1-2. Sā ṙô ngam Mëtiv 5:11, hòṅ sitih inlahen öi yěi kihngen?

KILĒḴNGÔRE ang Yēsū tö yip tamömköröön ò min nö töṙāmölōn takô. Hěnghöre vë-eny nang cha pöri inrē anga-aṅ tö cha min nö meukkūö kanihngen. (Mët. 10:22, 23; Lūk. 6:20-23) Ṙamölōn in ayī-ö töre öi mahaköp in Kristū. Sitih mufē pöri ayī-ö yēḵ hī hāngöre öi kunyāhavö min tö yip aṅpatī re, hakihtuṙen tö ngam sörkör, hōten hī yip hol hī ichūök kinmānö öi kēkö nup tövaich la-en? Lohten öi vöö yěi fēken u.

² Öt hěngtak tarik töṙāmölōn yěn hakihtuṙen. Hōten hī pöri ngam Paipöl öi ṙāmölōn yēḵ hī hakihtuṙen. Sā ṙô Yāköp nö sōten hī öi kihngen ellōn yēḵ hī fukkūi tö nup töṙōlkangen kanihngen, hōten hī pöri öi höng ṙāmölōn. (Yāk. 1:2, 12) Hōten hī inrē ang Yēsū öi ṙāmölōn yēḵ hī kihngen. (Vë-evkūö Mëtiv 5:11.) Sitih inlahen pöri ayī-ö ṙāmölōn pòrô öi kihngen? Teungen in tö sanapṙô e imat ngam chitri kahūich Yāköp. Töi urěh pöri ngëichkö nuk kanihngen yik Kristīön inuk ṙētak anū-ö.

3. Asuh nuk yamih unôichrit inlahen Yāköp nö vītöre nö mahaköp?

³ Ngam ṙētak Yāköp ök kahëm Yēsū nö vītöre nö mahaköp, unôichrit e minë inkihten yik Kristīön aṅ Yerusalem. (Inl. 1:14; 5:17, 18) Fëliyö ang Satēpan, unôichrit e ngaich nö  falngöre yik Kristīön nö kö kū-öre. Parātiyö cha-a nö “i chīṙö Yūta, Samariā inrē,” rīkre yik in cha samöl Saiprös, Antiòk inrē. (Inl. 7:58–8:1; 11:19) Pōyen nuk inkihten yik Kristīön inuk ṙētak anu-ö. Öp töng kū-ö cha pöri iṙūöhen cha-a nö ahangköm tölöök inhānga. (1 Pīt. 1:1) Ōt pöri hēk minë tökiröng kanihngen yamih nö ikūö cha.

4. Asuh nuk tö hēktöre kanihngen yik Kristīön inuk raneh senchurī?

⁴ Ik samyeūheu tö 50 C.E., kētö chööngö ang Klòtīös ngam mahayöng aṅ Rōm, nö hōten yik taṙòkhöre Yahuti nö ṙāngö ngam panam Rōm. Pōyen yik Yahuti ṙama-ang patī re, in cha më Kristīön inrē. (Inl. 18:1-3) Ngaich ik samyeūheu tö 61 C.E., ang Pôl nö kūich chitri nö vë-eny inlaha yik Kristīön nö hakihtuṙen, chaphötvö inrē cha-a nö el chēl, kē-ěyö nuk chehen cha. (Hep. 10:32-34) Rīkre in yik Kristīön mameukkūö yanāichö, invah inrē.—Rōm. 15:26; Filip. 2:25-27.

5. Asuh nup min intöönö tö chööhö sanapṙô tö hī?

⁵ Urēhěkūö ngam samyeūheu tö 62 C.E., ang Yāköp nö kūich ngam chitri re. Kôtamat anga-aṅ tö nuk kanihngen yik holmaneuk re Kristīön. Lökten ò nö uhômhötvö ellōn tö Yāvē nö halēn yik Kristīön, minë mahayööken cha min nö la-al nup yamih kanihngen re. Ta-a töi ngëichkö ṙô ngam chitri kahūich Yāköp, öi chöh sanap ṙô në: Tö sitih inlahen öng ngam ṙanamlōn vahënyö Yāköp? Asuh nup tömihôiṅ nö chatngen tī tö ngam ṙanamlōn ngòh Kristīön? Sitih inlahen ngam mikah, ṙinātö ellōn hēk ngam töt pinhë-eṅkūö nö hayööken hī min la-al nup kanihngen re?

6. Sā ṙô ngam Lūkös 6:22, 23, kūöyòh ang ngòh Kristīön nö ṙamlōn pòrô nö kihngen?

⁶ Ngö lōn ṙung ngòh tarik töre yěn öt vāhavö, hēk pōyen aṅ in tö rupīö, öt la-al kūö re nö el ngam mikūönö, möl anga-aṅ nö ṙāmölōn. Öt kakkö ngam töngatī ṙanamlōn pöri ang Yāköp nö ihih. Hö-ö ngam ṙanamlōn vahënyö ò nöng löktö inup taneunglen hī. Tön ṙòng ngam Töhet Kumlēḵ ngam Tēv pöri angū-ö ngam tö-örheūheu nö ōt pòrô öi öt taneungluṙen tö nup yò-ôvö. (Kal. 5:22) Yěn haṙamlōn Yāvē ngòh Kristīön, asīnken Yēsū inrē, teūngen min anga-aṅ tö ṙanamlōn re, angu-ö takô tökô-en nö ṙanamlōn. (Vë-evkūö Lūkös 6:22, 23; Kòl. 1:10, 11) Sā ṙēngen ngam töhukūö ëaṅvö lāltēn angū-ö ngam töt hōḵ nö nyangngö tö kuföt kumṙah inrē. Ngatī minë kanihngen yamih nö in hī nö ötkô nö kēngö ngam ṙanamlōn hī kahëtö Yāvē. Höng köpsöṙen ngam ṙanamlōn hī pòrô öi vāhavö, öt aṅhav in tö rupīö, hakihtuṙen inrē tö më aṅpatī re, sön nö öt kūöṅnngöre ngam ṙanamlōn hī. Yēḵ hī kihngen tökūö ṙinātö ellōn re, inmeuktö hī angū-ö öi mahaköp in Kristū. (Mët. 10:22; 24:9; Yôh. 15:20) Lökten Yāköp nö ngö ṙô tī nö kūich: “Kahōlö ṙanāmölōn an yěh, tö lōn yīö, yē yīö fukngö i nup töṙōlkangen kanihngen.”—Yāk. 1:2.

7-8. Sitih inlahen öng nö ngönlöre ngam ṙinatö ellōn hī yěn kalaha tö minë kanihngen?

⁷ Vë-eny nang hī ang Yāköp tö lāinyngen ngòh Kristīön nö kūöyòh nöng hōḵ nö hakihtuṙen. Ngö ṙô anga-aṅ: “Ngam kinlaha ngam mikah yīö nö tītö manöiyö” angū-ö. (Yāk. 1:3) Sā ṙēngen öp vët tö haṙāichö nö ikūö tameūyö ngaich ufoviyö, ngëḵlöre hēk angū-ö. Asātu nun minë kanihngen hī nö in ngam tameūyö. Yēḵ hī öi kihngen, ngönlöre hēk ngam ṙinātö ellōn hī. Lökten ang Yāköp nö ngö ṙô: “Hökngen ngam manöiyö nö hateungngö ngam la-enre, hòṅ yīö öi teungten, öt hanātuṙen itö keuheūttöre.” (Yāk. 1:4)Yēḵ hī öi haköplōnre tö në kanihngen nöng mahangönlöm ṙinātö ellōn hī, köptī min ayī-ö töm ṙanamlōn re.

⁸ Ōt pöri minë hēk vahënyö Yāköp imat ngam chitri kahūich ò, minë tömihôiṅ nö chatngen tī tö ngam ṙanamlōn hī. Sitih inlaha öi kò-òren yěn yih anu-ö nö in hī?

9. Kūöyòh öi hòṅ aṅhavin tö ngam mikah?

⁹ Ngam kanihngen: Yěi öt akahakūö tö inlaha re. Yēḵ hī kēḵ nup fësla el ṙūngö minë kanihngen, nup mahaṙamlōn Yāvē, tö reuslöre  alaha tī tö yip holmaneuk hī, mahayööken hī inrē öi haköpngöre in ngam Tēv. (Yar. 10:23) Ngaich hòṅ aṅhav in ayī-ö töm mikah yēḵ hī hòṅ kēḵ nup töngatī fësla. Yēḵ hī pöri min öt akahakūö tö inlaha re, angu-ö min tö mihôiṅ nö kūöṅnngöre tī töm ṙanamlōn hī.

10. Sā ṙô ngam Yāköp 1:5 hòṅ sitih inlahen öi yěi lōntö mikah elmat re?

¹⁰ Tö hòn inlahen meh: Havëkö kūö Yāvē tö mikah. Yēḵ hī hòṅ holtö ṙanamlōn re la-al minë kanihngen re, ngaich hòṅ havëkö kūö Yāvē ayī-ö tö mikah re. Möl min öi lööngö kahë tö nup fësla re. (Vë-evkūö Yāköp 1:5.) Yēḵ hī pöri ngölōn, öt ilööṙen an Yāvē nö kētö sanapṙô chu, ngaich hòṅ sitih inlahen ayī-ö? Hōten hī ang Yāköp öi ‘iṙūöhen vë-ekūö’ ngam Tēv. Ötlöktu ang Yāvē nö tainy nö in hī yěi havëkö kūö ò. “Ötṙāyutī” anga-aṅ nö kētö mikahelmat hī la-al nup kanhihngen re. (Sal. 25:12, 13) Akahalōn takô ang Yāvē tö nup kanihngen hī. Kihngen inrē anga-aṅ yěn meukö hī kihngen. Sitih tī ang pökeh Yāvē nö kētö mikah elmat hī?

11. Hòṅ asuh nup tö hēktöre la-en hī yěi lōntö mikah elmat re?

¹¹ Löktö imat ngam Paipöl tī an Yāvē nö kētö mikah elmat hī. (Inch. 2:6) Lökten yēḵ hī hòṅ teūngen tö mikahelmat re ngaich hòṅ haköpmat ngam Paipöl ayī-ö, vë-ekūö nup līpöre inrē mahayööken hī akaha elnang tö ṙôm Paipöl. Ötkô pöri öi höng haköp tön hòṅ asīnkö nup haköp re inrē. Ngö ṙô ang Yāköp: “Kamëkö kaha ngam ṙô yin yēḵ, un höng hamang.” (Yāk. 1:22) Yēḵ hī min kēkö kaha minë inlēnö aṅmat ngam Paipöl, aṅhavin min ayī-ö töm lanāmen, ṙanëmen, tööḵlö inrē tö miṙēḵlōn. (Yāk. 3:17) Anū-ö min në mahayööken hī la-al nup kanihngenre öi köptī tö ngam ṙanamlōn re.

12. Kūöyòh öi hòṅ chumkūöṙen haköpmat ngam Paipöl?

 ¹² Sā ṙēngen tinmël ön ngam Ṙô ngam Tēv. Hameukhömat hī angu-ö tö nup chūök hī hòṅ halööktit re. (Yāk. 1:23-25) Sā meh öre yěm tö veūtö tanāinyö, ngaich vë-ekūöm Paipöl më-eṅ, kòtökūö ngaich më-eṅ tö inlahen re öm hòṅ ṙapkö ngam tanāinyö re. Höng Yāvē tö mihôiṅ nö harunö hī öi ṙapkö tanāinyö re. Yěn ōt min nup vamīlö tanāinyö hī, hayööken hī min anga-aṅ öi ṙēmen la-al u. Lööngö kahë min ayī-ö tö fësla yěi ötveūtö tanainyö. (Yāk. 3:13) Kò-en in yöölen yěi chumkūöṙen haköpmat ngam Paipöl!

13. Kūöyòh öi hòṅ ngëichkö minë inchōḵ elmat re imat ngam Paipöl?

¹³ Halööten hī ngam Paipöl öi vë-ekūö inlaha nuk tövai la-en yik tarik ngaich haköplu öi in u. Haköplu inrē inuk vanāichö cha. Pōyen më inchōḵ elmat hī imat ngam Paipöl tö sā hē Aprahām, Rahap, Yōp, ngaich Ĕlaicha. (Yāk. 2:21-26; 5:10, 11, 17, 18) Pōyen nuk kanihngen yamih nö ikūö cha. Öt halöngngenre pöri cha-a nö chatngen tī töm ṙanamölōn re. Hayööken cha ang Yāvē, ngatī inrē min nö hayööken hī.

14-15. Kūöyòh nö ötkô nö höökiṙen minë kintööngölōn hī?

¹⁴ Ngam Kanihngen: Yēḵ hī katööngalōn. Lohten nö ōt nup muh ṙô imat ngam Paipöl töt mikah elnang hī. Hēk pi-a öi öl teūngen tö sanapṙô re vë-ekūötēv. Anu-ö tö mihôiṅ nö tī-ivö tö hī katööngalōn. Ötkô anu-ö nö höökiṙen, pön mihôiṅ nö kūöṅnngöre tī tö ngam ṙinatö ellōn hī in Yāvē. (Yāk. 1:7, 8) Mihôiṅ inrē öi löhlö tī tö ngam maheūṅkköre.

¹⁵ Ngam maheūṅkkö hī, vënyu angu-ö tö Pôl nö sā sanumti nup chōng. (Hep. 6:19) Hēḵ el chanôchö nö meukö la-en ngam sanumti. Hayööken ngam chōng angu-ö nöng hěng kang chūök pòrô nö fööka töm tökalēḵ kuföt. Yěn yëchu pöri ngam sanumti, mihôiṅ angu-ö nöng ilöö laköli. Ngatī ṙengen nup kintööngö lōn hī nö ötkô nö höökiṙen, pön sā ṙēngen yëch anu-ö nö in hī, tömihôiṅ nö kūöṅnngöre tī töm ṙinātö ellōn hī. Ngö ṙô ang Yāköp “ngòh tökatöngalōn nö sā mahūṅvö mai, töfööri tö kuföt nöng halöinyka.” (Yāk. 1:6) Öt hēḵtu nö ṙamölōn ngam tarik töngatī inlahen!

16. Hòṅ sitih inlahen ayī-ö yěn ōt nup kintööngölōn hī?

¹⁶ Tö hòṅ inlahen meh: Hangönlöm ṙinātö ellōnre. Um katööngalōn. Ilööṙen öm kē-ělkūö alahare yěn ōt nup kintööngölōn meh. Inuk ṙētak ök pròfět Ĕlaicha, Katööngalōn yik tarik tö chūök ren ṙātö ellōnre. Halēnö cha ngaich ang Ĕlaicha nö ngö ṙô: “I ṙô-òten öi sökngöre ihôi në tönët ṙinātö ellōn? Yēḵ [Yāvē] nö Tēv, tömrit ò, yěn Pē-al pöri ngaich tömrit ò!” (1 Rā. 18:21) Ngatī ayī-ö töngamuh ötkô öi katööngalōn. Lökten öi hòṅ chöh nup ṙô imat ngam Paipöl nup mahangönlö ngam ṙinātö ellōn hī in Yāvē tö òn tökô-en Tēv, ngaich Ṙô ò ngam Paipöl, ngaich tarik ò yip Vamënyen Yāvē. (1 Tös. 5:21) Yēḵ hī min ngatī inlahen ngaich ngönlöre min ngam ṙinātö ellōn hī.Mihôiṅ öi kēḵ inyööken re in yip minṙöinylen hòṅ minë ṙanamölōn hī nö köp im linöökö lōn Yāvē!

17. Sitih inlahen öi min yěi öt kalēḵ-en la-al nup kanihngen re?

¹⁷ Ngam kanihngen: Yēḵ hī haṙivölōn. Ngö ṙô ngam Paipöl: “Yēḵ meh cheingö ip sakāmö öp [kanihngen] meh, kūöṅnen öp kumlēḵ meh.” (Inch. 24:10) Ngam ṙô “cheingö” nö iṙô Heprāi tö ngö manah angu-ö inrē “öt kalēḵ-en.” Yēḵ meh öt kalēḵ-en  la-al nup kanihngen re, ilöö hö-övö min ngam ṙanamlōn meh.

18. Tö sitih manah öng ngam ṙô manöiyö?

¹⁸ Tö hòṅ inlahen meh: Rātö ellōnre in Yāvē, anga-aṅ min mahayööken meh. Ötkô ayī-ö vöö yěi la-al nup kanihngen re. Hòṅ möi pöri öi la-al u. (Yāk. 5:11) Ngam ṙô “manöiyö” vahënyö Yāköp, ṙôtö öp tarik angū-ö töt hanlöinyken töp kamngö chūök re nö sökhak. Sā inlahen öp kumyung nö öt falngöre pòrô nö meuktö yīhi öp la-al re.

19. Asuh öp haköplö hī in Pôl?

¹⁹ Tövai ang Pôl nö inchōḵ elmat hī. Hēkpī anga-aṅ nö akahaiṙen töre nö öt kaleḵ-en. Ṙātö ellōnre pöri anga-aṅ nö in Yāvē ngaich teūngen tö kumlēḵ re. (2 Kòr. 12:8-10; Filip. 4:13) Ngatī ayī-ö hòṅ havëkö kūö Yāvē tö hinòlṙen re la-al minë kanihngenre.—Yāk. 4:10.

20-21. Asuh öp mihôiṅ ṙinātö ellōn hī?

²⁰ Mihôiṅ in ṙinatu ellōn tö Yāvē nö öt löktu nö kalaha hī. Vë-eny nang hī Yāköp nö ngö ṙô: “Un tarīku tö ngö ṙô yē ò nö kalaha, kalaha chin tö aṅ im Tēv, tön rö-ö an ngam Tēv nö kô nö kalaha tö tötlöök, rö-ö an anga-aṅ nö kalah tarik.” (Yāk. 1:13) Yēḵ hī ṙātö ellōn re im ṙô Yāköp, haröhtöre min ayī-ö in ngam Yöng re aṅ el halīöngö.—Yāk. 4:8.

²¹ Öt haṙīköre ang Yāvē (Yāk. 1:17) Hayööken yik Kristīön misī anga-aṅ nö la-al nuk kanihngen re ngatī min anga-aṅ nö hayööken hī. Hòṅ havëkö kūö ò ayī-ö tö mikah elmat re, ṙinātö ellōnre, töt pinhë-eṅkūöre inrē. Öt löktu anga-aṅ nö öt hang ṙô hī. Hayööken meh min anga-aṅ öm köptī töm ṙanamlōn re pòrô hē el kanihngen!