ITINI pisasingdian a kilac i Pakiyo no Filiping, iraay ko tatosaay kaemangay a fafahiyan romakatay i lalan, maˈaraway ko sapisawacay a paliding no mita, kawra cowa ka piraod, tomirengay i tihi no sapisawacay a paliding a fafahiyan salikaka ci Haylon, madaˈmaˈay a masedi i cangranan, soˈlin cowa ka tomerep cangra, kawra cowa ka pawan to madaˈmaˈay a sedi ni Haylon.

Ikorto mikalicay cangra to faso a minokay, mitaˈlifay to cecay Hongti Kitakit Kasaˈopoan maˈaraway ko taˈangayay jw.org a kanpang, malecaday to maˈaraway nangra i sapisawacay a paliding, orato maepoday cangra, tayra i fawahan no Hongti Kitaki Kasaˈopoan, itira maˈaraway ko pisaˈopoan a toki.

Ikor miliyaw masaˈopo i, soˈlinay mirienang koniya tatosaay a fafahiyan, micomod i Hongti Kitakit Kasaˈopoan i, cima ko maˈaraway nangra hani? Ci Haylon. Tangsolay mahapinan nangra, ci Haylon oya madaˈmaˈay ko sedi a salikaka, sanay ci Haylon: “Marawraway kako itiya, cowa ka fanaˈ oniya tatosaay kafahalan a tamdaw, hano pasayni i takowanan a miraod.” Ikor, oniya tatosaay fafahiyan pasowalay takowanan to mifekaday a demak.

Tada maolahay cangra to lalakaw no saˈopo, malacafay to salikaka tada rihadayay ko harateng, maherek ko saˈopo, maˈaraway nangra ko roma tamdaw miasikay to kasaˈopoan, licayayho wa ngaˈay pacafay hokira. Ikor, o cecay fafahiyan tayraay i roma kitakit, oya cecay i, miceriday mirienang to saˈopo, misatapangayho minanam to Fangcalay Cudad, onini sahtoay o pakayniay i madaˈmaˈay a sedi.