1-2. Akɔdin to Matyu 5:​11, aw wi fɔ si prɔblɛm dɛn?

JIZƆS bin prɔmis in disaypul dɛn se dɛn go gɛt tru tru gladi-at, bɔt i bin tɛl dɛn bak se dɛn go gɛt prɔblɛm dɛn. (Mat. 10:​22, 23; Lyuk 6:​20-23) Wi gladi we wi na Krays in disaypul dɛn. Bɔt aw wi go fil if wi famili de tray fɔ mek wi lɛf fɔ sav Jiova, di gɔvmɛnt de mek wi sɔfa, ɔ wi wokmet ɔ skulmet dɛn de tray fɔ mek wi du bad tin? Fɔ tru, dɛn kayn tin dɛn ya kin mek wi bigin fɔ wɔri.

² Bɔku pipul dɛn nɔ kin tink se we pipul dɛn de mek dɛn sɔfa, dat fɔ mek dɛn gladi. Bɔt na dat Gɔd in Wɔd tɛl wi fɔ du. Fɔ ɛgzampul, di disaypul Jems bin rayt se bifo wi de wɔri pasmak we prɔblɛm dɛn mit wi, wi fɔ gladi we wi de go tru prɔblɛm dɛn. (Jems 1:​2, 12) Ɛn Jizɔs bin se wi fɔ gladi ivin we dɛn de mek wi sɔfa. (Rid Matyu 5:​11.) Aw wi go kɔntinyu fɔ gladi pan ɔl we wi gɛt prɔblɛm dɛn? Wi kin lan bɔku tin bay we wi go tɔk bɔt sɔm tin dɛn frɔm di lɛta we Jems bin rayt to di fɔstɛm Kristian dɛn. Fɔs, lɛ wi tɔk bɔt di prɔblɛm dɛn we dɛn Kristian dɛn ya bin gɛt.

3. Wetin bin apin shɔt tɛm afta we Jems bi Jizɔs in disaypul?

³ Shɔt tɛm afta we Jizɔs in brɔda we nem Jems bin bi disaypul, pipul dɛn bin bigin fɔ mek di Kristian dɛn na Jerusɛlɛm sɔfa. (Akt 1:​14; 5:​17, 18) We dɛn bin kil di disaypul we nem Stivin, bɔku Kristian dɛn bin rɔnawe kɔmɔt na di siti, ɛn “dɛn bin skata na difrɛn say dɛn na Judia ɛn Sameria.” Leta, dɛn bin rich na Sayprɔs ɛn  Antiɔk. (Akt 7:​58–8:​1; 11:​19) Di disaypul dɛn bin gɛt bɔku prɔblɛm dɛn. Bɔt pan ɔl dat, dɛn bin de prich di gud nyuz ɛnisay we dɛn bin de go, ɛn dɛn ɛp fɔ mek nyu kɔngrigeshɔn dɛn usay di Roman dɛn bin de rul. (1 Pit. 1:​1) Bɔt afta dat, dɛn bin gɛt bɔku ɔda prɔblɛm dɛn.

4. Wetin na sɔm ɔda prɔblɛm dɛn we di fɔstɛm Kristian dɛn bin gɛt fɔ bia?

⁴ Di fɔstɛm Kristian dɛn bin gɛt fɔ bia bɔku difrɛn prɔblɛm dɛn. Fɔ ɛgzampul, arawnd di ia 50 afta Krays, wan Roman ɛmparɔ we nem Klɔdiɔs bin tɛl ɔl di Ju dɛn fɔ kɔmɔt na Rom. So di Ju dɛn we bin dɔn bi Kristian dɛn bin lɛf dɛn os dɛn ɛn go de ɔdasay. (Akt 18:​1-3) Arawnd di ia 61 afta Krays, apɔsul Pɔl bin rayt se pipul dɛn bin de kɛr in kɔmpin Kristian dɛn na pɔblik ɛn mek dɛn shem, dɛn bin de put dɛn na prizin, ɛn dɛn bin de tek dɛn prɔpati dɛn bay fos. (Ibru. 10:​32-34) Ɛn jɔs lɛk ɔda pipul dɛn, Kristian dɛn bin po, ɛn dɛn bin de sik.—Rom. 15:​26; Fil. 2:​25-27.

5. Us kwɛstyɔn dɛn wi go ansa?

⁵ We Jems bin de rayt in lɛta bifo di ia 62 afta Krays, i bin no di prɔblɛm dɛn we in brɔda ɛn sista dɛn gɛt. Jiova bin dayrɛkt Jems fɔ rayt fayn advays to dɛn Kristian dɛn de so dat dɛn go kɔntinyu fɔ gladi pan ɔl we dɛn bin de gɛt prɔblɛm dɛn. Lɛ wi tɔk bɔt di lɛta we Jems bin rayt ɛn ansa dɛn kwɛstyɔn dɛn ya: Wetin na di gladi-at we Jems bin rayt bɔt? Wetin go mek Kristian nɔ gɛt gladi-at? Ɛn we wi gɛt sɛns, fet, ɛn maynd, aw dat go ɛp wi fɔ lɛ wi kɔntinyu fɔ gɛt gladi-at ilɛk us prɔblɛm dɛn wi gɛt?

6. Akɔdin to Lyuk 6:​22, 23, wetin mek Kristian dɛn fɔ gladi we dɛn gɛt prɔblɛm dɛn?

⁶ Pipul dɛn kin tink se di tin nɔmɔ we go mek dɛn gɛt gladi-at na we dɛn gɛt wɛlbɔdi, bɔku mɔni, ɛn pis na dɛn famili. Bɔt di gladi-at we Jems bin rayt bɔt na wan pan di kwaliti dɛn we Gɔd in spirit de mek pɔsin gɛt, ɛn i nɔ gɛt fɔ du wit wetin de apin na pɔsin in layf. (Gal. 5:​22) Kristian dɛn go gɛt tru tru gladi-at we dɛn no se dɛn de du wetin de mek Jiova gladi, ɛn we dɛn de fala Jizɔs in ɛgzampul. (Rid Lyuk 6:​22, 23; Kol. 1:​10, 11) Jɔs lɛk aw di faya we kin de insay shed lamp kin kɔntinyu fɔ kech ilɛksɛf briz de blo, na so wi go kɔntinyu fɔ gɛt gladi-at ilɛk wetin de apin to wi. Wi nɔ de stɔp fɔ gladi we wi gɛt mɔni ɔ wɛlbɔdi prɔblɛm. Dɔn bak, wi go ivin kɔntinyu fɔ gɛt gladi-at we pipul dɛn provok wi ɔ wi famili ɔ ɔda pipul dɛn de agens wi. Di mɔ we pipul dɛn de tray fɔ stɔp wi fɔ mek wi nɔ gɛt gladi-at, na di mɔ wi de gladi. Di prɔblɛm dɛn we wi kin gɛt bikɔs ɔf wi fet de sho se wi na Krays in tru tru disaypul dɛn. (Mat. 10:​22; 24:​9; Jɔn 15:​20) Na dat mek Jems bin rayt se: “Mi brɔda dɛn, una fɔ rili gladi we difrɛn tɛst dɛn mit una.”—Jems 1:​2.

7-8. Wetin mek wi fet de strɔng mɔ ɛn mɔ we wi gɛt prɔblɛm?

⁷ Jems bin tɔk bɔt ɔda rizin we mek Kristian dɛn rɛdi fɔ bia siriɔs prɔblɛm dɛn. I bin se: “We sɔntin tɛst una fet, dat go mek una ebul fɔ bia.” (Jems 1:​3) Wi prɔblɛm dɛn tan lɛk di faya we dɛn kin yuz fɔ mek di shap pat pan tin dɛn lɛk sɔd. We dɛn kin dɔn wam di shap pat na faya, ɛn alaw am fɔ lɛ i kol, di ayɛn kin strɔng pas aw i bin de. Semweso, we wi bia wi prɔblɛm dɛn, wi go gɛt mɔ fet. Na dat mek Jems bin rayt se: “Una alaw di bia we una de kɔntinyu fɔ bia fɔ tren una gud gud wan, so dat una go kɔmplit ɛn gud pan ɔltin.” (Jems 1:​4) We wi si se wi prɔblɛm dɛn de mek wi fet strɔng mɔ ɛn mɔ, dat de mek wi bia dɛn wit gladi-at.

⁸ Insay di lɛta we Jems bin rayt, i bin tɔk bɔt sɔm tin dɛn we kin mek wi nɔ kɔntinyu fɔ gladi. Wetin na dɛn prɔblɛm dɛn de, ɛn aw wi go sɔlv dɛn?

9. Wetin mek wi nid fɔ gɛt sɛns?

⁹ Prɔblɛm: We wi nɔ no wetin fɔ du. We wi gɛt prɔblɛm dɛn, wi want fɔ abop pan Jiova fɔ mek i go ɛp wi fɔ disayd fɔ du di rayt tin we go mek i gladi, we go bɛnifit wi brɔda ɛn sista dɛn, ɛn we go ɛp wi fɔ fetful to am. (Jɛr. 10:​23) Wi nid sɛns  fɔ no wetin wi fɔ du ɛn wetin wi fɔ se to di wan dɛn we de agens wi. We wi nɔ kin no wetin fɔ du, dat kin mek wi at pwɛl, ɛn i kin mek kwik kwik wan wi nɔ kin gɛt gladi-at igen.

10. Akɔdin to wetin de na Jems 1:​5, wetin wi fɔ du fɔ gɛt sɛns?

¹⁰ Wetin fɔ du? Aks Jiova fɔ sɛns. Fɔ mek wi ebul bia wi prɔblɛm dɛn wit gladi-at, fɔs wi fɔ pre to Jiova fɔ mek i gi wi sɛns so dat wi go du di rayt tin. (Rid Jems 1:​5.) Wetin wi fɔ du if wi fil se Jiova nɔ ansa wi prea wantɛm wantɛm? Jems bin tɔk se wi fɔ “kɔntinyu fɔ aks” Gɔd. Jiova nɔ de vɛks we wi de aks am fɔ sɛns ɔltɛm. Wi Papa we de na ɛvin de “gi [wi] bɔku bɔku” sɛns we wi pre to am fɔ bia wi prɔblɛm dɛn. (Sam 25:​12, 13) I de si wi prɔblɛm dɛn, i de sɔri fɔ wi we wi de sɔfa, ɛn i rili want fɔ ɛp wi. Dis kin mek wi rili gladi. Bɔt aw Jiova kin gi wi sɛns?

11. Wetin bak wi fɔ du fɔ mek wi gɛt sɛns?

¹¹ Jiova de yuz in Wɔd fɔ gi wi sɛns. (Prɔv. 2:​6) Fɔ gɛt da sɛns de, wi fɔ stɔdi Gɔd in Wɔd ɛn wi buk ɛn magazin dɛn. Bɔt wi nɔ fɔ jɔs stɔdi nɔmɔ. Wi fɔ du wetin Jiova tɛl wi fɔ du. Jems bin rayt se: “Una fɔ de du wetin Gɔd in wɔd se ɛn nɔ jɔs de yɛri.” (Jems 1:​22) We wi fala Gɔd in advays, wi go bi pɔsin we lɛk fɔ mek pis, we nɔ de pin, ɛn we gɛt sɔri-at. (Jems 3:​17) Dɛn kwaliti dɛn ya kin mek wi stil gɛt gladi-at as wi de kɔntinyu fɔ bia ɛni prɔblɛm.

12. Wetin mek i impɔtant fɔ sabi di Baybul gud gud wan?

¹² Gɔd in Wɔd tan lɛk glas we de ɛp wi fɔ lɛ wi si wetin wi nid fɔ ajɔst na wi layf. (Jems 1:​23-25) Fɔ ɛgzampul, sɔntɛm afta we wi dɔn stɔdi Gɔd in Wɔd, wi kin si se wi nid fɔ tray nɔ fɔ de vɛks kwik. Wit Jiova in ɛp, wi kin lan aw fɔ du tin saful  wan we pipul dɛn ɔ prɔblɛm dɛn mek wi vɛks. Bikɔs wi de du tin saful wan, dat go ɛp wi fɔ no wetin fɔ du we prɔblɛm dɛn mit wi. Wi go ebul fɔ tink fayn ɛn disayd fɔ du di rayt tin dɛn. (Jems 3:​13) I rili impɔtant fɔ mek wi sabi di Baybul gud gud wan!

13. Wetin mek wi fɔ stɔdi di ɛgzampul dɛn bɔt pipul dɛn we de na di Baybul?

¹³ Sɔntɛnde, wi kin lan nɔ fɔ du sɔntin afta we wi dɔn mek di mistek dɔn. Bɔt dat nɔto fayn we fɔ lan. Fɔ mek wi gɛt sɛns, wi fɔ lan frɔm di mistek dɛn we ɔda pipul dɛn dɔn mek ɛn di gud tin dɛn we dɛn dɔn du. Na dat mek Jems de ɛnkɔrej wi se lɛ wi falamakata pipul dɛn we gɛt fayn kwaliti dɛn na di Baybul lɛk Ebraam, Reab, Job, ɛn Ilayja. (Jems 2:​21-26; 5:​10, 11, 17, 18) Dɛn pipul dɛn ya we bin de sav Jiova fetful wan bin ebul fɔ bia dɛn prɔblɛm dɛn we bin fɔ dɔn mek dɛn nɔ kɔntinyu fɔ gɛt gladi-at. Dɛn ɛgzampul dɛn we dɛn sɛt fɔ sho se dɛn ebul fɔ bia dɔn ɛp wi fɔ no se Jiova kin ɛp wi da sem we de.

14-15. Wetin mek wi fɔ sɔlv di tin dɛn we kin mek wi dawt?

¹⁴ Prɔblɛm: We wi gɛt dawt bɔt wetin wi biliv. Sɔntɛnde, i kin at fɔ mek wi ɔndastand sɔntin we de insay di Baybul. Ɔ Jiova nɔ kin ansa wi prea dɛn di we aw wi want. Sɔntɛm dis kin mek wi bigin gɛt dawt na wi maynd. If wi nɔ pe atɛnshɔn to di tin dɛn we kin mek wi dawt, i kin mek wi fet wik, ɛn i kin pwɛl wi padi biznɛs wit Jiova. (Jems 1:​7, 8) Ɛn dis kin mek wi ivin lɛf fɔ biliv pan di op we wi gɛt fɔ tumara bambay.

¹⁵ Di apɔsul Pɔl bin kɔmpia wi op fɔ tumara bambay to ankɔ. (Ibru. 6:​19) Di ankɔ kin mek di ship de wan ples we big big briz de blo, ɛn i de mek di ship nɔ go usay rɔk dɛn de. Bɔt di ankɔ de mek di ship de wan ples if di chen we dɛn tay am wit nɔ kɔt. Jɔs lɛk aw ankɔ in chen kin wik we i rɔsti, na so di dawt we pɔsin kin gɛt de mek in fet wik. We prɔblɛm mit pɔsin we gɛt dawt, i nɔ kin gɛt fet igen se Jiova go du di tin dɛn we I dɔn prɔmis. If wi nɔ gɛt fet, wi nɔ go gɛt op. Jems bin tɔk se, pɔsin we de dawt “tan lɛk swɛlin na di si we briz de blo ɛn kɛr go ɛnisay.” (Jems 1:​6) I go mɔs bi se ɛnibɔdi we de fil da we de nɔ go gɛt gladi-at atɔl.

16. Wetin wi fɔ du we wi gɛt dawt?

¹⁶ Wetin fɔ du? Tray fɔ gɛt ansa fɔ di tin dɛn we de mek yu dawt; mek yu fet strɔng mɔ. Mekɔp yu maynd fɔ du sɔntin. Insay prɔfɛt Ilayja in tɛm, Jiova in pipul dɛn nɔ bin mekɔp dɛn maynd fɔ du wetin dɛn biliv. Ilayja bin tɛl dɛn se “dɛn nɔ go de ya, dɛn de yanda; if dɛn fil se na PAPA GƆD [“Jiova,” NWT] na PAPA GƆD, lɛ dɛn wɔship am; bɔt if na Beal na PAPA GƆD, lɛ dɛn wɔship am.” (1 Kiŋ 18:​21) Na di sem tin wi fɔ du tide. Wi nid fɔ du risach fɔ pruv to wisɛf se Jiova na di ɔlmayti Gɔd, di Baybul na in Wɔd, ɛn Jiova Witnɛs dɛn na in pipul dɛn. (1 Tɛs. 5:​21) We wi du ɔl dɛn tin dɛn ya, wi nɔ go gɛt dawt igen, ɛn wi go gɛt strɔng fet. If wi nid ɛp fɔ mek wi nɔ de dawt igen, wi kin aks di ɛlda dɛn. If wi want fɔ kɔntinyu fɔ sav Jiova wit gladi-at, wi fɔ mekɔp wi maynd fɔ du di rayt tin.

17. Wetin go apin we wi nɔ gɛt maynd?

¹⁷ Prɔblɛm: We wi at pwɛl. Gɔd in Wɔd se: “If yu at pwɛl di tɛm we yu gɛt prɔblɛm, yu nɔ go gɛt bɛtɛ trɛnk.” (Prɔv. 24:​10, NWT) Di Ibru wɔd we dɛn translet as “at pwɛl” kin min “we yu nɔ  gɛt maynd igen.” If yu nɔ gɛt maynd, yu nɔ go gɛt gladi-at.

18. Wetin i min fɔ bia?

¹⁸ Wetin fɔ du? Abop pan Jiova fɔ mek i gi yu maynd fɔ bia. Wi fɔ gɛt maynd fɔ mek wi bia wi prɔblɛm dɛn. (Jems 5:​11) Di wɔd we Jems bin yuz we dɛn translet as “bia” de mek wi tink bɔt pɔsin we nɔ kɔmɔt usay i tinap. Sɔntɛm wi go tink bɔt sojaman we gɛt maynd fɔ fɛt agens in ɛnimi. I go tinap wan ples ilɛk uskayn atak we in ɛnimi atak am.

19. Wetin wi kin lan frɔm apɔsul Pɔl in ɛgzampul?

¹⁹ Di apɔsul Pɔl bin sɛt fayn ɛgzampul as pɔsin we gɛt maynd ɛn we de bia. Sɔntɛnde, i bin de fil wik. Bɔt i bin ebul fɔ bia bikɔs i bin abop pan Jiova fɔ mek i gi am di trɛnk we i nid. (2 Kɔr. 12:​8-10; Fil. 4:​13) Wisɛf kin gɛt da kayn maynd ɛn trɛnk de if wi put wisɛf dɔŋ ɛn no se wi nid Jiova fɔ ɛp wi.—Jems 4:​10.

20-21. Wetin wi shɔ bɔt?

²⁰ Wi shɔ se di prɔblɛm dɛn we de mit wi nɔto pɔnishmɛnt frɔm Jiova. Jems bin tɛl wi se: “We sɔntin tɛst pɔsin, lɛ i nɔ se: ‘Na Gɔd de tɛst mi.’ Nɔbɔdi nɔ ebul fɔ tɛst Gɔd wit bad tin, ɛn Gɔd insɛf nɔ de tɛst ɛnibɔdi.” (Jems 1:​13) We wi biliv se dat na tru, wi de kam nia wi Papa we de na ɛvin mɔ ɛn mɔ.—Jems 4:​8.

²¹ Jiova “nɔ de chenj.” (Jems 1:​17) I bin ɛp di fɔstɛm Kristian dɛn we dɛn bin gɛt prɔblɛm dɛn, ɛn i go ɛp wi bak tide wan bay wan we wi gɛt prɔblɛm dɛn. Beg Jiova fɔ mek i ɛp yu fɔ gɛt sɛns, fet, ɛn maynd. I go ansa yu prea dɛn. Dɔn yu go shɔ se i go ɛp yu fɔ mek yu kɔntinyu fɔ gɛt gladi-at we yu de bia yu prɔblɛm dɛn.