DÉ JENN madanm té ka maché ansanm adan on vil yo ka kriyé Baguio ki ka touvé-y o Filipin. Yo vwè on prézantwa men yo pa ay owa a-y. Helen, sè-la ki té doubout owa prézantwa-la fè on bèl ti souri ba yo. Sé madanm-la kontinyé maché maché a yo men yo pa jen oubliyé bèl ti souri-la Helen té fè ba yo la.

Tibwen plita, sé madanm-la pran on kaw pou rantré akaz a yo é an chimen, yo vwè on sal di Wayòm. I té ni on gran pano maké « jw.org » asi-y. Lè yo vwè sa, yo sonjé kè sé sa ki té maké asi prézantwa-la yo té vwè la. Yo désann an kaw-la é yo ay douvan sal di Wayòm la. É anlè pòt a sal-la yo vwè akilè chak réinyon ka fèt.

Yo chwazi on réinyon é yo toulédé vin. É dèviné kimoun yo vwè lè yo rantré an sal-la ? Mòso Helen la ! Yo rèkonnèt-li tousuit pas yo pa jen oubliyé bèl ti souri-la i té fè ba yo la. Mi sa Helen ka di : « Lè yo vin owa an mwen, an té on ti jan jenné pas an konpranndèdi kè an té fè on biten ki pa bon. » Men an réyalité, sé madanm-la té vin owa Helen pou di-y kè yo té vwè-y owa prézantwa-la.

Sé madanm-la aprésyé réinyon-la é yo santi-yo alèz èvè toutmoun. Ou té’é di sé akaz a yo yo té yé ! Lè yo vwè sé frè é sè-la té ka nétwayé sal di Wayòm la apré réinyon-la, yo mandé si yo té pé ba-yo on pal. Yonn adan sé madanm-la pa’a viv o Filipin ankò men lòt-la kontinyé vin an réinyon é i jous koumansé étidyé Labib. Tousa fèt pas Helen té fè on bèl ti souri ba yo !