BOBEBINGA bebaé be mbe be kele’e ba wulu tisone ya Baguio, e Philippines. Nde be nga yen ata’a bekalate, ve be nga lôt ane jôm é nji bo. Ve Helen, sita a mbe a kañete’ ata’a bekalate, nye a nga fombô be a muñu’u. Binga bete be nga kee dulu dap ôsu, ve be nji vuane jam Helen a nga bo.

Éyoñe be bula’ane menda mabe môs ôte, be nga yene jw.org a too ntilane étyimbi é mbe é ba’a Aba Éjôé éziñ. Nde be nga simesane na be nga yene fe bikanga bite bi too ntilan ata’a bekalate. Été été be nga suse metua, a ke fombô mewolo bisulane ya mekônda me mbe me sula’an Aba Éjôé éte.

Mvuse ya valé, be nga tabe ésulan. Za nnye be nga tôbane nye wôé? Helen! Be nga ji’a yeme na, a ne minga be nga yen a muñu’ ata’a bekalate. Helen a jô na: “Éyoñe me nga yene be be za’a ma ôsu, nlem ô nga kute ma! Nde me nga sili mamiene na, ‘Jé fe me boya éyoñe ji?’” Ve bobebinga bete be nga kat Helen na be nga yene nye ata’a bekalate.

Bobebinga bete be nga wô’ ésulane mvaé, be nga bu’ubane fe mbamba minlañ a bobejañ. Éyoñ ésulan é maneya, be nga si-sili bobejañ nge be ne be volô bo mfubane ya Aba Éjôé. Minga wua ya be be a nyiñe ki fe Philippines, ve nyô mbok a ne mbane bisulan, a tatéya fe na a yé’é Mejô me Zambe. Amu jé? Fo’o ve amu Helen a mbe a muñu’u!