1-2. Dookɛ̄ kpa Matiu 5:11 kɔ doo, i ɛmadɛɛ̄ doā-ɛp doodoo wa?

JIZƆS bee yira yii nɛ pya a wee ye nyɔɔnɛ dumɛ kɔ ba gaa le ɛrɛ kaāna ɛɛbu. A bee kɔnage nɛ pya a ye wereloo kɔ ba ekpesī ɛma-ɛp. (Mat 10:22, 23; Luk 6:20-23) I ɛrɛ ɛɛbu aāloo lulu pya a nyɔɔnɛ dumɛ Kraist. Mɛ etɔɔ̄ i loo doodoo wa lo alu egbana i sī tɛ̄mabah pya i butɔ, lu etɛ̄ŋa i loo tɛ̄mabah pya bɛbɛɛ, ale lo pya i koo kɛ̄tam ale tɔkpa zū i kɔ i doo nu a bee piya ni? Alu kaka kɔ pya nu ama dap doo kɔ i ɛrɛ gbɛnɛ ekɛɛrɛ.

² Pya nɛɛ naa wee ɛp tɛ̄ŋaloo nua nu edoo kɔ ba a ɛrɛ ɛɛbu. Kerewo, taɛ nu Muɛ̄ Ue Bari kɔ i doo lo. Bu edoba, Jems a wee nyɔɔnɛ dumɛ Jizɔs bee ɛm kɔ i buū nua ɛɛbu sɔ̄ i kpesī ɛma-ɛp taā i ɛrɛ e’ɔaloo. (Jem 1:2, 12) E Jizɔs bee i kɔnage nɛ kɔ i ɛrɛ ɛɛbu sɔ̄ alu etɛ̄ŋa i loo. (Buū Matiu 5:11.) Bu mɛ sīdee na i dap kiisī lo e’ɛrɛ ɛɛbu kaɛlɛɛ doā-ɛp a? I dap nɔ gbɛnɛ-edo nu aāloo kɛkɛɛrɛbu pio nu a bee le bu kpa Jems bee ɛm ma pya Nɛɛ Kraist bu bagara sɔ̄ a. Tuatua, i dasī kɔnia nu finiabah pya lo Nɛɛ Kraist bee kpesī.

3. E na a bee sira nwīgbagbara sɔ̄ aā sɔ̄ Jems bee nyɔɔnɛ dumɛ Jizɔs a?

³ Nwīgbagbara sɔ̄ aā sɔ̄ wuga lu bu ka Jizɔs a kura Jems bee lu nɛɛ a nyɔɔnɛ dumɛ Kraist, bee lu etɛ̄ŋaloo pya Nɛɛ Kraist a bee le Jerusalɛm. (Doonu 1:14; 5:17, 18) E sɔ̄ a bee lu efɛ Stivin a wee nyɔɔnɛ dumɛ Jizɔs, gbɛnɛ-edo pya Nɛɛ Kraist bee aa lo gbɛnɛ buɛ̄ sa “yaara  tɛɛ̄ ɛŋɛnɛ barasī loo Judia le Sameria,” sa sɔ̄ sɔ̄ gaa kiisī ba ina kɛ̄ a binia doodoo Saiprɔs le Antiɔk. (Doonu 7:58–8:1; 11:19) I dap muɛ̄ dua e’aga kɛ̄tɔɔ̄ pya Nɛɛ Kraist bee kpesī lo sɔ̄. Kerewo, ba bee agɛrɛbah zue ue ɛrɛgeba kɛ̄ ba kii, e a bee lu eyere keekee bɔŋanaloo tɛ̄ma ɛŋɛnɛ dɛ̄dɛɛ̄ barasī Rom. (1 Pit 1:1) Mɛ ba bee kiisī lo ekpesī booboo taāŋa.

4. Dɔɔ̄na pya amunu taāŋa na pya Nɛɛ Kraist bee kpenage sī a?

⁴ Pya Nɛɛ Kraist bu bagara sɔ̄ ama bee kpesī keekee doā-ɛp. Bu edoba, dee bu zua 50 C.E., Mɛnɛ Claudius a gaa bee bɛɛ Rom bee kɔ dɛ̄dɛɛ̄ pya Juu a aa Rom kii. Nyɔɔwo, bee lu esu bah ekpo aā pya Juu ba lu Nɛɛ Kraist kɔ ba a aa wa be sa kii dɔɔ̄na kɛ̄. (Doonu 18:1-3) Dee bu zua 61 C.E., nɛɛ lɛɛratam Pɔɔl bee ɛm kɔ a bee lu ebɔbɛɛ kɛɛ pya Nɛɛ Kraist bie taɛkɛ̄, wa yere kpɔgɔrɔ sa su wa zɔ. (Hib 10:32-34) E pya Nɛɛ Kraist bee tɔga kɛ̄bah kporo le eyɔloo dookɛ̄ pya dɔɔ̄na nɛɛ bee doo.—Rom 15:26; Fil 2:25-27.

5. Pya amunu ebip na i gaa le agara a?

⁵ Sɔ̄ Jems bee ɛm ye kpa lɛɛ a gae lu bu zua 62 C.E., ebee dābeeloo doā-ɛp pya wuga nɛɛdam le nɛɛwa gaa bee tɛɛ̄ bu. Jɛhova bee su ye kaɛ edɔɔ̄ daā kɔ Jems a ɛm pya zuurabahtɔ̄ a dɔbiī ma pya Nɛɛ Kraist ama, lo eyerebah wa nɛ kɔ ba a tɔɔ̄ bu ɛɛbu kere ba gaa kpesī doā-ɛp. Doraa i naa nɔ nu akiiloo kpa Jems bee ɛm sa i agara taa ebip a kɔ: Amunu ɛɛbu na Jems bee kɔ nu kumaloo a? E na edap doo kɔ Nɛɛ Kraist  a peere lo ɛɛbu a? E bu mɛ sīdee na suānu, yira, le e’agaloo i dap yerebah nɛ kɔ i kiisī lo e’ɛrɛ ɛɛbu kaɛlɛɛ doā-ɛp i gaa kpesī a?

6. Dookɛ̄ Luk 6:22, 23 kɔ doo, e na anua Nɛɛ Kraist dap ɛrɛ ɛɛbu sɔ̄ a gaa kpesī doā-ɛp a?

⁶ Pya nɛɛ dap kɛɛrɛ kɔ ba e’ɛrɛ ɛɛbu lo ba ɛrɛe nwanaloo, gbɛnɛkpo kpugi, le efɛɛloo butɔ. Mɛ ɛɛbu Jems bee ɛm nu kumaloo na lo a le yɛɛ eyuu edɔɔ̄ Bari, e a naa dɛɛa nyɔɔ kɛ̄tɔɔ̄ nɛɛ le bu bu dum. (Gal 5:22) Nɛɛ Kraist ɛrɛ ɛɛŋa, ale kaāna ɛɛbu aāloo susuā kɔ a gaa nyɔɔnɛ edoba Jizɔs sa dooe nu a nia Jɛhova. (Buū Luk 6:22, 23; Kɔl 1:10, 11) Dua ɛɛbu ama gaa bɛ bu beenyiɛ pya Nɛɛ Kraist dookɛ̄ miā a le bu be-miā wee bɛ sɔ̄ gɛɛ̄-miā ye kpega doo. Ii le epee i ɛɛbu sɔ̄ loo i dumɛ ale sɔ̄ ii aadee ɛrɛ kpugi. E a naa wee zim nyɔɔbee egbɛa ale gbanasī a aa butɔ ale lo a aabah pya dɔɔ̄na. Taā a zim, a wee bɛ kaāna sɔ̄ pya gbanasī gbī ezimɛ ye. Pya doā-ɛp i kpesī nyɔɔ i yira tɔgɛ kɔ i lu kaka pya a nyɔɔnɛ dumɛ Kraist. (Mat 10:22; 24:9; Jɔn 15:20) Nu anua lo sa Jems dap ɛm kɔ: “Buūnaa dɛ̄dɛɛ̄ ɛɛ nua ɛɛbu, pya na wuga, sɔ̄ bui dɔ bu keekee ɛma ɛp.”—Jem 1:2.

7-8. Amunu biī na doā-ɛp dɔ nɛ i yira a?

⁷ Jems bee yerenage nukuādɛɛ̄ loo dɔɔ̄na nu anua pya Nɛɛ Kraist kpɛ̄naloo ekpesī kere lo doā-ɛp a aga. A bee kɔ: “Ɛma ɛp bui yira nua nyɔɔnyɔɔ egerebu.” (Jem 1:3) Dap lu esu doā-ɛp dooreloo miā a wee lu esu ɔma kpe gɛɛrɛ. Sɔ̄ lo kpe egɛɛra sa a sikɛ̄ lu elɛɛbaloo kɔ a fiitɔɔ, wee sikɛ̄ agaloo. Bu aba lo sīdee sɔ̄ i egerebu bu doā-ɛp, i yira wee agaloo. Nu anua lo sa Jems bee ɛm kɔ: “Doolo nyɔɔnyɔɔ egerebu ɛrɛ ye mmɛ tam, lokwa a mma sa lee.” (Jem 1:4) Sɔ̄ i muɛ̄ kɔ pya lo doā-ɛp doo kɔ i yira a agaloo, i dap wa tama bu ɛɛbu.

⁸ Bu kpa Jems bee ɛm, a bee yerenage nukuādɛɛ̄ loo pya nu a dap doo kɔ i peere i ɛɛbu. E na pya lo nu finiabah a, e bu mɛ sīdee na i dap wa be eebah a?

9. E na anua suānu bɛɛ̄ i a?

⁹ Nu finiabah: Sɔ̄ ii suā nu edoo. Sɔ̄ i gaa kpesī doā-ɛp, i bara Jɛhova kɔ a yerebah i nɛ lokwa i doo pya biaɛfii e’ɛɛrɛ ye bu, dɔbiī nɛ pya i wuga nɛɛdam le nɛɛwa, sa agɛrɛtɛ̄ i yira. (Jer 10:23)  Suānu bɛɛ̄ i lokwa i suā nu edoo le nu i kɔ nɛ pya a i gbanasī. Lo ii suā nu edoo, a dap i tɔɔ̄loo kɔ ii ɛrɛ lɔgɔ nɛɛ eyerebah i nɛ bu i kɛ̄tɔɔ̄, sa i dap peere i ɛɛbu.

10. Lo i gbī e’ɛrɛ suānu, e na Jemes 1:5 kɔ alu ebɛɛ̄ kɔ i doo a?

¹⁰ Nu edoo: Bara suānu aābah Jɛhova. Lo i gbī etama doā-ɛp bu ɛɛbu, i ɛrɛ edasī bara Jɛhova bu kara kɔ a nɛ i suānu esu biaɛma nu fii leere. (Buū Jemes 1:5.) E na i doo lo a bee kɔ Jɛhova naa agara i kara aba sɔ̄ a? Jems kɔ i kiisī lo e “bara bah” Bari. Naa wee biirebu Jɛhova sɔ̄ i kiisī lo ewee bara suānu. A naale ekɔgara i ue. I Tɛ a le li bunyɔɔ nɛ suānu dɛ̄dɛɛ̄ pya a ye bara “bu ɛɛ beenyiɛ” lokwa ba dap tama wa ɛma-ɛp. (Yɔɔ 25:12, 13) A muɛ̄ pya taāŋa i le bu, i toesaɛ̄ sa gbī eyerebah i nɛ. Bu kaka, lo ama nɛ i ɛɛbu! Kerewo, bu mɛ sīdee na Jɛhova i nɛ suānu ani?

11. Dɔɔ̄na e na i doo lo e’ɛrɛ suānu a?

¹¹ Jɛhova nɛ i suānu tɛ̄maloo ye Muɛ̄ Ue. (Kam 2:6) Lokwa i ɛrɛ lo suānu, i ɛrɛ enɔ Muɛ̄ Ue Bari le pya kpa i wee nɔā Baibol. Mɛ i ɛrɛ edoo emanyɔɔ aadee nɔ nu. I ɛrɛ esu suānu Bari yere bu i dum tɛ̄maloo edoo pya nu Bari i gbī aābah. Jems bee ɛm kɔ: “Bui luaa pya a doo ue a, e a naale aba pya a dā.” (Jem 1:22) Sɔ̄ i su pya zuurabahtɔ̄ Bari yere bu dogo, i lu pya a sere efɛɛloo, ɛrɛ suānu le beenyiɛ toesaɛ̄. (Jem 3:17) Pya elap dogo ama yerebah i nɛ kɔ i dap tama doā-ɛp sa ii peere i ɛɛbu.

12. E na anua alu ebɛɛ̄ kɔ i suā Baibol leere a?

¹² Muɛ̄ Ue Bari le doodoo taŋaligi, lo a i yerebah nɛ kɔ i muɛ̄ nu alu ebɛɛ̄ kɔ i kwabaloo bu i dum. (Jem 1:23-25) Bu  edoba, sɔ̄ i enɔā Muɛ̄ Ue Bari sah, i dap muɛ̄ kɔ alu ebɛɛ̄ kɔ i baɛbee i saŋ. Tɛ̄maloo yerebah Jɛhova, i dap nɔ kɛ̄ elu fɛgɛ doo sɔ̄ i gaa nyɔɔnɛ pya nɛɛ dānia nu, sɔ̄ pya nɛɛ ale taāŋa doo kɔ bu i a biira. I dap aabaloo taāŋa i kpesī bu le sīdee nyɔɔbee i lu fɛgɛ. I dap kɛɛrɛ nu leere sa biaɛ nu fii bu le sīdee. (Jem 3:13) Naa ɛp kɛ̄ alu ebɛɛ̄ kɔ i suā Baibol leere doo a!

13. E na anua i nɔ edoba pya nɛɛ Baibol kɔ ue kumaloo a?

¹³ Pio sɔ̄ i wee suā nu ii le ebee doo sɔ̄ i etɛ̄na ekwɔ sah. Mɛ a wee bee piya sɔ̄ i nɔ nu bu lo sīdee. Ziī kaāna sīdee e’ɛrɛ suānu na tɛ̄maloo enɔ nu aāloo kɛ̄ pya dɔɔ̄na bee tɛɛ̄ ekwɔ le kɛ̄ ba bee doo leere doo. Nu anua Jems yere i mɛm loo kɔ i nɔ edoba pya Baibol kɔ ue kumaloo doodoo Abreham, Rehab, Job le Elaija lo. (Jem 2:21-26; 5:10, 11, 17, 18) Pya zooro Jɛhova a bee kumalookɛ̄ ama bee dap be eebah pya doā-ɛp ebee doo kɔ ba a peere wa ɛɛbu. Edoba kɛ̄ ba bee egerebu doo tɔgɛ kɔ tɛ̄maloo yerebah Jɛhova i dapnage doo dookɛ̄ alaba bee doo.

14-15. E na anua i ɛrɛ elɛa baɛbaɛ ekɛɛrɛ bu i a?

¹⁴ Nu finiabah: Ɛrɛ baɛbaɛ ekɛɛrɛ. Aā ziī sɔ̄ mmɛ ziī, a dap i agaloo edābeeloo ziī nu a le bu Muɛ̄ Ue Bari. Ale a bee kɔ Jɛhova naa agara i kara bu sīdee i bee ɛmadɛɛ̄. Lo ama dap doo kɔ i ɛrɛ baɛbaɛ beenyiɛ. Lo i lɛɛbaloo baɛbaɛ ekɛɛrɛ bie bu i, a dap ɔɛloo i yira sa gbee i gbanialoo kumakɛ̄ Jɛhova le. (Jem 1:7, 8) A dapnage doo kɔ i peere bɛābu i ɛrɛ kumaloo deesī li.

¹⁵ Nɛɛ lɛɛratam Pɔɔl su bɛābu i ɛrɛ kumaloo deesī li dooreloo kpe aā fah. (Hib 6:19) Kpe aā fah wee aa fah sere ziī dɔ sɔ̄ fii dɔ sa doo kɔ aa yɛɛ pe. Mɛ aba sɔ̄ kpɔgɔrɔ kpe a wee lu esu aā fah dap dɔbiī na sɔ̄ a sii fura. Dookɛ̄ kaɛlogo dap gbee kpe aā fah doo, kɛ̄ baɛbaɛ ekɛɛrɛ dapnage gbee i yira doolo. Sɔ̄ gbanasī aakɛ̄, nɛɛ a ɛrɛ baɛbaɛ ekɛɛrɛ dap peere ye yira kɔ Jɛhova edoo pya ye yii gbɔ̄mɛɛ̄. Lo i peere i yira, i peere i bɛābu. Dookɛ̄ Jems bee kɔ doo, nɛɛ a ɛrɛ baɛbaɛ ekɛɛrɛ le “doodoo efɔp maā nyɔɔ gbɛnɛ pɛnɛ, lo a lu eda ye sa daaŋa tɛ̄maloo efɔp.” (Jem 1:6) Nɛɛ a le bu dua kɛ̄tɔɔ̄ ama naale e’ɛrɛ ɛɛbu doo pippip!

16. E na i doo lo i ɛrɛ baɛbaɛ ekɛɛrɛ a?

¹⁶ Nu edoo: Kwabaloo o baɛbaɛ ekɛɛrɛ; agɛrɛtɛ̄ o yira. Nwaabah doo dogo. Bu dee nɛɛ mɔmanudɛɛ̄ Elaija, pya nɛɛ Jɛhova bee ɛrɛ baɛbaɛ ekɛɛrɛ. Elaija bee wa kɔ nɛ kɔ: “Ina mɛ sɔ̄ na bui kiā si-kpɛgɛrɛ yɛɛ baɛ kee ekɛɛrɛ ani? Lo a le Jɛhova na Bari a, nyɔɔnɛaa ye; mɛ lo a le Baal nyɔɔnɛaa ye.” (1 Mɛnɛ 18:21) Lunage ebɛɛ̄ kɔ i nwaabah doo dogo anii’ee. Lee kɔ i gbītɛ̄ nu edoo kɔ i suā leere kɔ Jɛhova na Bari a, Baibol na ye Muɛ̄ Ue a, e Pya Ekeebee Jɛhova na pya ye nɛɛ a. (1 Tɛs 5:21) Dodoo dɛ̄dɛɛ̄ nu ama elɛɛ i baɛbaɛ ekɛɛrɛ bu sa agɛrɛtɛ̄ i yira. Lo i gbī yerebah lokwa i dap lɛa baɛbaɛ ekɛɛrɛ bu i, i dap kɔ nɛ pya kanɛɛ. Lu ebɛɛ̄ kɔ i doo dogo bu nwaanwaabah lo i gbī ekiisī lo e’ɛrɛ ɛɛbu bu i esiatam nɛ Jɛhova!

17. E na esira lo i ɛrɛ e’ɔaloo a?

¹⁷ Nu finiabah: E’ɔaloo. Muɛ̄ Ue Bari kɔ: “Lo a le o gbaa dee etɛɛrɛ o ekpo lu nwīgbagbara.” (Kam 24:10) Bee ue Hibru alu etap kure “gbaa” dap nage kura  “ɛrɛ e’ɔaloo.” Lo o ɛrɛ e’ɔaloo, o nwaabah peere o ɛɛbu.

18. E na yira agɛrɛ kura a?

¹⁸ Nu edoo: Dɛɛa nyɔɔ Jɛhova kɔ a nɛ a e’agaloo lo e egerebu. Alu ebɛɛ̄ kɔ i ɛrɛ e’agaloo lokwa i dap tama doā-ɛp. (Jem 5:11) Bee ue Jems su kɔā ue alu ekure “yira agɛrɛ” doo kɔ i kɛɛrɛ nu akiiloo nɛɛ a yira bia ye dɔ. I dap kɛɛrɛ nu akiiloo ziī nɛɛ nɔ̄ a yira baɛ pya ye baa sa naa aa dɔ kaɛlɛɛ ɛrɛgeba kɛ̄ ba ye be bu e’aga bah doo.

19. E na i dap nɔ aāloo edoba nɛɛ lɛɛratam Pɔɔl i sere kɛ̄ nɛ a?

¹⁹ Nɛɛ lɛɛratam Pɔɔl bee sere le edoba i nɛ akiiloo mɛm le yira agɛrɛ. A wee ɛrɛ e’ɔaloo pio sɔ̄. Mɛ a bee dap egerebu nyɔnɛbee a bee dɛɛa nyɔɔ Jɛhova kɔ a nɛ ye mɛm a ye bɛɛ̄. (2 Kɔr 12:8-10; Fil 4:13) I dap ɛrɛ dua mɛm le e’agaloo ama lo i kumalookɛ̄ sa dɛɛa nyɔɔ Jɛhova kɔ a yerebah i nɛ.—Jem 4:10.

20-21. E na i suā leere a?

²⁰ I dap suā leere kɔ pya ɛma-ɛp i kpesī naa lu kpɔte a aabah Jɛhova. Jems kɔ i nɛ kɔ: “Doolo lɔgɔ nɛɛ aa kɔ, sɔ̄ alu e’ɛma ye ɛp, ‘Bee lu e’ɛma mɛ ɛp tɛ̄ma bah Bari’; nyɔnɛbee pɔrɔ naa dap ɛma ɛp Bari; e alɛ alɛɛ loo naa doā lɔgɔ nɛɛ ɛp.” (Jem 1:13) Sɔ̄ i suā pya kaka ue ama, i tɔɔ̄ waɛloo i wereloo Tɛ a le li bunyɔɔ kaāna.—Jem 4:8.

²¹ Jɛhova lu nɛɛ a naa “ɛrɛ nyaa ale ekoo kikiiya.” (Jem 1:17) A bee yerekpotɛ̄ pya Nɛɛ Kraist bu tua sɔ̄ o’oo tup zua sɔ̄ ba kpesī doā-ɛp, sa eyerenage bah nɛ ili anii’ee. Kiisī lo ebara Jɛhova kɔ a nɛ a suānu, yira, le e’agaloo. A gaa le agara pya o kara. Lo sɔ̄ o suā leere kɔ a gaa le yerebah a nɛ kɔ o kiisī lo e’ɛrɛ ɛɛbu sɔ̄ o gaa kpesī doā-ɛp!