1-2. Mowiwanana ni Mateus 5:11, nafwanyiwa dhoweha nikalege avi?

YESU ahapaganya anamahara aye wi yere okanna ohagalala webaribari. Mbwenye kaakuwile wihina yere ofwanyiwa makathamiho. (Mat. 10:22, 23; Luc. 6:20-23) Kannanganyedha wi okala namahara a Yesu onodhana ohagalala. Naharahariwaga ni amudhi ehu obe ni anamathonga nnakala avi? Ki natujiwaga ni akwihu oskola obe omabasani nnakala avi? Ebaribari wi dhithu ndha dhinonthuwa-thuwiha.

² Athu owinjhiva enubuwela wi oharahariwa onodhana ohagalala? Naari. Mbwenye siyeyo Madhu a Mulugu enanaddeliwa wi nerena. Motajhiha, murumiwi Tiyagu ohuleba wihina naafwanyiwaga makathamiho kanthabwege osegedheya. Ohiya eyo, nihagalalege. (Tia. 1:2, 12) Teto Yesu ohuwoga wi naharahariwaga nihagalalege. (Omwileri Mateus 5:11.) Mbwenye nnande addi ohagalala naari nifwanyiwaga makathamiho? Opendda dhithu Tiyagu aalebenliye makiristawu obajha winere onikavihera. Vobajha, nnere woona makathamiho baani yafwanye makiristawu obajha.

3. Tiyagu nuukala namahara a Yesu yapadduwile ddi?

³ Mudhidhi nuuvira Tiyagu ddibile Yesu nuukala namahara, makiristawu obajha oharahariwa oJeruzale. (Atos 1:14; 5:17, 18) Estevawu nuupiwa, owinjhiva “othawela o Juda ni oSamariya”, ofiya o Shipre ni Antiyokiya. (Atos 7:58–8:1; 11:19) Mohanganyedha makathamiho anamahara ale yafwanyiwiwa kinawogeya. Podive dhigari ndo, aliwa kiyaselele olaleya muthenga dhomwene nuuhagalala. Aliwa wiita mulogo dhixa mumweneni watene oRoma. (1 Ped. 1:1) Mbwenye makathamihoya kayimenle vevale.

4. Makathamiho baani yafwanye makiristawu obajha?

 ⁴ Makiristawu obajha yahifwanyiwa makathamiho owinjhiva. Motajhiha, muwari mwa yaka 50, namathonga Kalawudiyu wawigara oRoma majudewu atene. Mwaha wa yeyo, majudewu yaali makiristawu yahihiya nyumba dhewa odhowa okalaga mburo mmodhaya. (Atos 18:1-3) Muwari mwa yaka 61, murumiwi Pawulo oleba wi makiristawu owinjhiva yoruwaniwa vathaddo, yovokeriwa mukambura ni yowiyeriwa dhithu dhewa. (Heb. 10:32-34) Ninga athu amodha, makiristawu yahihawa ni yokala aredda. — Rom. 15:26; Fil. 2:25-27.

5. Yohudhera ela nnawakule makoho baani?

⁵ Tiyagu alebile karta naaye ehinafiye yaka ya  62, oliye ahinona pamadhene makathamiho yafwanya addibila. Yehova onvethela Tiyagu oleba karta wihina awinviyarele makiristawu. Mwaha wa karta nenna, aliwa wakela dhoholela dhapama wodhela ohagalala naari efwanyiwaga makathamiho. Kabeni nihudhere karta na Tiyagu wi nande wawakula makoho ala: Ohagalala baani Tiyagu asorihiliye? Yamuyelelihe mukiristawu ohagalala ddi? Ki thotho, nroromelo ni oliba murima dhinanikavihera avi naafwanyiwaga dhoweha?

6. Mowiwanana ni Lucas 6:22, 23, mwahaya bwaddi mukiristawu agahagalala naarive afwanyiwaga makathamiho?

⁶ Athu owinjhiva enubuwela wi enakanne ohagalala yakanna egumi yapama, korowa dhowinjhiva ni murala wohagalala. Ohagalala baani Tiyagu awogiliye? Oliye anawoga ekalelo yowima ya muzimu wotxena wa Mulugu. (Gál. 5:22) Mukiristawu anohagalala mwaha omulabela Yehova ni okala namahara a  Yesu. (Omwileri Lucas 6:22, 23; Col. 1:10, 11) Ohagalala wula kunadha mwaha wa mudhidhi anafwanyeya kadda muthu. Ohagalala wehu podi oliganihiwaga ni waara muwari mwa lanterna. Mwaha okala muwari mwa lanterna, newene nipevo muzongwe kinawedha othimiha waara wule. Ni makalelo mamodhave, ohagalala onadha mmurimani mwa mukiristawu kunathima mwaha wa oruwaniwa obe oharahariwa ni emudhi obe athu amodha. Teto ohagalala wula kunavuguwa mwaha wohawa obe mwaha woredda. Mwebaribarene, naharahariwaga ohagalala oli mmurimani mwehu onooliba. Makathamiho nnafwanyiwihu mwaha wa nroromelo nehu enowoniha wi mwebaribarene nili anamahara a Yesu. (Mat. 10:22; 24:9; João 15:20) Bumwahaya Tiyagu adhe alebege: ‘Addibilaga, agalalani vanlubale, mwaha wofwanyiwa dhoweha dhohiyana-hiyana.’ — Tia. 1:2.

7-8. Mwahaya bwaddi nroromelo nehu nigaliba naafwanyiwaga makathamiho?

⁷ Tiyagu ohuwoga mwahaya bwaddi makiristawu esakulaga wagonjhiha makathamiho orusa. Oliye ohuwoga egi: ‘Nyu muhunona wihina nroromelo nenyu nehiwa nnowima ovilela.’ (Tia. 1:3) Makathamiho podi oliganihiwa ni fornu ya mootho munosiwa mujhila wihina muhaniwe supadda. Mujhila ole onowosiwa wamala othimihedhiwa, ni makalelo yala supadda nnakala novaddanene. Nimakalelo mamodhave, nagonjhiha makathamiho ninga mootho nroromelo nehu nnakala nolibanene. Bumwahaya Tiyagu adhe alebege egi: ‘Mowindala muhiye ovilela weenyu wawakwanelihe mabasa enyu, wihina mukale owaakwanela, apamene mwadhatedhene, ehuhalelagani ethu.’ (Tia. 1:4) Woona wi makathamiho enolibiha nroromelo nehu, eyo enonikavihera ovilela nuuhagalala.

⁸ Teto Tiyagu ohuwoga dhithu dhimodha dhaniyelelihe ohagalala. Dhithu baani awogile Tiyagu, ki nnagonjhihe ni makalelo baani?

9. Mwahaya bwaddi nigahowela thotho?

⁹ Yoweha: Ohunona yowera. Nafwanyiwa makathamiho kannanona yowera, makathamiho ayo podi onirijha nihinone yowera vano nyelele ohagalala. Mudhidhi yoyo nnohowela thotho wihina nnone ethu nnahowelihu wera ni onona makalelo owawakula ale enaniharahara. Bumwahaya, nigahowela nikavihero na Yehova wihina nsakule dhithu dhinamuhagalasa oliye, dhihinakwerebeyiha addibilihu ni dhinanikavihere okala ororomeleya. — Jer. 10:23.

10. Tiago 1:5 ananikongomedha wera ddi?

¹⁰ Yowerana: Nlobe thotho wa Yehova. Wihina nivilele nuuhagalala, nnohowela olobela wa Yehova nilobaga thotho wihina nande  othoma dhithu dhapama. (Omwileri Tiago 1:5.) Noona wi Yehova kanaaguva wawakula malobelo ehu nnere ddi? Tiyagu ohuleba wi nalobelaga wi nlobe thotho wihina nande ogonjhiha makathamiho, Babihu odhulu ‘ononivaha mwamahala.’ (Sal. 25:12, 13) Bumwahaya, Tiyagu agakongomedha wi ‘ndidele oloba’, obe, mulobelegeve wa Yehova. Yehova kananyanyuwa nalobelaga dila dhowinjhiva nilobaga thotho. Oliye onowoona makathamiho enanifwanya ni onowukuwa, teto onofuna onikavihera. Mwebaribarene nnohagalala onona muselu yoyo! Yehova ananivaha thotho ni makalelo baani?

11. Negi nikanne thotho enahoweleya nere ddi?

¹¹ Yehova anonivaha thotho wodhela Madhu aye. (Pro. 2:6) Wihina nikanne thotho nimuhudherege Bibliya ni malivuru ehu. Wenjhedhedha enonelo yehu baahi kinaakwana. Nnohowela ovirihamo ndhe nnahudherihu. Tiyagu ohuleba egi: ‘Mowindala mwavirihegemo madhu enawogiwa, ohiya okalaga anamiwave baahi.’ (Tia. 1:22) Neragana ndhe dhinawoga Mulugu, nnokala athu okurumuwa, okweya ni athagaraga. (Tia. 3:17) Kannapwatha makathamiho nnafwanyiwihu, dhikalelo ndha dhinere onikavihera ohuyelela ohagalala.

12. Mwahaya bwaddi sathima omunona pamadhene Bibliya?

¹² Tiyagu ohuleba wi wawileri Madhu a Mulugu enaligana ni wisugwa va espelyuni. Bibliya anonikavihera woona dhithu nnahowelihu osaddula mwigumini mwehu ni makaleloya osaddula. (Tia. 1:23-25) Motajhiha, namala omuhudhera Bibliya, nnowona wi nnohowela okurumusa murima wehu. Nnikavihero na Yehova iyo podi okala ookurumuwene athu amodha yaaniligaga obe naafwanyiwaga makathamiho. Nerana yeyo nnere wanda wagonjhiha makathamiho ni thotho. Nnowedha  wubuwela pama ni othoma dhithu dhapama. (Tia. 3:13) Bumwahaya, sathima omunona pama Bibliya!

13. Mwahaya bwaddi ekala yapama ohudhera ni dhopadduwa dha adhaari a Mulugu akale?

¹³ Malabo mamodha, nnohudhera werana ethu yapama nerana ethu yabure. Mbwenye ala kahi makalelo apama ohudhera. Ehikalawo makalelo apama okanna thotho. Iyo podi ohudhera ni dhopadduwa dha athu amodha, dhapama obe dhabure. Bumwahaya, Tiyagu adhe anikongomedhege ohudhera ni dhotajhiha dha athu akale oororomeleya, ninga Abarawu, Rahabe, Jo ni Eliyaji. (Tia. 2:21-26; 5:10, 11, 17, 18) Podive efwanyiwaga makathamiho aliwa yahanda ovilela, ehiyelenle ohagalala. Yotajhiha yewa enowoniha wi nnikavihero na Yehova nnowanda ovilela.

14-15. Mwahaya bwaddi kahi yapama wanganyedhaga nroromelo nehu?

¹⁴ Yoweha: Wanganyedha nroromelo nehu. Malabo mamodha iyo podi ohonelagamo pama Bibliya anawogiye. Obe podi wera Mulugu kanawakula malobelo ehu ninga mwafunelihu. Dhithu ninga dhendha podi onanganyedhihaga mmurimani, naherana ethu sithu wanganyedha wula podi okwerebeyiha nroromelo nehu ni ononga wandana ninnihuna ni Yehova. (Tia. 1:7, 8) Wanganyedha wula podi onthukulela wanganyedha mpaganyo dha Mulugu dhosogolo, ni oniyeleliha ejhehedho yehu.

¹⁵ Murumiwi Pawulo ohuwoga egi makathamiho ehu eli ninga ankora. (Heb. 6:19) Mudhidhi wa nipevo ankora anomukavihera baruku okala oolibene. Mbwenye kurentina nahikala napamanene kannakavihere. Ninga mugwita onamuddihiwa ankora, wanganyedha onokwerebeyiha nroromelo nehu. Vano nafwanyiwa makathamiho nnoyelela nroromelo ninnihuna ni Yehova, vano iyo obajha wubuwela wihina oliye kanakwanelihe mpaganyo dhaye. Nayelela nroromelo, nihiyelela ejhehedho. Tiyagu ohuwoga egi muthu ananganyedha ‘onaligana ni wumba wa niya, nipevo nnathukulela mburo winafuniwa.’ (Tia. 1:6) Muthu owi ndala newene kanakala ohagalala!

16. Nanganyedhaga nroromelo nehu neere ddi?

¹⁶ Yowerana: Nifwanye dhowakula dha makoho ehu ni nlibihe nroromelo nehu. Wanganyedha kuwakune mada. Malabo a namavuhulela Eliyaji nlogo nowanganyedha dhorumedha dhewa. Eliyaji owoga ni aliwa egi: ‘Wanganyedha weenyu winaagomele waani wodhela dhithu ndha biili? Akala Yehova di Mulugu eebaribari, mmulabelege oliye! Mbwenye akala di Bahale mmulabelege yoyo!’ (1 Reis 18:21) Peeno enopadduwa emodhave. Nihanganyedhege wi Yehova di Mulugu ebaribari, teto Bibliya bi Madhu aye ni Anamona a Yehova thiri nlogo naaye. Bumwahaya osayelege dhowakula dha makoho awo. (1 Tes. 5:21) Wasayela onere ofwanya ele onanganyedhiwe ni onere olibiha nroromelo nawo. Nafunaga nikavihero wihina nigomihe wanganyedha wehu podi wasayela anamaholela mulogo. Yathimaya siila: Sapama wasayela mowaguva wihina nidhowegeve nimulabelaga Yehova nuuhagalala!

17. Nahiliba murima enanipadduwele ddi?

¹⁷ Yoweha: Okala ookwerebeyene. Bibliya anowoga egi: “Wahiliba murima nlabo na makathamiho, Onere oyelela kopolo.” (Pro. 24:10) Ni Ebarayiku madhu owi “ohuliba murima” podi otapulelaga “okwerebeya.” Wahiliba murima kunaalibe oyelela ohagalala.

18. Ovilela onatapulela ddi?

¹⁸ Yowerana: Onone wihina nnohowela oliba murima wi nikale ooliba murima ni ovilela. Nnohowela oliba murima wi nikale ovilela naafwanyiwaga makathamiho. (Tia. 5:11)  Madhu alabihedhe Tiyagu owi “ovilela” enonubusedha muthu ali owimelene txithi ahinathikeya. Iyo podi omubuwelaga munyakoddo ahinathawa afwanyiwa amwiddani, mbwenye oliye onowikoma newene kanathikeya.

19. Nnahudhera ddi ni Pawulo?

¹⁹ Pawulo ohuhiya mweddelo wapama wodhela oliba murima ni ovilela. Malabo mamodha owitheya mwili. Naari dhigari ndo, owedha ovilela mwaha omuroromela Yehova wi ere onvaha oliba murima ni kopolo ahoweliye. (2 Cor. 12:8-10; Fil. 4:13) Iyo podi okanna oliba murima wimodhave ni kopolo namutajhiha murumiwi Pawulo nubuwelaga wihina Yehova anere onivaha ethu nnahowelihu. — Tia. 4:10.

20-21. Ethu baani nnafunihu wihina nihanganyedhege?

²⁰ Naafwanyiwaga dhoweha kahi wihina: Yehova anonisinyusa. Tiyagu ohuwoga egi: ‘Muthu akala vaari va yoweha, ahiwoge egi: “Ginna wehiwa ni Mulugu” Ni dhego dhabure, Mulugu kanehiwa, newene oliye kanamweha muthu.’ (Tia. 1:13) Nahanganyedhaga nnere olibiha wandana ninnihuna ni babihu odhulu. — Tia. 4:8.

²¹ Yehova ‘kanasadduwa.’ (Tia. 1:17) Oliye ahakavihera makiristawu obajha owanana makathamiho, teto peeno podi onerela emodhave. Olobele wa Yehova ni murima wawo watene olobaga thotho, nroromelo ni oliba murima. Oliye anere wawakula malobelo awo. Werana yeyo okanne ebaribari wihina Yehova anere wukavihera oliba murima ni ohuyelela ohagalala wagonjhihaga makathamiho awo!