INI n̄kaiferi iba ẹsụk ẹsan̄ade ke ikpehe n̄kan̄ emi ẹsinamde nsio nsio mbubehe ke Baguio City, ke Philippines, mmọ ẹma ẹkụt Mme Ntiense ẹnịmde ukpatn̄kpọ ẹda ẹkwọrọ ikọ, edi mmọ ikawahake ika. Ekedi Sista Helen emi akadade ekpere ukpatn̄kpọ oro okụt mmọ, enye atuak inua imam. N̄kaiferi iba oro ẹma ẹsan̄a ẹbe, edi mmọ ẹma ẹma nte Helen akatuakde inua imam.

Ekem ko, ini n̄kaiferi iba oro ẹsịnede ke bọs ẹnyọn̄ ufọk, mmọ ẹma ẹkụt ẹwetde akamba akamba jw.org ẹdian ke Ufọkmbono Obio Ubọn̄. Mmọ ẹma ẹti ke ima ikụt nte ẹwetde jw.org ke ukpatn̄kpọ oro mmimọ ikokụtde ke itie mbubehe oro. Mmọ ẹma ẹsụhọde ke bọs oro ẹka Ufọkmbono Obio Ubọn̄ oro, ẹkekụt nte ẹwetde ini emi nsio nsio esop ẹsinịmde mbono esop ke inuaotop Ufọkmbono Obio Ubọn̄ oro.

N̄kaiferi iba oro ẹma ẹdụk kiet ke otu mme mbono esop oro ẹkenịmde urua oro. Ama enen̄ede akpa mmọ idem ndikụt Helen ini mmọ ẹdụkde esịt Ufọkmbono Obio Ubọn̄ oro! Inikiet inikiet mmọ ẹma ẹti ke Helen edi owo emi mmimọ ikokụtde nte akatuakde inua imam. Helen ọdọhọ ete: “Ini mmọ ẹsan̄ade ẹbịne mi, idem ama enyek mi ekpri. Mma n̄kere m̀mê nso ke n̄konyụn̄ nnam.” Edi n̄kaiferi iba oro ẹma ẹdọhọ Helen ke mmimọ ima ikokụt enye adade ke mben ukpatn̄kpọ ọkwọrọ ikọ.

Se ẹkenemede ke mbono esop oro ama enem n̄kaiferi iba oro, okonyụn̄ etie mmọ ke idem nte mmọ ẹma ẹdọdiọn̄ọ nditọete ke esop oro. Ini mmọ ẹkụtde nte nditọete ẹnamde Ufọkmbono Obio Ubọn̄ asana ke mbono esop ama akasuana, mmọ ẹma ẹbụp m̀mê edi se mmimọ itiene inam. N̄kaiferi kiet ke otu oro idụhe aba ke Philippines, edi enye emi osụk odude ama ọtọn̄ọ ndidụk mbono esop onyụn̄ ọtọn̄ọ ndikpep Bible. Kpukpru oro inua imam ada edi!