PHILIPPINES, Baguio Khua i chawlehnak hmunhma ah nu pahnih cu lam an leng. Mah ah zapi lak phungchimnak an tuahmi kha an hmuh hna nain an fuhpanh hna lo. Cauk chiahnak leng pawngah a dirmi unaunu Helen nih panh tein a nih hna. An lan ko nain Helen nih panh tein a nihmi hna nih an lung a suk tuk hna.

Mawṭaw in innlei an ṭin lioah Biakinn ah jw.org tiah aa taarmi kha an hmuh. Mah cu a hmasa ah an hmuhmi zapi lak phungchimnak leng cungah an taarmi he aa lo ti kha an hngalh i mawṭaw in an ṭum. Cun Biakinn ah an kal i mah ah Khrihfabu pumhnak cazin kha an hmuh.

A hmaizarh ah mah nu pahnih cu pumhnak pakhat ah an rak i pum. Biakinn chung an luh tikah ahodah an hmuh? Helen kha an hmuh. Anih cu panh tein a rak kan nihtu a si ti kha an hngalh colh. Helen nih hitin a ti: “Ka sinah zeicah an rat ti kha ka hngalh lo caah ka thin a phang pah.” Asinain mah nu hna nih Helen kha zeidah a cang timi kong kha an chimh.

Mah mino nu hna cu pumhnak le unau pawl he i hawikomhnak ah an i nuam tuk. Pumh a dih hnuah midang nih biakinn an thianhmi an hmuh tikah bawmh a ngah maw tiah an hal hna. Mah nu pahnih lakah pakhat cu ramdang ah a kal. Asinain a dang pakhat tu cu a hun i pum i Baibal a hun hlathlai—panh tein nihnak nih thil ṭha a chuahter.