1-2. Nk’oku olwandiko lwa Matayo 5:11 luyerekene, nka gurhe rhukwanene kubona ebigeregezo?

YESU alilaganyize abanafunzi bage oku bakapatire obusime b’okuli. Anashuba kengusa balala bamuzigire oku bakahurene ebigeregezo. (Mt. 10:22, 23; Lu. 6:20-23) Rhugwerhe omwishingo g’okuba banafunzi ba Kristu. Aliko si, gurhe rhunachiyunva amango abantu b’omulala gwerhu bali bachihangana kurhubuza kukolera Yehova, nk’oburhegesi bwamarhulibuza, changwa nk’abarhukola nabo wala abarhusoma nabo bamarhushumika rhukole ebintu bibi? Kweri amango rhwamawaza kw’ebyola byoshi, rhwakayunva rhulagire.

² Omu bukweri, bantu banene barhabona nk’ebigeregezo byakabalerhera omwishingo. Aliko ntyo kwe Chinwa cha Mungu chirhubwirire rhubibonage. Omufano, omwanafunzi Yakobo aliyandikire okw’ahali h’okuchiyunva rhubabere bwenene amango rhuli rhwahurana ebibazo, rhukwanene rhugwarhe omwishingo. (Yak. 1:2, 12) Na Yesu aliderhere oku rhukwanene kugwarha omwishingo chiro n’amango rhuli rhwalibuzwa. (Osome Matayo 5:11.) Nka gurhe rhwakagenderera kugwarha omwishingo chiro akaba yirhwahurana ebigeregezo? Rhwakayiga binene omu kuganira oku mawazo mageke mali omu maruba Yakobo ayandikiraga Abakristu ba burhanzi. Rhurhange rhuganira oku bibazo abola Bakristu balihurene.

3. Bichi byarhengereraga amango Yakobo ayusa kuba mwanafunzi wa Yesu?

³ Harhalegamaga Yakobo mwene-wabo Yesu amalire kuba mwanafunzi, Abakristu bahwanza kulibuzwa omu Yerusalemu.  (Mdo. 1:14; 5:17, 18) N’amango omwanafunzi Stefano ayirhwa, Bakristu banene barhenga mw’eyola vile, “n’okushandala omu maeneo me Yudeya ne Samariya,” na buzinda bagera hale bwenene, nke Kipro ne Antiyokiya. (Mdo. 7:58–8:1; 11:19) Abanafunzi balihurene bigeregezo binene bwenene. Aliko, bagenderera kuhubiri n’obushiru emyazi minja buli hoshi bajaga, n’ebibaga byahwanziswa buli hoshi omu Burhegesi bwe Roma. (1 Pe. 1:1) Aliko Abakristu ba burhanzi bakashubire kuhurana ebindi bigeregezo bikomere.

4. Bindi bigeregezo bihe Abakristu ba burhanzi bahuranaga?

⁴ Abakristu ba burhanzi balilembere bigeregezo binene. Omu mwaka gwa 50 ntya N.K.Y., Klodiyo Murhegesi we Roma, afukuza Abayahudi boshi omu Roma. Bobola, Abayahudi babaga babere Bakristu bafukuzwa ahamwababo n’okuja lama omu mandi maeneo. (Mdo. 18:1-3) Omu mwaka gwa 61 ntya N.K.Y., entumwa Paulo yayandika okw’Abakristu baliri badukangwa embere z’abantu, kuhebwa omu prizo, n’okunyegwa ebintu byabo. (Ebr. 10:32-34) Na kuguma n’abandi bantu, Abakristu nabo baliri balwisa ehali y’obukene n’obulwala.​—Ro. 15:26; Flp. 2:25-27.

5. Bibazo bihe rhwashubizako?

⁵ Amango Yakobo ayandikaga amaruba mage embere y’omwaka gwa 62 ntya N.K.Y., alimenyere bwinja amalibuko bene-babo na bali-babo baliri bahurana. Kugerera eroho lichesibwa lya Yehova, Yakobo ayandikira Abakristu amahano m’okubarhabala bagenderere kugwarha omwishingo chiro akaba bali bahurana amalibuko. Rhushambalage oku maruba ma Yakobo, rhunashubize ku binola bibazo: Mwishingo gwa nyabachi Yakobo ayandikaga omu maruba mage? Bichi byakarhuma Omukristu aheza ogola mwishingo? Na nka gurhe obwengehe, obwemere, n’obushiru byakarhurhabala rhugenderere  kugwarha omwishingo chiro akaba rhuli rhwahurana ebigeregezo?

6. Nk’oku olwandiko lwa Luka 6:22, 23 luderhere, bichi byakarhuma Omukristu apata omwishingo amango ali ahurana ebigeregezo?

⁶ Abantu bakawaza oku bakapata omwishingo nka bagwerhe amagala menja, furanga zinene, n’obusime omu mulala. Aliko omwishingo Yakobo ayandikire omu maruba, chili chigabi ch’etunda ly’eroho lya Mungu, n’omuntu anapata ogola mwishingo chiro ab’ali omu hali zili gurhe. (Gal. 5:22) Omukristu akapata omwishingo, changwa obusime b’okuli, nk’amenyere okw’ali asimisa Yehova, n’okw’akulikire omufano gwa Yesu. (Osome Luka 6:22, 23; Kol. 1:10, 11) Omwishingo gwerhu gwakahuzanywa n’omuliro gw’etara. Ogola muliro guba gulangirwe oku chiyaga n’oku nvula; che chirhumire gwakabera gunakolerere. Nerhu rhwakagenderera kugwarha omwishingo chiro ebintu byaba gurhe omu kalamo kerhu. Omwishingo guli nk’ogola, gurhahwa amango omuntu amalwala changwa nka nta furanga agwerhe. Rhwanagenderera kugwarha omwishingo chiro n’amango abantu bamarhusuzagura, changwa amango abantu b’omulala gwerhu bamarhupinga. Omwishingo gwerhu gwakakomera bwenene buli mango abantu bamalonza oku rhuguheze. Ebibazo rhuli rhwahurana eju y’obwemere bwerhu, biyerekene oku kweri rhuli banafunzi b’okuli ba Kristu. (Mt. 10:22; 24:9; Yoh. 15:20) Che charhumaga Yakobo ayandika ntya: “Mubone byoshi oku guli mwishingo, bene-berhu, amango mwamahurana ebigeregezo bya ngasi lubero.”​—Yak. 1:2.

7-8. Nka gurhe obwemere bwerhu bwakakomera amango bwamageregezwa?

⁷ Yakobo ayerekene eyindi mpanvu erhumire Abakristu baba bali tayari kulembera ebigeregezo bya ngasi buko. Aderhere ntya: “Engeso egeregezwe y’obwemere bwenyu, enalerha okulembera.” (Yak. 1:3) Ebigeregezo byakahuzanywa n’omuliro gukoleswa omu kuchula echuma m’omupanga. Amango echuma chidugurhire bwenene n’okuhozwa, omupanga gwanakomera. Konakuguma, amango rhuli rhwalembera ebigeregezo, obwemere bwerhu bunakomera. Che charhumaga Yakobo ayandika ntya: “Muleke okulembera kwenyu kuyeneze akasi kako, yi muba bantu bakwanene barhanagwerhe gosa omu bintu byoshi.” (Yak. 1:4) Amango rhwamabona oku ebigeregezo rhulimo byakomeza obwemere bwerhu, rhwakabilembera n’omwishingo.

⁸ Mw’amala maruba, Yakobo alishubire kuyerekana bintu biguma byakarhuma rhwaheza omwishingo gwerhu. Bibazo bihe ebyola, na nka gurhe rhwakabihima?

9. Bulagurhe rhukenere obwengehe?

⁹ Echakarhuma rhwaheza omwishingo: Amango rhurhamenyere ech’okujira. Amango rhuli rhwahurana echibazo, rhunasima rhuheme Yehova  oburhabale yi rhuchishoga okujira ebimusimisize, byakalerhera bene-berhu na bali-berhu enyungu, byakanarhurhabala rhugenderere omu bushwekerezi bwerhu. (Yer. 10:23) Rhukenere obwengehe yi rhumenya echi rhwakajira n’echi rhukwanene kubwira balala bali barhupinga. Rhwakavunika omurhima amango rhurhamenyere ech’okujira, n’okuheza omwishingo gwerhu juba-juba.

10. Bichi olwandiko lwa Yakobo 1:5 lurhubwirire rhwakajira yi rhupata obwengehe?

¹⁰ Echi rhukwanene kujira: Rhuheme Yehova obwengehe. Yi rhugala kulembera ebigeregezo byerhu n’omwishingo, rhukwanene rhurhange rhusalire Yehova arhuhe obwengehe rhukenere yi rhuchishoga bwinja eby’okukola. (Osome Yakobo 1:5.) Gurhe rhwakajira nka rhubwene oku Yehova arhashubize oku sala lyerhu han’ahola? Yakobo aderhere oku rhukwanene “kugenderera kuhema” Mungu. Yehova arhayunva burhe amango rhugenderere kumuhema obwengehe. Arharhukalihira eju y’echola. Darha w’embingu “anahana n’omurhima goshi” amango rhuli rhwasalira arhuhe obwengehe b’okulembera ebibazo byerhu. (Zb. 25:12, 13) Anabona ebigeregezo byerhu, agwerhe olukogo, anagwerhe enyorha y’okurhurhabala. Kweri, echola che chirhulerhera omwishingo! Gurhe si Yehova anarhuha obwengehe?

11. Bindi bichi rhukwanene kujira yi rhupata obwengehe?

¹¹ Yehova arhuha obwengehe kugerera Echinwa chage. (Mez. 2:6) Rhukwanene kuyiga Ebiblia n’ebitabu biyumangire kuyo, yi rhupata obwengehe. Aliko hali ebindi rhwakajira olekere okufachakugwarha bumenyi bunene konyine. Rhukwanene kukolesa obwengehe bwa Mungu omu kalamo, omu kukulikira amahano mage. Yakobo aliyandikire ntya: “Mube bantu b’okukolesa echinwa, s’arhali bonviriza konyine.” (Yak. 1:22) Amango rhwamakulikira amahano ma Mungu, rhwanaba bantu b’okulerha omurhula, b’olugero, banagwerhe olukogo. (Yak. 3:17) Ezola ngeso zarhurhabala rhulwise buli chibazo, buzira kuheza omwishingo gwerhu.

12. Bulagurhe bili by’engenzi okumenya bwinja Ebiblia?

 ¹² Echinwa cha Mungu chili nka chiyo. Chinarhurhabala rhumenye bichi rhukwanene kukola bwinja, n’okuntu rhwakajira ntyo. (Yak. 1:23-25) Omufano, enyuma y’okuyiga Echinwa cha Mungu, hali oku rhwakabona oku bihemere rhuleke okuyinja rhwagaya juba-juba. Kugerera oburhabale bwa Yehova, rhwanayiga okuntu rhwakakazi chirhonda amango abantu changwa ebigeregezo byamarhugayisa. Bulala rhuli berhonzi, rhunamenya ebintu binja by’okujira amango rhuli rhwahurana ebibazo. Rhunagala kuwaza bwinja bwenene, n’okuchishoga eby’okujira. (Yak. 3:13) Bili by’engenzi bwenene okumenya Ebiblia bwinja!

13. Bulagurhe rhukwanene kuyiga eju y’emifano y’abantu baganirirwe omu Biblia?

¹³ Mango maguma rhunamenya echi rhukwanene kuleka, enyuma y’okujira egosa. Aliko eyola eli njira mbi y’okuyiga. Enjira nyinja rhwakapata m’obwengehe, kuli kuyiga esomo kugerera ebintu binja n’ebibi abandi bakolere. Echola che charhumaga Yakobo arhuhanula rhujire echi rhwakayiga kugerera emifano y’abantu baganirirwe omu Biblia nka Abrahamu, Rahabu, Yubu, na Eliya. (Yak. 2:21-26; 5:10, 11, 17, 18) Abola bakozi bimana ba Yehova baligalire kulembera ebigeregezo byakarhumire baheza omwishingo gwabo. Emifano yabo y’okulembera, eyerekene oku kugerera oburhabale bwa Yehova, nerhu rhwakagala kulembera.

14-15. Bulagurhe rhurhakwanene kusuzagura engangane zerhu?

¹⁴ Echakarhuma rhwaheza omwishingo: Amango rhuli rhwagangana eju y’obwemere bwerhu. Mango oku mandi, byakarhukomerera okuyunva chintu chilebe omu Chinwa cha Mungu. Changwa hali oku Yehova akufunda kushubiza oku masala merhu nk’oku rhwalilangalire ajirage. Ebyola byakalerha engangane. Nka rhusuzagwire engangane zerhu, zakahoza obwemere bwerhu, n’okuheza obwira bwerhu haguma na Yehova. (Yak. 1:7, 8) Zakanarhuma rhwaheza obulangalire bwerhu eju y’esiku zayinja.

¹⁵ Entumwa Paulo alihuzenye obulangalire bwerhu bw’esiku zayinja n’enanga. (Ebr. 6:19) Enanga enayumanza echombo omu kasanzi k’omulaba, n’okurhuma chirhaja kuhukula oku ntaza. Aliko enanga enarhabala nk’obulegule buyishwekere oku chombo burhanokere. Kuguma n’okw’egutu linanosya obulegule bushwekere enanga, intyo ku n’engangane zinanosya obwemere bwerhu. Amango omuntu ogwerhe engangane amageregezwa n’obupinzani, akaheza obwemere bwage omu bilagane bya Yehova. Nka rhuhezeze obwemere bwerhu, rhwanaheza n’obulangalire bwerhu. Nk’oku Yakobo anaderhaga, omuntu ogwerhe engangane, “ali kuguma n’echavundu ch’enyanja chihekwa n’omuyaga n’okukabulwa eyi n’eyi.” (Yak. 1:6) Kweri nta lusiku omuntu oli nk’oyola akaf’apatire omwishingo!

16. Bichi rhukwanene kujira nka rhugwerhe engangane?

¹⁶ Echi rhukwanene kujira: Olwise engangane zawe; okomeze obwemere bwawe. Orhalingirizaga. Amango m’omulebi Eliya, abantu ba Yehova baliri bagangana eju y’obwemere bwabo. Eliya ababwira ntya: “Mwagangana mu mawazo mabiri marhali kuguma kugera mangochi? Akaba Yehova ye Mungu w’okuli, mumukolere; changwa akaba Baali, mumukolere!” (1 Fa. 18:21) Zene, bihemere nerhu rhujire juba-juba omu kumala engangane zerhu. Rhukwanene kulonzereza emyazi yi rhuchiyemeza oku Yehova ali Mungu, okwe Biblia chili Chinwa chage, n’okw’Abahamirizi ba Yehova luli lubaga lwage. (1 Te. 5:21) Okujira ntyo kwamala engangane zerhu n’okukomeza obwemere bwerhu. Akaba rhukenere oburhabale yi rhumala engangane rhugwerhe, rhubwire abashamuka. Rhurhakwanene kugwarha engangane yi rhugenderera kugwarha omwishingo omu kasi ka Yehova!

17. Gurhe byakaba nka rhuhezeze obushiru bwerhu?

 ¹⁷ Echakarhuma rhwaheza omwishingo: Amango rhwamavunika omurhima. Echinwa cha Mungu chiderhere ntya: “Nka wamavunika omurhima amango m’ebibazo, emisi yawe yageha.” (Mez. 24:10) Echinwa ch’Echiebrania chitafsiribwe “kuvunika omurhima” chakashuba kuderhwa “kuheza obushiru.” Nk’ohezeze obushiru bwawe, waheza n’omwishingo gwawe juba-juba.

18. Okulembera k’okuderha gurhe?

¹⁸ Echi rhukwanene kujira: Olangalire oku Yehova akuha obushiru b’okulembera. Rhukenere obushiru yi rhugala kulembera ebigeregezo. (Yak. 5:11) Echinwa Yakobo akolesaga chitafsiribwe “kulembera,” chihanire ewazo ly’omuntu ogenderere kuyumanga buzira kudundwa. Rhwakawaza oku musoda ogenderere kuyumanga n’obushiru fasi nguma, orhanalibirhire amango abanzi babo bamabarhera.

19. Bichi omufano gw’entumwa Paulo gwakarhuyigiriza?

¹⁹ Entumwa Paulo alekere omufano gwinja g’okuyerekana obushiru n’okulembera. Mango maguma alizambire. Aliko aligalire kulembera bulala alilangalire oku Yehova amuha emisi akenere. (2 Ko. 12:8-10; Flp. 4:13) Nerhu rhwakagwarha emisi eli nk’eyola n’obushiru nka rhumenyere oku bwirhohye oku rhukenere oburhabale bwa Yehova.—Yak. 4:10.

20-21. Bichi rhukwanene kuchizera?

²⁰ Rhwakachizera okw’ebigeregezo rhwakahurana burhali buhane burhengere emwa Yehova. Yakobo arhubwirire ntya: “Amango omuntu ali omu bigeregezo, arhaderhaga mpu: ‘Indi nageregezwa na Mungu.’ Bulala Mungu arhakageregezwa n’amabi, naye yenyine arhageregeza muntu.” (Yak. 1:13) Amango rhwamayemera ok’obula buli bukweri, rhwajira obwira bukomere haguma na Darha w’embingu.​—Yak. 4:8.

²¹ Yehova “arhahindamuka.” (Yak. 1:17) Alirhabere Abakristu ba burhanzi baliri omu bibigeregezo, arhabala na buli-muguma werhu zene. Osalire Yehova n’omurhima goshi akurhabale ogwarhe obwengehe, obwemere, n’obushiru. Ashubiza oku masala mawe. Ahola wakaja wachizera oku akurhabala y’ogenderera kugwarha omwishingo amango oli wahurana ebigeregezo!