1-2. Dapré Matyé 5:11, kijan pou nou réyaji lè nou ka jwenn éprèv ?

JÉZI pwomèt disip a-y kè tchè a yo té’é kontan toubònman ! Anplis, i di osi kè moun ki enmé-y ké jwenn éprèv (Mat. 10:22, 23 ; Lik 6:20-23). Nou sé disip a Kris é nou kontan sa toubònman ! Kijan nou ka santi-nou lè fanmi an nou bizwen anpéché-nou sèvi Jéova oben lè kanmarad-lékòl an nou oben kolèg-travay an nou bizwen fè-nou fè on biten ki pa bon ? Nou ka tou konprann kè lè nou ka réfléchi asi sé biten-lasa, sa pé angwasé-nou.

² An jénéral, lèwvwè yo ka pèwsékité on moun, tchè a-y pa’a kontan. É poutan, Pawòl a Bondyé ka di-nou kè fò-nou ni tchè-kontan lè nou adan on sitiyasyon konsa. Pa ègzanp, Jak maké kè lè nou ka jwenn éprèv, fò pa nou mèt an tèt an nou kè tout krab-la mò an bari-la. Men okontrè, fò-nou ni tchè-kontan (Jak 1:2, 12). É Jézi di-nou kè fò-nou ni tchè-kontan menmsi yo ka pèwsékité-nou (li Matyé 5:11). Ka nou pé fè pou nou pé ni tchè-kontan menmsi nou ka jwenn éprèv ? Si nou pran tan ègzaminé lèt-la Jak maké ba sé prèmyé krétyen-la, nou ké touvé onlo lidé entérésan ki ké édé-nou réponn a sé kèsyon-lasa. Pou koumansé, an-nou vwè ki difikilté sé prèmyé krétyen-la jwenn.

3. Tibwen tan apré Jak vin disip a Jézi, ka ki pasé ?

³ Jak dèmi-frè a Jézi vin disip a-y é kèlkètan apré, yo koumansé pèwsékité krétyen ki té ka rété Jérizalèm (Akt 1:14 ; 5:17, 18). É lè yo tchouyé Étyèn, onlo krétyen kité Jérizalèm é yochak pran bò a yo. Yo ay an Jidé é an Samari é ni sa ki ay jous a Chipr é a Antyòch (Akt 7:58 – 8:1 ;  11:19). Nou ka tou konprann kè sé disip-la pran bon gaz menm ! Men magrésa, yo té ka préché bon nouvèl-la toupatou yo té ka pasé é sa pèwmèt onlo moun konnèt lavérité. Kifè, té ni onlo lasanblé sé koté-lasa (1 Pyè 1:1). Men, difikilté dèyè potoko mannyé !

4. Ki dòt kalté éprèv sé prèmyé krétyen-la jwenn ?

⁴ Sé prèmyé krétyen-la jwenn onlo éprèv. Pa ègzanp, an 50 a épok an nou, Klòd, pi gwo chèf a sé Women-la mandé sé Juif-la kité Wòm. Kifè, sé Juif-la ki té krétyen-la té oblijé lésé kaz a yo pou ay viv ondòt koté (Akt 18:1-3). Koté 61 a épòk an nou, lapòt Pòl maké kè yo jiré sèwten krétyen, yo mèt-yo lajòl é yo pran tousa ki té ta yo (Ébr. 10:32-34). É anplisdisa, ni sa ki té maléré é ni sa ki té malad (Wom. 15:26 ; Filip. 2:25-27).

5. A ki kèsyon nou ké réponn ?

⁵ Jak maké lèt a-y avan 62 a épòk an nou é i té sav byen ki difikilté sé frè é sè-la té ka jwenn. Jéova pousé Jak maké déotwa konsèy itil pou sé krétyen-la. Konsa, menm lè yo té’é jwenn éprèv yo té’é pé ni tchè-kontan. An-nou ègzaminé lèt-la Jak maké la é an-nou réponn a déotwa kèsyon : Dè ki jwa Jak ka palé ? Ka ki té’é pé anpéché on krétyen ni jwa-lasa ? É si nou ni sajès, si nou ni fwa é si nou ni kouraj, kijan sa pé édé-nou ni tchè-kontan kèlkèswa éprèv nou ka jwenn ?

6. Dapré Lik 6:22, 23, poukwa on krétyen pé ni tchè-kontan poubon menmsi i ka jwenn éprèv ?

⁶ An tèt a onlo moun, sé yenki si santé-la bon, si ou ni onlo lajan é si mennaj a-w  ka maché kè ou ké ni tchè-kontan. Men a pa dè jwa-lasa Jak té ka palé ! I té ka palé dè on kalité ki ka fè pawti a fwi a lèspri a Bondyé. Jwa-lasa pa’a dépann dè sa ki ka pasé adan vi a on moun (Gal. 5:22). Sé lè on krétyen ka fè Jéova plézi é lè i ka suiv ègzanp a Jézi kè i ni tchè-kontan poubon (li Lik 6:22, 23 ; Kol. 1:10, 11). Jwa an nou ka touvé-y kon flanm-difé ki limé adan on lanp a pétwòl. Konm ni on biten ki ka pwotéjé flanm-la, ni lapli-la ni van-la pé pa étenn-li. Menmjan-la osi, nou pé ni tchè-kontan poubon kèlkèswa pwoblèm nou pé jwenn adan vi an nou. Nou pa’a pèd jwa an nou menm lè kò-la pa gè bon oben kè lajan-la ra. É jwa-lasa pa’a disparèt menm lè yo ka fè jé èvè nou oben lè fanmi an nou oben dòt moun bizwen anpéché-nou sèvi Jéova. A chakfwa on moun bizwen étenn jwa-lasa, sé konsi sé chabon i ka mèt anba a-y pou fè-y brilé plis ankò. Lè nou ka jwenn éprèv, sa ka montré kè nou sé disip a Jézikris vréman (Mat. 10:22 ; 24:9 ; Jan 15:20). Sé pousa, Jak maké : « Frè an mwen, lè zò ka kontré tout kalté difikilté, pran sa èvè onpil jwa » (Jak 1:2).

7-8. Poukwa fwa an nou ka vin pi fò lè nou ka jwenn éprèv ?

⁷ Jak ka èspliké poukwa sé krétyen-la paré a andiré difikilté menmsi sé gwo difikilté yo ka jwenn. I ka di kè lè nou ka jwenn éprèv ki ka soukwé fwa an nou, sa ka ban-nou andirans (Jak 1:3). Sé éprèv-la ka touvé-yo kon travay-la yo ka fè la pou fè on mòso asyé vin rèd. Lè yo ka chofé on mòso asyé é kè yo ka lésé-y fwadi apré, sa ka fè-y vin pi solid. Menmjan-la, lè nou ka jwenn éprèv é kè nou ka kontinyé andiré, fwa an nou ka vin pi solid. Sé pousa, mi sa Jak maké : « Lésé andirans-la fè travay a-y, pou zò pé sa ni tousa ki fo é pou zò pa ni défo adan pon domenn » (Jak 1:4). Lè nou ka rann-nou kont kè sé éprèv-la ka fè fwa an nou vin pi solid, nou ka andiré èvè onlo jwa.

⁸ Adan lèt-la i maké la, Jak ka palé dè déotwa biten ki té’é pé fè-nou pèd jwa an nou. Ki biten ésa é ka nou pé fè pou rivé about a yo ?

9. Poukwa nou bizwen sajès ?

⁹ On 1^é biten ki pé fè-nou pèd jwa an nou, sé lè nou pa sav ka pou nou fè. Lè nou ka jwenn éprèv, nou ka mandé Jéova édé-nou pran bon désizyon. Poukwa ? Pas nou vé kè sé désizyon-la nou ka pran la fè Jéova plézi, fè frè é sè an nou dibyen é édé-nou rété fidèl (Jér. 10:23). Nou bizwen sajès pou nou sav ka pou nou fè é ka  pou nou di lè moun bizwen anpéché-nou sèvi Jéova. Si nou pa sav ka pou nou fè, sa pé rivé a dékourajé-nou é sa pé rivé a fè-nou pèd jwa an nou osi.

10. Sèlon Jak 1:5 ka pou nou fè pou nou ni sajès ?

¹⁰ Sa ou pé fè : mandé Jéova sajès. Si nou vé andiré sé éprèv-la nou ka jwenn la èvè jwa, 1^é biten pou nou fè sé priyé Jéova pou mandé-y sajès pou nou pran bon désizyon (li Jak 1:5). Si nou ni lenprésyon kè Jéova pa réponn a priyè an nou tousuit, kijan pou nou réyaji ? Jak ka di kè fò-nou « kontinyé mandé » Bondyé sajès. A pa paskè nou ka ‘mandé Jéova sajès akontinyé’ pou nou konprann kè nou ka anbété-y. I pé’é fè kòlè èvè nou pou sa. Lè nou ka jwenn éprèv, si nou ka mandé Pap’an nou ki an syèl-la sajès, i ké ban-nou-y pou tann-é-konprann pas i sé on ‘Bondyé ki donan’ (Sòm 25:12, 13). I ka vwè lè nou ka jwenn éprèv, i ni konpasyon pou nou é i vé édé-nou. Sèten sa ka mèt onlo jwa an tchè an nou. Men kijan i ka fè pou ban-nou sajès ?

11. Ki dòt biten pou nou fè pou nou pé sa ni sajès ?

¹¹ Pou Jéova ban-nou sajès, i ka sèvi èvè Pawòl a-y (Pwov. 2:6). Pou nou pé sa ni sajès, fò-nou étidyé Pawòl a Bondyé é piblikasyon an nou. Men a pa enki etidyé pou nou étidyé ! Fò-nou fè sa Jéova ka mandé-nou. Mi sa Jak maké : « Fò pa zò vin dé moun ki ka tann sèlman, [...] men fò zò vin dé moun ki ka mèt pawòl-la an pratik » (Jak 1:22). Si nou ka fè sa Bondyé ka mandé, nou ké antann-nou pibyen èvè lézòt, nou ké vin pi rézonab é nou ké aji èvè plis mizérikòd (Jak 3:17). Si nou ni sé kalité-lasa, sa ké édé-nou andiré kèlkèswa éprèv nou ka jwenn é nou pé’é jen pèd jwa an nou.

12. Poukwa fò nou konnèt Labib byen menm ?

¹² Labib ka touvé-y kon on miwa. I ka  édé-nou vwè ola pou nou pwogrésé é kijan nou pé rivé fè sa (Jak 1:23-25). Pa ègzanp, on jou, apré ou fin étidyé Labib, ou pé rann-vou kont kè ou pa ni asé métriz. Grasa Jéova, nou ka aprann aji èvè plis dousè lè on moun oben on pwoblèm ka égri-nou. Lè on moun ka jwenn pwoblèm si pwoblèm, si i ni dousè, i ké sipòté sa pibyen ki on moun ki pa ni dousè. Tèt a-y ké rété asi zépòl a-y. Kifè, i ké pran bon désizyon (Jak 3:13). Sé pousa, fò nou konnèt Labib byen menm !

13. Kijan ègzanp a sèwten sèwvitè a Bondyé ki an Bib-la pé édé-nou ?

¹³ Dépawfwa, ni sèwten moun ki ka di : « Fò ou manké néyé pou ou aprann najé ». Men si sé métòd-lasa, nou ni lentansyon itilizé pou nou ni plis sajès, nou ké soufè ! Vométan nou pran tan ègzaminé ègzanp a sèwten moun ki an Bib-la pas ni sèwten ki aji èvè sajès é toutbiten pasé byen pou yo é ni dòt aprézan ki té sòt é malè rivé-yo. Sé pousa, Jak ka ankourajé-nou pran tan étidyé ègzanp a sèwvitè a Jéova kon Abraam, Raab, Jòb é Éli (Jak 2:21-26 ; 5:10, 11, 17, 18). Yo andiré onlo éprèv ki té’é pé fè-yo pèd jwa a yo. Sa ka montré-nou kè nou osi, nou pé andiré grasa Jéova kèlkèswa éprèv-la nou ka jwenn la.

14-15. Poukwa fò pa nou lésé dout pran lanmen asi nou ?

¹⁴ On 2^èm biten ki pé fè-nou pèd jwa an nou, sé lè sa nou ka kwè po’o byen fon an tèt an nou. Défwa, nou pé ni dimal a konprann on pasaj a Labib. Oben Jéova pa oblijé ka réponn a priyè an nou kon nou té’é vlé. Tousa pé mèt enpé dout an tèt an nou. Si nou pa fè ayen pou woté sa an tèt an nou, sa pé fébli fwa an nou é nou pé’é bon zanmi èvè Jéova ankò (Jak 1:7, 8). É akòz dè sa, nou pé jous rivé a oubliyé èspérans-la nou ni la.

¹⁵ Pòl di kè èspérans an nou ka touvé-y kon lank a bato (Ébr. 6:19). Lè on tanpèt rivé, lank a bato-la ka anpéché dlo-la chayé-y é i ka anpéché bato-la varé asi sé kay-la. Men lank a bato-la pé’é sèvi ayen si chenn a-y pété. Menmjan wouy-la ka pouri chenn-la, menmjan-la osi, sé dout-la ki an tèt an nou la pé fébli fwa an nou. É a moman-lasa, si nou ka jwenn éprèv, nou pé’é ni konfyans an Jéova ankò. É nou pé’é ni konfyans adan sa i ka pwomèt-nou la nonplis. Jak maké kè on moun ki ni dout ka « touvé-y kon vag a lanmè kè van-la ka voyé monté é kè van-la ka pousé an tout sans » (Jak 1:6). Tchè a moun konsa pé pa kontan anponjan !

16. Si nou ni dout an tèt an nou, ka pou nou fè ?

¹⁶ Sa ou pé fè : si ou ni dout an tèt a-w woté-yo ; fè fwa a-w vin pi fò. Fò pa ou tadé pou fè sa. An tan a pwofèt Éli, sé Izraélit-la pa té sav kimoun pou yo adoré vréman. Mi sa Éli di-yo : « Konmen tan ankò zò ké rété an dé lidé ? Si Jéova sé vré Dyé-la, sèvi-y. Men si sé Baal, sèvi-y ! » (1 Wa 18:21). Nou osi, fò-nou aji vit. Fò-nou fouyé adan Labib é adan sé piblikasyon-la pou sa klè an tèt an nou kè Jéova sé vré Dyé-la, kè Labib sé Pawòl a-y é kè Témwen a Jéova sé pèp a-y (1 Tés. 5:21). Sé konsa, nou ké rivé a woté tout dout nou pé ni an tèt an nou é a fè fwa an nou vin pi fò. Si apré nou fè sa, nou ka rann-nou kont kè sé dout-la la toujou, fò nou mandé sé ansyen-la édé-nou. É fò pa nou tadé a fè sa si nou vé kontinyé sèvi Jéova èvè onlo jwa an tchè an nou !

17. Si nou pèd kouraj, ka ki ké rivé-nou ?

¹⁷ On 3^èm biten ki pé fè-nou pèd jwa an  nou, sé lè nou dékourajé. Labib ka di : « Si ou dékourajé lè malè ka rivé, ou pé’é ni onlo fòs » (Pwov. 24:10). Mo ébré la yo tradui la é ki bay « dékourajé » pé ni plizyè sans. Sa pé vé di « pèd kouraj » oben « vin two fèb pou aji ». Si ou pèd kouraj ou pé’é ni tchè-kontan ankò pas yonn pa k’ay san lòt.

18. Ka sa vé di andiré ?

¹⁸ Sa ou pé fè : fè fon asi Jéova pou i pé sa ba-w kouraj-la ou bizwen la pou andiré. Nou bizwen kouraj pou andiré éprèv nou ka jwenn (Jak 5:11). Mo-la Jak sèvi èvè-y la é ki bay « andirans » ka fè-nou sonjé on moun ki doubout on koté é ki pa’a bigidi. Moun-lasa kon on solda ki ni onlo kouraj é ki doubout dwèt. Menmsi lènmi a-y ka vin dèyè a-y pou ataké-y, i pa’a bat dèyè.

19. Ka ègzanp a Pòl ka aprann-nou ?

¹⁹ Pòl té ni onlo kouraj é onlo andirans. Sé on bèl ègzanp ban nou. Délè, i santi-y dékourajé. Men pou i té andiré, i té ka fè fon asi Jéova pou Jéova té bay fòs-la i té bizwen la (2 Kor. 12:8-10 ; Filip. 4:13). Nou osi, nou pé ni fòs-la é kouraj-la nou bizwen la si nou pa’a fè fon asi noumenm é si nou ka rèkonnèt kè nou bizwen Jéova édé-nou (Jak 4:10).

20-21. Ka pou nou mèt fon an tèt an nou ?

²⁰ Lè nou ka jwenn éprèv a pa Jéova ki ka pini-nou. Fò-nou sèten dè sa ! Jak di : « Fò pa ponmoun, lè i anba on éprèv, di : “Sé Bondyé ki ka mété-mwen a léprèv.” Pas pa ni mwayen mété Bondyé a léprèv èvè biten ki pa bon, é Bondyé limenm pa ka mété ponmoun a léprèv èvè dé biten konsa » (Jak 1:13). Si nou sèten dè sa, nou ké vin pibon zanmi èvè Pap’an nou ki an syèl-la é ki plen lanmou (Jak 4:8).

²¹ Jéova ‘pa’a chanjé’ (Jak 1:17). O 1^é syèk, lè sé krétyen-la té ka jwenn éprèv, Jéova té ka édé-yo. Menmjan-la, i ké édé-nou jòdijou osi. Sipliyé Jéova pou i pé sa ba-w sajès, fwa é kouraj. I ké réponn a priyè a-w. Ou pé seten kè i ké édé-w ni tchè-kontan menmsi ou ka jwenn éprèv.