WARAI müshii piamashii majayünnüü eere joouluin oikawaa chaa Baguio (Filipinas). Neirakaakalaka sümüin wanee kareetachon, nnojotkalaka narütkaain sünainmüin. Helen tü wawala yalajatkat süʼütpaʼa tü kareetachonkot, sukulemeraakalaka namüin. Nalataka süʼütpünaa, ponopejeʼe maʼin naaʼin sukulemeraain Helen namüin.

Mapa, wuusüluʼushii naya piamashiikana jieyuu süpüla naleʼejüinjanain nepialuʼumüin. Shiasaʼa wopuluʼupa naya, neʼrakalaka jw.org sünain tü Piichi Outkajaaleekat. Sotojookalaka naaʼin shiainya neʼe tü ashajuushi neʼrakat sünain tü kareetachonkot. Nashakanuwaakalaka suluʼujee tü wuusükalü otta noʼunaka sünainmüin tü Piichi Outkajaaleekat. Neirakaakalaka jalapüshiwalin tü outkajawaakat.

Nayasaʼa naya piamashiikana jieyuu nantakalaka sünainmüin tü outkajawaakat. Shiasaʼa nekerotapa suluʼumüin tü Piichi Outkajaaleekat, neʼrakalaka Helen. Sotoka naaʼin shiain tü wayuu akulemeraakat paala namüin. Anuu tü sümakat Helen süchiki tia: «Shapaasü taaʼin wanaa sümaa narütkaain tanainmüin ‹eetaaka wanee kasa mojukuwaʼipatka tatuma›, müsü taya suluʼu taaʼin». Nayasaʼa naya piamashiikana jieyuu naküjakalaka sümüin Helen neʼrüin paala shia sümaa tü kareetachonkot.

Kamalainshaatasü tü outkajawaakat namüin naya piamashiikana jieyuu otta anasü maʼin naaʼin namaa na wawalayuukana. Shiasaʼa neʼrapa na wawalayuukana sünain epitajaa tü Piichi Outkajaaleekat, asakitshii naya müleka eere süpüla nakaalinjain. Akolojoosü tü wanee wayuukot chejee Filipinas, shiasaʼa tü wane oʼunusü sünain tü outkajawaakat otta ekirajaasü shia sünain tü Wiwüliakat. Alatüsü tia sünainjee neʼe sukulemeraain tü wawalakat namüin.