PÄ TAWAQONAKAW negocionakajj utjki uka cheqan Baguio (Filipinas) markan sarnaqasipkäna. Jupanakajj mä kullakaruw carritomp predicaskir uñjapjjäna, ukampis janiw jakʼachasipkänti. Carritompïskäna uka Helen kullakajj wali kusisitaw uka pä tawaqor uñkattʼäna, ukhamäkchïnsa tawaqonakajj pasawayapjjakïnwa, ukampis Helen kullakan kusisit uñkattʼatapaw chuymanakapar purtʼäna.

Qhepatjja, utapar autot kuttʼasipkäna ukhajj mä Tantachasiñ Utanwa jw.org uk jachʼa letranakamp qellqkatat uñjapjjäna. Uka pachpa letranakjja, predicañatak carriton uñjapjjatapwa amtasipjjarakïna. Ukatsti autot saraqasajj kunürunakas congregacionanakajj tantachasipjje ukwa qellqkatat uñjapjjäna.

Uka qhepatjja, uka tawaqonakajj mä tantachäwiruw sarapjjäna. Uka tantachäwinjja Helen kullakaruw uñjapjjäna. Kusisit sarnaktʼasirïtapat jankʼakiw uñtʼapjjäna, kullakajj akham siwa: “Jupanakajj jakʼachasipkitäna ukhajja, mä jukʼa sustjasiyätwa, kuna jan walcha lurjjpachäta sasaw amuyayäta” sasa. Ukampis kunas pasäna ukwa Helen kullakarojj pä tawaqonakajj qhanañchtʼapjjäna.

Uka pä tawaqonakarojj wal tantachäwejj gustäna, jilat kullakanakampis wali kusisitäpjjänwa. Tantachäwi tukuyarojja, jilat kullakanakar Tantachasiñ Uta qʼomachaskir uñjasajja, yanaptʼapjjerismati sasaw sapjjäna. Ukhat jichhakamajja, mayni tawaqojj janiw Filipinas markan jakjjeti, ukampis maynejja tantachäwinakarojj jan faltasisaw sarjje, Bibliatsa mä kullakampejj yatjjataskarakiwa. Helen kullakan kusisit uñkattʼatapaw ukham yanaptʼawayi.