1, 2. Mateo 5:11​pi nishca shinaca llaquicunahuan cashpaca ¿imashinata sintirina capanchi?

JESUSCA paipa catijcunamanga cushilla causaiguta cunatami nirca. Shinapash paillatami nirca paita juyashpa catijcunaca llaquicunata charina cashcata (Mat. 10:22, 23; Luc. 6:20-23). Ñucanchicunaca Jesusta catijcuna cashcamandaca cushijushcami capanchi. Shinapash ñucanchi familiacunallata Jesusta ama catichun jarcaicunata churanga yashpami yapata preocuparita ushapanchi. Shinallata gobiernocuna, escuelamanda compañerocuna, trabajomanda cumbacunapash Jehová na gushtashca cosascunata rurachinga yashpami preocuparinchi.

² Ciertomi can, catiriashpa llaquichijpica pipash na cushijupanchichu. Shinapash Bibliapica cushilla sintirichunmi mandan. Santiago libropica llaquicuna shamujpica cushijuichi nijunmi (Sant. 1:2, 12). Jesusca catiriashpa llaquichijpica cushijuichi nircami (Mateo 5:11​ta liipangui). Shinapash llaquicunahuan cashpaca ¿imashinata cushilla cashpa catita ushapanchi? Santiago libropimi ashtaca ali consejocunata tari ushapanchi. Caipi consejocunataca callari Jesusta catijcunamanmi Santiagoca escribirca. Callaripica punda Jesusta catijcuna ima llaquicunata charishcata ricupashunchi.

3. Jesuspa la huauqui Santiago Jesusta catij tucushca jipaca ¿imata pasarca?

³ Santiago Jesusta catij tucushca jipami contracunaca, Jerusalén llactapica Jesusta catijcunataca llaquichi callarirca (Hech. 1:14; 5:17, 18). Jesusta catij Estebanda huañuchijpicarin, chai llactamanda Jesusta catijcunaca ‘Judea, Samaria shuti llactacunamanmi caiman chaiman tucuilla pacajushpa rinajurca’. Huaquingunaca Chipre, Antioquía nishca pushtucunamanmi chayagrirca (Hech. 7:58–8:1; 11:19). Cashna llaquicunahuan canaca paicunapaca  seguromi shinlli cashcanga. Shinapash na manllashpami paicunaca chai chayashca llactacunapipash tucui shunguhuan villachinajurca. Chaimi Roma llactapica ashtaca congregacionguna tiai callarirca (1 Ped. 1:1). Shinapash callari Jesusta catijcunaca chai llaquicunatallaca na charircachu.

4. Callari Jesusta catijcunaca ¿ima llaquicunatata ashtahuan chimbapurana tucurca?

⁴ Callari Jesusta catijcunaca shuj shuj llaquicunatami charirca. Por ejemplo, casi huata 50cunapica Roma llactata jatun mandaj Claudio shutimi judío gentecunataca Roma llactamanda llujshichun mandarca. Chaimandami chai tiempopi Jesusta catijcunaca paicunapa huasitapash saquishpa shuj pushtucunaman causangapaj rina tucurca (Hech. 18:1-3). Más o menos huata 61​pimi apóstol Pabloca, cai huauquipanicunaca ninanda rimai tucushpa, tucui charishca cosascunatapash quichujpimi carcelcunamanbash churai tucurca nishpami escribirca (Heb. 10:32-34). Shuj gentecunashnallatami imagutapash na charishpa pobrella causanajurca, ungüicunapashmi japirca. (Rom. 15:26; Filip. 2:25-27).

5. ¿Ima tapuicunatata yachajugripanchi?

⁵ Santiagoca casi huata 62​pimi shuj cartata escribirca. Cai cartata escribijushpaca huauquipanicuna ima llaquicunata charijushcataca alimi yacharca. Jehová Diosmi cai cartataca callari Jesusta catijcuna llaquicunahuan cajpi cushilla sirvishpa catichun Santiagoman escribichirca. Santiagopa cartata ricushpami huaquin tapuicunatapash contestapashun: Llaquicunata apajushpapash cushijushpa causanguichi nishpaca ¿imatata ningapaj munarca? ¿Imamandatata Jehová Diostaca ñana cushilla sirvishpa catita ushapanchiman? Llaquicunata charishpa aguantashpa catingapaca ¿imashinata ali yachaita charina, Jehová Diospi tucui shunguhuan crina, imatapash na manllanaca Jehová Diosta cushilla sirvishpa catichun ayudaita ushan?

6. Lucas 6:22, 23​pi nishca shinaca ¿imamandata llaquicunata charishpapash cushilla cashpa catita ushapanchi?

⁶ Ashtaca gentecunaca saludta charishpa, culquita charishpa, familiahuan ali cashpallami cushilla causaita ushanchi yan. Shinapash Santiagoca chaicunata charishpalla cushilla causanamandaca na parlajurcachu. Ashtahuangarin Diospa espíritu cushilla causaiguta cujpi causanamandami parlajurca. Shinallami ñucanchi causaipi ima llaquicuna japijpipash cushilla cashpa catishun (Gál. 5:22). Jesusta catijcunaca Jesuspa ejemplota catishpa, Jehová munashca shina imatapash pactachinajushcamandami cushilla causapanchi (Lucas 6:22, 23​ta liipangui; Col. 1:10, 11). Llaquicuna shamujpipash Jehová Diosta sirvinami ñucanchitaca cushilla cashpa catichun ayudan Jehová carashca cushijuica shuj lámpara michagushnami can. Shuj lámpara michaguca imahuanbash ali tapashca cashpaca huairapash, tamiapash na chayanllu. Shina cuendami saludta na charishpa, culqui faltajlla cashpapash, shujcuna ñucanchimanda burlarijpipash, familiacuna Jehovata sirvichun jarcajpipash cushilla cashpa catinchi. Contracuna Jehovapa ruraicunata tucuchingapaj munajpipashmi ashtahuan shinlli tucushpa catinchi. Imapash jarcaicunata aguantashpa catimandami ciertopacha Jesusta ali catijcuna cashcata ricuchipanchi (Mat. 10:22; 24:9; Juan 15:20). Chaimi Santiagoca: “Shuj shuj llaquicunata japishpapash, ninanda cushijushpa causanguichi” nircami (Sant. 1:2).

7, 8. Llaquicuna o problemacuna shamujpica ñucanchipa crishcacunahuanga ¿imata pasan?

⁷ Santiagoca Jesusta catijcuna imamanda llaquicunata o problemacunata charishpapash aguantashpa catishcatami villarca. Santiagoca: “Crij cashpa llaquicunata apanaca, imatapash ashtahuan aguantashpa catichunmi ayudan” nircami (Sant. 1:3, TNM ). Llaquicunaca jirruta rupayachishpa imamanbash tigrachingapaj ninashnami can. Shuj jirruta ninapi rupachishpa chiriyachijpica, chai jirruca chiriyashpaca ashtahuan shinllimi tucun. Shina cuendami llaquicuna o problemacunaca ñucanchi fetaca ashtahuan shinlliyachin. Chaimandami Santiagoca nirca: Llaquicunata aguantanami “tucuita aligutapacha yachachijun. Shina causashpami ima pandatapash na rurashpa, alipacha crij, imagupash na illajpi, tucuita charinguichi” nirca (Sant. 1:4). Shinaca llaquicunata aguantana, ñucanchi crishcacunata shinlliyachijta ricushpami llaquicunahuan, problemacunahuan cashpapash cushilla cashpa catishun.

⁸ Santiagoca imacunalla cushilla cashpa catichun jarcai ushashcatami parlarca. Shinaca cai llaquicuna o problemacunaca ¿maijanda can? ¿Imashinata cai llaquicunata o problemacunataca mishai ushapanchi?

9. Llaquicunata, problemacunata charishpaca ¿imamandata ali yuyaita minishtipanchi?

⁹ Shuj llaquica, imata ruranata na atinanami caita ushan. Llaquicunata o problemacunata  charishpaca Jehová Diosta sirvishpa catingapaj, huauquipanicunatapash ayudangapami shuj ali desicionda agllana capanchi. Shinami Jehová Diostaca cushichipashun (Jer. 10:23). Ñucanchi causaipi llaquicuna, problemacuna ricurijpi shuj ali decisionda agllangapaca ali yuyaitami minishtipanchi. Llaquicuna, problemacuna ricurijpi imata ruranata na atinashpaca, imata ruraitapash na ushashunllu. Chaimi Jehová Diostapash cushilla sirvishpa catichun jarcaita ushan.

10. Santiago 1:5​pi nishca shinaca ali yachaita charingapaca ¿imatata rurana capanchi?

¹⁰ Imata ruranata na atinashpaca Jehová Diostami mañana capanchi. Jehová Dios ñucanchicunaman ali yachaita cujpimi, shuj ali decisionda agllaita ushapashun (Santiago 1:5​ta liipangui). Jehová Diosta mañajpi ñucanchi mañashcashna na contestajta sintishpaca ¿imatata rurana capanchi? Santiagoca: ‘Taita Diostaca [cutin, cutinmi] mañana canguichi’ nircami. Jehová Diosca ñucanchicuna cutin cutin mañajpipash paica ñucanchicunahuanga na culirangachu. Ashtahuangarin llaquicunata, problemacunata aguantachunmi ali yachaitaca na mitsashpa cunga (Sal. 25:12, 13). Jehová Dios ñucanchicuna ima llaquicunata charijtapash alimi yachan. Chaimandami ñucanchicunataca ayudangapami munajun. Chaita yachashpaca ñucanchicunaca cushillami sintiripanchi. Shinapash Jehová Diosca ¿imashinata ñucanchimanga ali yachaitaca cun?

11. Ali yachaita charingapaca ¿imatata ashtahuan rurana capanchi?

¹¹ Jehová Diosca ñucanchiman ali yachaita cungapaca Bibliatami utilizan (Prov. 2:6). Chaimandami Bibliata, publicaciongunata liina capanchi. Shinapash liishpa yachajushcahuanllaca na quedanachu capanchi. Ashtahuangarin Jehovapa consejocunataca ñucanchi causaipimi pactachina capanchi. Santiagoca: “Diospaj Shimitaca pactachijcuna caichi. Na yanga uyashpalla purijcunachu cana canguichi” nircami (Sant. 1:22). Diospa consejocunata ñucanchi causaipi pactachishpaca tranquilo causanata mascaj gentecuna,  imatapash ali yuyashpa ruraj gentecuna, shujcunata llaquij gentecunami capashun (Sant. 3:17). Shina gentecuna cashpaca llaquicuna, problemacuna shamujpipash cushillami cashpa catishun.

12. ¿Imamandata Bibliata yachajunaca minishtirishcapacha can?

¹² Taita Diospa Shimica shuj espejoshnami can. Chaimandami ñucanchicuna imapi pandarijujpipash cuenta japishpa cambiachun ayudan (Sant. 1:23-25). Huaquinbica Bibliata liishpami ñucanchicuna yapata culiranlla cashcata cuenta japinchiman. Shinapash Jehovapa ayudahuanmi shujcuna culirachijpipash tranquilo canata yachajuita ushapanchi. Tranquilocuna cashpaca llaquicuna ricurijpipash imata ruranataca alimi yachashun. Ali yuyashpami imapash decisiongunataca agllashun (Sant. 3:13). Chaimandami Bibliata yachajunaca minishtirishcapacha can.

13. ¿Imamandata Jehovata sirvijcunapa causaimandaca yachajuna capanchi?

¹³ Huaquinbica pandarishparami imatapash yachajupanchi. Shinapash pandarishpara imatapash yachajunapa randica, shujcunapa pandarishcacunata ricushpa o shujcunapa ali ruraicunamandami yachajuita ushapanchi. Santiagoca Bibliapi huaquin jaricunamanda, huarmicunamanda yachajuchunmi animarca. Santiagoca, Abrahán, Rahab, Job, Eliasmandami parlarca (Sant. 2:21-26; 5:10, 11, 17, 18). Paicunaca llaquicunata, problemacunata charishpapash aguantashpami catirca. Ñucanchicunapashmi Jehová Diospa ayudahuanga llaquicunata, problemacunataca aguantashpa catita ushapanchi.

14, 15. ¿Imamandata ñucanchipa crishcacunapi seguro cangapaj esforzarina capanchi?

¹⁴ Shuj llaquica, ñucanchipa crishcacunapi na seguro canami caita ushan. Huaquinbica Bibliata liishpapash na cabal intindishcamanda o Jehová Diosta mañajpipash na ñucanchi munashcashna contestashcamandami ñucanchipa crishcacunapica na seguro caita ushanchiman. Ñucanchipa crishcacunapi na seguro cashpa, imatapash na rurashpaca Jehová Diosmandaca asha ashami caruyanchiman (Sant. 1:7, 8). Jipa punllacunapi ali causaigu tianatapashmi ñana crishpa catinchiman.

¹⁵ Apóstol Pabloca jipa punllacunapi ali causaigu tianata crinaca barco ama cuyurichun shinllita charijuj jirrushnami can nircami (Heb. 6:19). Cai jirruca huairahuan shinllita tamiajpimi barco ama rumicunaman rishpa huactarichun ayudan. Shinapash cai jirrutaca cadenacunami charijun. Cai cadenacuna jirrumbrashpa barcomanda fitirijpica chai jirruca barcotaca ñana ayudai ushanmanllu. Na seguro canaca ña fitirigrijuj jirrumbrashca cadena cuendami caita ushan. Chaimandami ñucanchipa crishcacunapi na seguro cashpaca asha asha Jehová Diosmandaca caruyaita ushanchiman. Jehovapa nishcacunapi na seguro cashpaca imapash jarcaicuna ricurijpica Jehová Diospa nishcacunapica ñana crishpa catinchimanllu. Jehovapa nishcacunapi ñana crishpaca jipa punllacunapi ali causaigu tianatapash ñana crishunllu. Santiagoca: “Ishcai shungu tucushpa mañajcunaca, mama cucha yacuta huaira caiman chaiman shitajunshnami” can nircami (Sant. 1:6). Shinaca pipash ishcai shungu tucushpaca cushilla causaitaca na ushangachu.

16. Imapipash na seguro cashpaca ¿imatata rurana capanchi?

¹⁶ Na seguro cashpaca, Jehovapi tucui shunguhuan cringapaj esforzaripai. Ama ishcai shungu tucupashunchi. Profeta Eliaspa tiempopica israelitacunaca ishcai shungumi tucurca. Chaimandami profeta Eliasca: “¿Ima horascamanda cangunaca, cashna ishcai yuyaihuan causagringuichi? Mandaj Dios, Taita Dios cajpica, paita catichi. Ashtahuangarin Baal shuti dios, Taita Dios cajpica, paita catishpa richilla” nircami (1 Rey. 18:21). Cunan punllacunapipashmi chashnallata pasaita ushan. Chaimandami Jehová Dios ciertopacha ñucanchi Dios cashcata tucui shunguhuan cringapaj, Bibliapash paipa Shimi cashcata cringapaj, testigo de Jehovacunapash pai agllashca llacta cashcata cringapaj ali yachajuna capanchi (1 Tes. 5:21). Shina rurashpami imata na seguro cashpapash tucui shungu crishpa catishun. Huauqui  ancianocunapa ayudatapashmi mañaita ushapanchi. Shinaca Jehová Diosta cushilla sirvishpa catingapaca ñucanchillatami ali yachajuna capanchi.

17. Problemacunahuan desanimarishca cashpaca ¿imata pasanga?

¹⁷ Shuj llaquica, desanimarishca canami caita ushan. Bibliapica: “Llaquicunahuan cashpaca, desanimarishca, ushai illajmi tucungui” ninmi (Prov. 24:10, TNM ). Shinaca desanimarishca cashpaca imatapash ñana rurai ushashpami ñana cushilla cashpa catishun.

18. Aguantana nishpaca ¿imatata ningapaj munan?

¹⁸ Desanimarishca cashpaca Jehová Dios ayudanapimi confiana capanchi. Llaquicunata, problemacunata aguantangapaca shinlli tucunatami minishtipanchi (Sant. 5:11, TNM ). Santiagoca “aguantana” shimitaca pipash shinlli shayajunshna cashcatami nirca. Caita ali intindingapaca caipi pensaripashunchi: Shuj soldadoca contracuna paita atacajpica na manllashpami shinlli shayarishpa catin.

19. Apóstol Pablomandaca ¿imatata yachajui ushapanchi?

¹⁹ Apóstol Pabloca llaquicunataca na manllashpami aguantashpa catirca. Huaquinbi na ushanshna sintirishpapash Jehová Dios paita ayudanapimi siempre confiarca (2 Cor. 12:8-10; Filip. 4:13). Ñucanchicunapashmi apóstol Pabloshna Jehová Diospi confiashpaca shinlli tucushpa ñaupaman catita ushapanchi (Sant. 4:10).

20, 21. ¿Imatata seguro caita ushapanchi?

²⁰ Llaquicunata, problemacunataca Jehová Diosca na cachamujunllu. Santiagoca: “Llaquicuna pitapash japijpica ama caitaca Taita Diosmi cachamujun yanguichichu. Taita Diosca pimanbash llaquicunataca na cachamujunllu” nircami (Sant. 1:13, TNM ). Cai shimicunapi tucui shunguhuan crishpaca Jehová Diosmanga ashtahuanmi quimiripashun (Sant. 4:8).

²¹ Jehová Diosca na cambiashcachu (Sant. 1:17). Callari Jesusta catijcunataca llaquicunata o problemacunata charijpimi Jehová Diosca aguantachun ayudarca. Shinallatami ñucanchitapash ayudanga. Chaimandami Jehová Diostaca ali yachaita cuchun, paipi shinlli crishpa catingapaj, shinlli tucushpa catingapaj mañana capanchi. Ñucanchicuna mañajpica ayudangami. Chaimi pai llaquicunata o problemacunata charishpapash cushillami sirvishpa catishun.