ADDA dua nga agtutubo a babbai a magmagna iti sentro ti Baguio City, Philippines. Nakitada ti maysa a public witnessing cart ngem dida inasitgan dayta. Iniseman ida ti kabsattayo a ni Helen a nakatakder iti abay ti cart. Intultuloyda ti nagna ngem dida nalipatan ti nainggayyeman nga isem ni Helen.

Idi agangay, bayat nga agaw-awidda a nakalugan iti bus, nakitada ti nagdakkel a karatula a jw.org iti maysa a Kingdom Hall. Nalagipda a dagita met la a letra ti nakitada iti witnessing cart. Dimsaagda iti bus ket iti ruangan ti Kingdom Hall, kinitada ti eskediul dagiti gimong ti nadumaduma a kongregasion.

Immatender ti dua a babbai iti maysa kadagiti simmaruno a gimong. Ket asino ti nakitada bayat a simrekda iti Kingdom Hall? Ni Helen! Nailasinda a dagus isuna gapu iti nainggayyeman nga isemna. “Bayat nga as-asitgandak,” kinuna ni Helen, “medio nagnerbiosak. Impagarupko ngamin nga addan sa madi a naaramidko.” Ngem inyestoriada ken Helen ti napasamak.

Nagustuan dagita a babbai ti gimong ken pannakilangen kadakuada dagiti kakabsat. Panagriknada, kasla nabayagen nga agaammoda. Idi nakitada nga agdaldalus ti dadduma kalpasan ti gimong, nagboluntarioda pay ketdi a tumulong. Nagabroden ti maysa kadagita a babbai, ngem nangrugin a makigimong ti maysa kadakuada ken makipagad-adalen iti Biblia—gapu laeng iti maysa nga isem!