1, 2. Eska na uandajka Mateu 5:11, ¿nénachi jatsiski para pʼikuarherani engachi jatsiauaka uandanhiatechani?

JESUSI aiakuaspti imeri chúxapatichani eskaksï meru tsípikua jingoni irekapiringa. Joperu, ístu arhiaspti eskaksï no sési nitamakuarhipiringa iámindu imecha engaksï xénchapiringa imani (Mat. 10:22, 23; Luk. 6:20-23). Kánikuachi sési pʼikuarherasïnga Kristueri chúxapatini. Joperuchi néna pʼikuarherasïni enga juchari familia uéjka úni eskachi nóteru marhuakuakia Jeobani o engajtsïni no sési kámajka juramuticha o engaksï eskuelarhu o ánchikuarhitarhu anapu kompanieruecha uéjka eskachi no sési ambe uáka.

² Engachi ísï kánhajka, úpirindijtsïni kánikua uandanhiatani. Kasi no nemani tsíperasïndi enga no sési kánhajka. Joperu, Tata Diosïri Karakatajtsïni arhisïndi eskachi jatsiska para tsípini. Santiagu karasti eskachi no jatsiska para uandanhiani engachi problemechani jatsiauaka, sánderu sési eskachi jatsiska para tsípini (Sant. 1:2, 12). Ka Jesusi uandaspti eskachi jatsiska para tsípini asta jiáni engachi no sési kánhani jauaka (arhinta je Mateu 5:11). Jimajkani, ¿nénachi uá tsípini nájkirukachi uandanhiatechani jatsiauaka? Uákachi uánikua ambe jorhenguarhini imeri ambe enga Santiagu karakuapka primeru kristianuechani. Joperuchi orheta exeaka, náki uandanhiatechanksï jatsiaspi.

3. ¿Ambe úkuarhispi ísï tátsekua enga Santiagu niárapka Jesusiri chúxapati úkuarhini?

³ Ísï tátsekua enga Santiagu Jesusiri mediu ermanu disipulu úkuarhipka, Jerusaleni anapu kristianuechaksï uénaspti no sési kánhani (Uku. 1:14; 5:17, 18). Ka enga disipulu Estebani uándikunhapka, uánikua kristianuechaksï niraspti sïpakuarhini ka “etsandurikuarhispti[ksï] máru para Judea ísï ka máteruecha para Samaria ísï”. Máruksï niáraspti jamberi asta Chipre ka máteruecha asta Antiokia (Uku. 7:58–8:1; 11:19). I kristianuechaksï uánikua uandanhiatechani jatsiaspti.  Peruksï útasï seguirispti kánikua tsípikua jingoni aianhpini jimesïsï engaksï niárenga ka jarhuajpesptiksï paraksï jimesïsï jimbanhi kúnguarhikuecha úkuarhini (1 Ped. 1:1). Joperuksï no ixú kʼamakurhispti kristianuecheri uandanhiatecha.

4. ¿Náki máteru uandanhiatechanksï jatsiaspi primeru kristianuecha?

⁴ Primeru kristianuechaksï uánikua uandanhiatechani jatsiaspti. Uéxurhini 50 jimbo ísï. Klaudiu Roma anapu juramuti, uandaspti eska nóteru ma judiu úpiringa Roma irekani. I ambe úspti eskaksï judiuecha engaksï kristianu úkuarhipka, jurajkuapiringa imecheri kʼumanchikuechani ka eskaksï nipiringa máteru nánisï irekani (Uku. 18:1-3). Uéxurhini 61 jimbo ísï, apostuli Pablu karaspti eskaksï uánikua erachichani no sési arhiaspka máteruechani japarini, eskaksï ónhaaspka, eskaksï euakuarhispka ambe engaksï jatsikuarhepka (Ebr. 10:32-34). Ka májkueni eska máteru kʼuiripuecha, máru kristianuechajtuksï pobrispti ka ístuksï pʼamenchasïrendi (Rom. 15:26; Filip. 2:25-27).

5. ¿Náki kurhamarhikuechanchi mókuantaua?

⁵ Enga Santiagu karapka imeri kartani antede uéxurhini 62, mítespti náki uandanhiatechanksï jatsiaspi erachicha. Jeoba úspti eska Santiagu karakuapiringa ini kristianuechani para arhiani ambeksï úpirini úni paraksï seguiri tsípikua jingoni irekani nájkirukaksï uandanhiatechani jatsiapiringa. Exeakachi Santiagueri karakatani ka mókuantauakachi ini kurhamarhikuechani: ¿ambe jásï tsípikuarhiterisï karapi Santiagu?, ¿ambe úpirini úni eska kristianu ma nóteru tsípikua jingoni irekapiringa? ka ¿nénajtsïni jarhuatasïni jánhaskakua, jakajkukua ka balori parachi seguirini tsípikuarhita jingoni irekani no arhiparini na járhati uandanhiatechanchi jatsiaua?

6. Eska na uandajka Lukasʌ 6:22, 23, ¿andisï uá kristianu ma tsípini pʼikuarherani enga tsʼéjkukua ma nitamakuarhini jauaka?

⁶ Uánikua kʼuiripuechaksï eratsesïndi eskaksï jiáni uáka tsípikua jingoni irekani engaksï  no pʼamenchaaka, engaksï kánikua sentabu jatsiaka ka enga imeri familia sési jauaka. Peru inde tsípikuarhita enga Santiagu uandapka Tata Diosïri espiritu santu jimbo jurhasïndi ka ísïchi úsïnga tsípikua jingoni irekani no arhiparini ambe engachi nitamakuarhini jauaka juchari irekuarhu (Gal. 5:22). Ambe enga újka eska kristianu ma tsípikua jingoni irekaaka, jindeesti míteni eska Jeoba jaiapanhentasïnga ka eska májkueni úxaka eska Jesusi (arhinta je Lukasʌ 6:22, 23; Kol. 1:10, 11). Úpiringachi terukutantani juchari tsípikuani lampara ma jingoni enga incharini tixarani jarhajka, chpiri kuájchakukata jarhasti para tarhiata ka janikua no pátani, ka ístu, juchajtuchi uáka tsípikuarhita jingoni irekani no arhiparini ambe enga úkuarhiaka juchari irekuarhu. Seguirisïngachi tsípikua jingoni irekani, nájkirukachi pʼamenchaaka ochi no jatsikuarheni kánikua sentabu. Seguirisïngachi tsípikua jingoni irekani nájkirukajtsïni teresmarhuaka ojtsïni juchari familia o máteru kʼuiripuecha no sésijtsïni kámani. Enga kʼuiripu újka ambe ma parachi jucha nóteru tsípikua jingoni irekania, i ambe úsïndi eskachi jucha sánderu tsípikua jingoni irekaaka. Tsʼéjkukuecha engachi nitamakuarhiajka xarhatasïndi eskachi jucha jindeeska Jesusiri chúxapaticha (Mat. 10:22; 24:9; Juanu 15:20). Jimbosï Santiagu úpti uandani: “Tsípi je, kánikuamindu engajtsï mámaru ambe jimbo tsʼéjkunhani jauaka” (Sant. 1:2).

7, 8. ¿Andisï sánderu uinhapiti úkuarhijki juchari jakajkukua engachi tsʼéjkukuechani nitamakuarhiajka?

⁷ Santiagu uandasïndi máteru ambe andiksïsï kristianuecha jiókuarhijki tsʼéjkukuechani nitamakuarhiani. Uandasïndi: “Míteparini eska engajtsï ísï tsʼéjkunhaaka chári jakajkukuani jimbo jorhenguarhiakajtsï tekaantskua jatsini” (Sant. 1:3). Úpiringachi terukutantaani tsʼéjkukuechani komu chpiri enga úrakuarhijka para espada tiámueri ma úni. Enga espada ma jorheperanhajka ka tátsekua tsʼiraperanhani, i ambe úsïndi eska sánderu uiuinhasï jauaka. Májkueni, engachi tsʼéjkukuechani nitamakuarhiajka, juchari jakajkukua sánderu uinhapiti úkuarhisïndi. Jimbosï Santiagu úpti uandani: “Ka uétarhisïndi eskajtsï jorhenguarhiaka sési jimbo tekaantskua jatsini parakajtsï iámindu ambe jimbo ísïmindu jindeuaka eska Diosï na uékajka” (Sant. 1:4). Engachi exejka eskaksï tsʼéjkukuecha uinhaperantasïnga juchari jakajkukuani, úsïngachi tsípikua jingoni tekaantani.

⁸ Imeri karakata jimbo, Santiagu uandasïndi máru uandanhiatechani engaksï uáka úni eskachi jucha nóteru tsípikua jingoni irekaakia, ¿nákiskiksï i uandanhiatecha ka nénachi uá orhepani uérakuani?

9. ¿Andichisï uétarhinchajki jánhaskakua?

⁹ Uandanhiata: no míteni ambe úni. Engachi uandanhiatechani jatsiajka, uékasïngachi imani ambe úni enga Jeoba jaiapanhintajka, enga marhuakuauaka juchari erachichani ka engajtsïni jarhuataaka parachi no méni jurajkuni Jeobani (Jer. 10:23). Uétarhinchasïngachi jánhaskakua parachi míteni ambe úni ka parachi úni mókukuantani  imechani engajtsïni ikiachijka, úpiringachi chkéni pʼikuarherani engachi no jánhaskaaka ambe úni ka i ambe úpirindi úni eskachi sóntku no sési pʼikuarheraaka.

10. Eska na arhijka Santiagu 1:5, ¿ambechi jatsiski para úni engachi uétarhinchani jauaka jánhaskakua?

¹⁰ Ambe engachi jatsika para úni: jánhaskakua kurhakuni Jeobani. Parachi úni orhepani uérakuani tsʼéjkukuechani tsípikua jingoni, orhetachi jatsiska para kómarhini Jeobani ka kurhakuni eskajtsïni íntskuaka jánhaskakua engachi uétarhinchajka parachi ambakiti ambe erakuni úni (arhinta je Santiagu 1:5). Joperu, ¿ambechi úpirini engachi ísï exepiringa enajkijtsïni Jeoba no sóntku mókuchiantaajki kómarhikuechani? Santiagu uandasïndi seguirini ja je kómarhini Tata Diosïni. Jeoba no kuatantaati ni ikiani engachi méntku úndaska kurhakuni eskajtsïni íntskuaka jánhaskakua parachi úni orhepani uérakuani tsʼéjkukuechani. Sánderu sési, juchari Táti auandarhu anapu kánikua tsípikua jingontsïni íntskuati jánhaskakua (Sal. 25:12, 13). Ima exeasïndi náki uandanhiatechanchi jatsiasïni, pʼamojkusïndijtsïni ka uékasïndijtsïni jarhuatani. ¿A no eskajtsïni i ambe kánikua sési pʼikuastasïnga? Joperu Jeoba, ¿nénajtsïni íntskusïni jánhaskakua?

11. ¿Ambeteruchi jatsiski para úni parachi jatsini jánhaskakua?

¹¹ Jeobajtsïni íntskusïndi jánhaskakua imeri Karakata jimbo (Prov. 2:6). Parachi úni jatsini, jatsiskachi para jorhenguarhini Bibliaeri ambe ka publikasionichani engaksï Bibliarhu pʼitakateka. Joperu no solu uétarhisïndi míteni ambe ma, jatsiskachi para ísï irekani eska Jeoba na uandajka. Santiagu uandaspti: “Ú je eska Diosïri karakata na arhijka, ka no solu ísku kurhandintsï” (Sant. 1:22). Engachi újka ambe engajtsïni Tata Diosï arhijka, niárasïngachi sánderu sési pájperani máteruecha jingoni, sési kámpini ka pʼamojpini (Sant. 3:17). I ambejtsïni jarhuataati parachi úni orhepani uérakuani tsʼéjkukuechani kánikua tsípikua jingoni.

12. ¿Andisï xáni jukaparhakue eskachi sési míteaka Bibliani?

¹² Tata Diosïri Karakata ísïsti komueska espeju  ma ka jarhuatasïndijtsïni parachi exeni ambechi jatsiski para mójtakuni ka nénachi uá ísï úni (Sant. 1:23-25). Engachi kʼamaraakia jorhenguarhini Tata Diosïri Karakateri ambe, úpiringachi kuenta íntskukuarheni eskachi jatsiska para nóteru xáni ikiania. Jeobaeri jarhuajperata jingoni, jorhenguarhisïngachi tekaantstini, jiáni engajtsïni kʼuiripuecha o uandanhiatecha no sési pʼikuastaaka. Jimbokachi tekaantstiskia, sánderuchi sési preparadu jarhasïnga parachi orhepani uérakuani uandanhiatechani. Úsïngachi sánderu sési eratseni ka ambakiti ambe erakuni úni (Sant. 3:13). ¡Xáni enga jukaparhakueka eskachi sési míteaka Bibliani!

13. ¿Andichisï jatsipirini para jorhenguarhini imecheri ambe engaksï sési marhuakuka Jeobani?

¹³ Ménisïchi jorhenguarhisïnga imani ambe jimbo engachi no sési újka. Peruchi no jatsiska para ísï jorhenguarhini, sánderu sésisti, jorhenguarhini imani ambe jimbo engaksï máteruecha sési újka ka engaksï no sési újka. Joperujtsïni Santiagu pʼímarhisïndi parachi jorhenguarhini imecheri ambe engaksï Bibliarhu jaka komueska Abraani, Raabi, Jobu ka Elíasi (Sant. 2:21-26; 5:10, 11, 17, 18). I ambakiti Jeobaeri marhuarichaksï tekaantasti uandanhiatechani enga úpiringa eskaksï nóteru tsípikua jingoni irekapiringia. Imeri ejempluechajtsïni xarhatachesïndi eskachi juchajtu uáka tekaantani Jeobaeri jarhuajperata jingoni.

14, 15. ¿Andichisï jatsi para seguru jarhani ambe engachi jakajkujka?

¹⁴ Uandanhiata: engachi no seguru jarhajka ambe engachi jakajkujka. Ménisïchi úpiringa úkua jukanchani kurhanguni ambe ma engachi arhintaaka Tata Diosïri Karakatarhu. Ojtsïni ménisï Jeoba no ísï mókuchiantani kómarhikuechani eskachi na erokuarhienga. I ambe úpirindi úni eskachi no seguru japiringa ambe engachi jakajkujka. Jatsiskachi para seguru jarhani, engachi no ísï úska, i ambe uáti eska juchari jakajkukua chkéaka ka eskachi no uáka sési pájperani Jeobani jingoni (Sant. 1:7, 8). Úpirindi úni, eskachi niáraaka jamberi tsïtani juchari erokuarhikua para sánderu orhepani.

¹⁵ Apostuli Pablu terukutantaspti juchari erokuarhikuani ankla ma jingoni (Ebr. 6:19). I ankla úsïndi eska barku no xáni manakuarhiaka enga uinhamu janini jauaka ka eska no uatatakuarhiaka tsakapuecha jingoni. Peru jiántkusï marhuajti enga kadena no katsïkurhiaka. Enga ankleri kadena ma iámu iaratsejkia nóteru uinhapesïndia, májkueni engachi jucha no seguru jauaka ambe engachi jakajkujka, ístu no uinhapiti jauati juchari jakajkukua. Enga kʼuiripu ma no seguru jarhajka ambe enga jakajkujka ka no sési kánhani, i ambe uáti úni eska nóteru jakajkuaka eska Jeoba uáka ambe enga aiatspeka. Ka enga nema no jakajkujka nójtu úsïndi erokuarhini ambe ma. Eska na uandajka Santiagu, ima enga dudarijka ísïsïndi “eska japondarhu anapu jengueraticha [o olecha] engaksï jiniani ka jiniani panhajka tarhiata jimbo” (Sant. 1:6). ¿Né úpirini tsípikua jingoni irekani enga i ambe nitamakuarhini japiringa?

16. ¿Ambechi jatsiski para úni engachi no seguru jauaka ambe engachi jakajkujka?

¹⁶ Ambe engachi jatsika para úni: Seguru jarhani ambe engachi jakajkujka ka uinhaperantani juchari jakajkukuani. Jatsiskachi para seguru jarhani. Eliasiri jurhiatikuecha jimbo, Jeobaeri ireta no seguru jarhaspti ambe enga jakajkuenga. Eliasi arhiaspti: “¿Asta na jatini jamberijtsï jiniani ka jiniani nirani jaua tsimani ambe eratseparini? !Enga Jeoba jindeeka Tata Diosï jurhimbiti, imani jingoni ni je! ¡Joperu, enga Baali jindeeka, imani jingoni ni je!” (1 Rey. 18:21). Iásïjtu úpirindi i ambe úkuarhini, jimbochisï jatsika para jucha mismu xarhatakuarhini eska Jeoba jindeeska Tata Diosï enga jurhimbitiika, eska Biblia imeri Karakateska ka eskaksï Jeobaeri testiguecha jindeeska Jeobaeri ireta (1 Tes. 5:21). Engachi ini ambe úska seguruchi jauaka ambe engachi jakajkujka ka juchari jakajkukua uinhapiti úkuarhiati. Engachi uétarhinchaaka jarhuajperata para seguru jarhani ambe engachi jakajkujka uákachi arhiani orhejtsïkutichani eskajtsïni jarhuataaka. Parachi seguirini tsípikua jingoni marhuakuni Jeobani, jatsiskachi para sóntku jánguarhintani i ambe úni.

17. ¿Ambe úkuarhia engachi tsïtaska balori?

¹⁷ Uandanhiata: chkétakuarhitini jarhani. Biblia  uandasïndi: “Engari niáraska chkéni pʼikuarherani jiáni engari uandanhiani jauaka, nóri xáni uinhapiti jauaka” (Prov. 24:10). Uandakua ebreu jimbo, enga ixú tradusirikuarhika “chkétakuarhini” ístu arhikuekasïndi “balori tsïtani”. Engachi balori tsïtaska, nóchi ióndaaka kómu pʼikuarherani.

18. ¿Ambe arhikuekasïni tekaantani?

¹⁸ Ambe engachi jatsika para úni: Mintsikani eskajtsïni Jeoba íntskuaka balori parachi orhepani uérakuani tsʼéjkukuechani. Balorichi uétarhinchasïnga parachi orhepani uérakuani tsʼéjkukuechani (Sant. 5:11). Uandakua enga Santiagu úraka para arhikuekani “tekaantani” arhikuekasïndi nemani enga méntku no manakuarhijka. Úpiringachi eratseni sondaduni ma enga no chéjka ka enga no sïpakuarhijka enga imeri enemigu kʼuanirani jarhajka.

19. ¿Ambechi uá jorhenguarhini Apostuli Pablueri ejemplu jingoni?

¹⁹ Apostuli Pablu ambakiti ejemplu ma íntspispti ambeski balori jukani ka tekaantani, ménisï chkéni pʼikuarheraspti, peru úspti tekaantani jimboka mintsikasïrenga eska Jeoba íntskupiringa uinhapikua enga ima uétarhinchenga (2 Kor. 12:8-10; Filip. 4:13, TNM). Juchajtuchi uáka ísï uinhapeni ka balori jatsini engachi kaxumbikua jingoni jiókuarhiska eskachi uétarhinchasïnga Jeobaeri jarhuajperata (Sant. 4:10).

20, 21. ¿Amberichi uá seguru jarhani?

²⁰ Uákachi seguru jarhani eskajtsïni Jeoba no tsʼéjkusïnga. Jimbosï Karakata Santiagueri uandajti: “Enga nema terongutanhani jarhajka, asï tantiarie eska Diosïsï teronguntajka, jimboka Diosï no úsïnga teronguntanhani para no sési úni, ka nijtu ima újki terongutpini” (Sant. 1:13). Engachi meru jakajkuska ini ambe sánderuchi andarheraka juchari Táti auandarhu anapuni enga xáni uékpitika (Sant. 4:8).

²¹ Jeoba no mójtakurhisïndi “níjtu méni ménderueni eratseni” (Sant. 1:17). Ísï eska Jeoba na jarhuataapka primeru sigluru anapu kristianuechani paraksï orhepani uérakuani tsʼéjkukuechani, juchantsïntu májkueni jarhuataati iásï. Ju je mintsita jingoni kómarhini Jeobani eskajtsïni íntskuaka jánhaskakua, balori ka parachi sánderu mintsikani Jeobani. Jeoba mókuantauati juchari kómarhikuechani. Uákachi seguru jarhani eskajtsïni jarhuataaka parachi seguirini jarhani tsípikua jingoni irekani nájkirukachi tsʼéjkukuechani jatsiauaka.