ỊYẸẸNỌ imiiye ịhyẹ wẹẹ bajẹ kam bwu oye nya ẹga ọlẹ ká angịnyị kaa ji lụmẹ e-epweji nya Baguio, Philippines. Ị chẹhị ka yẹ ịcart ọlẹ kịị kpa ya ẹla Ohe ẹ-ẹpwụ nya alụma, ma ị́ tị jẹ tụ́ ka ụwa ka. Ọọwa lẹ, Helen ko ri ọọnahị ọlẹ kọ dayị ba ịcart ọọwa ba à chị ụmwẹhụ mwẹẹ jahị daa lẹlẹ. Anyang ịịwa kịnyaa la ẹdịyẹ nyaa, ma ị tị kpịtịya nya ụmwẹhụ ọmwẹẹ nya Helen.

Ụka ọkịla nyọlẹ ká anyang ịịwa ju imoto wẹẹ jẹ ka ẹpwa, ị chẹhị kaka yẹ jw.org ọkpọyị ọlẹ kị ya ba u-Ube nya Ịpyị-Adịrahụ. Ị kpịtịya nyori abwọlẹ kị dọọ la okpokpo bala ọlẹ kị yẹ ene lalẹ u-uhye nya ịcart ọlẹ kịị kpa ya ẹla Ohe. Ịwa angị imimiiye hireji bwu imoto lẹ, ị wụla ụka nya ọjịra-jịra ọlẹ kị ya ba u-Ube nya Ịpyị-Adịrahụ yẹ lẹlẹ.

Anyang imiiye ịịwa wẹ ọjịra-jịra ọhẹ ku ẹkpẹ nyọọwa. Ọ laa ẹbyẹbyị nyọlẹ kị yẹ Helen ụka ọlẹ kị ju ka Ube nya Ịpyị-Adịrahụ! Ị kpịtịya ahyaahị nyori ọwa-à ri ọngọlẹ kọ chị ụmwẹhụ taa lẹẹ lẹ. Helen yẹkẹẹ: “M̀ chuko pyịnyẹng ụka kị wẹ ka tọm. M̀ me nyori ọhẹka m̀ haa ẹla ọtịpyọ ọhẹ lẹ.” Ma, anyang ịịwa wụlẹ ya je Helen jaabwọ ká ẹla ọọwa la.

Ọjịra-jịra bala ọ-yẹjula awụlẹ nya aanahị kpụ anyang ịịwa ịpyọ yẹẹyẹẹ; ọ laa lala o-ri nyị juwa ẹ-ẹpwa nyịlaa. Ụka kị yẹ angịkịla wẹẹ kpa ẹga cheri-cheri nyọlẹ ká ọjịra-jịra myị́ kpá, ị tịtọ nyọka dụbwọ ịnyịnyị. Ọngọhẹ lẹpwụ nya anyang ịịwa rụ bwu ẹpwụma ọwẹ chẹẹ lẹ, ma ọngọkịla kaa wẹ ọjịra-jịra bala ọ-dọmwụ nyọka jẹ́ ịBayịbụụ ịnyịnyị​—ọọlajị nya ụmwẹhụ!