IYẠL arisina anmanyaạn otelhean roten esi dị romuul ghan ḍighi siphẹ egbogh emhạ phọ aBaguio, epẹ Philippines. Kụ bidị omhiịn kạt dị rongoọm ogbaanhaạn. Bidị uten ni bịn, u/kị siphẹ akạt phọ. Kuolọ umarani phọ amheerạ bọ siphẹ akạt phọ, Helen, ayịgh bịn daị kụ aphogh bidị. Anmanyaạn phọ unyeenhe ni bịn oghị epẹ bidị rokị bọ, kuolọ bidị u/tue ubulha ḍiyịgh eenyuụm mọ aHelen.

Onyebel roten, bidị oḍigh moto rokeel kụ bidị omhiịn saịn boọd dị ogẹ mọ Kindọm Họl. Kụ bidị ootughiạn mọ iphẹn idọ igẹ phọ bidị omhiịn bọ siphẹ akạt phọ ḍiroọr phọ. Bịn iyạl phọ abidị osoor moto phọ, ophogh edeọm ituughạ arookpomhoghan phọ oḍapharị bọ siphẹ aget aKindọm Họl phọ.

Iyạl phọ anmanyaạn phọ usopha oghị aani iniin ituughạ phọ edaphạn bọ siphẹ. Nạ alegheri ni oye dị bidị omhiịn mem mọ bidị orelhe bọ roḍigh siphẹ aKindọm Họl phọ? Umarani phọ Helen! Mem mem mọ bịn bidị ootughiạn mọ odị kụ anhịr phọ bidị omhiịn bọ siphẹ akạt phọ r’aḍiyịgh phọ. AHelen aḅẹm mọ: “Mem mọ bidị orelhe bọ rotu oteẹny amhị, oḅio amhị asalhaạny ni kụ mị aatughiạn mọ eeni mị maḍighi iyaạr dị i/nighẹ.” Kụ bidị oghaạph ipẹ eḍighi bọ oḅenhị Helen, mọ bunọ umhiịn nyodị esi akạt.

Anmanyaạn phọ ughelhọm ni ituughạ phọ, oḅilhẹ olhoghoma eborọph igbo abumor r’abumarani phọ. Mem mọ bidị omhiịn bọ dị roḅeer otu ituughạ phọ mem mọ ituughạ phọ emiteghu bọ, bidị upuru ni mughumọ bunọ kotue ni oḅeer aani. Oniin siphẹ iyạl phọ abidị maḅuạ akị enhọn eelhe, kuolọ ophoriphọ mamhiigh oghị ituughạ ḅilhẹ ratuughạ Baibul phọ—loor aḍiyịgh bịn!