AKWEZE aali a mapwo te kanayi ni kulanda yimwe mu mbonge ya Baguio, Filipinas. Muze te anapalika, ayo yamona temba lia mikanda, alioze kakakundamineko. Ndumbu Helen yoze wapwile hakamwihi ni temba, yaasehesa. Akweze jacho yanunga, alioze kakomokene ha chize ndumbu Helen aasehesele.

Hanyima, muze akweze jacho te anahiluka ku zuwo mu kalela, ayo yamona jw.org ku Zuwo lia Wanangana. Ayo yewuluka ngwo, sona jacho je amwene helu lia temba ya mikanda. Eswe aali yasunuka mu kalela yaya ku Zuwo lia Wanangana hanga atale maola waze yikungulwila yakulikungulula.

Kusulaho, akweze jacho yaya ku kukunguluka. Muze ahetele ku Zuwo lia Wanangana, nunanyingika yoze ayo amwene? Helen! Hazehene, ayo yewuluka ngwo iye kali mutu yoze amwene masehejela. Helen yamba ngwenyi: “Muze ayo akundamine kuli yami yingwivwa woma, mumu nanyongene ngwe hanji nalingile chimwe chuma chipi.” Alioze akweze jacho yalumbununa kuli Helen yize yaatwalile ku Zuwo lia Wanangana.

Akweze jacho kazangile chinji kukunguluka hamwe ni mandumbu, chocho yalivwa ngwe kali ku zuwo. Muze amwene akwo kanakomba-komba mu Zuwo lia Wanangana, no yalihana hanga akwase. Umwe wa kuli akweze jacho hanayi mu chifuchi cheka, alioze mukwo kakuya ku kukunguluka mashimbu eswe, nawa haputuka kulilongesa Mbimbiliya. Yino yeswe yinakalingiwa mumu lia kuseha!