1-2. Segun ta Mateo 5:11, anni nakuan i matageno tam nu maka-ekspiriensa ittam tu problema ira?

NIPROMESA ni Jesus ta taga-tuttulna ira nga mabbalin ira tu kurug nga magayayya. Ngem inabisowanna gapa danuri mangiddu nisa nga meparubang ira ta problema. (Mat. 10:22, 23; Luc. 6:20-23) Magayayya ittam megafu ta disipulo ittam ni Cristo. Ngem kunnasi nu kokkontran ittam na kafamilia tam, persigian ittam na gobiernu, onu pilitan ittam na katrabahu onu kaeskuela tam nga magangngua tu liwa? Magga mavurung ittam nu mesimmu nittam yatun.

² Normal nga nonopan na totolay nga ari tu makapagayayya i kapeppersigi. Ngem kagian na Biblia nga magayayya ittam nu mapeppersigi ittam. Angngariganna, nitura ni Santiago nga nu maka-ekspiriensa ittam tu problema, ari ittam marraddam, lallagu magayayya ittam. (Sant. 1:2, 12) Kinagi paga ni Jesus nga mawag tu magayayya ittam maski nu mapeppersigi ittam. (Bibbigan i Mateo 5:11.) Kunnasi ittam mattalupaddian nga magayayya nu magatta-attam tu problema? Aru i magigiammu tam ta tura ni Santiago ta ollu-siglo ira nga Cristiano. Ammuattam labbi i neparubang nira nga problema.

3. Anni i nesimmu kabalin nga nabbalin nga disipulo ni Jesus si Santiago?

³ Ari nabbayag kabalin nga nabbalin tu disipulo i wagi ta yena ni Jesus nga si Santiago, napeppersigi i Cristiano ira ta Jerusalem. (King. 1:14; 5:17, 18) Turi ta pinateda i disipulo nga si Esteban, pinanawan na aru nga Cristiano i siudad tapus  ‘nawwara-wara ira ta probinsia na Judea anna Samaria’ adde ta nakadde ira ta Cipro anna ta Antiokia. (King. 7:58–8:1; 11:19) Aru nga ziga-riga i inattamman na disipulos ira ngem matalikarag nga nilayyagayyada i mapia nga dumug maski sitaw i nakaddetadda. Gafu tatun, aru nga kongregasion i nabuu ta Imperio na Roma. (1 Ped. 1:1) Ngem kabalin natun, mas aru paga nga mariga nga problema i neparubang nira.

4. Anni i karuan nga problema nga inattamman na ollu-siglo ira nga Cristiano?

⁴ Aru nga problema i inattamman na ollu-siglo ira nga Cristiano. Angngariganna, turi 50 C.E., nimandu na Romano nga Emperador nga si Claudio nga manaw i ngamin nga Judio ta Roma. Yatutta fuersadu nga pinanawan na Judio ira nga nabbalin nga Cristiano i babaleda anna nagali ira ta tanakuan nga lugar. (King. 18:1-3) Turi ta 61 C.E., nitura ni apostol Pablo nga aru ta Cristiano ira i nai-insulto ta arubang na magaru nga totolay, nefuku ira, anna nala i pakkukuada ira. (Heb. 10:32-34) Gitta na tanakuan nga totolay, nagatta-attam gapa i Cristiano ira megafu ta pobre ira anna nattaki ira.​—Roma 15:26; Fil. 2:25-27.

5. Anni ira i tabbagattam nga pakkiavu?

⁵ Turi ta pinadday ni Santiago i turana nige na 62 C.E., ammuna nu anni ira i problema na wawwaragina. Nipetura yatun ni Jehova kani Santiago tapenu tabarangngan ira anna mabbalin ira tu magayayya maski nu egga ira i problemada. Gigiammuattam yaw nga tura ni Santiago anna tabbagattam danaw nga pakkiavu: Anni i tukuyan ni Santiago nga pagayayya ta turana? Anni i mangalsa ta pagayayya na tadday nga Cristiano? Kunnasi ittam uffunan na sirib, pangurug, anna gutu tapenu mapattalupaddiattam i pagayayya maski nu makkaproblema ittam?

6. Segun ta Lucas 6:22, 23, ngatta magayayya lagapa i tadday nga Cristiano maski nu egga ira i attattammanna nga problema?

⁶ Abbo na totolay nga magayayya laman ira nu makasta i gawa-gawayyadda, nu aru i kuartuda, anna nu memammo i familiada. Ngem i pagayayya nga tinukoy ni Santiago ay parte na vunga na espiritu na Dios anna ari nga nakadepende ta paddia-paddian na tadday nga tolay. (Gal. 5:22) Magayayya i tadday nga Cristiano nu ammuna nga mapagayayyana si Jehova anna nu tuttuttulanna i ehemplo ni Jesus. (Bibbigan i Lucas 6:22, 23; Col. 1:10, 11) Awayya tam nga igitta i pagayayya tam bilang Cristiano ta afi ta unag na hasag. Ari yatun nga maddo na paddag onu danum megafu ta protektadu yatun. Ari gapa nga makkuro yatun nu mattaki ittam onu awan tu kuartu tam. Ari nga maddo yatun nu uyu-uyawan onu kokkontran ittam na kafamilia tam onu tanakuan. Imbes nga makkafi yatun, mas lallagu nga makkaddul kada purueban na kumokkontra ira nga addappan yatun nga afi. Nu mapurueban i pangurug tam, pakurugan natun nga sittam i kurug nga disipulos ni Cristo. (Mat. 10:22; 24:9; Juan 15:20) Fustu gafu yaw nga nitura ni Santiago: “Wawwagì ira, ibilang nu tu pagayaya nu duttal nikamu i maganna-gannug nga pazziga-riga.”​—Sant. 1:2.

7-8. Anni i mesimmu ta pangurug tam nu mapurueban yatun?

⁷ Kinagi paga ni Santiago nu ngatta sigga-paran nga attamman na Cristiano ira i madammo nga problema. Kunna: “I kapurueba na angngurug nu ay mangiyawa ta pasensia nu nga magattam.” (Sant. 1:3) Awayya tam gapa nga igitta i problema ira ta afi nga meyusa ta pappanday. Nu mepapatu i balayang tapus mapalammin yatun, mas mattagga yatun. Nu attattammattam gapa i problema ira, massikan i pangurug tam. Yayya nga nitura ni Santiago: “Mawag tu magatta-attam kamu adde ta pangurianan tapenu mammanakam kamu ta angngurug nu anna awan vuluvuga tu pakkurangan nu.” (Sant. 1:4) Nu massikan i pangurug tam maski nu egga i problema ira, makapagattam ittam nga sigga-pagayayya.

⁸ Mabibbig paga ta tura ni Santiago i karuan nga gannug nga makalsa ta pagayayya tam. Anni danatun? Kunnasi tam malabanan danatun?

9. Ngatta kawagattam i sirib?

⁹ I problema: Ariattam ammu i kuattam. Nu egga i problema tam, mappoffun ittam kani Jehova tapenu masirib i desisiottam anna mapagayayya tam yayya. Makoffun gapa yatun ta  wawwaragi tam anna mapattalupaddiattam i kinamatalo tam. (Jer. 10:23) Kawagattam i sirib tapenu ammu tam i kuattam anna nu anni i itabbag tam turi ira ta mameppersigi nittam. Nu ariattam ammu i kuattam, baka makkafi i nono tam anna mabi laman nga mawawan i pagayayya tam.

10. Segun ta Santiago 1:5, anni i kuattam tapenu meddan ittam tu sirib?

¹⁰ I solusion: Makkiddaw kani Jehova tu sirib. Tapenu sigga-pagayayya nga maattammattam i problema ira, ollu labbi nga ipakimallo tam kani Jehova tu iddanna ittam tu sirib tapenu makangngua ittam tu makasta ira nga desision. (Bibbigan i Santiago 1:5.) Anni i kuattam nu ari insigida tabbagan ni Jehova i pakimallo tam? Kinagi ni Santiago nga itulu-tuloy tam lagapa nga “makimallo” ta Dios. Ari nga molang si Jehova maski nu kanayun ittam nga makkiddaw nisa tu sirib. Ikallona ittam anna ‘vuka-palag nga iyawana’ i sirib tapenu maattammattam i problema tam ira. (Sal. 25:12, 13) Ammuna i problema tam ira, makipattageno yayya, anna sigga-paran nga uffunanna ittam. Siguradu nga mamagayayya yatun nittam! Kunnasi ittam iddan ni Jehova tu sirib?

11. Anni paga i kuattam tapenu meddan ittam tu sirib?

¹¹ Iddan ittam ni Jehova tu sirib gukaban na Uvovugna. (Prov. 2:6) Mala tam yatun nga sirib nu gigiammuattam i Biblia anna i publikasiottam ira. Ngem ariattam laman nga basta nga maggigiammu. Mawag nga kuattam nu anni i ipakua na Dios nittam. Nitura ni Santiago: “Ari laman tu ginnan nu i uvovug na, nu ari parulattan nu.” (Sant. 1:22) Nu iyaplika tam i tabarang na Dios, mabbalin ittam tu mas memammo, masippo, anna minaggallallo. (Sant. 3:17) Makoffun nittam danatun nga kualidad tapenu maattammattam i maski anni nga problema anna makapattalupaddian ittam nga magayayya.

12. Ngatta importante nga gigiammuattam tu mapia i Biblia?

 ¹² Negitta i Uvovug na Dios ta ispefu nga makoffun nittam tapenu masingan i mawag tam ulian anna nu kunnasi tam kuan yatun. (Sant. 1:23-25) Angngariganna, kabalittam gigiammuan i Biblia, awayyana tu masingattam nga kawagattam fugaddan i pappata-patu. Ta uffun ni Jehova, magigiammu tam nga mabbalin tu kalmadu nu meparubang ta totolay onu problema nga mamappatu ta ulu tam. Megafu ta kalmadu ittam, mas memammo i pangarubattam ta problema ira. Mas makapannono ittam gapa anna makapaddesision tu mapia. (Sant. 3:13) Kuruga importante nga gigiammuattam tu mapia i Biblia!

13. Ngatta gigiammuattam nakuan i ehemplo ira ta Biblia?

¹³ Nu mittan, mammuattam laman nu anni i mawag nga lillitattam kabalittam nga nakangngua tu kamali. Ngem mariga i kunnatun. Mas makasta nu mabbalin ittam tu masirib megafu ta nakagigiammu ittam ta makasta ira nga kingngua na tanakuan kunne na gapa ta nakaliwatadda. Yayya nga pagaramman ittam ni Santiago nga gigiammuattam i ehemplo ira ta Biblia gitta da Abraham, Rahab, Job, anna Elias. (Sant. 2:21-26; 5:10, 11, 17, 18) Naattamman danatun nga matalo nga aripan ni Jehova i problema ira nga makalsa nakuan ta pagayayyada. Nipasingan na pagatta-attamda nga ta uffun ni Jehova, makapagattam ittam gapa.

14-15. Ngatta mawag nga alsattam i padduda tam ira?

¹⁴ I problema: Paddudattam i pangurug tam ira. Awayyana nga egga i tiempo nga marigatan ittam nga malippawa nu anni i ikagi na Biblia. Baka ari nga sinabbag ni Jehova i pakimallo tam segun ta ikaya tam. Awayyana nga danatun i rason nga madduda ittam ngana ta kurugattam. Nu ariattam alsan i padduda, pakkafian natun i pangurug tam anna daralan natun i relasiottam kani Jehova. (Sant. 1:7, 8) Awayyana gapa nga mawawattam i iddanama tam ta mappange.

¹⁵ Nigitta ni apostol Pablo i iddanama tam ta mappange ta tadday nga angkla. (Heb. 6:19) Megafu ta angkla, ari nga meyana-anug i barku nu egga i bagiu anna ari nga mebangga yatun ta batu ira. Ngem makoffun laman i angkla nu ari nga makatta i nikakadena natun ta barku. Ngem mallaray i kadena na angkla nu magattay yatun. Pakkafian gapa na padduda i pangurug tam. Nu makkaproblema i tolay nga egga i paddudana, mawawanna i pangurugna nga tuppalan ni Jehova i promesana ira. Oras tu mawawan i pangurugna, mawawanna gapa i iddanamana. Fustu gafu i kinagi ni Santiago nga “i tolay nga mabbabbang ay kagitta na palung ta bebay nga ituttubba anna ipappattu na paddag.” (Sant. 1:6) Ari vuluvuga magayayya i kunnatun nga tolay!

16. Anni i kuattam nu madduda ittam?

¹⁶ I solusion: Alsammu i paddudam ira anna pasikannammu i pangurug mu. Siguradu ka nakuan ta kuru-kurugammu. Ta kaggawan ni profeta Elias, madduda i totolay ni Jehova. Yayya nga kinagi ni Elias ta nira: “Adde sonu anni kamu nga magala-ali ta dua nga madduma nga opinion? Nu si Jehova i kurug nga Dios, yayya i tuttulannu; ngem nu si Baal, yayya i tuttulannu!” (1 Pat. 18:21) Kunnatun gapa ta kaggawattam. Mawag tu marresearch ittam tapenu kumbinsidu ittam nga si Jehova i Dios, i Biblia i Uvovugna, anna i Saksi ira ni Jehova i totolena. (1 Tes. 5:21) Nu kunnatun i kuattam, malsa i padduda tam anna massikan i pangurug tam. Ngem nu madduda ittam lagapa, mappoffun ittam ta elder ira. Insigida ittam nakuan nga magguyu tapenu mapattalupaddiattam i pagayayya tam ta passerbi kani Jehova!

17. Anni i mesimmu nu mawawattam i sikan na nono tam?

 ¹⁷ I problema: Pakkafi na nono. Kagian na Biblia: “Nu nakkafi i nono mu ta aggaw na ziga, bumaddi noka i sikammu.” (Prov. 24:10) I kebalinan na Hebreo nga termino nga netransleyt tu “nakkafi i nono” ay “nawawan i sikan na nono.” Nu nawawan i sikan na nono mu, mabi ngana laman gapa nga mawawan i pagayayya mu.

18. Anni i kebalinan na magattam?

¹⁸ I solusion: Mammakatalo kani Jehova nga iyawana nikaw i sikan na nono tapenu makapagattam ka. Kawagattam i sikan na nono tapenu maattammattam i problema ira. (Sant. 5:11) Ipanono nittam na termino nga niyusa ni Santiago nga netransleyt tu “nakapagattam” i tadday nga tolay nga agga-taddag anna ari vuluvuga nga manaw ta puestuna. Kagitta yatun na tadday nga suddalu nga masikan i nonona nga agga-taddag anna ari vuluvuga manaw ta puestuna. Ari gapa yayya nga makkarela nu umatake i kalabadda.

19. Anni i magigiammu tam kani apostol Pablo?

¹⁹ Makakkasta i nipasingan ni apostol Pablo nga ehemplo ta sikan na nono anna pagattattam. Egga ira i tiempo nga nakkafi yayya. Ngem naattammanna danatun megafu ta naddepende yayya ta sikan nga iyawa ni Jehova nisa. (2 Cor. 12:8-10; Fil. 4:13, NW) Mapeggan ittam gapa tu kunnatun nga sikan anna gutu nu mapakalinno ittam nga mappoffun kani Jehova.​—Sant. 4:10.

20-21. Ta anni ittam nga makasiguradu?

²⁰ Makasiguradu ittam nga ari nga pangastigo nittam ni Jehova i problema tam ira. Kunnaw i kagian ni Santiago: “Nu matenta i tolay, ari nga mepangngo tu kagian na, ‘I Dios ay tentan nà.’ Ta i Dios ay ari nga matenta ta marakay anna ari yaya nga manenta.” (Sant. 1:13) Nu kumbinsidu ittam tatun, mas maddukko ittam ta minaggiddu nga nelangitan nga Yama tam.​—Sant. 4:8.

²¹ “Ari vuluvuga nga manguli” si Jehova. (Sant. 1:17) Inuffunanna i ollu-siglo ira nga Cristiano ta problemada ira yayya nga magga uffunanna i kada tadday ta nittam. Ari ka nakuan nga magimmang nga makkiddaw kani Jehova tu sirib, pangurug, anna sikan na nono. Tabbaganna i pakimallo mu ira. Makasiguradu ka gapa nga uffunan naka tapenu mapattalupaddiammu i pagayayya durante nga attammammu i problemam ira!