bés, di nlama ba maséé. (Yakôbô 1:2, 12) Yak Yésu a bi kal le di nlama ba maséé i ngéda di nkôs ndééñga. (Añ Matéô 5:11.) Lelaa di yé le di tééda maséé més ikété mandutu? Di nla ôt biniigana mu maéba Yakôbô a bi ti bikristen bi hiai hi bisu mu kaat yé. Di bôk ndugi di tehe mandutu bikristen bi, bi bé boma.

3. Kii i bi bôña ndék ngéda i mbus le Yakôbô a bi yila nnigil Yésu?

³ Ndék ngéda i mbus le manyañ Yésu le Yakôbô a bi yila nnigil, bikristen bi bi bôdôl boma ngolba ikeñi i Yérusalem. (Minson mi baôma 1:14; 5:17, 18) I ngéda ba bi nol nnigil wada le Stéfanô, ngandak bikristen i bi ke Yérusalem ngwéé, ‘i tjama mu minkoñ mi Yudéa ni mi Samaria,’ ipe i bi ke haa letee ni i Kiprô ni i Antiôkia. (Minson mi baôma 7:58–8:1; 11:19) Di hégda mandutu momasôna  banigil ba bi boma. Ndi to hala, ba bi ke ni bisu i tjam miñañ minlam i homa ba bé ke, kayéle makoda ma bi gwéé minkoñ nwominsôna mi mi bé isi énél i Rôma. (1 Pétrô 1:1) Ndi mandutu makeñi mape ma bé bem bo.

4. Mambe mandutu mape bikristen bi hiai hi bisu bi bé boma?

⁴ Bikristen bi hiai hi bisu bi bé boma ngandak mandutu. Kiki hihéga, bebee le nwii 50 N.Y., ñane Rôma nunkeñi le Claudiô a bi ti oda le bon ba Lôk Yuda bobasôna ba nyodi i Rôma. Jon, Lôk Yuda i i bi yila bikristen i bé nyégsaga i tjôô mandap map inyu ke yén homa numpe. (Minson mi baôma 18:1-3) Bebee ni nwii 61 N.Y., ñôma Paul a tila le ba bi sol bikristen, ba ha bo mok, ba kadal nkus wap. (Lôk Héber 10:32-34) U héya mandutu ma, bikristen bi bé boma ki mandutu bana bôt bape ba bééna kiki liyep ni kon.​—Rôma 15:26; Filipi 2:25-27.

5. Mambe mambadga di ga timbhe?

⁵ I ngéda Yakôbô a tila kaat yé bebee ni nwii 62 N.Y., a bé yi mandutu lôk kéé i bôlôm ni i bôda i bé boma loñge loñge. Yéhôva a bi ti Yakôbô mbuu mpubi inyu boñ le a ti bikristen maéba malam ma ma bé lama hôla bo i tééda maséé map ikété mandutu. Di wan kaat Yakôbô, di timbhe ki mambadga mana: Mambe maséé Yakôbô a mpôdôl mu kaat yé? Kii i bé le i boñ le bikristen bi nimis maséé map? Lelaa pék, hémle ni ñem ngui bi nla hôla bés i tééda maséé més ngéda di mboma manoodana?

6. Inoñnaga ni kaat Lukas 6:22, 23, inyuki kristen i nla ba maséé ikété mandutu?

⁶ Bôt bahogi ba nhoñol le ba nla ba maséé i ngéda ba yé mbôô, i ngéda ba gwé ngandak moni, ni i ngéda lihaa jap li niñ ikété nsañ. Ndi maséé Yakôbô a mpôdôl hana ma nlôl bé mam mut a mboma mu niñ yé, ndi ni mbuu mpubi. (Galatia 5:22) Kristen i nla toi ba maséé i ngéda i nyi le i nlémél Yéhôva, i noñok ndémbél i Yésu. (Añ Lukas 6:22, 23; Kôlôsé 1:10, 11) Kiki nsôñgô u mboñ le mbebi i lém bañ lambe, hala nyen kristen i nla ke ni bisu i ba maséé to ikété mandutu. A nimis bé maséé ma to i ngéda a nyep tole i ngéda a nkwo kon. A ntééda ki maséé mé i ngéda ba ndegle nye, tole i ngéda bôt bé ba lihaa ni bôt bape ba nkolba nye. Maséé més ma nkônde keñep, hiki ngéda bôt ba noode tômbôs hémle yés. Mandutu ma momasôna ma ñunda toi le di yé bañga banigil ba Kristô. (Matéô 10:22; 24:9; Yôhanes 15:20) Inyu hala nyen, Yakôbô a tila le: “A lôk kéé, ngéda ni mboma manoodana nya ndi nya, yoña hala ni maséé momasôna.”​—Yakôbô 1:2.

7-8. Inyuki hémle yés i nkônde let i ngéda di mboma mandutu?

⁷ Yakôbô a nti njom ipe i i ntinde bikristen i hônba mandutu. A nkal le: “Ngéda hémle nan i nkôhna manoodana, hala a nti hônba.” (Yakôbô 1:3) Di nla hégha mandutu ma nkwél bés ni i hié ba ngwélél inyu ligis kei ba ñuu pansoñ. I ngéda ba mal ôô yo ndi ba ha yo malép i nhol, i témb i let. Nlélém kiki i pansoñ i, i ngéda di nhônba manoodana, hémle yés i nkônde let. Inyu hala nyen Yakôbô a tila le: “Hônba i nlama mélés nson wé, le ndi ni ba nyonok, ni boñok mam momasôna loñge.” (Yakôbô 1:4) I ngéda di ntehe le mandutu ma nlédés hémle yés, hala a mboñ le di hônba mo ni maséé.

⁸ Mu kaat yé, Yakôbô a mpôdôl ki ngim mam i i nla boñ le di nimis maséé més. Mambe, ni lelaa di nla yémbél mo?

9. Inyuki di gwé ngôñ ni pék?

⁹ Ndutu: Me nyi bé kii me boñ. I ngéda di mboma mandutu, di nlama bat Yéhôva mahôla inyu yoñ makidik ma ma nlémél nye, ma ma nhôlôs lôk kéé yés i bôda ni i bôlôm, ni ma ma nhôla bés i tééda ndéñbe yés. (Yérémia 10:23) Di gwé ngôñ ni pék ha ngéda i, inyu yi kii di boñ ni lelaa di timbhe baoo bés. Ibale di nyi bé kii di boñ, di yé le di nôgda wee di nhel kayéle di nimis maséé més.

10. Inoñnaga ni kaat Yakôbô 1:5, kii di nlama boñ inyu bana pék?

 ¹⁰ I yom u nla boñ: Bat Yéhôva pék. Ibale di ngwés hônba mandutu ni maséé, di nlama bat Yéhôva ikété masoohe le a ti bés pék inyu yoñ makidik malam. (Añ Yakôbô 1:5.) Kii di nlama boñ ibale di nôgda wee Yéhôva a ntimbhe bé masoohe més? Yakôbô a nkal le di nlama “ke ni bisu i bat yo” Nyambe. Yéhôva a ga waa bé emble bés ibale di ntéñbe i bat nye pék. A ga ôm bé bés nsohi. Ndi a ga “ti bés yo i nya i nloo hihéga.” (Tjémbi 25:12, 13) A ntehe mandutu di mboma, a nkônôl ki bés ngoo, a yé bebee i hôla bés. Ñ, hala a nti bés maséé! Ndi lelaa Yéhôva a nti bés pék?

11. Kii ipe di nlama boñ inyu bana pék?

¹¹ Yéhôva a nti bés pék ni njel Bañga yé. (Bingéngén 2:6) Inyu bana pék, di nlama nigil Bibel ni bikaat bi ntôñ. Di nlama ndik bé yônôs boña wés ni yi. Ndi di nlama bii mam di nigil bisélél mu niñ yés. Yakôbô a tila le: “Yilnana banôgôl bañga, ha ndik baemble bé.” (Yakôbô 1:22) I ngéda di noñ maéba ma Djob, di nyila mut a ngwés nsañ, di ga ba bé mut a nai ndik le ba boñ mam kii a ngwés, di ga ba ki nyonok ni konangoo. (Yakôbô 3:17) Bilem bini bi ga hôla bés i yémbél to imbe ndutu di mboma ibabé i nimis maséé més.

12. Inyuki i yé nseñ i tibil yi Bibel?

¹² Lipôdôl li Djob li yé kiki léman, i i nhôla bés i yi kii di nlama kodol i niñ yés, ni lelaa di kodol yo. (Yakôbô 1:23-25) Kiki hihéga, i ngéda di nigil Bibel, di nla nôgda le di nlama nigil gwel bésbomede. Ni mahôla ma Yéhôva, di nla nigil i gwel bésbomede i ngéda bôt ba ñunbaha bés  tole i ngéda di mboma mandutu. Ibale di gwé ñemlima, hala a ga hôla bés i ba nwee i ngéda mandutu ma nai. Hala a ga hôla ki bés i tibil ôt pék inyu yoñ makidik malam. (Yakôbô 3:13) Kinje loñge jam i tibil yi Bibel!

13. Inyuki di nlama nigil ndémbél i bagwélél ba Djob ba kôba?

¹³ Ngim mangéda di yé di yi i yom di nlama keñgle i ngéda di mal hôs. Ndi i suklu i, i nyék bés ndôndôô. Loñge njel i bana pék i yé le di ôt biniigana mu mam malam ni mabe bôt bape ba bi boñ. Inyu hala nyen Yakôbô a nti bés makénd i nigil ndémbél i bôt ba kôba Bibel i mpôdôl kiki bo Abraham, Rahab, Hiôb, ni Élia. (Yakôbô 2:21-26; 5:10, 11, 17, 18) Bagwélél ba Yéhôva bana ba bi pam i yémbél mandutu ma ma bé le ma boñ le ba nimis maséé map. Ndémbél yap i hônba i ñunda le ni mahôla ma Yéhôva, yak bés di nla pamba.

14-15. Inyuki di nlama boñ biliya i héya pééna miñem nwés?

¹⁴ Ndutu: Pééna miñem nwés. I yé i pam ngim mangéda le di nok bé ngim jam Bibel i niiga. Tole i nla pam le Yéhôva a timbhe bé masoohe més kiki di hoñlak. I nya mam i, i nla boñ le di kahal bana pééna mu ñem wés. Ibale di nyoñ bé bitelbene i héya i pééna i ñem wés, i nla tômbôs hémle yés, i ôbôs yak maada més malam ni Yéhôva. (Yakôbô 1:7, 8) I pééna i, i nla yak boñ le di nimis botñem yés.

¹⁵ Ñôma Paul a bi hégha botñem i bikristen ni hikoba hi sitima. (Lôk Héber 6:19) Ngéda nop a no ni ngui, a ban-ga mbuk mbebi, hikoba hi nhôla sitima i yén siñ. Ndi hikoba hi nla ndik ba nseñ ibale hi tiñi i sitima. I ngéda mañglét mi nje nsañ bikei u ngwel sitima, mi nla kit wo. Nlélém, pééna miñem nwés i nla tômbôs hémle yés. I ngéda mut a gwé pééna ñem, ndi a boma ndééñga, a nla bôdôl hoñol le Yéhôva a ga yônôs ha bé mimbônga nwé. Ibale hémle yés i ntomb, di ga bana ha bé botñem. Yakôbô a kal le, i mut a mpééna “a yé kiki nnoñgo tuye le mbebi i nyuge, i ndéñghak ki to hee to hee.” (Yakôbô 1:6) I nya mut i i ta bé le i yénak i ba maséé!

16. Kii di nlama boñ ibale di gwé pééna miñem nwés?

¹⁶ I yom u nla boñ: Joo sañ inyu héya i pééna i; lédés hémle yoñ. U ba bañ mut a nkon woñi i yoñ makidik. Dilo di mpôdôl Élia, litén li Yéhôva li bi kon woñi i yoñ makidik. Jon Élia a kal bo le: “Bé n’a migde ipôla bipes biba letee ni ngéda mbe? Ibale Yéhôva a yé Nyambe, wee noña nye!” (1 Bikiñe 18:21) Yak bés di nlama boñ nlélém i len ini. Di nlama boñ nyiña mu bikaat bi ntôñ inyu kwés bésbomede nkaa le Yéhôva a yé Nyambe, le Bibel i yé Bañga yé, ni le Mbôgi Yéhôva i yé litén jé. (1 Tésalônika 5:21) Ibale di mboñ i mam mana momasôna, i pééna di gwé ñem i ga mal, di ga témb di bana hémle i ngui. Ibale di gwé ngôñ ni mahôla, di tehe mimañ. Di nlama hoo yoñ bitelbene bi ngui mu jam li ibale di nsômbôl tééda maséé més mu nson u Yéhôva!

17. Kii i ga pémél bés ibale di nimis makénd?

¹⁷ Ndutu: I nimis makénd. Bañga i Djob i nkal le: “Ibale u ntomb kel ndutu, wee ngui yoñ [y’a ba] titigi.” (Bingéngén 24:10) I buk i Lôk Héber ba ngwélél hana le “i ntomb” i nla kobla le “i nimis makénd.” Ibale di nimis makénd, di ga pala nimis yak maséé més.

18. I hônba wee kii?

 ¹⁸ I yom u nla boñ: Bat Yéhôva le a ti we ngui i hônba. I mbéda bés ñem ngui ibale di ngwés hônba. (Yakôbô 5:11) I buk Yakôbô a ngwélél hana le “hônba” i nhôñlaha bés mut a umi siñ. Di nla ki hoñol sônda i i nkon bé ñoo wé woñi, tolakii ñoo wé a nke ni bisu i jôs nye gwét, a nke bé ngwéé.

19. Kii di nla nigil mu ndémbél ñôma Paul a bi yigle bés?

¹⁹ Ñôma Paul a bi yigle bés ndémbél ilam i hônba ni i ñem ngui. Ngim mangéda, a bé nôgda wee a mbomb. Ndi a bé pam i hônba ni mahôla ma Yéhôva. (2 Korintô 12:8-10; Filipi 4:13) Yak bés di nla bana nlélém ñem ngui ibale di mbat Yéhôva mahôla ni suhulnyuu.​—Yakôbô 4:10.

20-21. Di nla ba nkwoog nkaa ni kii?

²⁰ Di nyi ntiik le, i ngéda di mboma mandutu, hala a nsômbôl bé kal le Yéhôva a nkogse bés. Yakôbô a niiga bés le: “I ngéda manoodana, mut to wada a kal bañ le: ‘Nyambe nyen a noode me.’ Inyule Nyambe a nla bé noodana ni mam mabe, to nyemede a noode bé mut hala.” (Yakôbô 1:13) Ngéda di yé nkwoog nkaa ni maliga ma, di nkônde kôôge Tata wés Nungingii bebee.​—Yakôbô 4:8.

²¹ Yéhôva “a nhéñha bé to heñla.” (Yakôbô 1:17) A bi nit bikristen bi hiai hi bisu mu mandutu ba bé boma, a ga nit yak hiki wada wés i len ini. Di yemhe Yéhôva le a ti bés pék, hémle ni ñem ngui. Ibale di mbat nye hala ikété masoohe, a ga ti bés i mam ma. U nla ba nkwoog nkaa le a ga hôla we i tééda maséé moñ to ikété mandutu!