1-2. Lá nkilika Mateo 5:11, wopo wɔkɔnge okokaso ndɔsa ehemba?

YESO alakaka ambeki wande ante wangoyala l’osasa wɔ nsɔsɔlɔ. Nde atepelaka lonkina ante, wanɛ w’ɔkɔpa wangopomana l’ehemba. (Mat. 10:22, 23; Luka 6:20-23) Tolekɔ l’osasa wɔ ndjala ambeki wa Kristo. Ko, isoyawokaka ngetemo wina wɔ ase nkfumbo kɛso, kana ase lɛɛta ɔtɛnyɛwɔ ndjolo, ko kana winaso wel’olemo, kana welá nkalasa ototshindawɔ djɛ nangha nkambo mɔtshi djɛ nyɛtshi? Wina w’okanelaso akambo wasɔ, iso nkoka ndakiyanyɛ.

² Anto efula wapawola ambɔ ndjolo nkoka nkomɛ onto djɛ ndjala l’osasa. Koko, kɛsɔ ndeke Otepela wɔ Ndjambe otoshimelande djɛ nangha. Ndjɔmbɔmba, ombeki Djakɔbɔ afunaka ante, l’edjena k’iso ndawoka etengo tombodjinda l’ekakasano, iso nkoka ndɔsa ekakasano wɛkɔ etengo ikɔkɔ y’osasa wina w’opomanaso la wɛkɔ. (Dja. 1:2, 12) Edjinge Yeso atepelaka ante iso ladjɛ ndjala l’osasa kaanga wina wɛnaso ndjolo. (Wala Mateo 5:11.) Wopo wɔkɔnge okokaso nkindjɛ nama osasa wɔso ayale kaanga lá wina w’opomanaso l’ehemba? Iso nkoka mba elakanyelo efula má nshishima tokanyi tolekɔ l’onkanda wɔ Djakɔbɔ ndafunela Akristo wa l’ɛtɛndɔ kɛ ntondo. Ntondo ntondo, nyontshɔ tokoshishima ekakasano wepomanisa l’Akristo wasɔ.

3. Kɛkɔnge keposisa ndambo daambi m’ɔkɔngɔ wɔ Djakɔbɔ ndjala ombeki wɔ Yeso?

³ Ndambo daambi m’ɔkɔngɔ wɔ Djakɔbɔ dj’ankfunɛ Yeso ndjala ombeki, watateyɛka nyɛnyɛ Akristo ndjolo lá Jerusalɛmɛ. (Ele. 1:14; 5:17, 18) Edjinge wina w’iyayake ombeki Stefanɛ, Akristo efula ‘walotaka má ngando edjinge watshanghanaka l’etatshi kɛ looko kɛ Judeya la kɛ Samariya,’ edjinge otale efula tá  Kupiriyo la tá Antiyɔka. (Ele. 7:58–8:1; 11:19) Kokanela ekakasano wɛ ambeki wasɔ iyayale ladjɛ nkfulumeyɛ. Koko, iwɔ wakindjɛka mpoposanyɛ losango lɔ wɔlɔ l’osasalo djena nkfumɔ dj’iyatshu, edjinge ntshumano djetaposaki ngo mposa lá Onkfumi w’Ɔrɔma w’otondo. (1 Pɛ. 1:1) Ko m’ɔkɔngɔ wɔ m’asɔ wayɛka ndopomana l’ekakasano enkina efula.

4. Ehemba wɛkɔnge ɛmɔtshi wɛ Akristo iyayale ladjɛ nkfulumeyɛ?

⁴ Akristo wa l’ɛtɛndɔ kɛ ntondo wayalaka ladjɛ nkfulumeyɛ ehemba wetshikitanyi. Ndjɔmbɔmba, tá ɔnɔnyi 50 Ɛ.K., Klodiya Nkfumi kel’Ɔrɔma ilaka ɔlɛmbɛ wɔ ase Juda ankfumɔ nyima m’Ɔrɔma. Djɛkondeke, watshindaka ase Juda wayisa ndoyala Akristo la wolo dj’iwɔ ntshika amvulu yɛwɔ ko ntshɔ toyala ntena nkina. (Ele. 18:1-3) T’ɔnɔnyi 61 Ɛ.K., ɔpɔstɔlɔ Poolo afunaka ante, winande Akristo watolamaka lá ntshandjawala, wawilaka l’ankando edjinge wawɔngɔlaka nkete djɛwɔ. (Heb. 10:32-34) Edjinge ngo ngete anto ankina, Akristo amɔtshi w’ɛnaki ndjolo l’ɔnvɔ edjinge l’elando.​—Ɔrɔ. 15:26; Flp. 2:25-27.

5. Weepó wɛkɔnge wɔkɔpaso nkadjimola?

⁵ Winá wɔ Djakɔbɔ ndafune onkanda wɔnde, lá ntondo k’ɔnɔnyi 62 Ɛ.K., nde ewaki wɔlɔ wɔlɔ ehemba wepomanaki la wananyɔ l’ankaana. Yehova alɔndjɛka Djakɔbɔ djɛ nde nfunela Akristo alako wa djonyi wayalisa ladjɛ ndakotshɛ dj’iwɔ nama osasa wɔwɔ kaanga iya pomanaka l’ehemba. Nyontshɔ tokoshishima onkanda wɔ Djakɔbɔ edjinge tokadjimole lá weepó wɛ wɔlama wɛnɛ: Djakɔbɔ ndafune nkambo djelendana l’osasa wɔkɔnge? Kɛkɔnge kekoka ntshutsheyɛ Okristo osasa wɔnde? Edjinge wopo wɔkɔnge balo, djawo edjinge oloko wolo, okokawɔ ntokotshɛ djɛ nama osasa wɔso ayale kaanga ehemba wɛkɔnge wepomana laso?

6. Lá nkilika Luka 6:22, 23, ladjikɛnge Okristo okokande ndjala l’osasa wina woyɛnde l’ehemba?

⁶ Anto efula nfɛnyɛka ambɔ, dj’iwɔ ndjala l’osasa, ngo ntsha walekɔ la demba djɛ wɔlɔ, nfalanga efula, edjinge ndjala vu lá nkfumbo. Koko yopo y’osasa yefunisa Djakɔbɔ, ilekɔ l’anteyi kɛ olowa wɔ nyuma kɛ Ndjambe. Edjinge osasa wɔkɔ wopaye má kɛnɛ kekomela onto. (Nga. 5:22) Okristo nkoka ndjala l’osasa efula ntsha nde ndjewaka djɛ nde nsasangɛka Yehova edjinge nde nkilikaka ndjɔmbɔmba kɛ Yeso. (Wala Luka 6:22, 23; Kɔl. 1:10, 11) Iso nkoka ndjɛdjɛ osasa wɔso la iyɛ yɛ ntala, lá ndjɔmbɔmba kɛ mwinda wɔ petrɔlɛ, iyɛ yɛnde namemaka l’eteyi k’okele wɔ mwinda. Iyɛ yɛnde namemaka má lompopo kana má mvula wina woyɛwɔ l’eteyi k’okele wɔ mwinda. Wopo wɔk’ɔmɔ ndeke, iso nkindjɛka ndjala l’osasa kaanga lá ntondo k’ekakasano enkfumɔ wetokomela lá lowiko. Topatshutshɛka osasa wɔso wina w’oyɛso l’olando kana wɔ sopalekɔ la nfalanga. Tongoyala l’osasa kaanga wina w’anto ankina ɔtɔnyɔlawɔ edjinge kaanga ase nkfumbo kana anto ankina otonanyɛwɔ. Osasa wɔso wongoleka nfula wina enkfumɔ, w’anto iyongonanghaka la wolo djɛ ntotshutsheyɛ osasa wɔkɔ. Tolekɔ mpomana l’ehemba, ladjikɛnde djawo djɛso djeshikikɛ djɛ tolekɔ ambeki wa Kristo. (Mat. 10:22; 24:9; Dj. 15:20) Djɛkondeke, Djakɔbɔ afunaka ante: ‘wananyɔ nyosasange, wina w’opomananyo l’ehemba wɛ wepo la wepo.’​—Dja. 1:2.

7-8. Lamo djawo djɛso olekawɔ nkemba wina w’opomanaso l’ehemba?

⁷ Djakɔbɔ ɛnyɛka l’onkina elonga k’Akristo okokawɔ nkfulumeyɛ kaanga ehemba wɛ wolo. Nde atepelaka ante: ‘Djawo djɛnyo djemingela l’ehemba mbotaka onkfulumeyelo.’ (Dja. 1:3) Iso nkoka ndjɛdjɛ ehemba la iyɛ y’otshulawɔ lowolo. Ntsha lowolo lɔmbɛla teele l’iyɛ, kowɛ ndowila lá washi wa ntshitshi longolekake ndjala wolo. Wopo wɔk’ɔmɔ ndeke, wina wokfulumeyɛso ehemba, djawo djɛso nkembaka. Djɛkondeke Djakɔbɔ ndafunde ante: ‘Nyotshike djɛ okfulumeyelo nshiyɛ olemo wɔwɔ, djɛ nyo ndjala djɔ edjinge ipa la badji l’akambo ankfumɔ.’ (Dja. 1:4) Wina w’ɛnaso ente ehemba nkembɛka djawo djɛso, iso nkokaka ndakfulumeyɛ l’osasa.

⁸ L’onkanda wɔnde, Djakɔbɔ ɛnyɛka l’onkina akambo amɔtshi wakoka ntotshinda djɛ ntshutshɛ osasa wɔso. Akambo wakɔnge wasɔ edjinge wopo wɔkɔnge w’okokaso ndakandola?

9. Lamo oyɛso la djonyi djɛ balo?

⁹ Okakasano: Ntsha topewe kɛnɛ k’okokaso nangha. Wina w’opomanaso l’ehemba, iso ladjɛ ndawɛkɛ te Yehova djɛ nde ntokotshɛ dj’iso nangha ɛsɔnɛlɔ wengoosasangɛ, wengoyala la wapɔ te wananyɔ l’ankaana, edjinge wengotokotshɛ djɛ nama nkɔmano djɛso. (Jɛr. 10:23) Iso ladjɛ ndjala la balo djɛ ndjewa kɛnɛ koyɛso ladjɛ nangha edjinge koyɛso ladjɛ nshimela  wanɛ watonanyɛ. Ntsha topewɛ kɛnɛ kokokaso nangha, tokoka ndɛmba edjinge mbala kɛkɔ kɛmɔ ntshutshɛ osasa wɔso.

10. Djɛ mba balo, wopo wɔkɔnge Djakɔbɔ 1:5 otoshimelande djɛ nangha ?

¹⁰ Wopo wɔ mba nkando: Lɔmba Yehova djɛ nde nkɔpɛyɛ balo. Ntsha iso nkɔpaka nkfulumeyɛ ehemba l’osasa, iso ladjɛ ntondo ntondo ndɔmba Yehova djɛ nde ntɔpɛyɛ balo dj’oyɛso la djonyi djɛ ndɔsa akano wa wɔlɔ. (Wala Djakɔbɔ 1:5.) Okokaso nangha mo, ntsha tɔmbɛna ente Yehova apakadjimola mbala kɛkɔ kɛmɔ lɔlɔmbɔ lɔso? Djakɔbɔ ntepelaka ante, iso ladjɛ ‘nkindjɛ djɛ ndɔmba’ Ndjambe. Yehova apokaka ante tofutanyɛ wina wokindjɛso ndɔlɔmba balo. Nde apatomadjɛka. Ntsha iso ndɔlɔmba balo djɛ nkfulumeyɛ ehemba, Papa kɛso kel’olongo ‘angɔtɔpɛyɛ la lokapo lonkfumɔ.’ (Yee. 25:12, 13) Nde nyɛnaka ehemba wetokomela, nde ntokaka djandji edjinge nde ndjalaka entshupa djɛ ntokotshɛ. Lá nsɔsɔlɔ, ɔsɔ ndeke ikɔkɔ y’osasa wɔso! Iyako, wopo wɔkɔnge Yehova ɔtɔpɛyɛnde balo?

11. Kɛkɔnge k’okokaso nangha dj’iso mba balo?

¹¹ Yehova ntɔpɛyɛka balo má lotshimbo l’Otepela wɔnde. (Woo. 2:6) Djɛ mba balo iso ladjɛ ndjekaka Otepela wɔ Ndjambe, edjinge enkanda wɛso enkfumɔ wesakisola Bible. Koko, iso ladjɛ nangha akambo ankina efula apengo ndjeka toko. Iso ladjɛ nkamba l’alako w’owalaso m’Otepela wɔ Ndjambe lá lowiko lɔso. Djakɔbɔ afunaka ante: ‘Nyoyale ananghi y’otepela koko apengo andjoki.’ (Dja. 1:22) Ntsha tombokamba l’alako wa Ndjambe, tongoyala vu, la ekanedji kɛ wɔlɔ, edjinge la djandji. (Dja. 3:17) Nanghedji djɛsɔ djengotokotshɛ dj’iso nkfulumeyɛ kaanga ekakasano wɛ wepo wɛkɔnge wekoka ntotshutsheyɛ osasa wɔso.

12. Lamo oyɛwɔ djonyi dj’iso ndjewa Bible wɔlɔ?

¹² Otepela wɔ Ndjambe wolekɔ ngete ilendjeyɛ, wongotokotshɛke djɛ ndashishima, djɛ nyɛna idjena yoyɛso ladjɛ ndalɔngɔsɔla edjinge  wopo w’okokaso nangha nkambo djɛsɔ. (Dja. 1:23-25) Ndjɔmbɔmba, m’ɔkɔngɔ w’iso ndjeka Otepela wɔ Ndjambe, iso nkokaka nsipisoyɛ ente, alekɔ djonyi dj’ipa iso ndjala ɛnkɛlɛnkɛlɛ. M’okotshɔ wɔ Yehova, tongeka wopo wɔ ndakota, wina w’anto otomadjɛwɔ kana w’opomanaso l’akambo watɔpɛyɛ nkɛlɛ. Ntsha tolekɔ la ndakota, tongonangha akambo lá yopo yɛ wɔlɔ wina wopomanaso l’ekakasano. Tongoyala l’akoka wa ntɔnɔla wɔlɔ edjinge ndɔsa akano wa wɔlɔ. (Dja. 3:13) Ndjewa Bible wɔlɔ, alekɔ nsɔsɔlɔ nkambo djɛ djonyi efula!

13. Lamo oyɛso ladjɛ ndjeka ndjɔmbɔmba y’anto w’otepelawɔ lá Bible?

¹³ Mbala efula, iso ndjekaka djɛ ndjewɔ nangha wayi amɔtshi ngo m’ɔkɔngɔ wɔ nangha ovunga. Koko ɔsɔ apalekɔ yopo yɛ balo yɛ nangha akambo. Yopo yɛ wɔlɔ yɛ mba balo nde, ndjeka wayi wa nyɛtshi la wa wɔlɔ wananghisa anto amɔtshi. Djɛkondeke Djakɔbɔ ntokeketshɛka dj’iso ndjeka ndjɔmbɔmba y’anto wotepelawɔ lá Bible, ndjɔmbɔmba Abrahama, Rahaba, Djɔbɔ, edjinge Elidja. (Dja. 2:21-26; 5:10, 11, 17, 18) Enkambi wɛ Yehova wɛ nkɔmano wɛsɔ, wayalaka l’akoka wa nkfulumeyɛ ehemba wekokisa ndatshutsheyɛ osasa wɔwɔ. Ndjɔmbɔmba yɛwɔ y’okfulumeyelo, nyɛnyɛka djɛ má okotshɔ wɔ Yehova iso nkokaka nangha wopo wɔk’ɔmɔ.

14-15. Lamo isopakoke nyimɛ yimba lá wayi woyɛso l’ehamo l’eteyi?

¹⁴ Okakasano: Wina w’oyɛso la ehamo lá wayi amɔtshi wa lendana la djawo djɛso. Lá wina ɛmɔtshi, tokoka ndjala l’okakasano wɔ nsipisoyɛ nkambo mɔtshi l’Otepela wɔ Ndjambe. Kana nkoka ndjala ko Yehova apakadjimola alɔmbɛlɔ waso lá yopo y’okanelaso. Nkambo djɛsɔ nkoka nkomɛ onto djɛ nde ndjala l’ehamo. Ntsha iso ntshika ehamo wɛsɔ nfula l’eloko wɛso, mbɔkoko, ehamo wɛsɔ wɛngɔhɔdjɛ djawo djɛso edjinge wengotshita djokanelo djɛso la Yehova. (Dja. 1:7, 8) Edjinge wekoka kaanga ntotshutsheyɛ nkongi djɛso dj’etsho weyaye.

¹⁵ Ɔpɔstɔlɔ Poolo ɛdjɛka djawo djɛso dj’etsho weyaye la loongo lɔ masuwa. (Heb. 6:19) Loongo nkotshɛka masuwa djɛ mpikama wina wɔ lompopo lɔ wolo, edjinge nanghaka dj’ipa masuwa mpela ave. Koko, loongo lɔsɔ nkambaka ngo ntsha mulɔla wokolawɔ lá masuwa wotopɛ. Wopok’ɔkɔmɔ ndeke, etengo akɛdji ɔlɛmbɛwɔ mulɔla wɔ masuwa, ntsha tombotshika ehamo l’eloko wɛso, wɛngɔlɛmbɛ djawo djɛso. Wina wopomanande l’ekakasano, onto wolekɔ l’ehamo nkoka ntshutshɛ djawo djɛnde dj’ante Yehova angokotshɛ alaka wande. Ntsha tombotshutshɛ djawo djɛso, tongotshutshɛ edjinge nkongi djɛso. Djakɔbɔ atepelaka ante: ‘Onto wolekɔ l’ehamo alekɔ etengo anyɛnghu wa ndjale wa wɛmbamaka la lompopo tányi la tányi.’ (Dja. 1:6) Onto wɔ nghɔsɔ apayalaka l’osasa kaanga ndambo daambi!

16. Kɛkɔnge k’oyɛso ladjɛ nangha ntsha tolekɔ l’ehamo?

¹⁶ Wopo wɔ mba nkando: Imɛ ehamo edjinge kembɛ djawo djɛko. Totshatshimbake djɛ ndɔsa nkano. L’etsho w’ɔprɔfɛtɛ Elidja, enkambi wɛ Yehova wayɛka ndoyala l’ehamo l’ankambo w’iyawolaka. Elidja ashimelaka ante: ‘Polo lá wina wɔkɔnge nyongokindjɛ ntshingatshinga l’antenyi kɛ tokanyi tope? Ntsha Yehova ndeke Ndjambe kɛ nsɔsɔlɔ, nyokilike, ko ntsha Baala ndeke Ndjambe kɛ nsɔsɔlɔ, nyokilike!’ (1 Nk. 18:21) Wopo wɔk’ɔmɔ ndeke, lɔɔko kɛnɛ, iso ladjɛ nangha ehonelo djɛ ndjala l’eshikikelo ente, Yehova alekɔ Ndjambe, Bible deko Otepela wɔnde, edjinge Ewake wɛ Yehova walekɔ enkambi wɛnde. (1 Te. 5:21) Nangha nghɔsɔ angotokotshɛ djɛ nyimɛ ehamo, edjinge nkembɛ djawo djɛso. Ntsha tolekɔ la djonyi djɛ okotshɔ djɛ nshiyɛ ehamo wɛso, iso nkoka ndɔmba okotshɔ me tokokolo. Iso ladjɛ nangha akambo ipa la ntshatshimba dj’iso nama osasa wɔso wina w’okambelaso Yehova!

17. Kɛkɔnge kekoka ntokomela ntsha tombotshutshɛ oloko wolo wɔso?

¹⁷ Okakasano: Ɔlɛmbɛlɔ. Otepela wɔ Ndjambe  ntepelaka ante: ‘Ntsha ɔmbɔlɛmba l’etsho wɛ ndjolo, wolo wɔko wongokakita.’ (Woo. 24:10) Itepala yelá Hebero ikadjimɔma ‘ndɛmba’ nkoka nsakisola ‘ntshutshɛ oloko wolo.’ Ntsha ombotshutshɛ oloko wolo, wɛ ongotshutshɛ osasa wɔko mbala kɛkɔ kɛmɔ.

18. Nkfulumeyɛ osakisolande nge?

¹⁸ Wopo wɔ mba nkando: Yawɛkɛ te Yehova djɛ nde nkɔpɛyɛ oloko wolo wɔ wɛ nkfulumeyɛ. Iso ladjɛ ndjala l’oloko wolo ntsha iso nkɔpaka nkfulumeyɛ ehemba. (Dja. 5:11) Itepela yekambisa la Djakɔbɔ y’ente ‘nkfulumeyɛ’ mpɛyɛka ikanyi yɛ onto wombotshikala l’edjena kɛnde ipa la nsasoka. Lá ndjɔmbɔmba kɛ ongala w’oloko wolo, nde nyemalaka l’edjena kɛnde edjinge nde apalotaka wina w’antonyi wande onanyɛwɔ.

19. Olakanyelo wɔkɔnge w’okokaso mba má ndjɔmbɔmba kɛ ɔpɔstɔlɔ Poolo ?

¹⁹ Ɔpɔstɔlɔ Poolo atotshikelaka ndjɔmbɔmba kɛ wɔlɔ kelendana l’oloko wolo edjinge kɛ okfulumeyelo. Lá wina ɛmɔtshi, nde alɛmbaki. Koko nde ayalaka l’akoka wa nkfulumeyɛ ladjikɛnde ayawɛkɛka te Yehova djɛ nde ndɔpɛyɛ wolo woyɛnde la djonyi. (2 Kɔ. 12:8-10; Flp. 4:13) Iso nkoka mba wolo edjinge oloko wolo etengo woyalisa lande, ntsha iso ndjawola l’okitshakitshɛ ente tolekɔ la djonyi dj’okotshɔ wɔ Yehova.​—Dja. 4:10.

20-21. Nkambo djɛkɔnge dj’okokaso ndaashikikɛ?

²⁰ Iso nkoka ndashikikɛ ente ehemba wetokomela apalekɔ dilanyɛ dj’ime Yehova. Djakɔbɔ atoshikikɛ ante: ‘Onto atatepelake wina wɔ nyongohembama ante: ‘Ndjambe ndeke l’ompemba.’ Má nde Ndjambe apakoke mpembama l’akambo wa nyɛtshi, edjinge nde apahembe kaanga onto.’ (Dja. 1:13) Ntsha iso ndaashikikɛ ente nkambo djɛsɔ dekɔ nsɔsɔlɔ, tongoleka ndjala entshupa iso la Papa kɛso kel’olongo.—Dja. 4:8.

²¹ Yehova ‘apatshikitana edjinge apakadjimɔ.’ (Dja. 1:17) Nde asukaka Akristo wa l’etsho wɛ ntondo wina w’iyayalaka l’ehemba edjinge kaanga lɔɔko kɛnɛ, nde angokotshɛ ɔm’ɔmɔ l’anteyi kɛso. Lɔmba Yehova l’oloko ɔmɔ djɛ nde nkokotshɛ djɛ wɛ mba balo, djawo edjinge oloko wolo. Nde angokadjimola alɔmbɛlɔ wako. Másɔ ongoyala l’eshikikelo ente, nde angokokotshɛ djɛ wɛ nama osasa wɔko wina woyalɛ l’ehemba!