1-2. Dɛ mbrɛ Matthew 5:11 kyerɛ no, ɔsɛ dɛ yebu nsɔhwɛ dɛn?

JESUS maa n’ekyirdzifo awerɛhyɛmu dɛ hɔn enyi bɛgye ankasa. Afei, ɔdze kɔkɔbɔ maa hɔn a wɔdɔ no no dɛ wobehyia nsɔhwɛ. (Matt. 10:22, 23; Luke 6:20-23) Ɔyɛ hɛn enyigye dɛ yɛyɛ Christ n’esuafo. Naaso, sɛ ɔkɛba no dɛ hɛn ebusuafo soɛr tsia hɛn, aban dze ɔtaa ba hɛn do, anaa hɛn edwumamufo anaa hɛn skuulfo hyɛ hɛn dɛ yɛnyɛ adze bɔn bi a, yɛbɛtse nka dɛn? Sɛ yɛdwendwen nsɛm a ɔtse dɛm ho a, obotum egya hɛn dadwen, na ntseasee wɔ mu so.

² Nyimpa piinara taa bu ɔtaa dɛ, ɔyɛ biribi a ɔnnsɛ dɛ ɔma hɛn enyi gye. Naaso Nyankopɔn n’Asɛm so kã dɛ, sɛ yehyia ɔtaa a ɔsɛ dɛ yɛma hɛn enyi gye. Dɛ nhwɛdo no, osuanyi James kyerɛɛw dɛ, dɛ nkyɛ yehyia nsɔhwɛ a yɛbɛma wɔahyɛ hɛn do no, ɔsɛ dɛ yebu no enyigye mbom. (Jas. 1:2, 12) Jesus so kãa dɛ ɔsɛ dɛ yɛma hɛn enyi gye ber mpo a yerihyia ɔtaa no. (Kenkan Matthew 5:11.) Yebesi dɛn akɔ do enya enyigye ber mpo a yerihyia nsɔhwɛ no? James ne krataa a ɔkyerɛwee kɛmaa Christianfo a wodzi kan no, sɛ yesusu no mu nsɛm kakraabi ho a, yebotum esũa ndzɛmba pii efi mu. Odzi kan no, hom mma yensusu nsɛndzendzen a dɛm Christianfo no hyiae no ho.

3. Aber a James bɛyɛɛ Jesus no suanyi ekyir pɛɛ no, ebɛn asɛm na osii?

³ Aber a Jesus no nua James bɛyɛɛ osuanyi no, annkyɛr koraa na wɔdze ɔsoɛrtsia baa Christianfo a nna wɔwɔ Jerusalem no do. (Andw. 1:14; 5:17, 18) Aber a wokum osuanyi Stephen no, Christianfo piinara guanee fii kurow no mu na ‘wɔpetsee  kɔr Judea nye Samaria asaase do,’ na owiee ase no, wokyinii kodur Cyprus nye Antioch. (Andw. 7:58–8:1; 11:19) Hɛn adwen nko na yebotum dze ebu nsɛndzendzen ara a nna ɔsɛ dɛ esuafo yi gyina ano no. Naaso wɔyeer hɔnho kãa asɛmpa no wɔ beebiara a wɔkɔree no, na wɔboae ma wɔtsetseew asafo ahorow wɔ Rome Ahenman no mu nyina. (1 Pet. 1:1) Naaso, nna mber a no mu yɛ dzen papaapa da Christianfo a wodzi kan no enyim.

4. Nna ebɛn nsɔhwɛ afofor na ɔsɛ dɛ Christianfo a wodzi kan no gyina ano?

⁴ Nna ɔsɛ dɛ Christianfo a wodzi kan no gyina nsɔhwɛ ahorow ano. Dɛ nhwɛdo no, bɛyɛ afe 50 H.B. no, Rome Ambrado Claudius hyɛɛ dɛ Jewfo nyina mfi Rome. Dɛm ntsi Jewfo a nna wɔabɛyɛ Christianfo no, nna ɔsɛ dɛ ɔkwan biara do no wotu fi hɔn efie na wɔkɔ mbea afofor. (Andw. 18:1-3) Bɛyɛ afe 61 H.B. no, ɔsomafo Paul kyerɛɛw dɛ wɔahyɛ ne mfɛfo Christianfo ahorohoraa wɔ bagua mu, wɔdze hɔn egu efiadze na wɔagye hɔn egyapadze efi hɔn nsamu. (Heb. 10:32-34) Afei so, nna ɔsɛ dɛ Christianfo no gyina ohia nye yarba ano dɛ mbrɛ ɔtse wɔ nyimpa nyina afamu no.​—Rom. 15:26; Phil. 2:25-27.

5. Ebɛn nsɛmbisa na yebenya ho mbuae?

⁵ James kyerɛɛw ne krataa no ansaana afe 62 H.B. reba; dɛm aber no nna onyim nsɔhwɛ a no nuanom no rihyia no papaapa. Jehovah dze no sunsum kaa James ma ɔkyerɛɛw krataa kɛmaa dɛm Christianfo yi, na ɔmaa hɔn afotu pa a nna ɔbɔboa hɔn ma wɔaakɔ do enya enyigye ɔmmfa ho dɛ nna worihyia nsɔhwɛ no. Hom mma yensusu James ne krataa no ho, na yembua dɛm nsɛmbisa yi: Ebɛn enyigye na James kãa ho asɛm no? Ebɛnadze na obotum ama Christiannyi bi aahwer n’enyigye? Ebɛn kwan do  na nyansa, gyedzi nye akokodur botum aboa hɛn ma yaakɔ do enya enyigye ɔmmfa ho mpo dɛ yerihyia nsɔhwɛ no?

6. Dɛ mbrɛ Luke 6:22, 23 kyerɛ no, ebɛnadze ntsi na Christiannyi a orihyia nsɔhwɛ ahorow no botum enya enyigye?

⁶ Bi a nyimpa binom benya adwen dɛ sɛ wonya ebusua asetsena a enyigye wɔ mu, apɔwmudzen papa nye sika pii nkotsee a na wobenya enyigye. Naaso dɛm enyigye a James kãa ho asɛm no yɛ Nyankopɔn no sunsum no aba no ne fã, na onngyina hɛn nsɛm tsebea do. (Gal. 5:22) Sɛ Christiannyi bi nyim dɛ ɔreyɛ dza ɔsɔ Jehovah n’enyi na oridzi Jesus no nhwɛdo ekyir a, ɔma odzi dɛw, anaa onya enyigye mapa. (Kenkan Luke 6:22, 23; Col. 1:10, 11) Tse dɛ lantɛn a wɔasɔ ma ɔredzɛw a hyeed bɔ gya no ho ban ma onndum no, enyigye a ɔtse dɛm no dzɛw wɔ Christiannyi n’akoma mu. Sɛ yɛyar anaa yedzi hia mpo a, enyigye a ɔtse dɛm no nnsɛɛ. Wɔ kwan bi do no, enyigye a ɔtse dɛm no nndum aber a hɛn ebusuafo anaa afofor dzi hɛnho fɛw anaa wɔsoɛr tsia hɛn no. Aber biara a asoɛrtsiafo bɔbɔ mbɔdzen dɛ wobodum hɛn enyigye a ɔdzɛw dɛ gya wɔ hɛn akoma mu no, gya no nndum, mbom no ɔhyerɛn kɛse. Hɛn gyedzi ho nsɔhwɛ ahorow a yehyia no ma ɔda edzi dɛ yɛyɛ Christ n’esuafo ampa. (Matt. 10:22; 24:9; John 15:20) Iyi ntsi, nna James botum akyerɛw dɛ: “Mo nuanom, sɛ hom hwe nsɔhwɛ horow mu a, hom mbu no dɛw koraa.”​—Jas. 1:2.

7-8. Sɛ wɔsɔ hɛn gyedzi hwɛ a, ebɛn mfaso na yenya?

⁷ James kãa biribi fofor a ɔno ntsi Christianfo wɔ ɔpɛ dɛ wobegyina nsɔhwɛ ahorow a no mu yɛ dzen no mpo ano. Ɔkãa dɛ: “Hom gyedzi no nsɔhwɛ yɛ abotar ho edwuma.” (Jas. 1:3) Yebotum dze nsɔhwɛ ahorow a yehyia no atoto gya a ɔtomfo dze bɔ sekan anaa dadze no ho. Sɛ wɔdze sekan no hyɛ gya mu ma ɔdɔ na woyi dze hyɛ nsu mu a, ɔma dadze no yɛ dzen. Dɛm pɛpɛɛpɛ na hɛn so sɛ yegyina nsɔhwɛ ano a, ɔma hɛn gyedzi yɛ dzen. Dɛm ntsi na James kyerɛɛw dɛ: “Hom mma abotar nwie n’edwuma yɛ pɛ, na hom eedzi mu pirim a ɔnnka hom hweeara.” (Jas. 1:4) Sɛ yehu dɛ nsɔhwɛ ahorow a yehyia no ma hɛn gyedzi yɛ dzen a, yebotum dze enyigye egyina ano.

⁸ Wɔ James ne krataa no mu no, ɔsanee kãa ndzɛmba ahorow a obotum asɛɛ hɛn enyigye no mu bi ho asɛm. Ebɛn ndzɛmba na obotum asɛɛ hɛn enyigye, na ebɛnadze na yebotum ayɛ wɔ ho?

9. Ebɛnadze ntsi na yehia nyansa?

⁹ Dza obotum asɛɛ hɛn enyigye: Aber a yennyim dza yɛbɛyɛ no. Sɛ yerihyia nsɔhwɛ a,  yɛpɛ dɛ yɛhwehwɛ mboa fi Jehovah hɔ dze sisi gyinae a ɔsɔ n’enyi, ɔbɔboa hɛn nuanom, na ɔbɔboa hɛn ma yaakɔ do ekura hɛn emudzi mu. (Jer. 10:23) Yebehia nyansa ama yeehu dza ɔsɛ dɛ yɛyɛ nye asɛm a ɔsɛ dɛ yɛkã kyerɛ hɔn a wɔsoɛr tsia hɛn no. Sɛ yennyim dza yɛbɛyɛ a, bi a yɛbɛtse nka dɛ yerunntum nnyɛ hɛn tsebea no ho hwee, na iyi botum asɛɛ hɛn enyigye ntsɛmara.

10. Sɛ yebenya nyansa a, ebɛnadze na James 1:5 kã kyerɛ hɛn dɛ yɛnyɛ?

¹⁰ Dza yebotum ayɛ: Bisa Jehovah hɔ nyansa. Sɛ yebotum dze enyigye egyina nsɔhwɛ ahorow ano a, ɔsɛ dɛ yedzi kan bɔ Jehovah mpaa dɛ ɔmma hɛn nyansa a yehia no ama yeetum esisi gyinae pa. (Kenkan James 1:5.) Sɛ yɛtse nka dɛ Jehovah emmbua hɛn mpaabɔ no amonmu hɔ ara a, ɔsɛ dɛ yɛyɛ hɛn adze dɛn? James kãa dɛ, ɔsɛ dɛ yɛkɔ do ‘bisa’ Nyankopɔn. Sɛ yɛkɔ do ara bisa Jehovah hɔ nyansa a, no bo rummfuw hɛn na ɔrennka hɛn enyim so. Sɛ yɛbɔ hɛn sor Egya no mpaa bisa nyansa a yɛdze begyina nsɔhwɛ ahorow no ano a, ‘ɔdze bɛma hɛn kwa.’ (Ndw. 25:12, 13) Ohu nsɔhwɛ ahorow a yɛrefa mu no, ne yamu hyehye no ma hɛn, na ɔwɔ ɔpɛ dɛ ɔbɔboa hɛn. Nokwasɛm nye dɛ, ɔsɛ dɛ iyi ma hɛn enyi gye! Naaso, Jehovah si dɛn ma hɛn nyansa?

11. Ebɛn adze fofor na ɔsɛ dɛ yɛyɛ ama yeenya nyansa?

¹¹ Jehovah nam n’Asɛm no do ma hɛn nyansa. (Mbɛ. 2:6) Sɛ yebotum enya dɛm nyansa no a, ɔsɛ dɛ yesũa Nyankopɔn n’Asɛm nye Bible ho nwoma ahorow a yɛwɔ no. Naaso sũa a yebosũa adze no ara nko nndɔɔ sõ. Ɔsɛ dɛ yɛdze afotu a Nyankopɔn dze ma hɛn no yɛ edwuma wɔ hɛn asetsena mu. James kyerɛɛw dɛ: “Hom nyɛ asɛm no ayɛfo, na mma hom nnyɛ etsiefo nko.” (Jas. 1:22) Sɛ yɛdze afotu a ɔwɔ Nyankopɔn n’Asɛm mu no yɛ edwuma a, yɛbɛyɛ nyimpa a yɛpɛ asomdwee, yɛwɔ ntseasee, na yɛda ehumbɔbɔr  edzi. (Jas. 3:17) Dɛm su ahorow yi bɔboa hɛn ma yeegyina nsɔhwɛ biara ano, na yaakɔ do enya enyigye.

12. Ebɛnadze ntsi na no ho hia dɛ yesũa Bible no yie?

¹² Nyankopɔn n’Asɛm no tse dɛ ahwehwɛ a ɔboa hɛn ma yehu biribi a yɛtɔ sin wɔ mu a no ho hia dɛ yɛyɛ ho edwuma. (Jas. 1:23-25) Dɛ nhwɛdo no, aber a yeesũa Nyankopɔn n’Asɛm no ewie no, bi a yebohu dɛ ɔsɛ dɛ yenya abotar. Dze nam Jehovah no mboa do no, yehu mbrɛ yebesi ada ɔdwe edzi ber a ebufusɛm bi esi anaa afofor ayɛ adze ma wɔahyɛ hɛn ebufuw no. Osian ɔdwe a yɛda no edzi ntsi, sɛ yehyia nhyɛdo a yɛyɛ hɛn adze wɔ kwan pa do. Yetum dwen adze ho kɔ ekyir na yesisi gyinae a nyansa wɔ mu. (Jas. 3:13) Hwɛ hia a no ho hia dɛ yesũa Bible no yie!

13. Ebɛnadze ntsi na ɔsɛ dɛ yesũasua nhwɛdo pa a nyimpa binom a Bible no kã hɔnho asɛm yɛe no?

¹³ Ɔtɔfabi a, aber a yɛayɛ ndzɛmba bi a ɔmmfata ewie no ansaana yeehu dɛ saana wɔnnyɛ adze dɛm. Ɔba no dɛm a, nna wɔakɛyɛ dɛ gyama ɔsɛ dɛ muoko ka hɛn enyiwa ana yeesũa biribi efi mu. Ɔkwan pa a yebotum afa do enya nyansa nye dɛ yebosũa hɔn a wɔyɛɛ adze pa nye hɔn a wodzii mfomdo no ho adze. Dɛm ntsi na James hyɛ hɛn nkuran dɛ yɛnhwɛ nhwɛdo pa a nyimpa binom a Bible no kã hɔnho asɛm yɛe no. Hɔn mu bi nye Abraham, Rahab, Job, nye Elijah. (Jas. 2:21-26; 5:10, 11, 17, 18) Jehovah n’asomfo anokwafo yinom hyiaa nsɔhwɛ ahorow a nkyɛ obotum asɛɛ hɔn enyigye. Abotar a wɔdze tsimii no ma yehu dɛ, Jehovah bɔboa hɛn ma yeetum ayɛ hɛn adze tse dɛ hɔnara.

14-15. Ebɛnadze ntsi na sɛ hɛn adwen mu yɛ hɛn konsee a, ɔsɛ dɛ yɛyɛ ho biribi?

¹⁴ Dza obotum asɛɛ hɛn enyigye: Aber a hɛn adwen mu yɛ hɛn konsee wɔ dza yɛgye dzi ho. Ofi ber to ber no, bi a ɔbɛyɛ dzen ama hɛn dɛ yɛbɛtse asɛm bi a Bible kã no ase. Anaa bi a Jehovah rummbua hɛn mpaabɔ dɛ mbrɛ yɛhwɛ kwan no. Bi a iyi botum ama hɛn adwen mu aayɛ hɛn konsee. Sɛ hɛn adwen mu yɛ hɛn konsee na yaannyɛ ho hwee a, obotum ama hɛn gyedzi aayɛ mberɛw na asɛɛ yɛnye Jehovah ntamu ebusuabɔ no. (Jas. 1:7, 8) Na obotum mpo asɛɛ daakye ho enyidado a yɛwɔ no.

¹⁵ Ɔsomafo Paul dze daakye ho enyidado a yɛwɔ no totoo sekyɛ ho. (Heb. 6:19) Sɛ po do hɛn nam po do na ehum rutu a, wɔto no sekyɛ mbrɛ ɔbɛyɛ a obegyina fakor amma wɔaannkɛpem ɔbo. Naaso, sɛ sekyɛ no nkɔnsɔnkɔnsɔn a osuo po do hɛn no mu no tsew a, mfaso biara remmba sekyɛ no do. Dɛ mbrɛ nkandar botum ama nkɔnsɔnkɔnsɔn a ɔsa sekyɛ no do aayɛ mberɛw no, dɛmara na hɛn so, sɛ yɛkɔ do ma hɛn adwen mu yɛ hɛn konsee a, obotum ama hɛn gyedzi aayɛ mberɛw. Sɛ obi a n’adwen mu yɛ no konsee no hyia nsɔhwɛ a, gyedzi a ɔwɔ dɛ Jehovah bɛma n’anohoba aba mu no botum asɛɛ. Sɛ hɛn gyedzi sɛɛ a, hɛn enyidado no so bɛsɛɛ. Dɛ mbrɛ James kãe no, nyia n’adwen mu yɛ no konsee no “tse dɛ po asorɛkye a mframa ridzi no akɔnaaba.” (Jas. 1:6) Bi a ɔbɛyɛ dzen papaapa dɛ nyimpa a ɔtse dɛm no benya enyigye!

16. Sɛ hɛn adwen mu yɛ hɛn konsee a, ebɛnadze na ɔsɛ dɛ yɛyɛ?

¹⁶ Dza yebotum ayɛ: Dzi dza ɔma w’adwen mu yɛ wo konsee no ho dwuma; hyɛ wo gyedzi mu dzen. Mma w’adwen nnyɛ wo ntanta. Wɔ nkɔnhyɛnyi Elijah n’aber do no, Jehovah no nkorɔfo hɔn adwen yɛɛ hɔn ntanta. Elijah kãa kyerɛɛ hɔn dɛ: “Hom rigyina adwen ebien ntamu ekodu dabɛn? Sɛ [Jehovah] nye Nyankopɔn a, hom ndzi n’ekyir: sɛ Baal so a, ɔno hom ndzi n’ekyir.” (1 Ahe. 18:21) Ndɛ so dɛmara na ɔsɛ dɛ yɛyɛ. Ɔsɛ dɛ yɛyɛ nhwehwɛmu dze gye to mu dɛ Jehovah nye nokwar Nyankopɔn  no, Bible no yɛ n’Asɛm, na Jehovah Adasefo nye no nkorɔfo. (1 Thess. 5:21) Sɛ yɛyɛ iyinom nyina a, ɔbɛma hɛn adwen esi hɛn pi na ɔbɛhyɛ hɛn gyedzi dzen. Sɛ yehia mboa dze eyi hɛn adwen mu a ɔyɛ hɛn konsee no efi hɔ a, yebotum ebisa asafo mu mpanyimfo no. Sɛ yebotum akɔ do dze enyigye asom Jehovah a, ɔnnsɛ dɛ yɛtwentweɔn hɛn ananadze wɔ dza yɛakã ho asɛm yi ho!

17. Sɛ yɛbɔ hũ a, ebɛn asɛm bɔto hɛn?

¹⁷ Dza obotum asɛɛ hɛn enyigye: Aber a hɛn abaw mu ebu. Nyankopɔn n’Asɛm no kã dɛ: “Sɛ etɔ bahaw wɔ ahohia da mu a, w’ahoɔdzen suar.” (Mbɛ. 24:10) Hebrew kasafua a wɔkyerɛɛ ase “etɔ bahaw” no botum akyerɛ “ebɔ hũ.” Sɛ ebɔ hũ a, ɔbɛsɛɛ w’enyigye ntsɛmara.

18. Sɛ wɔkã abotar a wɔdze tsim a ɔkyerɛ dɛn?

¹⁸ Dza yebotum ayɛ: Fa woho to Jehovah do ma ɔmma wo akokodur a ibotum dze egyina ano. Yehia akokodur ama yeetum egyina nsɔhwɛ ano. (Jas. 5:11) Kasafua a James dze dzii dwuma a wɔakyerɛ ase dɛ “abotar” no, obotum so akyerɛ abotar a wɔdze tsim; dza iyi ma ɔba hɛn adwen mu nye obi a ogyina n’ananmu pintsinn a onnhihim. Bi a yɛdze hɛn adwen bobu sordaanyi a ɔdze akokodur gyina n’atamfo enyim na ɔayɛ krado dɛ orunntu ne nan ɔmmfa ho dza atamfo no bɛyɛ no.

19. Ebɛnadze na yebotum esũa efi ɔsomafo Paul no nhwɛdo no mu?

¹⁹ Ɔsomafo Paul yɛɛ abotar a wɔdze tsim nye akokodur ho nhwɛdo a ɔda nsew. Ɔtɔ da a, nna ɔtse nka dɛ ɔayɛ mberɛw. Naaso osiandɛ ɔdze noho too Jehovah do ma ɔmaa no ahoɔdzen a ohia ntsi, otumii gyinaa ano. (2 Cor. 12:8-10; Phil. 4:13) Sɛ yefi ahobrɛadze mu gye to mu dɛ yehia Jehovah no mboa a, yebotum enya ahoɔdzen na akokodur a ɔtse dɛm.​—Jas. 4:10.

20-21. Ebɛnadze na yebotum agye edzi?

²⁰ Yebotum agye edzi dɛ nsɔhwɛ a yehyia no nnyɛ asotwe a ofi Jehovah hɔ. James ma yenya awerɛhyɛmu dɛ: “Sɛ wɔsɔ obiara hwɛ a, mma ɔnnkã dɛ, Nyankopɔn na ɔsɔ me hwɛ: na bɔn bi nntum nnsɔ Nyankopɔn nnhwɛ, na ɔno so nnsɔ obiara nnhwɛ.” (Jas. 1:13) Sɛ yɛgye dɛm nokwasɛm yi to mu a, yɛbɔtwe abɛn hɛn sor Egya a ɔwɔ ɔdɔ no kɛse.​—Jas. 4:8.

²¹ Jehovah “nnsakyer.” (Jas. 1:17) Ɔboaa Christianfo a wodzi kan no ma wogyinaa hɔn nsɔhwɛ ano, dɛmara na ndɛ so ɔbɔboa hɛn mu biara. Bɔ mpaa dzendzenndzen serɛ Jehovah dɛ ɔmboa wo ma nya nyansa, gyedzi, nye akokodur. Obobua wo mpaabɔ no. Afei, ibotum enya awerɛhyɛmu dɛ ɔbɔboa wo ma aakɔ do enya enyigye ber mpo a irihyia nsɔhwɛ no!