1-2. Sesuai tu Mateus 5:11, aha do na boi tahilala nang pe masa sitaonon?

HEA do didok Jesus tu akka siseanna boi do nasida marlas ni roha situtu. Alai dipaingot Jesus do tong nasida, ikkon taonon ni nasida do na haccit. (Mat. 10:22, 23; Luk. 6:20-23) Las do rohatta ala boi gabe sisean ni Kristus. Alai boha do molo adong tantangan sian keluarga, penganiayaan sian pamaretta, manang tekanan sian dongan karejo dohot dongan sasikkola? Memang molo masa sisongon i wajar do marsak hita.

² Godang do halak mandok dang mungkin hita marlas ni roha molo dianiaya. Alai Hata ni Debata mandok boi do hita marlas ni roha nang pe dianiaya. Misalna disurat si Jakobus do, boi do hita marlas ni roha jala dang sai marsak molo masa sitaonon. (Jak. 1:2, 12) Jala Jesus pe mandok boi do hita marlas ni roha nang pe dianiaya. (Jaha Mateus 5:11.) Alai boha carana? Marsiajar ma hita sian na disurat ni si Jakobus tu halak Kristen di abad na parjolo. Saonari taulas ma akka tantangan na diadopi halak Kristen di abad na parjolo.

3. Dang leleng dung gabe sisean ni Jesus si Jakobus, aha do na masa?

³ Hea do masa penganiayaan tu halak Kristen na di Jerusalem, dang leleng dung gabe sisean ni Jesus si Jakobus adek tirina i. (Ul. 1:14; 5:17, 18) Tikki mate dibunu si Stepanus, godang do halak Kristen na lari sian kota i. “Gabe marserak ma sude sisean i tu sude huta na di Judea dohot Samaria.” Alai dang holan i, adong do na lari sahat tu Siprus dohot Antiokia. (Ul. 7:58–8:1; 11:19) Boi ma tabayangkon songon dia haccitna dihilala nasida tikki i. Nang pe songon i, torus do nasida marbarita na uli manang tudia pe nasida lari. Alani i gabe tamba ma  huria Kristen di godang inganan. (1 Ptr. 1:1) Jala torus dope masa penganiayaan tu nasida.

4. Tantangan aha dope na masa tu halak Kristen di abad na parjolo?

⁴ Godang do sitaonon na diadopi halak Kristen di abad na parjolo. Misalna hira-hira taon 50 M, disuru Kesar Klaudius ma asa sude halak Jahudi maninggalhon Rom. Jadi halak Jahudi naung gabe halak Kristen pe, ikkon dohot do pinda ikkon tinggalhononna do jabuna. (Ul. 18:1-3) Hira-hira taon 61 M, disurat si Paulus do muse taringot halak Kristen di abad na parjolo, na dileai di jolo ni natorop, dipenjarahon, jala dirampok. (Heb. 10:32-34) Gabe godang do sian nasida na marpogos jala marsahit.​—Rom 15:26; Plp. 2:25-27.

5. Sukkun-sukkun aha do na porlu taalusi?

⁵ Andorang so taon 62 M ma disurat si Jakobus suratna i. Di tikki i takkas do diboto ibana akka tantangan na masa tu dongan sahaporseaonna. Dipakke Jahowa ma si Jakobus manuratton poda tu akka dongan sahaporseaonna i, asa toktong nasida marlas ni roha nang pe godang tantangan. Saonari tapareso ma jo surat ni si Jakobus on asa boi taalusi sukkun-sukkun on: Las ni roha na songon dia do na disurat si Jakobus? Aha do na mambahen halak Kristen dang marlas ni roha be? Jala songon dia do bisuk, haporseaon, dohot habaranion mangurupi hita toktong marlas ni roha nang pe gok tantangan?

6. Sesuai tu Lukas 6:22, 23, boasa boi halak Kristen marlas ni roha nang pe godang sitaononna?

⁶ Godang do halak mandok molo godang hepeng, sehat hita, jala las roha ni keluargatta, baru pe boi las rohatta. Alai sian surat ni  si Jakobus taboto ma boi do hita marlas ni roha dang soal aha na masa di ngolutta. Alana las ni roha i parbue ni tondi parbadia do. (Gal. 5:22) Boi do halak Kristen marlas ni roha situtu molo ditiru ibana teladan ni Jesus Kristus jala dibahen ibana las roha ni Jahowa. (Jaha Lukas 6:22, 23; Kol. 1:10, 11) Dipatudos do las ni roha i songon api ni lampu sapporong na torus galak di bagasan kaca nang pe mangullus alogo. Songon i ma las ni roha ni halak Kristen. Dang mittop las ni roha i molo tung pe marsahit manang susa di parhepengon. Jala dang mago las ni roha molo tung pe adong paraloan sian keluarga manang sian na asing. Gariada boi do tamba las ni rohatta nang pe torus adong sitaonon. Alana akka sitaonon i patuduhon na tutu do hita sisean ni Jesus. (Mat. 10:22; 24:9; Joh. 15:20) Alani i do disurat si Jakobus, “Hamu akka donganku, las ma rohamuna molo masa tu hamu akka sitaonon.”​—Jak. 1:2.

7-8. Boasa boi lam togu haporseaotta molo nungnga diuji?

⁷ Dipaboa si Jakobus do boasa boi halak Kristen martahan mangadopi hasusaan. Didok ibana, “Boi do hamu togu molo nungnga taruji haporseaonmuna.” (Jak. 1:3) Dipatudos do sitaonon i songon api na dipakke lao manopa podang. Dung sian api dibahen ma muse podang i tu aek asa lam kuat. Songon i do tong haporseaotta, boi do lam togu molo martahan hita mangadopi godang hasusaan. Alani i do didok si Jakobus, “Molo toktong hamu togu, gabe sun denggan ma hamu di saluhutna jala dang hahurangan manang aha pe.” (Jak. 1:4) Molo lam togu haporseaotta boi ma hita marlas ni roha nang pe godang sitaonotta.

⁸ Di suratna i dipaboa si Jakobus do muse akka na mambahen mago las ni rohatta. Songon dia do hita boi mangatasi i?

9. Boasa porlu hita marbisuk?

⁹ Na mambahen mago las ni roha: Dang taboto aha na ikkon taulahon. Molo dang taboto aha na ikkon taulahon tikki masa sitaonon boi do gabe mabiar hita jala mago las ni rohatta. Alani i molo masa sitaonon porlu do tapangido Jahowa mangurupi hita mambahen keputusan na palasson rohana, na bermanfaat tu dongan sahaporseaon, jala na mangurupi hita torus setia tu Jahowa. (Jer. 10:23) Porlu do di hita bisuk asa taboto aha na ikkon taulahon jala aha na ikkon tahatahon molo adong paraloan.

10. Sesuai tu Jakobus 1:5, aha do na ikkon taulahon molo dang pittor dialusi Jahowa pangidoatta?

¹⁰ Carana manjaga las ni roha: Pangido ma bisuk sian Jahowa. Boi do hita marlas ni roha nang pe masa sitaonon molo tapangido bisuk sian Jahowa asa boi tabahen keputusan na  denggan. (Jaha Jakobus 1:5.) Alai songon dia do molo dang pittor dialusi Jahowa pangidoatta i? Songon na didok si Jakobus, ‘toktong ma i tapangido tu Debata’ alana “burju do Debata mangalehon”. Dang sogo roha ni Jahowa tu hita manang gabe muruk Ibana molo sai torus tapangido bisuk tu Ibana. Jadi asa boi hita martahan tikki masa hasusaan tapangido ma bisuk. (Ps. 25:12, 13) Diida Jahowa do aha na masa tu hita. Boi do dihilala Ibana hasusaatta jala rade do Ibana mangurupi. Pasti las do rohatta mambege i. Alai songon dia do carana Jahowa mangalehon bisuk tu hita?

11. Asa marbisuk hita aha dope na porlu taulahon?

¹¹ Sian Bibel do boi tadapot bisuk ni Jahowa. (Poda 2:6) Ikkon taparsiajari do Bibel dohot publikasitta asa marbisuk hita. Alai dang sae holan i. Ikkon taulahon do aha na taparsiajari i. Didok si Jakobus do asa unang “holan na manangihon hata i”, alai ikkon diulahon do i. (Jak. 1:22) Molo taulahon i gabe boi ma dame rohatta, lambok, jala marasi ni roha. (Jak. 3:17) On ma na mambahen hita toktong marlas ni roha nang pe gok sitaonon.

12. Boasa penting taboto isi ni Bibel?

¹² Tikki tajaha Bibel songon na markaca do hita. Gabe boi ma taida akka na porlu tapadenggan sian diritta jala songon dia cara mangulahon i. (Jak. 1:23-25) Misalna, dung taparsiajari Hata ni Debata gabe taboto ma ikkon tarajai do diritta asa unang mura-mura muruk. Molo diurupi Jahowa do hita, boi do toktong hita lambok tikki adong halak na mambahen hita muruk manang adong masalah na mambahen jut rohatta. Alana molo lambok hita, boi ma denggan tapikkiri masalahta i jala denggan ma hita mambahen keputusan. Ujungna boi ma tapasae masalah i. (Jak. 3:13) Jadi penting hian do taboto isi ni Bibel.

13. Boasa porlu marsiajar hita sian akka halak na disurat di Bibel?

 ¹³ Olo do ra dung tabahen keputusan na sala jala taboto aha akibatna, gabe marsiajar ma hita mambahen keputusan na denggan. Alai dang denggan songon i. Undenggan do molo marsiajar hita sian pengalaman ni na asing. Alani i do disuru si Jakobus hita marsiajar sian si Abraham, si Rahab, si Job, dohot si Elia. (Jak. 2:21-26; 5:10, 11, 17, 18) Boi do torus nasida marlas ni roha nang pe godang sitaononna. Songon nasida hita pe boi do torus marlas ni roha manaon godang hasusaan molo diurupi Jahowa.

14-15. Aha do bahayana molo moru pos ni rohatta?

¹⁴ Na mambahen mago las ni roha: Tikki moru pos ni rohatta. Sipata olo do ra adong informasi na disurat di Bibel na maol dapot rohatta. Manang alus ni Jahowa tu tangiangta dang songon na taharappon. On ma na mambahen moru pos ni rohatta. Molo tapasombu torus songon i boi ma gabe gale haporseaotta jala sega ma parale-aleotta tu Jahowa. (Jak. 1:7, 8) Bahaya do on, boi do gabe dang tapaima-ima be akka janji ni Debata di ari na naeng ro.

¹⁵ Didok si Paulus songon jangkar ni kapal do akka janji ni Debata di ngolutta. (Heb. 6:19) Boi do jangkar mambahen kapal hot di ingananna. Dang maup diboan aek jala dang sappe manabrak batu karang. Alai asa marguna jangkar ni kapal i, dang boi putus i sian rattena. Molo tasikon ratte i gabe mura ma i putus sian jangkarna. Songon i ma tong, molo moru pos ni rohatta gabe gale ma haporseaotta. Jadi tikki adong tantangan gabe mago ma haporseaotta tu akka janji ni Jahowa. Tikki gale haporseaotta mago ma harapanta. Didok si Jakobus halak na ganggu rohana, “dos do i songon galumbang ni laut na niullus ni alogo”. (Jak. 1:6) Halak sisongon i pasti dang marlas ni roha.

16. Tikki moru pos ni rohatta aha do na porlu taulahon?

¹⁶ Carana manjaga las ni roha: Tapatogu ma haporseaotta. Unang ma tapaleleng-leleng moru pos ni rohatta, pittor taatasi ma i. Najolo di jaman ni si Elia hea do moru pos ni roha ni halak Israel jala leleng do dipasombu nasida i. Alani i didok si Elia ma tu nasida, “Sadia leleng nai do hamu mardua roha? Molo Jahowa do Debata na sittong, ihutton ma Ibana. Alai molo Baal do na sittong, ihutton ma i!” (1 Raj. 18:21) Marlakku dope hata ni si Elia on sahat tu hita saonari. Jadi porlu do talului buktina molo Jahowa i do Debata na sittong, Bibel i do Hatana, jala Saksi Jahowa do naposona. (1 Tes. 5:21) Molo taulahon i gabe pos ma rohatta jala togu ma haporseaotta. Molo tong dope dang pos rohatta, tapangido ma asa diurupi sintua hita. Jadi ikkon hatop do i taatasi asa boi hita toktong marlas ni roha manomba Jahowa.

17. Aha do na masa molo mago habaraniotta?

¹⁷ Na mambahen mago las ni roha: Tikki metmet rohatta. Bibel mandok, “Molo metmet roham tikki masa hasusaan, moru ma gogom.” (Poda 24:10) Hata Heber ni ‘marmetmet ni roha’ boi do lapatanna gabe ‘mago habaranion’. Molo mago habaraniotta mago ma las ni rohatta.

18. Aha do lapatan ni hata martahan?

¹⁸ Carana manjaga las ni roha: Pangido habaranion sian Jahowa asa boi martahan. Asa boi hita martahan manaon hasusaan ikkon barani do hita. (Jak. 5:11) Hata “martahan” na dipakke si Jakobus dison, dipakke do i lao mandok sasahalak na martahan jongjong di ingananna. Olo do ra gabe taingot sahalak tentara na barani na tetap jongjong di ingananna jala dang lari tikki ro musu.

19. Aha do na boi taparsiajari sian si Paulus?

¹⁹ Ala barani do si Paulus jala martahan ibana manaon hasusaan gabe sitiruon na denggan  do ibana di hita. Nang pe sipata gale ibana, alai boi do ibana martahan ala dipangido ibana gogo sian Jahowa. (2 Kor. 12:8-10; Plp. 4:13) Molo serep rohatta mangido Jahowa mangurupi hita, boi ma hita barani jala margogo songon si Paulus.​—Jak. 4:10.

20-21. Boasa boi pos rohatta na sai urupan ni Jahowa do hita?

²⁰ Molo masa sitaonon tu hita unang ma tadok na diuji Debata hita. Alana takkas do didok si Jakobus, “Molo masa sitaonon tu sasahalak, unang ma didok ibana, ‘Debata do na manguji au.’ Ai dang boi ujion Debata marhite na jahat jala dang diuji Ibana manang ise pe.” (Jak. 1:13) Molo porsea do hita tu hata i, boi ma lam jonok hita tu Bapakta na di surgo i.​—Jak. 4:8.

²¹ ‘Dang olo muba’ Jahowa. (Jak. 1:17) Molo najolo diurupi Ibana do halak Kristen asa martahan manaon hasusaan, saonari pe pasti urupanna do hita. Tapangido ma tu Jahowa asa dilehon tu hita bisuk, haporseaon, dohot habaranion. Ai lehononna do pangidoatta i. Pos ma rohatta sai urupanna do hita asa toktong marlas ni roha nang pe godang sitaonon.