WAŊ laanduaa a ŋiɔɔŋ wa kelaa o chiee bɛndoo Baguio niŋ, lɛŋnde Filipiŋndeŋ, ma komal Seiyaa Chɛhowaa yooŋgu kɛndɔɔ dimioo o luŋ kpendekele a pɛŋgɛi mapuuluei. Mi che bɛɛ a kue o pɛŋgɛi le, kɛ mi ndepiliaa wa yooŋgu kɛndɔɔ dimioo wa opilɔɔ diolaŋ Hɛliŋ mam muɛɛŋ o nda lo. Mi hei pilaŋ nda kɔllo tau!

Mɛɛ waŋ laanduaa haa wa miiŋgoo o nda lo bɛɛ o mɔmbillo niŋ, ma cha jw.org o poonyiaa o Toŋgo leMasaa. Nduyɛ, ma loonuŋ maa poonyiaa pilɛ koŋ kpe nda che o pɛŋgɛi ndepiliaa wa yooŋgu kɛndɔɔ dimioo ve choo ni. Okoŋ ma tual, ma kua o Toŋgo leMasa koŋ. Nduyɛ ma tofa kɛɛsiaa cho le bɔŋaŋndaŋ ndo.

Mi waŋ laanduaa ŋiɔɔŋnda haa kua o bɔŋaŋndo lɔɔ opilɔɔ. Mɛɛ nda luɛi o Toŋgo leMasaa niŋ, mi kɔndɔfillo bii nda tau mɛɛ nda che Hɛliŋ! Nduyɛ ma loonuŋ sakpo maa, ndu mam o nda lo paale nda kuɛ kelaa leŋ ni. Mi Hɛliŋ dimi aa: “Mɛɛ nda wa ya hunɔɔ o hɔl, mi siooŋnde kandu ya tiŋ biyɔɔ. Mi yiyaŋ maa naapum suɛi wɔɔŋnde ya tosa ni.” Kɛ mi waŋ laanduaa kaŋ dimul ndu maa, mɛɛ nda wa kelaa paale pilɛ, ma komal nda yooŋgu kɛndɔɔ dimioo a pɛŋgɛi mapuuluei. Nduyɛ maa mbo mam muɛɛŋ o nda lo.

Mi waŋ laanduaa haa tuɛi bɔŋaŋ koŋ yeela tau, nduyɛ ma sinaŋ nyɛkɛndɛi a mɛɛ puaapiliaa a ndepiliaa bii nda yɛ. Mɛɛ bɔŋaŋndo chuu nduyɛ ma cha puaapiliaa a ndepiliaa Toŋgo leMasaa dindioo, ma nyuna te o bɛnda pɛ ma yɔŋguŋ le malaa. Mi che bɛɛ waŋ laanduaa haa opilɔɔ kuɛŋnuŋ niŋ o lɛŋnde cheleŋ niŋ, kɛ opilɔɔ kandu kɔlaŋ o bɔŋaŋndaŋ, a Baabuiyo pɛɛkoo. Hei kpou yɔŋnuŋ le mɛɛ ndepilɛnɔɔ mam muɛɛŋ o nda lo yɛ!