1-2. Premalo Matej 5:11, sar valjani te dikha ko kušnje?

O ISUS obećinđa pe sledbenikonenđe so ka oven bahtale. Isto ađahar, ov upozorinđa okolen kola mangena le so ka ovel len kušnje (Mat. 10:22, 23; Luka 6:20-23). Amen hijam but bahtale so šaj te ova e Hristese učenikija. Ama, sar osetinaja amen ked doživinaja progonstvo andi amari porodica ja andi vlast hem ked amare kolege ja amala ki škola, ćhivena amen te ćera diso soj tano neispravno? Naravno so but ka brinina amen ked ka razmislina ando odola buća.

² But manuša na mislinena soj tane o kušnje razlog te oven bahtale. Ama, i Biblija baš phenela amenđe odova, so valjani te ova radosna ked isi amen kušnje. Na primer, o Jakov pisinđa so na valjani te mislina so našti ništa te ćera ked isi amen kušnje. Umesto odova, valjani te ova bahtale (Jak. 1:2, 12). Hem o Isus phenđa so valjani te ova bahtale iako hijam progonime. (Čitin Matej 5:11.) Ama, sar šaj te aćhova radosna iako isi amen kušnje? But ka sikljova ako razmotrinaja disave savetija ando lil kova o apostol Jakov pisinđa e hrišćanenđe ko prvo veko. Sar prvo, hajde te dikha kola kušnje hine len odola hrišćanija.

3. So desinđa pe sigate palo odova so o Jakov ulo e Isuseso učenik?

³ Sigate palo odova so e Isuseso poluphral, o Jakov, ulo oleso učenik, o hrišćanija ko Jerusalim doživinđe baro progonstvo (Dela 1:14; 5:17, 18). Hem ked o učenik Stefan hine mudardo, but hrišćanija našlje andi diz hem „đelje ki Judeja hem ki Samarija, hem čak đi o Kipar hem đi i Antiohija“ (Dela 7:58–8:1; 11:19). Šaj samo te zamislina kobor pharipa  hine len odola učenikija. Ama bizo obzir ko odova, on revno propovedinđe i šukar vest kuri god đelje hem ko razna thana ulje neve skupštine (1. Petr. 1:1). Ama, palo odova hine len pana pobare problemija.

4. Kola avera kušnje hine len o hrišćanija ko prvo veko?

⁴ O hrišćanija ko prvo veko hine len razna kušnje. Na primer, oko 50. berš ki nevi era, o rimsko imperator Klaudije naredinđa sa o Jevreja te đan ando Rim. Odolese o Jevreja kola ulje hrišćanija, morandilje te mukhen po ćher hem te đan ko aver than (Dela 18:1-3). Oko 61. berš ki nevi era, o apostol Pavle pisinđa ando odova so e hrišćanenđe marđe muj, so ćhivđe len ko phanlipe hem so lelje olendar odova so hine len (Jevr. 10:32-34). Hem sar avera manuša, hem o hrišćanija hine ćorore hem naborme (Rimlj. 15:26; Fil. 2:25-27).

5. Ko kola pućiba ka dobina odgovorija?

⁵ Ked o Jakov pisinđa po lil, angleder 62. berš ki nevi era, ov jasno đanđa kola kušnje doživinena olese phralja hem phenja. O Jehova vodinđa e Jakove te del disave praktična savetija odole hrišćanenđe, kola pomožinđe lenđe te aćhon bahtale, iako hine len kušnje. Hajde te razmotrina oleso lil hem te odgovorina ko akala pućiba: Andi koja radost o Jakov pisinđa? Sar šaj te našala amari radost? Hem sar šaj i mudrost, i vera hem i hrabrost te pomožinen amen te aćhova radosna iako isi amen kušnje?

6. Premalo Luka 6:22, 23, sose šaj te ova radosna ked isi amen kušnje?

⁶ O manuša šaj te mislinen so šaj te oven bahtale samo ako isi len šukar sastipe, but pare hem ako tani olengi porodica bahtali. I  radost andi koja o Jakov pisinđa, šaj te ovel amen sebepi o sveti duh kova isi amen hem odija radost na zavisini ando amare okolnostija (Gal. 5:22). Amen šaj te ova radosna ja bahtale ako đanaja so o Jehova tano zadovoljno amencar hem ako oponašinaja e Isuseso primer (Čitin Luka 6:22, 23; Kol. 1:10, 11). Asavki radost tani sar i jag koja tani zaštitimi ki jekh svetiljka. Oj na našalđola čak iako hijam naborme ja aćhovaja bizo pare. Amen šaj te ova radosna čak hem ked o manuša marena amenđe muj hem ked amari porodica ja avera protivinena pe amenđe. Amari radost šaj te ovel pana pobari svako puti ked o manuša pokušinena te len amendar amari radost. O kušnje kola doživinaja sebepi amari vera, mothovena so hijam e Hristese učenikija (Mat. 10:22; 24:9; Jov. 15:20). Odolese o Jakov pisinđa: „Phraljalen, radujinen tumen ked hijen ko razna kušnje“ (Jak. 1:2).

7-8. Sose tani amari vera pozorali ked isi amen kušnje?

⁷ O Jakov pana vaćeri ando odova sose o hrišćanija tane spremna te podnosinen o kušnje. Ov phenela: „Tumari vera, ked tani ađahar ispitimi, ćerela te oven istrajna“ (Jak. 1:3). Pana jekh buti sovaja šaj te uporedinen pe amare kušnje tani sar i jag koja koristini pe te bi oblikujini pe o mač ando metal. Ked o mač taćari pe ki jag hem hladini pe ko pani, o metal ovela pozoralo. Isto ađahar, ked istrajinaja ko kušnje, amari vera ovela pozorali. Odolese, o Jakov phenđa: „Ama dozvolinen i istrajnost te ćerel pi buti, te oven savršena hem potpuna, bizi mana“ (Jak. 1:4). Ked dikhaja so amari vera tani pozorali sebepi o kušnje, amen šaj te istrajina hem te aćhova radosna.

⁸ Isto ađahar, ko po lil, o Jakov vaćerđa ando buća sebepi kola šaj te našala amari radost. Kola tane odola izazovija hem sar šaj te pobedina len?

9. Sose valjani amenđe mudrost?

⁹ O izazov: Ked na đanaja so te ćera. Ked isi amen kušnje, amen mangaja te molina e Jehova te pomožini amen te ana šukar odluke, te pomožina e phralenđe hem e phenjenđe hem te aćhova verna olese (Jer. 10:23). Amenđe valjani mudrost te šaj te đana so te ćera hem so te phena okolenđe kola protivinena pe amenđe. Ako na đanaja so te ćera, šaj te obeshrabrina amen hem sebepi odova šaj sigate te našala amari radost.

10. Premali Jakovljeva 1:5, so valjani te ćera te šaj te ova mudra?

¹⁰ O rešenje: Rode mudrost ando Jehova. Ako mangaja te aćhova radosna ked isi amen kušnje, mora te molina e Jehova te del amen mudrost te šaj te ana šukar odluke.  (Čitin Jakovljeva 1:5.) So valjani te ćera ako o Jehova na odgovorini odmah ko amare molitve? O Jakov phenđa so valjani te „roda la“ ando Devel. Na hijam lese dosadna ked rodaja olestar mudrost hem ov na ka holjani upro amende. Amaro nebesko Dad „dela velikodušno“ ked molinaja le te del amen mudrost te bi istrajinaja ko kušnje (Ps. 25:12, 13). Ov dikhela sova borinaja amen hem olese tano pharo ked dikhela so amen patinaja. Odolese, ov tano spremno te pomožini amen. Odova ćerela amen bahtale. Ama, sar o Jehova dela amen mudrost?

11. So pana valjani te ćera te bi ovaja mudra?

¹¹ Prekalo po Lafi, o Jehova dela amen mudrost (Posl. 2:6). Te šaj te ova mudra, amen mora te proučina e Devleso Lafi hem amare publikacije. Ama, mora te ćera diso pobuter nego li samo te proučina. Amen mora te ćera odova so o Jehova phenela amenđe. O Jakov pisinđa: „Ama ma samo šunen o lafi, već hem ćeren premalo leste“ (Jak. 1:22). Ked ka primenina e Devleso savet, šukar ka slažina amen averencar, ka ova razumna hem milosrdna (Jak. 3:17). Akala osobine ka pomožinen amen te istrajina ki svako kušnja hem te na našala amari radost.

12. Sose tano važno te penđara šukar i Biblija?

¹² E Devleso Lafi tano sar ogledalo, sose pomožini amenđe te dikha ko so valjani te ćera hem sar te ćera ko odova (Jak. 1:23-25). Na primer, palo odova ked ka proučina, amen šaj te haljova so valjani te ćera ki amari samokontrola. Uzi e Jehovasi pomoć, amen šaj te sikljova sar te ova blaga e manušencar hem sar šaj te aćhova asavke ked isi amen problemija. Ked hijam blaga, pošukar ka reagujina ked isi amen problemija. Tegani ka ova razborita hem ka ana šukar  odluke (Jak. 3:13). But tano važno šukar te penđara i Biblija.

13. Sose valjani te sikljova ando primerija ki Biblija?

¹³ Podijekh puti haljovaja so valjani te ćera, tek palo odova so ćerđam greška. Ama odova tano popharo način te sikljova. Pošukar način te dobina mudrost tano te sikljova ando šukar hem lošna buća kola avera ćerđe. Odolese, o Jakov podstaknini amen te sikljova ando Avraham, andi Rava, ando Jov hem Ilija (Jak. 2:21-26; 5:10, 11, 17, 18). Odola verna e Jehovase sluge, uspinđe te istrajinen ko kušnje sebepi kola šajinđe te našalen pi radost. Olengo primer mothovi amenđe so uzi e Jehovasi pomoć hem amen šaj te istrajina ko kušnje.

14-15. Sose mora te rešina amare sumnje?

¹⁴ O izazov: Ked isi amen sumnje. Sar đala o vreme, šaj te ovel amenđe pharo te haljova diso andi Biblija. Ili o Jehova šaj na odgovorinđa ki amari molitva ađahar sar so amen mangljam. Sebepi odova, šaj te ovel amen sumnje. Ako na rešinaja len, on šaj te oslabinen amari vera hem te ruminen amaro amalipe e Jehovaja (Jak. 1:7, 8). Čak sebepi o sumnje, šaj te našala i nada asi budućnost.

¹⁵ O Pavle vaćerđa so amari nada asi budućnost tani sar o sidro (Jevr. 6:19). Sebepi o sidro, o brod šaj te aćhol stabilno ki oluja hem o sidro ka sprečini e brodo te khuvel ko bara. Ama o sidro tano korisno samo ako oleso lanco kova povezujini le e brodoja nane ćhindo. Sar so i rđa šaj te hal e lanco ando sidro, isto ađahar hem o sumnje kola na rešinđam šaj te oslabinen amari vera. Ked doživini progonstvo, i osoba koja isi la sumnje šaj te našali pi vera so o Jehova ka ispunini pe obećanja. Ako našalaja amari vera, našalaja hem amari nada. Sar so o Jakov phenđa, okova „kova sumnjini tano sar o morsko talas kas i bavlal vazdela hem legari“ (Jak. 1:6). I osoba koja ađahar osetini pe, verovatno niked na ka ovel radosno.

16. So valjani te ćera ako isi amen kušnje?

¹⁶ O rešenje: Cide o sumnje, zorjaćer ti vera. Reagujin sigate. Ko vreme ked živinđa o prorok Ilija, e Jehovaso narodo hine but neodlučno. O Ilija phenđa lenđe: „Ði ked ka oven neodlučna? Ako o Jehova tano pravo Devel, služinen olese, a ako tano o Val, služinen olese“ (1. Kralj. 18:21). Isto tano hem avdije. Amen valjani hor te proučina te šaj kokri amen te uverina so o Jehova tano Devel, so i Biblija tani oleso Lafi hem so e Jehovase svedokija tane oleso narodo (1. Sol. 5:21). Ako ćeraja sa odova, amen ka rešina amare sumnje hem ka zorjaćera amari vera. Ako valjani amenđe pomoć te rešina amare sumnje, šaj te puća e starešinen. Ama, mora te reagujina sigate ako mangaja te aćhova radosna đi služinaja e Jehovase.

17. So ka desini pe ako našalaja amari hrabrost?

¹⁷ O izazov: Ked hijam obeshrabrime. E Devleso Lafi phenela: „Ako obeshrabrineja tut ko dive andi nevolja, ka našale ti snaga“ (Posl. 24:10). O hebrejsko lafi kova tano prevodimo sar „te obeshrabrine tut“, šaj te značini „te našale i hrabrost.“ Ako našaleja ti hrabrost, sigate ka našale ti radost.

18. So značini te istrajina?

¹⁸ O rešenje: Ov uverimo so o Jehova ka del tut hrabrost te istrajine. Valjani amenđe hrabrost te šaj te istrajina ko kušnje (Jak. 5:11). O lafi kova o Jakov koristinđa, kova tano prevedimo sar istrajnost, ćhivela amen te razmislina nekastar ko hrabro terđola ko po than. Šaj te razmislina ando jekh vojniko kova hrabro terđola anglo po neprijatelj hem kova na mangela te cidel pe ked ov napadini le.

19. So šaj te sikljova ando e Pavleso primer?

 ¹⁹ O Pavle aćhavđa amenđe šukar primer andi hrabrost hem istrajnost. Ama podijekh puti, hem ov hine slabo. Ama, uspinđa te istrajini sose hine uverimo so o Jehova ka del lese snaga koja ka valjani lese (2. Kor. 12:8-10; Fil. 4:13). Hem amen šaj te ovel amen asavki snaga hem hrabrost ako ponizno priznajinaja so valjani amenđe e Jehovasi pomoć (Jak. 4:10).

20-21. Ko so šaj te ove uverimo?

²⁰ Amen šaj te ova uverime so o kušnje nane kazna ando Jehova. O Jakov uverini amen: „Ked tano neko ki kušnja, ma te phenel: „O Devel iskušini man. Sose niko našti te iskušini e Devle e lošno bućencar, a ni ov nikas na iskušini e lošnipaja“ (Jak. 1:13). Ked ka ova uverime ko odova, amen ka ova pana popaše amare nebesko Dadese, kova mangela amen (Jak. 4:8).

²¹ O Jehova „na menjini pe“ (Jak. 1:17). Ov podržinđa e hrišćanen ko prvo veko ked hine len kušnje hem isto ađahar hem amen ka podržini avdije. Iskreno rode ando Jehova te del tut mudrost, vera hem hrabrost. Ov ka odgovorini ko te molitve. Tegani šaj te ove uverimo so ov ka pomožini tut te aćhove radosno iako isi tut kušnje.