1-2. Laha hentea ty Matio 5:11, akory ty tokony ho fahitantsika ty raha sarotsy mahazo antsika?

NAMPITAMÀ ty mpanori-dia azy Jesosy hoe tena ho falifaly rozy. Fe nivola tamin-drozy koa ie hoe hiatriky raha sarotsy sankarazany rozy. (Mat. 10:22, 23; Lioka 6:20-23) Falifaly tsika satria mpianatsini-Kristy. Fe manao akory, ohatsy, tsika laha toherini-fianakavia, enjehini-fanjakà, na laha taomini-mpiaraky miasa na mpiaraky mianatsy amintsika hanao raha raty? Mety hiasa loha tsika lafa mandiniky ani-raha reo.

² Mety ho falifaly va ty olo lafa enjehy? Sarotsy zay hoasan’olo. Fe zay mihintsy ty ampirisihini-Baiboly hataontsika. Nanoratsy, ohatsy, Jakoba hoe tsy tokony ho kivy tsika lafa miatriky raha manahira fa vomaiky tokony ho falifaly. (Jak. 1:2, 12) Nivola koa Jesosy hoe tokony ho falifaly avao tsika lafa enjehy. (Vakio Matio 5:11.) Ino ty hanampy antsika ho falifaly avao ndre miatriky raha sarotsy? Hahita raha maro hanampy antsika tsika lafa mandiniky raha sisany baka amy taratasy nisoratini-Jakoba ho ani-Kristiana tamy taonjato voalohany. Fe ndao tse tsika handiniky ty raha sarotsy natrehini-Kristiana reo.

3. Ino ty raha niseho tafara kelikely naha lasa mpianatsy ani-Jakoba?

³ Nanomboky nenjehy ty Kristiana ta Jerosalema tao tafara kelikely naha lasa mpianatsy ani-Jakoba rahalahini-Jesosy. (Asa. 1:14; 5:17, 18) Lafa nivonoa Stefana, le maro ty Kristiana nilay ka “niparitaky tamy faritsini-Jodia noho Samaria” le nipotitsy a Sipra noho Antiokia any. (Asa. 7:58–8:1; 11:19) Tena niaritsy raha sarotsy maro mpianatsy reo. Fe ndre teo zay, le mbo nazoto nitory ty vaovao soa avao rozy tamy ze tany nomban-drozy. Nihamaro ty olo lasa Kristiana ka lasa nisy fiangona tamy  faritsy maro ta Roma any. (1 Pet. 1:1) Fe vomaiky niatriky raha sarotsy sankarazany rozy tafarani-zay.

4. Ino koa ty raha sarotsy natrehini-Kristiana tamy taonjato voalohany?

⁴ Maro ty raha sarotsy natrehini-Kristiana tamy taonjato voalohany. Tamy tao 50 tany ho any, ohatsy, Klaodio Mpanjaka Romana nandidy ty Jiosy iaby mba hiala ta Roma ao. Voatery nanenga ty tranon-drozy zany ze Jiosy lasa Kristiana le nifindra amy tanà hafa. (Asa. 18:1-3) Nanoratsy apostoly Paoly tamy tao 61 tany ho any hoe nalà baraka tamason’olo, nigadrà, noho nangalary ty hananani-Kristiana namany. (Heb. 10:32-34) Nisy tamin-drozy koa nahantra noho narary.​—Rom. 15:26; Fil. 2:25-27.

5. Ino iaby ty fanontanea hovaleantsika?

⁵ Haini-Jakoba soa ty raha sarotsy natrehini-rahalahy noho anabaviny reo tamy ie nanoratsy ty taratasiny talohani-tao 62. Nameani-Jehovah ty fanahiny masy Jakoba ka nanoratsy taratasy ho ani-Kristiana reo. Nanome torohevitsy mahasoa ie mba hanampea an-drozy ho falifaly avao ndre niatriky raha sarotsy aza. Ndao tsika handiniky ani-taratasini-Jakoba io, le hamaly ani-fanontanea retoa: Ino fifalea niresahini-Jakoba io? Ino ty raha mety hisaka ty Kristiana tsy ho falifaly? Le manino ty fahendrea, finoa, noho ty herim-po ro hanampy antsika ho falifaly avao ndre ino ino ty raha sarotsy atrehintsika?

6. Laha hentea ty Lioka 6:22, 23, manino ty Kristiana ro afaky ho falifaly avao ndre miatriky raha sarotsy?

⁶ Maro ty olo mieritseritsy hoe tsy ho falifaly mihintsy rozy laha tsy salama soa, manan-drala be noho mifandramby soa amy ty fianakaviany. Fe tsy zay fifalea niresahini-Jakoba toy.  Tsy mianky amy ze raha iainan’olo raha io fa vokatsini-fanahy masi-Ndranahary. (Gal. 5:22) Afaky ho falifaly ty Kristiana raiky lafa mahay hoe mampifalifaly ani-Jehovah ie sady manaraky ty modelini-Jesosy. (Vakio Lioka 6:22, 23; Kol. 1:10, 11) Azo ampitovizy amy lelan’afo amy jiro fanala io ty fifaleantsika. Tsy maty lelan’afo iny ndre misy tsioky na ora satria voaaro. Ho zay koa fa afaky ho falifaly avao tsika ndre ino ino ty raha miseho amy fiainantsika. Mety harary tsika na tsy hanan-drala, na koa ho kizahin’olo na enjehini-fianakavia na ty olo hafa. Fe mbo afaky ho falifaly avao tsika. Mety hanao raha hahavy antsika tsy ho falifaly, ohatsy, ty olo, fe arakaraky ty anaovan-drozy ani-zay ro vomaiky hampitombo ty hafaleantsika. Hita baka amy raha sarotsy atrehintsika vokatsini-finoantsika rey hoe tena mpianatsini-Kristy tsika. (Mat. 10:22; 24:9; Jaona 15:20) Zay nahavy ani-Jakoba nanoratsy hoe: “Lafa tojiky fitsapà maro samby hafa nareo, rahalahiko, le rambeso ho fifalifalea bevata raha zay.”​—Jak. 1:2.

7-8. Manino ro hihamatanjaky ty finoantsika lafa tsika miatriky fitsapà?

⁷ Misy raha hafa koa nivolanini-Jakoba mahavy ty Kristiana parè hiaritsy raha sarotsy sankarazany. Hoy ty asany: “Satria hainareo fa miteraky fiareta ty finoanareo vita sedra.” (Jak. 1:3) Azo ampitovizy amy afo ampiasani-mpanefy vy rey ty raha sarotsy atrehintsika. Vomaiky mihamahery ty vy laha ie mafana iny ro ajobo anaty rano ao. Ho zay koa fa hihamatanjaky ty finoantsika lafa miatriky raha sarotsy sankarazany tsika. Zay ro nahavy ani-Jakoba hanoratsy hoe: “Engao hamita ty asany ty fiareta, amy zay ho lavorary noho tsy hisy tsiny amy kila raha iaby nareo.” (Jak. 1:4) Lafa hitantsika hoe mahavy antsika hana finoa matanjaky raha sarotsy mahazo antsika rey, le hahavita hiaritsy avao tsika sady ho falifaly.

⁸ Mbo niresaky raha hafa mety hahavy antsika tsy ho falifaly koa Jakoba amy taratasy nisoratiny ao. Ino iaby zay, le ino ty azontsika atao mba handresea azy?

9. Manino tsika ro mila fahendrea?

⁹ Ino ty raha mety hahavy antsika tsy ho falifaly? Lafa tsy haintsika ty hatao. Lafa misy raha manahira, le teantsika ty hiantehitsy amy Jehovah amy zay ie hanampy antsika hanao safidy mampifalifaly azy noho hanampy antsika hampahery ty rahalahy noho anabavintsika. Teantsika koa laha ampeany tsika mba tsy hivaliky aminy. (Jer. 10:23) Mila fahendrea tsika mba hahaizantsika ze raha tokony hatao noho ze raha hovolany amin’olo manohitsy antsika. Lafa tsy haintsika ty hatao, le mety ho kivy tsika ka mety tsy ho falifaly sasy.

10. Laha hentea ty Jakoba 1:5, ino ty raha mila ataontsika mba hahazoa fahendrea?

 ¹⁰ Ino ty azo atao? Mangataha fahendrea amy Jehovah. Laha teantsika ty ho falifaly avao lafa miatriky raha manahira, le tokony hivavaky amy Jehovah tse tsika mba hameany fahendrea hanampy antsika hahay hanapa-kevitsy. (Vakio Jakoba 1:5.) Ino ty tokony hataontsika laha mahatsapa tsika hoe mbo tsy valeani-Jehovah vavaky nataontsika iny? ‘Tsy tokony hieny’ hangataky amy Ndranahary tsika, hoasani-Jakoba. Tsy mahakamo ani-Jehovah tsika ndre mampimpolimpoly mangataky fahendrea aminy. Tsy heloky antsika zao ie. “Matariky” Babantsika an-danitsy any iny ka ameany avao tsika saky mangataky fahendrea aminy mba hahavy antsika hiaritsy raha sarotsy. (Sal. 25:12, 13) Hitany raha mahazo antsika rey le ferinesany tsika ka ta hanampy antsika ie. Falifaly biby tsika lafa mahay ani-zay! Fe akory ty anomezani-Jehovah fahendrea antsika?

11. Ino koa ty raha mila ataontsika mba hahazoa fahendrea?

¹¹ Mampiasa ty Safàny Jehovah mba hanomeza antsika fahendrea. (Ohab. 2:6) Ka laha teantsika ty hahazo fahendrea, le mila mianatsy ty Safàny tsika sady mianatsy ani-boky noho gazetintsika rey. Fe tsy ampy ty hoe mianatsy avao. Tsy maintsy ataontsika koa ze raha ampanaovi-Ndranahary antsika. Zao ty nisoratini-Jakoba: “Tokony ho mpanoriky safà nareo fa tsy mpijanjy avao.” (Jak. 1:22) Laha manoriky ty torohevitsy amea-Ndranahary tsika, le ho tea filongoa, hahay mandanjalanja, sady ho be famindram-po. (Jak. 3:17) Toetsy reo ro hanampy antsika hiaritsy raha sarotsy sady ho falifaly avao.

12. Manino ro tena ilà ty hoe mahay soa ty Baiboly?

¹² Mitovy amy fitaratsy io ty Safà-Ndranahary ka manampy antsika hahay noho hahita ze raha mila ahitintsika. (Jak. 1:23-25) Lafa baka nianatsy Baiboly, ohatsy, tsika le mety hahita  hoe tsy tokony ho mora sosotsy tsika. Lafa ampeani-Jehovah tsika, le mahavita miezaky ho kalma avao ndre misy olo na raha hafa mety hampeloky antsika. Lafa kalma tsika le ho haintsika ty hiatriky ani-ze raha manahira antsika. Lasa afaky mandiniky soa aza tsika sady mahay manapa-kevitsy. (Jak. 3:13) Tena ilà zany ty mahay soa ty Baiboly!

13. Manino tsika ro tokony hianatsy ty modelin’olo amy Baiboly ao?

¹³ Lafa nanao hadisoa tsika matetiky vo mahay hoe tsy tokony ho nanao ani-raha iny. Fe tsy mora ty mahay ani-raha zay. Ho hendry tsika laha mandramby fianara baka amy ty raha soa nataon’olo hafa noho ty raha tsy nety nataony. Zay nahavy ani-Jakoba nampirisiky antsika mba handiniky ty modelin’olo amy Baiboly ao rey, ohatsy hoe ry Abrahama, Rahaba, Joba, noho Elia. (Jak. 2:21-26; 5:10, 11, 17, 18) Nahavita niaritsy raha sarotsy mety ho nahavy an-drozy tsy ho falifaly mpanomponi-Jehovah tsy nivaliky reo. Hitantsika baka amy ty fiaretan-drozy hoe afaky hahavita manahaky ani-zay koa tsika satria manampy Jehovah.

14-15. Manino tsika ro tsy tokony hisalasala?

¹⁴ Ino ty raha mety hahavy antsika tsy ho falifaly? Ty fisalasalà. Mety ho sarotsy amintsika kindraiky ty hahazo soa ty raha volanini-Safà-Ndranahary. Na mety tsy araky ty nieritseretantsika azy ty fomba namaleani-Jehovah ty vavakintsika. Lasa misalasala amy zay tsika. Laha tsy dareantsika raha mampisalasala antsika zay, le hihamalemy ty finoantsika ka ho simba ty fifandrambesantsika amy Jehovah. (Jak. 1:7, 8) Mety tsy hatòky ty raha ampitamani-Ndranahary amy hoavy mihintsy aza tsika.

¹⁵ Nampitovizini-apostoly Paoly amy nanga na talim-bato ty raha tamanintsika amy hoavy. (Heb. 6:19) Tsy ino nanga zao fa bolokom-bỳ mavesatsy amy sambo eny. Mifehy amy seny na taly raha io, le mitanjaky ani-sambo iny tsy hihetsiky na hamanta hidofotsy vato lafa alatsaky an-drano any. Fe tsy hisy ilà azy nanga iny laha simba seny iny. Hihamalemy, ohatsy, seny iny laha heriky ka tsy hahatanjaky azy. Manahaky ani-zay koa fa hihamalemy ty finoantsika laha misalasala tsika. Ka lafa miatriky raha sarotsy amy zay tsika, le tsy hatòky hoe hanatanteraky ty raha ampitamaniny Jehovah. Lafa tsy manam-pinoa tsika le tsy manan-draha tamany sasy. Ze misalasala hoasani-Jakoba le “manahaky lozoky an-driaky any rey, andesin-tsioky sady ahetsiketsiny.” (Jak. 1:6) Tsy ho falifaly mihintsy ty olo manahaky ani-zay!

16. Ino ty tokony hataontsika laha misy raha mampisalasala antsika?

¹⁶ Ino ty azo atao? Reseo ty fisalasalà, le hatanjaho ty finoanao. Ka misalasala mihintsy. Nanjary nisalasala ty vahoakini-Jehovah tamy androni-Elia mpaminany. Nivola tamin-drozy Elia hoe: “Zisiky ombia nareo ro hisalasala? Laha Jehovah ro Ndranahary marina, le manaraha azy. Fa laha Bala ro ie, le manaraha azy.” (1 Mpanj. 18:21) Manahaky ani-zay koa henanizao. Mila manao fikaroha tsika amy zay tsika mihintsy ro ho resy lahatsy hoe tena misy Jehovah Ndranahary, Safàny ty Baiboly, le ty Vavolombeloni-Jehovah ro tena mpanompony. (1 Tes. 5:21) Tsy hisalasala sasy tsika laha manao ani-raha iaby reo sady hihamatanjaky ty finoantsika. Laha mila fanampea tsika satria tsy ta hisalasala, le afaky miresaky amy anti-panahy. Tokony hanao raha malaky tsika laha teantsika ty ho falifaly avao amy fanompoa ani-Jehovah!

17. Hanao akory tsika laha tsy mana herim-po?

¹⁷ Ino ty raha mety hahavy antsika tsy ho falifaly? Ty hakivia. Mivola ty Safà-Ndranahary hoe: “Laha kivy iha amy fotoa sarotsy, le ho kelikely ty herinao.” (Ohab. 24:10) “Tsy mana herim-po” ty dikani-safà hebreo hoe “kivy.” Laha  tsy mana herim-po iha, le ho mora rava ty hafaleanao.

18. Manao akory miaritsy zao?

¹⁸ Ino ty azo atao? Miantehera amy Jehovah mba hanome anao herim-po hahavitanao miaritsy. Mila mana herim-po tsika laha teantsika ty hiaritsy raha sarotsy. (Jak. 5:11) Safà hoe ‘miaritsy’ nampiasani-Jakoba io, safà ivolana olo tsy miala amy pilasy itsanganany eo. Manahaky maramila tsy matahotsy io. Tsy miala amy pilasiny eo mihintsy ie sady tsy milay lafa avy ty fahavalo.

19. Ino ty ianarantsika baka amy ty modelini-apostoly Paoly?

¹⁹ Modely soa amy resaky herim-po noho fiareta apostoly Paoly. Nisy fotoa ie nahatiaro hoe nalemy. Fe nahavita niaritsy ie satria niantehitsy tamy Jehovah mba hanome azy ze hery nilàny. (2 Kor. 12:8-10; Fil. 4:13) Afaky hahazo hery noho herim-po koa tsika laha miambany ka mieky hoe mila ty fanampeani-Jehovah.—Jak. 4:10.

20-21. Ino ty azontsika atokisa?

²⁰ Matokisa fa tsy sazy baka amy Jehovah ty raha sarotsy mahazo antsika. Manome toky antsika Jakoba hoe: “Lafa misy fitsapà, le ao tsy hisy hivola hoe: ‘Fitsapà baka amy Ndranahary toy.’ Satria Ndranahary tsy azo tsapà amy raha raty, sady tsy mitsapa ndre ia ndre ia amy raha zay koa.” (Jak. 1:13) Laha tena mino an’io tsika, le hinama marìny amy Babantsika be fitiava an-danitsy any iny.​—Jak. 4:8.

²¹ “Tsy miovaova” mihintsy Jehovah. (Jak. 1:17) Nanampy ty Kristiana tamy taonjato voalohany ie lafa niatriky raha sarotsy rozy. Hanampy antsika kiraidraiky koa ie. Misolohoa amy Jehovah mba hanampy anao hana fahendrea, finoa, noho herim-po. Hamaly ty vavaky ataonao ie. Matokisa fa hanampy anao ho falifaly avao Jehovah lafa miaritsy raha sarotsy iha!