1-2. Thenge la Mataio 5:11, nemene la aqane tro sa goeëne la itre jol?

 HNEI Iesu hna thingehnaeane laka, tro la itretre drei nyidrë a madrin. Ngo hnei nyidrëti fe hna qaja ka hape, tro angatr a cile kowe la itre jol. (Mat. 10:22, 23; Luka 6:20-23) Tru la madrine së ngöne la easa xötrethenge Keriso. Ngo tune kaa e kola icilekeu hnene la itre atrene la fami së, maine qanangazo së hnene la itre mus, maine ngöne la kola huli së hnene la itre sine huliwa maine sine ini pena? E cili, tro hë sa kucakuca me hnehengazo.

² Pëkö ka madrin ngöne la kola traqa la itre jol. Ngo celë hi la hna qaja hnei Tusi Hmitrötr. Hnei Iakobo hna cinyihane ka hape, tha tro kö sa kucakuca ngöne la itre itupath, ngo loi e tro pe sa madrin. (Iako. 1:2, 12) Ketre, öni Iesu ka hape, madrine së ngöne la kola axösisi së. (E jë la Mataio 5:11.) Haawe, nemene la nyine tro sa kuca matre tro palahi sa madrin ngöne la itre jol? Tro sa ce wang la hna qaja hnei Iakobo ngöne la tusi hnei angeic hna cinyihane kowe la itre pane Keresiano. Ngo tro sa pane ce wang la itre jol hnei angatr hna cile kow.

3. Nemene la ka traqa thupene la Iakobo a nyiqane xötrethenge Iesu?

³ Ame ngöne lo ijine Iakobo, trejin me Iesu, a nyiqane xötrethenge nyidrë, hna elë la etrune la itre ka icilekeu. (Itre hu. 1:14; 5:17, 18) Ketre, thupene la hna humuthi Setefano, hnene la itre Keresiano hna kötr “kowe la itre nöj  ne Iudra me Samaria,” uti hë e Kupero me Anetioka. (Itre hu. 7:58–8:1; 11:19) Drei la ketre jol ka tru koi angatr! Ame pe, hnei angatr palahi hna catre cainöj, matre nyimutre la itre ekalesia hna acil ngöne la itre nöje cili hna musinëne hnei Roma. (1 Pet. 1:1) Ngo hetre itre xaa jol palakö ka troa traqa.

4. Nemene la itre xaa jol ka traqa kowe la itre pane Keresiano?

⁴ Nyimutre la itre jol ka traqa kowe la itre pane Keresiano. Ame lo 50 M.K., hnei Kalaudio, joxu ne Roma, hna helëne la angetre Iudra qa Roma. Celë hi matre hnei angatr hna nue la itre hnalapa i angatr matre troa mel ngöne la ketre nöj. (Itre hu. 18:1-3) Ame lo 61 M.K., hnei Paulo aposetolo hna cinyihane ka hape, alanyimu la itretre dreng hna qanangazone me akalabusin, nge hna thapa la itre mo i angatr. (Heb. 10:32-34) Ketre, ame la itre xaa Keresiano ke, hna tithi angatr hnei mec maine pena pëkö ewekë i angatr.—Rom. 15:26; Fil. 2:25-27.

5. Nemene la itre hnying hne së hna troa sa?

⁵ Hnei Iakobo hna cinyihane la tusi angeic qëmekene lo 62 M.K. Celë hi matre, atre hnyawa hi angeic la itre jol hna cile kowe hnene la itre trejin. Hnei Iehova hna upi Iakobo troa cinyihane la itre eamo ka lolo, ka troa xatua angatr tro palahi a madrin ngöne la itre jol. Haawe, tro sa ce ithanatane la tusi Iakobo me sa la itre hnying celë: Nemene la madrine hna qaja hnei Iakobo? Nemene la ka troa thapa la madrinene la ketre trejin? Nge nemene la aqane troa xatua së hnene la inamacan, me lapaune, me catr, matre tro palahi sa madrin ngöne la itre jol?

6. Thenge la Luka 6:22, 23, pine nemene matre itre Keresiano a madrin ngöne la itupath?

⁶ Ame koi itre xan, tro sa madrin e pëkö meci së, nge tru hnei mo së, nge ka lolo la aqane imelekeu së memine la fami së. Ngo ame la madrin hna qaja hnei Iakobo, tre, ketre igötranene la wene la ua i Akötresie, nge tha ka xulu kö qa ngöne la itre ewekë ka traqa ngöne la mele së. (Gal. 5:22) Itre Keresiano a madrin ngöne la angatr a amadrinë Iehova me nyitipu Iesu. (E jë la Luka 6:22, 23; Kol. 1:10, 11) Eje hi, ceitu la madrine celë memine la ukahlokin eë ne la laam laka, ka mele palahi ej ngacama kola enyi me manie. Ketre tune fe, easë palahi a madrin, ngacama hna tithi së hnei mec maine pëkö ewekë së pena maine kola icilekeu me hnyimasai së hnene la itre fami së me itre xan. Kolo pe a acatrene la madrine së. Eje hi, kola amamane hnene la itre itupath hne së hna cile kowe pine la lapaune së laka, itre nyipi Keresiano së. (Mat. 10:22; 24:9; Ioane 15:20) Celë hi matre hnei Iakobo hna cinyihane ka hape: “Madrin atraqatre jë ange trejin, e kola traqa koi nyipunie la itre itupath.”—Iako. 1:2.

7-8. Nemene la thangane ka loi hne së hna kapa qa ngöne la itre itupath?

⁷ Hnei Iakobo hna qaja la ketre kepin matre itre Keresiano a cile catr ngöne la itupath. Öni angeic: “Ame la kola tupathe tune lai la lapaune i nyipunie, nyipunieti lai a inine troa xomihni.” (Iako. 1:3) Ijije hi tro sa aceitunëne la itre itupath memine la kola dreu fao. Thupene la kola dreuthe la fao, ej a catr. Ketre tune fe, ame la easa xomihnine la itre jol, kola acatrene la lapaune së. Celë hi matre öni Iakobo: “Nue pi tro la thiina cili, ene la xomihni, a apexejene la huliwan ej, matre pexeje pi nyipunie, me pë engazon ngöne la nöjei götran asë.” (Iako. 1:4) Ame la easa öhn laka, itre itupath a acatrene la lapaune së, kolo lai a xatua së troa madrine me xomihnine la itre jol.

⁸ Ame ngöne la tusi angeic, Iakobo mina fe a qaja la itre jol ka troa thapa la madrine së. Nemene la itre jole cili, nge tune kaa la aqane tro sa xomihnine itre ej?

9. Pine nemene matre nyipiewekë tro sa inamacan?

⁹ Jol: Thatre kö së la nyine troa kuca. Ame la kola traqa la itupath, easa canga thele ixatua thei Iehova matre axecië mekun thenge la aja i Nyidrë, nge ka troa hetre eloine kowe la itre trejin, me xatua troa mele nyipici. (Iere. 10:23) Eje hi, nyipiewekë tro sa inamacane matre atre la  nyine troa kuca maine qaja kowe la itre ka icilekeu. Maine thatre kö së la nyine troa kuca, tro hë sa kucakuca nge tro ha patre la madrine së.

10. Thenge la Iakobo 1:5, nemene la nyine tro sa kuca matre troa inamacan?

¹⁰ Nyine troa kuca: Troa sipo inamacane koi Iehova. Maine easa ajane troa xomihnine la itre itupath cememine la madrin, loi e tro sa sipo inamacane koi Iehova matre atreine axecië mekun hnyawa. (E jë la Iakobo 1:5.) Tune kaa e tha canga sa kö Iehova la itre thithi së? Öni Iakobo ka hape, ‘loi e tro palahi sa sipo Akötresie’ la inamacan. Tha tro kö Nyidrëti a wesitr pine la hne së hna lapa thith. Ame la easa sipo inamacane matre troa xomihnine la itre jol, Iehova Keme së a ‘hamën atrun koi së.’ (Sal. 25:12, 13) Öhne hi Nyidrëti la itre jole ka traqa koi së, nge aja i Nyidrëti troa xatua së. Celë hi ka hamë madrine koi së! Ngo tune kaa la aqane hamë inamacane së hnei Iehova?

11. Nemene la ketre nyine tro sa kuca matre troa inamacan?

¹¹ Iehova a ini së jëne la Trengewekë i Nyidrë matre tro sa inamacan. (Ite edomë 2:6) Celë hi matre, nyipiewekë tro sa inine la Tusi Hmitrötr me itre itusi së. Ngo tha tro hmekuje kö sa atre la itre eamo qaathei Iehova. Loi e tro fe sa trongëne itre ej ngöne la mele së. Öni Iakobo: “The tro hmekuje kö nyipunie a itretre drenge la trengewekë, . . . ngo loi e tro fe nyipunie a itretre trongën.” (Iako. 1:22) E cili, tro hë sa tingeting, me menyik, me tiqa hnei utipin. (Iako. 3:17) Celë hi la itre thiina ka troa xatua së troa xomihnine la itre jol me madrin.

12. Pine nemene matre nyipiewekë tro sa atre hnyawa la Tusi Hmitrötr?

¹² Ame la Trengewekë i Akötresie tre,  hna aceitunëne memine la ketre ithulu. Ej a amamane la itre engazo së me xatua së troa saze. (Iako. 1:23-25) Maine jë, ame la easa ini tus, easa öhne laka, loi e tro sa atreine xomehnöthe la aliene hni së. Jëne la ixatua Iehova, easa inine troa thiina ka menyik ngöne la easa elëhni. Celë hi ka xatua së ngöne la itre jol. Ej a xatua së troa pane mekun me axecië mekune hnyawa. (Iako. 3:13) Haawe, nyipiewekë tro sa atre hnyawa la Tusi Hmitrötr!

13. Pine nemene matre loi e tro sa inine la itre tulu ekö?

¹³ Ame itre xaa ijin, easa tria me xomi ini qa ngöne la itre tria së. Ngo tha celë kö lai nyine troa kuca matre troa inamacan. Loi e tro pe sa xomi ini qa ngöne la itre tulu ka lolo me ka ngazo. Celë hi kepin matre Iakobo a ithuecatre koi së troa xomi ini qa ngöne la itre tulu ekö, tui Aberahama, Rahaba, Iobu me Elia. (Iako. 2:21-26; 5:10, 11, 17, 18) Ngacama hnei angatre hna cile kowe la itre jol ka tru, ngo tha patre kö la madrine i angatr. Eje hi, jëne la ixatua i Iehova, ijije hi tro sa catre xomihnine la itre jol me mele nyipici koi Nyidrë.

14-15. Pine nemene matre tha tro kö sa luelu?

¹⁴ Jol: Easa luelu. Maine jë, tha trotrohnine kö së la itre xaa ini e hnine la Tusi Hmitrötr. Maine pena, tha canga sa kö Iehova la itre thithi së, matre easa luelu. Ngo maine tha canga hmeke kö së, tro ha nanazij la lapaune së nge tro ha thë la aqane imelekeu së me Iehova. (Iako. 1:7, 8) Ketre, tro hë sa luelue göne la itre hnei Iehova hna thingehnaeane elany.

¹⁵ Hnei Paulo hna aceitunëne la mejiune së memine la ketre iuhni. (Heb. 6:19) Ame la kola traqa la ketre wene, tro la iuhni a cilaxome la he wanga troa

thaane eje ngöne la itre menij. Ngo eje hi laka, nyipiewekë troa catr la cein ne la iuhni. Maine troa hetre xojene lai cein, tha tro hë eje lai a catr. Ketre tune fe, maine tro palahi sa luelu, tro hë lai a nanazije la lapaune së. Ketre, ame la easa cile kowe la itre jol, loi e tro sa thupën ke, canga tro hi a paatre la mejiune së kowe la itre hna thingehnaean hnei Iehova. Nge maine pëhë lapaune së, tro fe lai a paatre la mejiune së. Tune la hna qaja hnei Iakobo, ame la atr la luelu ke, “ceitu i angeic me hoke ne gejë hna ufenyin nge hna ufagön.” (Iako. 1:6) Thatreine kö tro angeic a madrin!

16. Nemene la nyine tro sa kuca e traqa ju së luelu?

¹⁶ Nyine troa kuca: Tha tro hmaca kö sa luelu; troa acatrene la lapaune së. Loi e tro sa canga hmek. Ame ngöne la ijine Elia perofeta, hnene la angetre Isaraela hna luelu. Öni Elia koi angatr: “Uti hë eue la tro nyipunie a luelue ngöne la lue mekun? Maine Iehova la Akötesie, xöte thenge anganyidë, nge maine Baala, xöte thenge nyidëti pena.” (1 Ite jo. 18:21) Loi e tro fe sa canga axecië mekun. Loi e tro sa isa ithel matre xecie koi së laka, Iehova la nyipi Akötresie, nge Trengewekë i Nyidrëti la Tusi Hmitrötr, nge thene la itre Temoë Iehova la nyipi hmi. (1 Thes. 5:21) E cili, tha tro hë sa luelu, ngo tro pe sa catre lapaun. Maine easa aja ixatua, loi e tro sa sipon kowe la itre qatre thup. Haawe, catre pi së huliwa i Iehova cememine la madrin!

17. Nemene la thangan e pëhë trengecatre së?

¹⁷ Jol: Easa kucakuca. Öni Tusi Hmitrötr: “E eö a kucakuca ngöne la drai ne aköt, te, co hi la tenge cate i ’ö.” (Ite edomë 24:10) Ame la aliene la hnaewekë “kucakuca” qene Heberu, tre, “tha catre hë tune ekö, pëhë trengecatr troa kuca la ketre  ewekë.” Maine pëhë trengecatre së, tro fe lai a paatre la madrine së.

18. Kola hapeu la troa cile hut?

¹⁸ Nyine troa kuca: Troa sipone koi Iehova la trengecatr ka ijij. Nyipiewekë tro sa hetre trengecatr matre xomihnine la itre jol. (Iako. 5:11) Ame la hnaewekë “cile hut” hna qaja hnei Iakobo, tre, kola qaja la ketre atr ka catr. Maine jë, easa mekun la ketre sooc ka catr. Ngacama kola traqa la itre ithupëjia, ngo tha kötre kö angeic.

19. Nemene la ini hne së hna xom qa ngöne la tulu i Paulo?

¹⁹ Hnei Paulo hna amamai tulu göne la aqane troa catr me cile hut. Eje hi laka, hnei angeic hna hane kucakuca. Ngo pine laka, hnei angeic palahi hna sipo trengecatre koi Iehova, matre hnei angeic hna cile hut ngöne la itre itupath. (2 Kor. 12:8-10; Fil. 4:13) Ijije hi tro sa hane catr me cile hut tui Paulo, e hne së hna thele ixatua thei Iehova.—Iako. 4:10.

20-21. Nemene la ka troa xecie koi së?

²⁰ Tha tro kö sa mekun laka, kola traqa la itre jol ke Akötresieti a ameköti së me haji së. Ngo öni Iakobo: “Hnine la itupath, the tro pi kö ketre a qaja ka hape: “Kola tupathi ni hnei Akötresie.” Ke thatreine kö troa tupathi Akötresie hnene la itre ewekë ka ngazo, nge thatreine kö nyidrë tupathi ketre tune lai.” (Iako. 1:13) Maine xecie koi së la itre trengewekë celë, tro hë sa easenyi catre koi Iehova, Keme së ka tru ihnimin.—Iako. 4:8.

²¹ Ame Iehova ke, “tha ka saze kö nyidrë.” (Iako. 1:17) Hnei Nyidrëti ekö hna xatuane la itre pane Keresiano, haawe, tro fe Nyidrëti lai a xatua së enehila. Loi e tro sa sipo Nyidrëti troa hamëne la inamacan, me lapaune me catr. Nge tro Nyidrëti a sa la thithi së. Eje hi, tro Nyidrëti a xatua së troa madrin ngacama traqa ju hë la itre jol.