1-2. Imnis mnuk ḇero Matius 5:11, moḇsa koḇaḇir raya fafisu kosmai samswen nabore?

YESUS ikofen ḇe manfamyan ḇyesya nari sismai raryaḇ kaku. Ḇape, Yesus ikofen nari sismai kandera kako. (Mat. 10:22, 23; Luk. 6:20-23) Komarisen kukro kakḇe Kristus manfamyan ḇyesi. Imbape kakḇe manfamyan ḇyedi ido, na kosmai roi ḇedwarek ro kina koḇesi, pamarenta sifrur kandera ko, bati koḇesya ro rumfarkor ḇaido ro moḇ kofararur rona sidif ko fa kofrur sasar. Kokara roi nane ido, na komgakwarek manggunko.

² Fyorno ido, snonggaku nari sismai raryaḇ ḇa rofyor sifrur kandera si. Imboi, Refo ikofen roi eḇese. Imnis ra, Yakobus fyas ḇo doḇe rofyor kosmai fafrowes ḇaido samswen, na kosusu ḇa mboi kodworen pdef. (Yak. 1:2, 12) Ma Yesus doḇe fandun fa kona aski rofyor sifrur kandera ko. (Wasya Matius 5:11.) Moḇsariso koryaḇ pdef fafisu kosmai samswen nabore? Ro farkarkor ine, nari kawos farkarkor ḇefandun ro Yakobus syap ḇyedi faro snonggaku Kristen ḇero abad randak sya. Ḇape kawos na ḇaime, rwama kawos ḇepon fafrowes ḇaido samswen risai snonggaku Kristen ansi sismai ro ḇepon iwara na.

3. Fyoro ḇa rofyor Yakobus dakḇe Yesus manfamyan ḇyedi rosai ḇeḇejadi ya?

³ Fyoro ḇa rofyor Yakobus, Yesus naek pari ḇyedi dakḇe Yesus manfamyan ḇyedi, snonggaku Kristen ḇero Yerusalem sismai kandera. (Kis. 1:14; 5:17, 18) Ma rofyor  smun Stefanus fa imar, ḇebor sya sifrar sibur kota ani ma ”sikam sibur sfamok sup Yudea ḇesiper ma Samaria,” isof ro Siprus ma Antiokhia kako. (Kis. 7:58–8:1; 11:19) Snonggaku kristen ansya sismai samswen nabore. Ḇape, siryaḇ fa sbaryas pdef abar ḇepyum ro moḇ sra ro na. Inja, sidang ḇeyores babo nabor nasya ro moḇ anna. (1 Ptr. 1:1) Imbape samswen nabor nasya wer nari ḇekur si.

4. Samswen risai wer ḇekur snonggaku Kristen ro abad randak sya?

⁴ Samswen risai wer ḇekur snonggaku Kristen ro abad randak sya? Indokada ro taun 50 M, Kaisar Romawi Klaudius iwan fa snonggaku Yahudi syakam sibur Roma. Inja, snonggaku Yahudi ḇeḇe Kristen kwar sibur rum sena ma sra ḇe moḇ ḇese. (Kis. 18:1-3) Indokada ro taun 61 M, Manwawan Paulus ikofenḇair min Kristen ḇyesya sonef si ma sifrur mamyai si ro ḇarpon snonggaku sya, sisun si ḇe bui, ma sun roiebor sena. (Ibr. 10:32-34) Ma imnis ra ḇesesya, sino sisya sesabarar ma sismai dafdufe.​—Rm. 15:26; Flp. 2:25-27.

5. Fakfuken-fakfuken risai monda na kokarem na?

⁵ Rofyor Yakobus fyas syap ḇyedi taun 62 M ḇaime, ifawi roi naek srar ḇyedi sismai nakam. Yahwe fyarkin Yakobus i fa ḇyuk anun roro syap ḇyedi insama naek srar ḇyedi siryaḇ pdef fafisu sismai samswen. Rwama kawos Yakobus syap ḇyedi ma kokarem fakfuken-fakfuken nane: Raryaḇ risai Yakobus ikofen ya? Rosai na ḇefrur snonggaku Kristen oso iryaḇ wer ḇa? Ma moḇsa fawawinanem, kakyar, ma makak ḇa nafnoḇek ko fa koryaḇ pdef rofyor kosmai samswen?

6. Imnis mnuk ḇero Lukas 6:22, 23, rosai ḇefnai fa snonggaku Kristen siryaḇ pdef rofyor sismai samswen nabore?

⁶ Snonggaku soḇe sismai aski ḇaido raryaḇ fyor sidafduf ḇa, pipi sena nabore, ma kina sena nakain pyum. Imboi, raryaḇ Yakobus ikofen ro dine iso ḇar oser ro Allah rur ḇesren Ḇyedi, ma raryaḇ ḇeradine nasya snar roi kosmai anna ḇa. (Gal. 5:22) Snonggaku Kristen oso nya raryaḇ ḇaido ḇyeaski kaku kukro ifrur Yahwe imarisen ma iso Yesus nyan ḇepyum ḇyena. (Wasya Lukas 6:22, 23; Kol. 1:10, 11) Raryaḇ ani imnis ra for ḇesak ro padamara oso. For ani imbrer ḇa boi isak ker kukro wam ma mekem nawufpum i ḇa. Rarirya kako, kona samswen nabor ro kenem koḇena yo, na koryaḇ pdef. Koduf ke kona pipi ba ke, na nafrur raryaḇ koḇena napromesbur ko ḇa. Kina koḇesi ḇaido snonggaku ḇese sonef ko roḇaido sidwarek ko raryano, na kofasnai raryaḇ ya pdef. Fafisu ḇesampum konsya imbe sifrur samaido raryaḇ koḇena nambrer, raryaḇ ani na isber syadi wer. Fyor kosmai roi ḇedwarek snar kakyar koḇena ido, nfasnai koma Kristus manfamyan ḇyesi ko. (Mat. 10:22; 24:9; Yoh. 15:20) Injariso Yakobus fyas ḇo doḇe, ”Naek srar ayesi, rofyor mkosapi ro fafrowes ḇeḇor, mkokarana imnis aski oso.”​—Yak. 1:2.

7-8. Rosai na kosmai fyor kofarmku ro samswen ḇekur ko na?

⁷ Yakobus ikofenḇair roi ḇese ḇefnai snonggaku kristen simarisen samswen nkur si, ḇemarḇak syadi na kako. Fyas ḇo doḇe, ”Snar mkofawi, mboi manasnasen ḇekur kakyar mkoḇena nbuk ḇaḇenamu faro mko.” (Yak. 1:3) Samswen anna namnis ra roi ḇefrur sumber oso pember ḇyedi nako syadi. Fyor se i fa isam ma naprim ido, sumber ani pember ḇyedi na inako syadi wer. Rarirya kako, kofarmku ro samswen koḇena ido, kakyar koḇena nari nako syadi. Injariso Yakobus fyas ḇo doḇo, ”Ma ḇaḇenamu ani ḇyuk bon ḇemku, insa mkomnis ma mkosiper ma mkananjar awer roi ono kako kada.” (Yak. 1:4) Kakuḇeri, samswen ḇekur ko na nafrur kakyar koḇena nako syadi wer. Kofawi na ido, na kofarmku ma koryaḇ pdef fafisu kosmai samswen.

⁸ Ro Yakobus syap ḇyedi, ikofenḇair kako roi na ḇefrur fa koryaḇ wer ḇa. Roi ḇedwarek risai Yakobus dap nane, ma rosai na kofrur insa kosmai na wer ḇa?

9. Rosai ḇefnai fa kofandun fawawinanem ya?

⁹ Samswen ya: Wafawi roi imbe wafrur na ḇa. Rofyor kosmai samswen, na kun snemuk ḇefrur marisen Yahwe, kosambraḇser naek srar koḇesi, ma ḇefnoḇek ko fa kosouser pdef. (Yer. 10:23) Kofandun fawawinanem insama kofawi rosai na kofruri ma rosai na kokofen ḇe ḇesampum konsya. Kofawi roi imbe kofrur na ḇa ido, na koḇesneso. Nafrur ko fa kona raryaḇ wer ḇa.

10. Imnis mnuk ḇero Yakobus 1:5, rosai na kofruri insa kona fawawinanem?

¹⁰ Roi wafrur ya: Wor fawawinanem ro Yahwe I. Kor fawawinanem insa kun snemuk ḇepyum. Kor ido, na kofarmku ma koryaḇ pdef fafisu kosmai samswen. (Wasya Yakobus 1:5.) Ḇape, koḇaḇir Yahwe kyarem ḇeri nadi koḇena ḇa ido rarso? Yakobus doḇe ’kor’ ḇesya kwar. Yahwe imsor ḇaido fyafayaf ḇa rofyor kor fawawinanem ro I. Kma koḇedi ro nanggi nari ”ḇyuk nabor kaku” fyor koḇenadi ḇo kor fawawinanem ḇefnoḇek ko fa kofarmku. (Mz. 25:12, 13) Myam samswen koḇena, ifawi sneḇair koḇena, ma imarisen kaku fa ifnoḇek ko. Na komarisen kukro kofawi roi ine! Inja, moḇsa Yahwe ḇyuk fawawinanem ḇe ko rai?

11. Imbe kona fawawinanem ido rosai na kofrur ya wer?

¹¹ Yahwe ḇyuk fawawinanem roro Wos Ḇyedi. (Ams. 2:6) Imbe kona fawawinanem ido, kofarkor kaku Allah Wos Ḇyedi ma syap-syap ḇeknam ro Refo. Imboi kofarkor mondama namnis ḇaime. Kofrur kako rosai kofarkor na. Yakobus fyas: ”Mkuffarmyan wos ani ma mkorower monda awer.” (Yak. 1:22) Koso Allah  ananun Ḇyena ido, na kokain pyum kuker snonggaku ḇesesya, swaruser koḇena napyum, ma kofasnai sawarwar ya. (Yak. 3:17) Rari-rari ḇepyum nane na nafnoḇek ko fa kofarmku ma koryaḇ pdef fafisu kosmai samswen.

12. Rosai ḇefnai fa kosmai payamyum fyor kofawi pyum Refo ya?

¹² Allah Wos Ḇyena namnis ra fanin, kokmambir kaku ko ma rosai na kofrur ya. (Yak. 1:23-25) Imnis ra, kofarkor Refo kwar ido, kofawi fandun fa kofarmku masasor koḇena. Snar Yahwe ifnoḇek ko, inja kofasnai sne ḇemayar fafisu sifrur pyum ko ḇa ḇaido fyor snonggaku sifrur fa komsore. Snar kofasnai sne ḇemayar, kofawi moḇsa kofrur mnis samswen koḇena kuker payamyum. Kona swaruser ḇepyum syadi wer ma wos snemuk kun na napyum. (Yak. 3:13) Inja, kofawi pyum Refo ido na kosmai payamyum nabore!

13. Rosai ḇefnai fa kofarkor ro snonggaku ḇeḇefas ro Refo nyan ḇepyum sena?

¹³ Fyorno ido kofarkor fa kobinggwanbur roi oso rofyor kofrur sasar oso kwar. Imbape ima nyan ḇesamswen dirya. Nyan ḇepyum fa kosmai fawawinanem iso kofarkor ro snonggaku ḇese nyan ḇepyum sena ma nyan sasar sifrur kwar na. Iso ḇefnai fa Yakobus danun ḇe ko fa koso nyan ḇepyum ro snonggaku sfas ro Refo sya imnis ra Abraham, Rakhab, Ayub, ma Elia. (Yak. 2:21-26; 5:10, 11, 17, 18) Yahwe manfamyan ḇesouser Ḇyansine bisa sfarmku ro samswen ḇefrur siryaḇ wer ḇa ya. Ro roi sfasnai nane kofarkor snar Yahwe na dakfnoḇek ko fa kakfrur raris moḇ sikenem rai.

14-15. Rosai ḇefnai fa koḇeḇirḇar ker awer?

¹⁴ Samswen ya: Ḇeḇirḇar ker. Ro ras ḇe ras, na kofawi pyum Allah Wos Ḇyena kam ḇa. Roḇaido Yahwe na kyarem nadi koḇena ḇa imnis ra marisen koḇena. Inja nafrur fa koḇeḇirḇar. Koḇeḇirḇar faro roi nane ker ido, na nafrur fa kakyar koḇena nsambraḇ wer ḇa ma wis koḇena kuker Yahwe napyum ḇa kako. (Yak. 1:7, 8) Na nafrur fa saneraro koḇena faro ras ḇarpon nayama napromesbur ko.

¹⁵ Manwawan Paulus ḇyukimnis saneraro koḇena kuker yore. (Ibr. 6:19) Sbuk yor fa sikserepen wai oso fyor wam doḇer myun ma ikserepen wai ani insama dek ro karui nabori ḇa. Ḇoi yor ani ikserepen pyum rofyor rante sikyawek yor ma wai ani imuk ḇa. Imnis praf ḇefrur rante ani inako ḇa, kokako fyor koḇeḇirḇar ker ido na nafrur kakyar koḇena nako wer ḇa. Fyor snonggaku oso ismai roi ḇedwarek, ma ḇyeḇirḇar ker ido na ikyar faro Yahwe asas Ḇyena wer ḇa. Kakyar koḇena napromes ido, saneraro koḇena kako napromes. Imnis ra Yakobus ikofen ḇeḇeḇirḇar sya ”simnis kuker ḇak ro soren, wamya dun mura-muma”. (Yak. 1:6) Snonggaku oso ḇyerarirya ido, na ismai raryaḇ noḇaḇeri!

16. Rosai na kofruri rofyor koḇeḇiḇar ker?

¹⁶ Roi wafrur ya: Ḇeḇirḇar ker awer; swambraḇser kakyar bena. Ro Elia fafisu ḇyedi, Yahwe kawasa Ḇyesi sakḇeḇirḇar kako. Elia ikofen yoḇ si, ”Isof ro fafisu risai mgoḇe sne mandu? Yahwe ima Allah ḇekaku dirya ido mgoso I. Mboi Baal iso ḇekaku ya ido, mgoso i!” (1 Raj. 18:21) Imnis ra baboine kako. Fandun fa kofarkor nabor wer fa kokyar syadi snar Yahwe ima Allah ḇekaku dirya, Refo ima Wos Ḇyedirya, ma Saksi-Saksi Yahwe sima kawasa Ḇyesirya kako. (1 Tes. 5:21) Kofrur roi nane ido na koḇeḇirḇar wer ḇa ma kakyar koḇena nako. Insama koḇeḇirḇar  ker awer ido kor fafnoḇek ro penatua sya. Imbe koryaḇ pdef ro fararmyan koḇena ḇe Yahwe ido kun snemuk ro kirine ḇeri!

17. Kona ḇaḇeḇri wer ḇa ido rosai na kosmai ya?

¹⁷ Samswen ya: Ḇesanekar. Refo doḇe, ”Ausya ḇesanekar ro ras samswen ya ke, nari samambraḇ bedi nabro fawase.” (Ams. 24:10) Ro wos Ibrani wos ”sanekar” kyurfasnai ḇe ”ḇaḇeḇri wer ḇa.” Nwa ḇaḇeḇri wer ḇa ido, fasaw kaku wasmai raryaḇ wer ḇa.

18. Wos ḇaḇefarmku kyurfasnai ḇe rosai?

¹⁸ Roi wafrur ya: Wakyar faro Yahwe snar ḇyuk ḇaḇeḇri fa farmku pdef. Kofandun ḇaḇeḇri insama kofarmku ro samswen koḇena. (Yak. 5:11) Yakobus ḇyepake wos ”ḇaḇefarmku” fyasnai ḇe snonggaku oso ḇeyores pdef ro moḇ ḇyedi. Kokarapan snon mamun oso ḇeḇri fa ḇeyores ro moḇ ḇyedi fa myunwarek i ro mbroḇ ḇyesya, imbe smun i yo ikren mgun ḇaḇeri ro moḇ ani.

19. Rosai kofarkor ro manwawan Paulus nyan ḇepyum ḇyena?

¹⁹ Manwawan Paulus fyasnai nyan ḇepyum kaku ro ḇaḇeḇri ma ḇaḇefarmku ya. Fyono ido iryar ḇa kako. Mboi fyarmku pdef snar ikyar Yahwe nari byuk samambraḇ ḇe i. (2 Kor. 12:8-10; Flp. 4:13) Kofasnai kofandun Yahwe fafnoḇek Ḇyeja ido, na kaksambraḇ ma kakḇeḇri.​—Yak. 4:10.

20-21. Rosai kokyar kaku ya?

²⁰ Kokyar kaku snar samswen ḇekur ko nakam ndrama ro Yahwe I ḇa. Yakobus ikofen, ”Rofyor snonkaku oso isma fafrowes ido ikofen awer: Fafrowes ine ryama ro Allah! Snar ḇarḇorya ipok ifrowes Allah ḇa, ma Allah mankundi ifrowespan manseirya ḇa kako.” (Yak. 1:13) Kofawi kakaku ine ido, nari kofanam syadi wer ḇe Mami koḇedi ro nanggi.​—Yak. 4:8.

²¹ Yahwe ima fyarwei ḇa. (Yak. 1:17) Ifnoḇek snonggaku Kristen ro abad randak siwara kwar rofyor sismai samswen, inja na ifnoḇek ko kako. Wor fafnoḇek ro Yahwe insa wana fawawinanem, kakakyar, ma ḇaḇeḇri. Nari kyarem nadi bena kam. Ramnai, wakyar snar nari ifnoḇek ker au fa waryaḇ fafisu wasmai samswen!