1-2. Matev 5:11 pormonnem, tras soschea vixim amkam koxem disonk zai?

JEZUN aplea xisank te khuxal astole mhunn sanglem. Punn tankam dhumallo pasun sosunk poddttolo mhunn tannem xittkailem. (Mt. 10:22, 23; Lukas 6:20-23) Kristache xis zalolean amkam khuxalkai melltta. Punn amchea familintlim amkam Jehovachi seva korunk dina zalear, sorkar amcher dhumallo haddtta zalear, vo amchea kamachea zagear vo iskolant lok vo bhurgim amcher chukichem tem korunk dobhav ghaltat zalear, amkam koxem bhogtolem? Oslea poristhiti vixim chintun ami uskeunk xoktat.

² Dhumallo ieta tednam ami khuxal ravonk xokonant mhunn choddxe lok chintat. Punn oslea vellar ami khuxal asonk zai mhunn Devachem Utor sangta. Udharonnak amkam tras ietat tednam kainch upai na mhunn chintchea bodlek ami khuxal asonk zai mhunn Jakoban boroilem. (Jak. 1:2, 12) Ani dhumallo ieta tednam ami khuxal asonk zai mhunn Jezun sanglem. (Matev 5:11 vachat.) Tor tras ietat tednam ami koxim khuxal ravonk xoktat? Adlea Kristanvank Jakoban boroilolea chittie thaun ami zaitem xikonk xoktat. Punn poilem, tankam koslea oddchonneancho fuddo korcho poddlo tem polloum-ia.

3. Jezucho sovto bhav Jakob, Kristanv zaun thoddea tempa uprant kitem zalem?

³ Jezucho sovto bhav Jakob, Kristanv zaun thoddea tempa uprant Jerusalemant aslolea Kristanvancher dhumallo ailo. (Itihas 1:14; 5:17, 18) Istevak jivexim marlea uprant, zaitim  Kristanvam xarant ani “Judeiache ani Samarieche bhonvtonnchea ganvamnim ximpoddlim.” Uprant tim Siprus ani Antiok meren pasun pollun gelim. (Itihas 7:58–8:1; 11:19) Tankam zaitea oddchonneancho fuddo korcho poddlo tori astana, jea zagear tim ximpoddlolim thoim tannim urben bori khobor porgott keli ani zaitea zagear sobha suru korunk pasun modot keli. (1 Ped. 1:1) Punn fuddem tankam anik zaitea oddchonneancho fuddo korcho aslo.

4. Adlea Kristanvank anik koslea trasancho fuddo korcho poddlo?

⁴ Adlea Kristanvank veg-vegllea toreche tras sosche poddle. Udharonnak, sumar 50 K.X.-ant, Romi Somrat Klaudius-an soglea Judevank Roma xar soddun vochonk hukum dilo. Tor poile Judev aslolea Kristanvank aplem ghor soddun dusrea eka zagear vochon ravchem poddlem. (Itihas 18:1-3) Sumar 61 K.X.-ant, Kristanvancho opman kel’lo, tankam bondkhonnint ghatlolem ani tancheo vostu luttun vhel’leo tea vixim Paulun boroilem. (Heb. 10:32-34) Tea bhair, her lokam bhaxen, tankam-i goribi ani duensacho fuddo korcho poddlo.—Rom. 15:26; Filp. 2:25-27.

5. Ami khoinchea prosnanche zobab polloitolim?

⁵ 62 K.X.-a poilim, Jakoban apli chitt boroili tednam bhav-bhoinnam koslea trasancho fuddo kortat tem to boro zannam aslo. Tea vellar, tim koxim khuxal ravonk xoktat tea vixim boro sol’lo borounk Jehovan Jakobak prerit kelo. Atam ami Jakobachea chittie thaun hea prosnanche zobab polloum-ia: Jakoban khoinchea khuxalkaie vixim boroilem? Khoinchea karonnak lagon ek Kristanv apli khuxalkai hogddaunk xokta? Ami koslea-i trasancho fuddo korum, tea vellar khuxal ravonk amkam zannvai, bhavarth ani dhir koso modot korunk xokta?

6. Lukas 6:22, 23-a pormonnem, ek Kristanv trasancho fuddo korta tednam pasun to kiteak khuxal ravonk xokta?

⁶ Bori bolaiki, zaito poiso ani familint xanti aslearuch ami khuxal asonk xoktat mhunn lok chintunk puro. Punn Jakob jea khuxalkaie vixim uloilo, ti Devachea povitr xoktecho bhag zaun asa ani eka munxachea poristhiticher adarit na. (Gal. 5:22) Apunn Jehovak khuxal korta mhunn ek Kristanv zannam asta tednam ani Jezuchea dekhin cholta tednam to kallzant thaun khuxal asta. (Lukas 6:22, 23, vachat; Kol. 1:10, 11) Varean uzo palvona zaunk adlea tempar eka divea bhonvtonnim ek kanch astali. Eka Kristanvak asta ti khuxalkai tea divea sarki asa. Ami duent poddlear, amkam poixeanchem unnemponn zalear, amchea famili vo heram thaun opman vo virodh soscho poddlear amcho ho khuxalkaiecho divo palvona. Tachea bodlek, amche virodhi amchi khuxalkai palounk jitlo proitn kortat, titlo amcho ho khuxalkaiecho divo anik porzolltta. Ami amchea bhavarthak lagon trasancho fuddo kortat tednam ami Jezuche khore xis mhunn dakhoun ditat. (Mt. 10:22; 24:9; Juanv 15:20) Takach lagon Jakoban mhunnttlem: “Tumcher jinnosvar koxtt-dogd ietat tednam, tankam lagun ekdom khuxal zaunk tumkam borem karonn asa.”—Jak. 1:2.

7-8. Tras ietat tednam amcho bhavarth koso ghott zata?

⁷ Kristanv khub tras pasun kiteak sosunk toiar astat tachem ek karonn Jakob sangta. To mhunntta: “Osle bhavarthache porikxent . . . tumi odik thir astoleat.” (Jak. 1:3) Amcher ietat te tras ujea sarke asat. Ek tolvar ghott korunk zai zalear ti ujeant gorom korun udkant ghalun thondd kortat. Hea toren tem lokhondd ghott zata. Teach toren, amkam tras ietat tednam ami thiraien vo sosnikaien tacho fuddo kortat zalear amcho bhavarth ghott zatolo. Taka lagon Jakoban oxem boroilem: “Oslea thirponnan tumi soglleanch vattamnim Tache poripurnn xis zaunk pavtoleat, kosloch sugunn tumkam unno ascho na.” (Jak. 1:4) Tor amcher tras ietat tednam, amcho bhavarth anik ghott zata tem polloun, ami te tras khuxalkaien sosunk pavtat.

⁸ Punn ek Kristanv, apli khuxalkai khoinchea thoddea karonnank lagon hogddaunk xokta tem pasun Jakoban aplea chittient sanglem. Teo vostu khoincheo ani tancho ami koso fuddo korunk xoktat?

9. Amkam Jehovachea zannvaiechi kiteak goroz asa?

⁹ Poilem karonn: Kitem korchem tem kollona tednam. Amkam eka trasacho fuddo korcho poddtta tednam, Jehovak manta tosle nirnnoi gheunk ami tachi modot gheunk zai. Tea nirnnoi-a udexim amkam visvaxi ravonk modot zaunk zai ani amchea bhav-bhoinnank-ui faido zaunk zai. (Jer. 10:23) Amchea virodheank kitem zobab diuncho ani ami kitem korchem tem zannam zaunk amkam Jehovachea  zannvaiechi goroz asa. Karonn tea vellar ami kitem korchem tem kollona zalear, ami niraxi zaunk xoktat ani amchi khuxalkai rokddich hogddaunk xoktat.

10. Zannvai mellonk ami kitem korunk zai mhunn Jakob 1:5 sangta?

¹⁰ Kitem korchem: Zannvaie pasot Jehova lagim magat. Bore nirnnoi gheunk Jehova lagim zannvai maglolean, ami amchea trasancho khuxalkaien fuddo korunk xoktat. (Jakob 1:5 vachat.) Punn Jehova amchea magnneancho rokddoch zobab dina oxem amkam dislear ami kitem korunk zai? Deva lagim ‘magot ravat’ mhunn Jakoban sanglem. Ami Jehova lagim zannvai di mhunn magot ravtat tednam to amcher bejar vo ragar zaina, punn to ti amkam “udarponnan” dita. (St. 25:12, 13) To amche tras polloita, tea vixim taka vaitt dista ani to amkam modot korunk sodanch toiar asta. Hem zannam zal’lean amkam kitli khuxalkai melltta! Punn Jehova amkam zannvai koxi dita?

11. Devachi zannvai mellonk ami anik kitem korunk zai?

¹¹ Jehova amkam aplea Utrantlean zannvai dita. (Mho. 2:6) Ti zannvai mellonk ami Bible ani Bible adarit prokaxonancho obheas korunk zai. Punn fokot obheas kelo mhunn puro nhoi, ami Dev sangta tem korunk zai. Hea toren ami Devachi zannvai amchea jivitant apnnaunk pavtolim. Hea vixim Jakob sangta: “Devachem utor fokot aikun tumkanch fottoum nakat, punn Devachea utra pormannem cholat.” (Jak. 1:22) Ho sol’lo apnnailear ami dusream sangata anik chodd xantin, somjikaien ani doiallaien vagonk pavtolim. (Jak. 3:17) Tor he gunn aslolean ami amchi khuxalkai hogddainastana soglea trasancho fuddo korunk xoktolim.

12. Ami Bible bore toren zannam zavop kiteak mhotvacho?

¹² Devachem Utor eka harxea sarkem asa. Karonn ami khoim ani koxem sudharunk zai tem amkam Bible-antlean kolltta. (Jak. 1:23-25) Udharonnak, ami Devachea Utracho obheas  kortat tednam ami amcho rag tabeant dovrunk zai mhunn xiktat. Tor amchea somosiank lagon amkam rag ailear vo lokamnim amkam rag haddlear, ami Jehovachea modotin dulobaien vagonk proitn kortolim. Ami oxem kortat zalear, ami borea toren chintun nirnnoi gheun tea somosiancho fuddo korunk pavtolim. (Jak. 3:13) Khorench, Bible bore toren zannam zavop kitlem mhotvachem!

13. Jehovachea sevokam thaun ami kiteak xikonk zai?

¹³ Thodde pavtti ami kitem korchem nhoi tem ami amchea chukim thaun xiktat. Punn hea toren xikchea bodlek, dusreamnim kitem kelam ani tim khoim chukleant tachea thaun xikop ek bori vatt zaun asa. Taka lagon, Jakoban amkam Abraham, Rahab, Job, ani Elijachea udharonnantlean xikonk urba dilea. (Jak. 2:21-26; 5:10, 11, 17, 18) Jehovachea hea visvaxi sevokamnim apli khuxalkai hogddainastana trasancho fuddo kelo. Ami pasun Jehovachea modotin amchea trasancho khuxalkaien fuddo korunk xoktat mhunn ami tanchea thaun xiktat.

14-15. Amkam aslolea dubhava vixim ami kainch korinant zalear kitem zaunk xokta?

¹⁴ Dusrem karonn: Amchea patienni vixim amkam dubhav astat tednam. Thodde pavtti ami Devachea Utrantlean vachta tem amkam somzona zait vo ami chintlolo toso Jehovan amchea magnneancho zobab diunk na zait. Oslea vellar amkam dubhav ieunk xokta. Punn hea vixim ami kainch korinant zalear, amcho bhavarth halonk xokta ani Jehova sangata amchi ixttagot tuttonk xokta. (Jak. 1:7, 8) Tea bhair, ami fuddaracho bhorvonso pasun hogddaunk xoktat.

¹⁵ Apostl Paulun, amkam aslolo bhorvonso eka nangrak sor kelo. (Heb. 6:19) Vadoll ieta tednam ek tarum khoddpar vochon adollna zaunk nangor taka eka zagear ghott dhorta. Punn nangrak bandloli sankhlli ghott na zalear faido na. Kollmel’li ek sankhlli jea toren tuttonk xokta teach toren amkam aslolea dubhava vixim ami kainch korinant zalear amcho bhavarth tuttonk xokta. Dhumallo ieta tednam dubhav aslolea eka munxacho, Jehovacher ani tachea bhasaunneancher aslolo bhavarth halonk xokta. Tor, amcho bhavarth halta zalear, amcho bhorvonso-i haltolo. Jakoban sanglam toxem dubhav dhortat tim “varean halta-dolta toslea doriachea lhara sarkim” asat. (Jak. 1:6) Tor oslim munxam ghoddie kednanch khuxal asonk xokonant!

16. Amkam dubhav ietat tednam ami kitem korunk zai?

¹⁶ Kitem korchem: Tumche dubhav pois korunk pavl gheiat; ani tumcho bhavarth ghott korat. Fattim-fuddem soronastana rokddench pavl gheiat. Provadi Elijachea disamnim Jehovache lok fattim-fuddem sortale. Elija-n tankam mhunnttlem: “Kedna porian tumi don hoddeancher pai dovrun bhonvtoleat? Sorvespor Dev zalear, Tachoch pattlav korat; punn Baal zalear tache pattlean vochat.” (1 Raz. 18:21) Aiz pasun ami fattim-fuddem soronastana rokddench pavl gheunk zai. Taka lagon, Jehovach Dev zaun asa, Bible tachench Utor zaun asa ani Jehovache Sakxi tache lok asat, hem khatri korunk ami thoddo sodh korunk zai. (1 Tes. 5:21) Ami oxem kortat tednam, ami amche dubhav pois korunk pavtolim ani amcho bhavarth ghott zatolo. Amche dubhav pois korunk ami vhoddilanchi pasun modot gheunk zata. Ami Jehovachi seva khuxalkaien korit ravonk, fattim-fuddem soronastana pavl gheunk zai!

17. Ami dhir soddlo zalear kitem zatolem?

¹⁷ Tisrem karonn: Niraxiponn. Devachem Utor sangta: ‘Vaitt dis, ietat tea vellar tunvem dhir soddlear vo nirax zalear, tujea bollacho kosloch faido zauncho na.’ (Mho. 24:10) Tor, tumi dhir soddlear tumi tumchi khuxalkai hogddaitolim.

18. Sosnikai mhunnttlear kitem?

¹⁸ Kitem korchem: Tras sosunk dhirak lagon Jehovacher patieun ravat. Amcher ietat te tras sosunk amkam dhirachi goroz asta. (Jak. 5: 11)  “Sosnikai” hea utrak Jakoban uzar kelolem Grek utor mhunnttana, ek munis aplea zagear thir ubo ravta hem monant ieta. Hem ami eka soinikak sor korunk zata zo dusman akromonn korta tednam tanchea thaun pollun voichea bodlek to aplea zagear ravon dhiran zhuzot ravta.

19. Pauluchea udharonnantlean ami kitem xikonk zata?

¹⁹ Apostl Paulun dhir ani sosnikai dakhoun ekdom borem udharonn dovorlam. Thodde pavtti apunn oskot asa oxem taka dislem. Punn Jehovacher patielolean tannem taka xokti dili ani to aple tras sosunk pavlo. (2 Kor. 12:8-10; Filp. 4:13) Teach bhaxen, Jehovachea modotichi goroz asa mhunn ami khaltikaien manun ghetat tednam amkam pasun toslich xokti ani dhir mellonk xokta.—Jak. 4:10.

20-21. Ami kitem khatri dovrunk zata?

²⁰ Amcher ietat te tras Devan dil’li xikxa nhoi mhunn ami khatri dovrunk zata. Jakob sangta: “Vaitt korunk apnnacher tallnni ieta tednam, konnench oxem mhonnche nhoi: Dev mhaka he tallnnent ghalta; kiteak vaitt korchi tallnni Devak lagoch na, nhoi mhonn Dev-ui konnakuch vaitt korche tallnnent ghalina.” (Jak. 1:13) Hacher amkam khatri asta tednam ami amchea mogall sorginchea Bapak lagim soronk pavtat.—Jak. 4:8.

²¹ Jehova “kodinch bodolna.” (Jak. 1:17) Tannem poilea xekddeantlea Kristanvank trasancho fuddo korunk modot keli toxi to aiz dor ekleak modot kortolo. Tor zannvai, bhavarth ani dhir di mhunn Jehova lagim magot ravat ani to tumchea magnneancho zobob ditolo. Tednam tumchea trasancho khuxalkaien fuddo korunk to modot kortolo mhunn tumi khatri dovrunk zata!