1-2. Mowiwanana na Mateu 5:11, iyo ninfwanyela woona dhavi makattamiho?

YEZU waharoromeliha anamafwara aye wi agahikana wagalala webaribari. Iyene vina wahawaddela wi abale anadhowegevi amukwelaga agahigumanana makattamiho. (Mt. 10:22, 23; Lk. 6:20-23) Iyo ninowagalala sabwa ya okala anamafwara a Kristu. Mbwenye niniwamo dhavi nigagumanagana makattamiho a ofwara-fwariwa na anamudhi, alamuleli a elabo, obe amarho ehu o’mabasani vina oskola aganikukuselaga okosa elobo yabure? Joziweya wi nigagumanagana makattamiho ninga aba ninokalaga odhugudheyene.

² Attu ena anubuwela wi v’ofwara-fwariwani kavali mwaha wowagalala. Mbwenye Nzu na Mulugu ninonaddela wi ninofwanyela wagalala nigafara-fariwaga. Motagiha Tiago ohinaddela wila ninofwanyela wagalala nigafwanyiwaga makattamiho ottiyana-ttiyana. (Tia. 1:2, 12) Yezu vina ohiloga wila enowodheya iyo wagalala masiki nigafara-fwariwaga. (Kengesa Mateu 5:11.) Ninawodhe dhavi okanavi wagalala masiki na makattamiho? Ninela osunzavo venjene na karta yalebelile Tiago Akristu a vyaka zana dhoroma. Ovano ninfuna none makattamiho agumanana Akristu abale.

3. Txini epadduwile mwa mudhidhi mung’onovi Tiago mukaleliye namafwara wa Yezu?

³ Tiago mbali wa Yezu mukaleliye namafwara, Akristu o Jeruzalemi ahiroma ofwara-fwariwa. (Mer. 1:14; 5:17, 18) Mmaleli opiwa Estevau, Akristu enji ahittawa mu Jeruzalemi, ‘abalaleyela mwilaboni y’o Judeya, Samariya’ vina enooneya ninga  enaya ahithawela wolapela ninga o’Sipro na Antiokiya. (Mer. 7:58–8:1; 11:19) Nigatanalela yali makattamiho manddimuwa vaddiddi agumanana anamafwara. Masiki dhawene, awene anlaleyavi miselu dhapama mpule mwavirani ofiyedha wita milogo mmiburhoni dhottiyana-ttiyana Elabo ya Roma. (1 Ped. 1:1) Mbwenye osogorhowa ahifwanyiwa makattamiho menji.

4. Makattamiho gani mena agumanilena Akristu a vyaka zana dhoroma?

⁴ Movira wa mudhidhi mung’onovi Akristu abale ahigumanana makattamiho awinjiva. Motagiha, waddamela vyaka 50 N.K. [Nsaka na Kristu], Kláudyo Mulamuleli w’o Roma wahilamula wi Ayuda otene avenyemo elabo ya Roma. Eji yahapatta Ayuda ali Akristu ofiyedha ottiya numba dhawa, odhowa otamela miburho dhina dhokala. (Mer. 18:1-3) Yaka ya 61 N.K. murumiwi Paulo wahalebela Akristu akwaye wi awene ahinyimuliwa vattado, anruwaniwa vamentoni va attu vina anfugeliwa mukambura akiwaga dhawa dhotene. (Aheb. 10:32-34) Dhahene ninga attu ena, Akristu anpattiwa na makattamiho a oyelega vina oredda.—Rom. 15:26; Fil. 2:25-27.

5. Ninakule mavuzo gani?

⁵ Tiago mulebeliye karta ntti waddamana yaka ya 62 N.K., wanziwa deretu makattamiho agumanana abali vamodha na arogora. Yehova wahimulabihedha Tiago wi avahe Akristu abale malago agakamihedhile okalavi ohagalelene masiki na makattamiho. Ovano ninfuna nitanaleleni karta ya Tiago vina nakule mavuzo aba: Wagalala gani waloga Tiago? Txini egamuttukuleli Mukristu oyelela wagalala oku? Nanda ononelamo, nroromelo na oliba murima dhinanikamihedhe dhavi okanavi wagalala masiki nigumanagana makattamiho?

6. Mowiwanana na Luka 6:22, 23, Mukristu onfwayelelani wagalala masiki agumanagana makattamiho ottiyana-ttiyana?

⁶ Attu anubuwela wi awene anele okana wagalala agakana egumi yaderetu, muhaku mwinjene vina agakana murenddele na amudhawa. Mbwenye wagalala ologile Tiago onkosa mpaddi wa dhobaala dha muya wokoddela wa Mulugu, kintanala dhimpadduwa mwigumini mwa muttu. (Gal. 5:22) Mukristu onokana wagalala obe ottaba onddimuwa sabwa ya oziwa wila onomwagalaliha Yehova, vina onofara yotagiha ya Yezu. (Kengesa Luka 6:22, 23; Kol. 1:10, 11) Dhahene ninga motto onkala mwari mwa kandiyero ombareleya wi onattime na pevo, wagalala watxibarene onkala mmirimani mwa Mukristu. Iyo kaninayelele wagalala wehu nigahikane muhaku obe nigakala aredda. Iyo kaniyelela wagalala wehu masiki nigabeddiwaga nigafara-fwariwaga na anamudhi obe na attu ena. Amwiddani ehu aganifara-fwaraga wagalala wehu onowunuwavi. Dhoweha dhingumanihuna sabwa ya nroromelo nehu, dhinowoniha kakamwe wi nili anamafwara atxibarene a Yezu. (Mt. 10:22; 24:9; Jo. 15:20) Sabwa ya ejuwene Tiago wahifiyedha oleba dhahi: “Amudhaga, mugafwanyiwa dhawehiwana dhothiyana-thiyana, teyelaní.”—Tia. 1:2.

7-8. Nroromelo nehu ninnikamihedha dhavi nigafwanyiwaga dhoweha?

⁷ Tiago wahiloga mwahaya ongumanelana Akristu makattamiho awinjiva. Iyene ohiloga: “Ziwaní wi ororomela othikiwe, onovaha ovilela.” (Tia. 1:3) Dhoweha dhinoladdanihiwa ninga mujila onotxiwa wi osasanyiwena mbeni. Mujilaya ogaviha onowobana, mbwenye ogavola onkala wovadda. Na mukalelo wakakene, dhoweha dhinovaddiha nroromelo nehu. Nona Tiago ohenjedhedha wi: “Ovilelawá wunuwe mmurimani mwenyu, wi mukale awakwana, owarala, ahinjombeliwa elo.” (Tia. 1:4) Iyo nigona wi dhoweha dhihilibiha nroromelo nehu ninele odhowanavi wagalala wehu.

⁸ Mukartani mwaye, Tiago ohilebamo dhilobo dhiganittukuleli oyelela wagalala wehu. Makattamiho gani aganittukuleli oyelela wagalala wehu nanda ninawodhe dhavi okwaranya?

9. Iyo ninfunelani okana ononelamo?

⁹ Makattamiho: Ohiziwa yokosa. Nigagumanagana makattamiho, ninofwanyela omukuluvela Yehova wi anikamihedhe okosa dhosakula dhinimwagalaliha, dhinapurela abalihu vamodha na arogora, vina dhinanikamihedhe okalavi ororomeleyene. (Jer. 10:23) Iyo ninofwanyela okana ononelamo wi niziwe txini enfwanyelihu okosa vina niziwe wawakula abale aninfara-fwara. Iyo nigahiziwe yokosa ninodha  wubuwela wi kanina nikamihedho mwaha wa makattamiho anifanyile, eji enele onittukulela oyelela wagalala wehu momaguva.

10. Wila nikaane ononelamo txini enfwanyelihu okosa ninga munlogela Tiago 1:5?

¹⁰ Yokosa: Omukumbirhe Yehova ononelamo. Akala ninfuna niwanena makattamiho anifwanyile, voroma ninofwanyela omukumbirha Yehova ononelamo wi niwodhe okosa dhogana dha malago. (Kengesa Tiago 1:5.) Txini enfwanyelihu okosa akala ninowubuwela wila Yehova kanakula malobelo ehu momaguva? Tiago ohiloga wi ninofwanyela okalelavi ntidi ‘omulobagavi Mulugu.’ Yehova kanasilidhiwe nigadidelavi omuloba ononelamo. Vina kanniludduwela. Iyo nigamuloba Babihu wa wirimu ononelamo wi niwanena makattamiho ehu, iyene onele ‘onivaha na murima wotene.’ (Masal. 25:12, 13) Yehova dda ttagaraga, iyene onowiwa opa aganonaga nitabuwaga, nona onokosa elobo txilobo wi anikamihedhe. Obu mwaha wa makamaka onittukulela iyo wagalala! Weyo oniwamo dhavi sabwa ya ononelamo onnivaha Yehova?

11. Elobo gani yina enfwanyelihu okosa wi nikaane ononelamo?

¹¹ Yehova ononivaha ononelamo alabihedhaga Nzu naye. (Gano 2:6) Wila nikaane ononelamo ninofwanyela osunzaga Nzu na Mulugu Bibilia, vina manivuru a nikuru nehu. Ottiya osunzavi, ninofwanyela ovirihamo esile dhinsunzihu munzuni naye. Iyo ninofwanyela ottiya wi ononelamo wa Mulugu alabe mwigumini mwehu, mwa ovirihamo esiledha dhinsunzihu. Tiago ohileba: “Virihaganimo nzu na Mulugu, kamukale anamewaví muvipelaga malago mwanya.” (Tia. 1:22) Iyo nigavirihamo malago anfwanyeya munzuni naye, ninela okala attu a murenddele, okurumuwa, vina a ttagaraga. (Tia. 3:17) Mikalelo esi dhinela onikamihedha owanana makattamiho ehu, nihiyelelaga wagalala wehu.

12. Ekaleleni yamakamaka oziwa deretu nzu na Mulugu?

 ¹² Nzu na Mulugu ninoladdanihiwa na supeyo enikamihedha woona mpaddi onfwanyelihu wogolela vina mukalelo onfwanyelihu okosa ejoya. (Tia. 1:23-25) Motagiha, nigamala osunza Nzu na Mulugu ninofwanyelela wang’anela ekalelo ya omuttu wehu. Na nikamihedho na Yehova ninosunza okala attu ofwaseya nigakaana makattamiho na attu ena obe vagetteya makattamiho annittiya odhugudheyene. Iyo nigakala attu ofwaseya ninela owodha owanana deretu makattamiho angumanihuna. Ninela otanalela mwawakwana-mwene vina ninela okosa dhosakula dhaderetu. (Tia. 3:13) Ninowagalala vaddiddi sabwa ya oziwa pama Nzu na Mulugu!

13. Ninfwanyelelani osunza na dhotagiha dha attu alebiwe Mbibiliani?

¹³ Mudhidhi mwina iyo ninosunzaga orabela okosa elobo yabure nigamala okosa yottega. Mbwenye mukalelo obu wa osunza onovaha mabasa vaddiddi. Mukalelo waderetu wa okana ononelamo bwa osunza na dhotagiha dha attu akosile dhilobo dhaderetu na abale akosile dhabure. Nona Tiago aganipangaga wi nifare dhotagiha dhili Mbibiliani dha attu ninga aba, Abrahamu, Raabe, Job na Eliya. (Tia. 2:21-26; 5:10, 11, 17, 18) Adhari aba ororomeleya a Yehova ahigumanana makattamiho agawakile wagalala. Dhotagiha dhawa dhinowooniha wi na nikamihedho na Yehova ninela okosa yakakene.

14-15. Sabwaya jani kaninfwanyela opwaza esile dhinaganyedhihu?

¹⁴ Makattamiho: Waganyedha esile dhinroromelihu. Mudhidhi na mudhidhi, ninodhaga orutxiwa ononelamo dhilobo dhina dhili mBibiliani. Esi dhigapadduwa dhinodhaga wita waganyedha, nigapwaza esile dhinaganyedhihu, dhinele wobaniha nroromelo nehu vina dhinele wika mandano ehu vangovini. (Tia. 1:7, 8) Omamalelowa dhinele onittukulela oyelela njedhelo nehu na musogorho.

¹⁵ Murumiwi Paulo ohiladdaniha njedhelo nehu na musogorho ninga nángura. (Aheb. 6:19) Nángura ninowodha omwimetxa paporo s’ohittekenyeya ogatatamuwa otagala onddimuwa wa manebe. Mbwenye nángura ninwodha okamihedha akala kabala emageleliwe paporoya jolibene. Kabalaya egavudda, nángurana kaninakamihedhe, na mukalelo wakakene ohifanya dhawakula dha esile dhinaganyedhihu enowobaniha dhinroromelihu. Agafwanyiwa yoweha y’ofwara-fwariwa, muttu wowaganyedha, onowubuwela wi Yehova kanakwanihedhe dhogana dhaye. Akala ninoyelela nroromelo nehu ninoyelela vina njedhelo nehu. Nona Tiago aloga dhahi “Ole onloba aganyedhaga, onoladdana na manebe a mbara, antukumeliwa na pevo oku n’oku.” (Tia. 1:6) Muttu ona yimelelo eji kankana wagalala mwa dhilobo dhotene dhinkosiye!

16. Txini enfwanyelihu okosa akala ninowaganyedha?

¹⁶ Yokosa: Ofwanye dhowakula dha esile dhinaganyedhiwe; olibihe nroromelo nawo. Kukale na mirima minli. Nsaka nikalilewo namavuhulela Eliya, anamavuhulela ena a Yehova yahikala anamirima minli. Eliya wahawaddela dhahi: “Munatxelele lini otopinyaga na nnyalo na nnyalo? Akala Nabuya [Yehova] ddi Mulugu wenyu, mumfware; akala ddi Baal, mfware Baaliyá!” (1 Amwe. 18:21) Masaka abano enopadduwa elobo yakakene. Iyo ninofwanyela opepesa wi ninonelemo nanyene wi Yehova ddi Mulugu webaribari, Bibilia tti Nzu naye vina Anamoona a Yehova tti nlogo naye. (1 Tes. 5:21) Nigakosa dhawene, ninela ogomiha dhowaganyedha dhehu vina ninela olibiha nroromelo nehu. Akala ninoveda nikamihedho wi nigomihe waganyedha enowodheya wakumbirha anddimuwa a mmulogoni. Ninofwanyela  okosa ejoya momaguva wi nidhowegevi nimulabelaga Yehova nowagalala!

17. Txini empadduwa akala ninoyelela oliba murima?

¹⁷ Makattamiho: Wojeya. Nzu na Mulugu ninloga dhahi: “Ogondeya guru vanfwanyiwewe segedho, murima wawo kulibile.” (Gano 24:10) Nzu ntti “ogondeya guru” na elogelo ya Ebrahiko, nintapulela muttu “ottuwile oliba murima.” Weyo ogayelela oliba murima, momaguva-mwene onoyeleela wagalala wawo.

18. Txini entapulela ovilela?

¹⁸ Yokosa: Omukuluvele Yehova iyene onele wuvaha oliba murima wi ovilele. Iyo ninofuna oliba murima nigagumanagana dhoweha. (Tia. 5:11) Tiago alogaga mazu aba “ovilela” ondana mobuwelo wa muttu onkalavi owimelene pwi masiki agumanagana makattamiho. Eji enonubutxedha munyakoddo woliba murima ondidelavi owana na amwiddani aye, ohiniyelela mundduni masiki epadduwe elobo txilobo.

19. Ninsunzavo eni na yotagiha ettiyile murumiwi Paulo?

¹⁹ Murumiwi Paulo ohinittiyedha yotagiha yaderetu vaddiddi, ya oliba murima vina ovilela. Masaka mena iyene wankala awobanene. Mbwenye iyene wandowavi avilelaga sabwa ya nikamihedho navahiwiye na Yehova. (2 Kor. 12:8-10; Fil. 4:13) Enowodheya iyo okalavi ovilela vina oliba murima na oviyeviha nigaziwa wi ninofuna nikamihedho na Yehova.—Tia. 4:10.

20-21. Iyo ninfwanyelela okuluvela eni?

²⁰ Iyo ninofwanyela oziwa wi makattamiho annipatta onnittottela kahiye Yehova. Tiago ohinikuluveliha wi: “Muthu onfwanyiwa manyengetho, kaloge: “Ddi Mulugu onddinyengetha”, vowi Mulugu kanehiwa na obure, vina kanimukukusela muthu wira dhabure.” (Tia. 1:13) Iyo nigakuluvela mazu aba ninela okana mandano ofiyedheya na Babi wehu wa wirimu.—Tia. 4:8.

²¹ ‘Yehova kansadduwa.’ (Tia. 1:17) Iyene owakamihedha Akristu a vyaka zana dhoroma mmakattamihoni agumananina, onele vina omukamihedha muttu ddi muttu wa iyo masaka abano. Kahiye yorutxa omukumbirha Yehova wi anivahe ononelamo, nroromelo, vina oliba murima. Iyene onele wakula nlobelo nawo. Ottiya ejo, kakuluvela wi Yehova onele wukamihedha okanavi wagalala masiki na makattamiho ottiyana-ttiyana!