JU MA nyir moko ario gibino wotho karacelo i adhura mi Baguio, i ng’om mi Philippines. Giwok gineno prezantwar moko ucungo i dhu ndaki, re gicoro ngo ceng’ini kude. Nyamego Helen m’ucungo i ng’et prezantwarne uvonjo i bang’gi. Ju ma nyirne gicidho migi, re ng’iero ma Helen ung’iero i bang’gi utelo nen migi.

I ng’eye, nindo mange kinde ma ju ma nyirne gibino wotho ku mutukari, giwok gineno Ot Ker moko ma juketho cal ma dit mi jw.org i kume. Gipoi wang’ acel nia eca tie ayi kwan ma rom ma gineno i kum prezantwar kinde ma gibino kadhu. E gilor kud i mutukari, man gibin gineno program mi coko ma tung’ tung’ ma juketho i dhu gang’ mi Ot Ker.

I ng’eye, ju ma nyir ario eno gibino i coko. Kinde ma gimondo i Ot Ker, ibepoi nia giwok ging’iyo ng’a? Helen! Ging’iye wang’ acel ni kum ng’iero pare. Helen uwacu kumae: “Kinde ma gibino atira atira i bang’a, lworo maka. Apenjara nia nyo atimo lembe moko ma raci!” Ento giwacu ni Helen nia gilar ginene kinde m’ecungo i ng’et prezantwar.

Ju ma nyir maeno gifoyo lembe ma giwinjo i coko, man giwinjiri ve gitie i kind umego ku nyimego migi i pacu. Kinde ma gineno jumange ubeweyo ot i ng’ei coko, gipenjo ka nyo gin de gicopo weyo. Nyakune acel dong’ umbe i ng’om mi Philippines, ento ma kucelo re ucaku cidho i coko, man ecaku ponjo Biblia. Lembuno ceke utimere ni kum wang’ mi ng’iero!