1-2. Kweelana a Mateyo 5:11, ino mapensho tulyeelete kwaabona buyani?

YESU wakashomesha bashikwiiya bakwe ayi balaakucana lusangalalo lwancinencine. Alimwi wakalwiita baabo boonse bakalinga kumusuni ayi balaakucana mapensho. (Mate. 10:22, 23; Luka 6:20-23) Tulikondetwe kuba bashikwiiya bakwe Klistu. Ano ino tulalinyumfwa buyani na beshikamukowa batalika kutupikisha, kupenshekwa amfulumeende, nabi na mbotwiiyabo kucikolo na mbotusebensaabo balisuni kutuyunga kucita shibiibi? Kuyeeya pashintu ishi inga kwatupa kulisukama.

² Bantu baanji balabona ayi kupenshekwa inga takubapi kuba alusangalalo. Nacibi boobo, Maswi akwe Lesa alaamba ayi kupenshekwa inga kwatupa kuba basangalete. Kucakubonenaako, shikwiiya Jemusi wakalemba ayi muciindi cakulisukama abuumbi ndyetutokwiinda mumapensho, tulyeelete kusangalala. (Jemu. 1:2, 12) Alimwi Yesu wakaamba ayi tulyeelete kuba basangalete nabi ndyetutoopenshekwa. (Amubelenge Mateyo 5:11.) Ino inga twacita buyani kwaamba ayi tutolelele kusangalala nabi ndyetutokwiinda mumapensho? Inga tweeya shiinji kuswa munkalata Jemusi njaakalembela Beneklistu bakutaanguna. Cakutaanguna, amuleke tubandike mapensho Beneklistu aba ngobakeendaamo.

3. Ino nciinshi cakacitika Jemusi ndyaakaba shikwiiya wakwe Yesu?

³ Ndipakeendabo ciindi ciniini kuswa ciindi Jemusi mwanike wakwe Yesu wakucanaamo ndyaakaba shikwiiya, Beneklistu bakatalika kupenshekwa mu Jelusalemu. (Mili. 1:14; 5:17, 18) Alimwi shikwiiya  Sitifini ndyaakacaikwa, Beneklistu baanji bakaloboka mu Jelusalemu ‘akupalanganina mumisena yoonse ya Judeya a Samaliya,’ mukuya kwaciindi ciindi, bamwi bakaya ku Saipulasi alimwi aku Antyoki. (Mili. 7:58–8:1; 11:19) Bashikwiiya bakeenda mumapensho aanji. Nacibi boobo, bakalinga kusebensa cankusu muncito yakushimikila makani abotu kulikoonse nkobakaya alimwi bakacafwilisha kutalika mabungano mumisena iinji. (1 Pit. 1:1) Nacibi boobo, kwakalinga mapensho aamwi aanji akalinga kusa kunembo.

4. Ino ngamapensho nshi amwi Beneklistu bakutaanguna ngobakalinga kuliyumya?

⁴ Beneklistu bakutaanguna bakeenda mumapensho apusenepusene. Kucakubonenaako, cakuma 50 C.E., Kulodyasi Muleli wa bene Loma wakalwiita ba Juda boonse kuswa mu Loma. Aboobo ba Juda boonse bakaba Beneklistu bakakakatishikwa kushiya maandaabo akulongela kumisena kumwi. (Mili. 18:1-3) Cakuma 61 C.E., mutumwi Paulo wakalemba ayi Beneklistunyina bakalinga kucobolwa pabantu, kubikwa mujeele, alimwi akunyaikwa shintu. (Ebu. 10:32-34) Alimwi bweenka mbuli bantu bamwi, Beneklistu bakalinga kwiinda mumapensho mbuli bukandu akuciswa.​—Loma. 15:26; Filip. 2:25-27.

5. Ino njimiipusho nshi njeshi tubandike?

⁵ Jemusi ndyaakalemba nkalata yakwe mwaaka wa 62 C.E. kootana kushika, wakalinga kwaashi kabotu mapensho bashominyina ngobakalinga kwiindaamo. Yehova wakatanjilila Jemusi kulembela Beneklistu makani eenga abacafwa kutolelela kuba alusangalalo nabi ndyebakalinga kwiinda mumapensho. Amuleke tubandike makani ngotucana munkalata yakwe Jemusi, lyalo akukumbula miipusho itokonkelawo: Ino nkusangalala kwa mushobo nshi Jemusi nkwakalemba? Ino nciinshi ceenga capa kwaamba ayi Mwineklistu acileeke kuba alusangalalo  ulo? Alimwi ino busongo, lushomo, alimwi akutaloonda inga shatucafwa buyani kutolelela kuba alusangalalo nabi twiinde mumapensho ali buyani?

6. Kweelana a Luka 6:22, 23, ino nceebonshi Mwineklistu inga waba alusangalalo nabi ndyaatokwiinda mumapensho?

⁶ Bantu bamwi balayeeya ayi inga bababo alusangalalo na kabacite buumi bubotu, maali aanji, alimwi akunyumfwana mumukwashi. Ano lusangalalo Jemusi ndwaakalinga kwaamba ndubasu lwa shisepo sha mushimu wakwe Lesa alimwi talusi ceebo ca bukaalo muntu mbwabeteemo. (Gala. 5:22) Cipa Mwineklistu kuba alusangalalo lwancinencine nkushiba kwaamba ayi atoocita shisangalasha Yehova alimwi akukonkela cakubonenaako cakwe Yesu. (Amubelenge Luka 6:22, 23; Kolo. 1:10, 11) Lusangalalo lwesu inga twalukoshanisha kukatambo kalilampi katoonyaka. Kalatolelela kunyaka mukwiinga kalishitilishitwe kumuuwo na imfula. Aswebo inga twatolelela kuba basangalete nabi twiinde mumapensho ali buyani mubuumi. Teshi tukacileeke kusangalala ceebo cakwaamba ayi twaciswa na kubula maali. Alimwi tulaakutolelela kusangalala nabi bantu ndyebatotuseka na kupikishikwa abeshikamukowa. Muciindi cakuboolela panshi, lusangalalo lwesu lulaakutolelela nabi batucitile sheenga shapa kwaamba ayi tucileeke kuba alusangalalo. Mapensho ngotwiindaamo ceebo calushomo lwesu ncitondesho cakwaamba ayi tuli bashikwiiya bakwe Klistu bancinencine. (Mate. 10:22; 24:9; Joni 15:20) Nceceeco Jemusi ncaakalembela ayi: “Nobamakwesu, kamusangalala abuumbi na mwashikilwa mapensho apusenepusene.”​—Jemu. 1:2.

7-8. Ino nceebonshi lushomo lwesu lulayuminaako ndyetutokwiinda mumapensho?

⁷ Jemusi wakaamba cipa Mwineklistu kuba ulibambite kuliyumya mumapensho. Wakaamba ayi: “Kweeleshekwa kwa lushomo lwanu kulaleta kuliyumya.” (Jemu. 1:3) Mapensho inga twakoshanisha ku mulilo ngobasebensesha kupanga naifi ya ceela. Na baitenta mumulilo lyalo akwitontosha ilayumu abuumbi. Aswebo na twaliyumya mumapensho, lushomo lwesu lulayuma. Nceceeco Jemusi ncaakalembela ayi: “Kutaboola pesule kwanu kulyeelete kutolelela kushikila mukabule kampenda nakaceyi mulushomo lwanu.” (Jemu. 1:4) Na twabona kwaamba ayi mapensho ngotutokwiindaamo atooyumya lushomo lwesu, inga twaliyumya calusangalalo.

⁸ Munkalata Jemusi njaakalemba, wakaamba pamapensho eenga apa kwaamba ayi tucileeke kuba alusangalalo. Ino ngamapensho nshi, alimwi ino inga twacita buyani kwaamba ayi twaakoome?

9. Ino nceebonshi tulayandika busongo?

⁹ Lipenshi: Kutashiba cakucita. Ndyetutokwiinda mumapensho, tulisuni kwaamba ayi Yehova  atucaafwe kusala shimusangalasha, sheenga shacafwa bamakwesu abenankashi akutucafwa kutolelela kushomeka kuli nguwe. (Jele. 10:23) Tulayandika busongo kwaamba ayi tushibe kabotu shakucita alimwi ansheenga twaamba kubaabo batotupikisha. Na tatucishiwo shakucita inga twalefuka akucileka kuba alusangalalo.

10. Ino lilembo lyakwe Jemusi 1:5 lilatulwiita kucita nshi kwaamba ayi tube abusongo?

¹⁰ Shakucita: Amupaile kuli Yehova kwaamba ayi amupe busongo. Kwaamba ayi tucikoonshe kuliyumya calusangalalo ndyetuli mumapensho, tulyeelete kutaanguna kupaila kuli Yehova kwaamba ayi atupe busongo bwakusala kabotu. (Amubelenge Jemusi 1:5.) Ino tulyeelete kucita buyani na twaabona anga Yehova tatookumbula mupailo wesu? Jemusi waamba ayi “amutolelele kumusenga” Lesa. Yehova takalaliiwo kwaamba ayi twatolelela kumusenga busongo. Ishiwesu wakwiculu “ulapa” na twamusenga ayi atupe busongo bwakuliyumya mumapensho esu. (Kulu. 25:12, 13) Alaabona mapensho ngotwiindaamo, alatunyumfwila nkumbu, alimwi alisunishi kutucafwa. Ici cilatupa kukondwa abuumbi! Ano ino Yehova alatupa buyani busongo?

11. Ino nshiinshi shimwi nshotweelete kucita kwaamba ayi tube abusongo?

¹¹ Yehova alatupa busongo kwiinda mu Maswi akwe. (Tus. 2:6) Kwaamba ayi tube abusongo ubo, tulyeelete kwiiya Maswi akwe Lesa amabuku esu aamba shamu Baibo. Nacibi boobo, tatweelete kweelabo pakwiiya. Tulyeelete kukonkela Lesa nshaatulwiita. Jemusi wakalemba ayi: “Amube beshikucita shaamba Maswi akwe Lesa.” (Jemu. 1:22) Na twakonkela shaamba Maswi akwe Lesa, tulaba bantu banyumfwana abamwi, bayeeya kabotu, alimwi bacite nkumbu. (Jemu. 3:17) Iyi njimiibo yeenga yatucafwa kuliyumya mumapensho aliwoonse calusangalalo.

12. Ino nceebonshi kwiishiba kabotu Baibo kulayandika?

¹² Maswi akwe Lesa ali nga ndigilasi, alatucafwa kushiba mbasu nshotweelete kusebenselawo. (Jemu. 1:23-25) Kucakubonenaako, pesule lyakwiiya Maswi akwe Lesa, inga twesa  mukubona kwaamba ayi mpashi tulicite lipenshi lyakufwambaana kukalala. Kwiinda mulucafwo lwakwe Yehova, tuleeya kukalika moyo na bamwi bacita shikalasha nabi na mapensho atupa kukalala. Kukalika moyo kulatucafwa kushiba kabotu nsheenga twaciita ndyetuli mumapensho. Tulayeeya akusala kabotu shintu. (Jemu. 3:13) Aboobo cilayandika abuumbi kwiishiba kabotu Baibo!

13. Ino nceebonshi tulyeelete kwiiya shakubonenaako sha baabo baambwa mu Baibo?

¹³ Cimwi ciindi tulesa mukwiiya nshotweelete kuleya pesule lyakubisha. Sombi ubu teshi mboceelete kuba. Nshila ibotu mbweenga twaba abusongo nkwiinda mukwiiya kushakubonenaako sha bamwi mbobakacita kabotu alimwi ambobakaalilwa. Nceceeco Jemusi ncaatuyuminishila kwiiya kushakubonenaako sha baabo baambwa mu Baibo mbuli Abulaamu, Laabu, Jobo, alimwi a Elija. (Jemu. 2:21-26; 5:10, 11, 17, 18) Basebenshi bakwe Yehova bashomeka aba bakaliyumya mumapensho akalinga kweelete kumanisha lusangalalo lwabo. Shakubonenaako shabo shilatondesha kwaamba ayi aswebo inga twacikonsha kuliyumya kwiinda mulucafwo lwakwe Yehova.

14-15. Ino nceebonshi tatweelete kutolelela kutoonsha nshetushoma?

¹⁴ Lipenshi: Kutonsha nshetushoma. Cimwi ciindi inga caba ciyumu kunyumfwishisha shimwi Baibo nshoyaamba. Na mpashi Yehova inga taakumbuli mipailo yesu kweelana ambotwalinga kulangila. Ici inga capa kwaamba ayi tutalike kutonsha nshetushoma. Na twatolelela kutoonsha, lushomo abushicibusa bwesu a Yehova inga shanyonyooka. (Jemu. 1:7, 8) Alimwi ici inga capa kwaamba ayi tucileeke kulangila buumi bwakunembo.

¹⁵ Mutumwi Paulo wakakoshanisha lushomo lwesu kuceela cakwiimikisha bwaato. (Ebu. 6:19) Ceela ici cilacafwa bwaato kukalikana ndyekuli cipuupu akupa kwaamba ayi bwaato butoomi mu mabwe. Nacibi boobo, ceela ici inga cacafwabo na ceeni icatite kubwaato taikwe kusutuka. Bweenka ndalabwa mbweenga shanyonyoola ceeni icata kuceela cakwiimikisha bwaato, kutoonsha inga kwanyonyoola lushomo lwesu. Alimwi na twacana mapensho inga twacileka kushoma ayi Yehova alaakukumanisha shishomesho shakwe. Na twacileka kushoma, nkokwaamba ayi twacileka akulangila. Bweenka Jemusi mbwakaamba ayi “uyo utonsha uli anga ndyaaba palweenge ilyo litolaanishikwabo amuuwo.” (Jemu. 1:6) Muntu ulinyumfwa boobo inga tacikoonshi kuba alusangalalo!

16. Ino nciinshi ncotweelete kucita na twatalika kutoonsha nshetushoma?

¹⁶ Shakucita: Kucileka kutoonsha akuyumya lushomo lwanu. Amufwambaane kucitawo comwi. Muciindi ca mushinshimi Elija, bantu bakwe Yehova bakatalika kutoonsha nshobakalinga kushoma. Elija wakabalwiita ayi: “Ino mutootola ciindi cilaamfu buyani kwaamba ayi musale ca maano? Na Yehova ngoLesa walushinisho, kamumulambila, sombi na Baali ngoLesa kamumulambila!” (1 Baam. 18:21) Amunshiku shino mbocibete. Tulyeelete kulangoola makani eenga atucafwa kushoma cakutatoonsha kwaamba ayi ncakwiila Yehova ngo Lesa wancine, Baibo nga Maswi akwe, alimwi Bakamboni Bakwe Yehova mbobantu bakwe. (1 Tesa. 5:21) Kucita boobo kulaakutucafwa kucileka kutoonsha akuyumya lushomo lwesu. Na tutoyandika bakutucafwa kwaamba ayi tucileeke kutoonsha, inga twalwiita bamanene. Tulyeelete kufwambaana kucitawo comwi kwaamba ayi tutolelele kusebensela Yehova calusangalalo!

17. Ino nciinshi ceenga cacitika na twaba aboowa?

¹⁷ Lipenshi: Kulefuka. Maswi akwe Lesa alaamba ayi: “Na watentuka muciindi ca mapensho, nkokwaamba ayi nkusu shako shilaceya.” (Tus. 24:10) Muci Ebulu maswi akasansululwa ayi “na watentuka” inga asansulula “kucileka kuba utaloondi.” Aboobo kuba aboowa, inga kwatumana lusangalalo.

18. Ino kuliyumya cilaamba nshi?

 ¹⁸ Shakucita: Amushome muli Yehova kwaamba ayi amucaafwe kutaloonda akuliyumya. Kuliyumya mumapensho kulayandika kutaloonda. (Jemu. 5:11) Liswi lyakwaamba ayi “kuliyumya” Jemusi ndyaakaamba lilatupa kuyeeya muntu utolelela kwiimikana cakushimpa pamusena mpwaabete. Mpashi inga twayeeya musoja wiimfwi cakutaloonda alimwi akutacicawo mulwani wakwe ndyaatomulwana.

19. Ino nciinshi nceenga tweeya kuswa kucakubonenaako ca mutumwi Paulo?

¹⁹ Mutumwi Paulo wakatondesha cakubonenaako cibotu abuumbi cakutaloonda akuliyumya. Cimwi ciindi wakalinga kulinyumfwa kulefuka. Nacibi boobo, wakacikonsha kuliyumya mukwiinga wakalinga kushoma ayi Yehova alaakumupa nkusu shakuliyumya. (2 Koli. 12:8-10; Filip. 4:13) Aswebo inga twacikonsha kutaloonda akuliyumya ndyetutokwiinda mumeelesho, na twaliceesha akwiibaluka kwaamba ayi tulayandika lucafwo lwakwe Yehova.​—Jemu. 4:10.

20-21. Ino nciinshi nceenga twashoma cakutatoonsha?

²⁰ Inga twashoma cakutatoonsha kwaamba ayi mapensho ngotwiindaamo teshi kwaanishikwa kuswa kuli Yehova. Jemusi wakaamba cakushinisha ayi: “Muntu na wasunkwa ataambi ayi, ‘Lesa ngowansunka,’ ceebo Lesa taasunkwi abubi alimwi taaku muntu ngwaasunka.” (Jemu. 1:13) Na twashooma kwaamba ayi maswi aya ngancine, tulaba abushicibusa buyumu a Ishiwesu wakwiculu shilusuno.​—Jemu. 4:8.

²¹ Yehova ‘tapilooki na kwaaluka aaluka.’ (Jemu. 1:17) Wakacafwa Beneklistu bamuciindi ca batumwi ndyebakalinga kwiinda mumapensho, aswebo alaakutucafwa. Amupaile camoyo woonse kwaamba ayi Yehova amupe busongo, lushomo, alimwi akutaloonda. Alaakukumbula mipailo yanu. Lyalo inga mwashoma cakutatoonsha kwaamba ayi alaakumucafwa kutolelela kuba basangalete nabi ndyemutokwiinda mumapensho!