MERITRE nibu nikani dikekä jondron rürübäin käi känti ta juta Baguio Filipinas yete. Karito kukwe driekäre ye jutuabare ietre, akwa ñan krötabare ja ken kwetre mikakäre ñärärä. Helen, meri testiko nämäne nünaninkä karito ken käkwe niaratre mikani ñärärä aune kä nämäne kötare ngwärebätä. Meritre ye nikani jerekäbe ta, akwa kä nämäne kötare Helen ngwärebätä ye käkwe niaratre töi mikani ñan krütare.

Ye bitikäre nämänentre näin bute ja gwirie kokwäre ngwane, cartel kri jw.org jutuabare ietre Ju Ja Ükarakrö yekänti. Tärä okwä ye arabe tuani kwetre karito kukwe driekäre yekänti ye nükaninta törö ietre. Nikanintre bute kwintubu aune konkrekasion jene jene nämäne gätä nuainne ñongwane ye mikani ñärärä kwetre Ju Ja Ükarakrö yekänti.

Meritre nibu ye janamane gätäbätä. Aune nikanintre gwäkäre Ju Ja Ükarakrö yete ngwane, ¿nire jutuabare ietre? Helen jutuabare ietre. Kä kötare krubäte Helen ngwärebätä yebätä nükaninta gare ietre. Helen tä niere: “Jatabatre nemente ti kokwäre ngwane, ti rikakaba chi. Nane ti kukwe ñaka kwin nuainba rababa ruin tie”. Akwa dre namani bare ye meritre käkwe mikani gare Helen ie.

Nämänentre keteitibe ja mräkätre ben aune gätä ye namani kwin meritre ye kräke, nämänentre ja gwirete ye erere ja namani ruin ietre. Ja mräkätre nämäne Ju Ja Ükarakrö mike mrebe gätä täbiti ye jutuabare ietre ngwane, ja töi mikani kwetre ja mräkätre dimike arato. Yete ja käne, iti ñaka niena nüne juta yete, akwa iti ye jatani niken gätäbätä aune ja tötike Bibliabätä. ¡Kä mikani kötare ja ngwärebätä ye köböire!