ပိာ်မုၣ်​သးစၢ်​ခံဂၤ​လဲၤ​ဝဲ​လၢ တၢ်ဆါ​တၢ်ပှ့ၤ​အလီၢ် ဖဲ Baguio City လၢ​ကီၢ်​ဖံးလံးဖံ(စ်) အ​ပူၤ​လီၤ. အဝဲသ့ၣ်​ထံၣ်ဝဲ လ့ၣ်ဆီၣ်​လၢ ကမျၢၢ်​တၢ်​စံၣ်တဲၤ​တဲ​လီၤ​အမဲာ်ညါ ဘၣ်ဆၣ်​ အဝဲသ့ၣ်​တ​လဲၤ​လၢ လ့ၣ်ဆီၣ်​အ​ခီၣ်ထံး​ဘၣ်. ဒီပုၢ်ဝဲၢ်​မုၣ်​ ဟဲ​လဲၤ ဆၢထၢၣ်​လၢ​လ့ၣ်ဆီၣ်​ကပၤ​ဒီး နံၤကမှံ​​ဘၣ်​အဝဲသ့ၣ်​လီၤ. ပိာ်မုၣ်​ခံဂၤ​အံၤန့ၣ်​ အဝဲသ့ၣ်​ဆဲး​လဲၤတၢ် ဘၣ်ဆၣ်​ ဒီပုၢ်ဝဲၢ်​မုၣ်​ ဟဲ​လဲၤ အ​တၢ်နံၤ​ကမှံၤ​န့ၣ်​ အိၣ်​တီၢ်​လၢ​အဝဲသ့ၣ်​ အ​မဲာ်ချံ​ပူၤ​လီၤ.

လၢခံ ဖဲ​အဝဲသ့ၣ်​က့ၤ​ဒိး ဘၢး(စ်)ကါ​လၢ​ကျဲ​အခါ အဝဲသ့ၣ်​ထံၣ်စိ​ဝဲ ဘီမုၢ်ဘျီၣ်ဒိၣ်​တဖျၢၣ်​လၢ အ​အိၣ်ဒီး jw.org တၢ်​ပနီၣ်​ဖးလဲၢ်​တဘ့ၣ်​လီၤ. အဝဲသ့ၣ်​ သ့ၣ်နီၣ်​​ဘၣ်​က့ၤ​ဝဲ​လၢ လံာ်မဲာ်ဖျၢၣ်​အံၤ အဝဲသ့ၣ်​ထံၣ်​ဘၣ်​တ့ၢ်​​ဝဲ​လၢ လ့ၣ်ဆီၣ်​လၢ​ကမျၢၢ်​တၢ်​စံၣ်တဲၤ​တဲ​လီၤ​အမဲာ်ညါ​န့ၣ်​လီၤ. အဃိ အဝဲသ့ၣ်​ဟးထီၣ်​လၢ ဘၢး(စ်)ကါ​အ​ပူၤ ဒီး​လဲၤ​လၢ​ဘီမုၢ်ဘျီၣ်ဒိၣ်​အလီၢ် ဒီး​ထံၣ်​ဝဲဒၣ်​ တၢ်​ထီၣ်​တၢ်​အိၣ်ဖှိၣ်​ အ​တၢ်ရဲၣ်​တၢ်ကျဲၤ​လၢ ပှၤ​ကျး​​လီၤ​အီၤ​လၢ တြဲၤ​အ​ကပၤ​န့ၣ်​လီၤ.

ပိာ်မုၣ်​သးစၢ်​ခံဂၤ​အံၤ လဲၤထီၣ်​ဝဲဒၣ်​ တၢ်​အိၣ်ဖှိၣ်​တဖျၢၣ်​အံၤ အ​တၢ်ရဲၣ်​တၢ်​ကျဲၤလီၤ. ဖဲ​အဝဲသ့ၣ်​လဲၤနုာ်​​လီၤ​လၢ ဘီမုၢ်ဘျီၣ်ဒိၣ်​ပူၤ​အခါ အဝဲသ့ၣ်​ထံၣ်​ဘၣ်​​ဝဲ​မ​တဂၤ​လဲၣ်. အဝဲသ့ၣ်​ထံၣ်ဝဲ ဒီပုၢ်ဝဲၢ်​မုၣ်​ ဟဲ​လဲၤ လီၤ. အဝဲသ့ၣ်​သ့ၣ်ညါ​ဝဲ တဘျီဃီ​လၢ ဟဲ​လဲၤ မ့ၢ်​ပှၤလၢ​အ​နံၤကမှံ​ဘၣ်​ အဝဲသ့ၣ်​န့ၣ်​လီၤ. ဒီပုၢ်ဝဲၢ်​မုၣ်​ ဟဲ​လဲၤ တဲ​ဝဲ​လၢ “ဖဲ​အဝဲသ့ၣ်​ဟဲ​လၢ ယ​အိၣ်​အခါ ယ​သးကနိး​ညါ ယ​ဆိကမိၣ်​လၢ မ့ၢ်​ယ​မၤ​ကမၣ်​ဘၣ်​ အဝဲသ့ၣ်​တမံၤမံၤ​ဟီ​ဧါ.” ဘၣ်ဆၣ်​ ပိာ်မုၣ်​သးစၢ်​ခံဂၤ​အံၤ တဲပၠး​​ဘၣ်​ဝဲ ဒီပုၢ်ဝဲၢ်​မုၣ်​ဟဲ​လဲၤ​လၢ အဝဲသ့ၣ်​ထံၣ်​ဘၣ်​အီၤ​လၢ အ​မၤဝဲ ကမျၢၢ်​တၢ်​စံၣ်တဲၤ​တဲ​လီၤ​လၢ လ့ၣ်ဆီၣ်​အမဲာ်ညါ​လီၤ.

ပိာ်မုၣ်​သးစၢ်​ခံဂၤ​အံၤ ထီၣ်​တၢ်​အိၣ်ဖှိၣ်​ဒီး ရ့လိာ်​အသး ဒီး​ဒီပုၢ်ဝဲၢ်​မုၣ်​ခွါ​တဖၣ်​ မုာ်​ဒိၣ်မး​လီၤ. ဖဲ​တၢ်​အိၣ်ဖှိၣ်​ဝံၤ​အလီၢ်​ခံ အဝဲသ့ၣ်​ထံၣ်ဝဲ ပှၤ​မၤ​ကဆှဲ​ကဆှီ ဘီမုၢ်ဘျီၣ်ဒိၣ်​အခါ အဝဲသ့ၣ်​သံကွၢ်​ဝဲ​လၢ မ့ၢ်​အ​မၤ​ကဆှဲ​ကဆှီ​စၢၤ​တၢ်​က​သ့ဧါ. ပိာ်မုၣ်​သးစၢ်​ခံဂၤ အကျါ​တဂၤ​န့ၣ်​ တအိၣ်​လၢ​ကီၢ်​ဖံးလံးဖံ(စ်) လၢၤဘၣ်. လၢအဝဲတဂၤန့ၣ်​ စးထီၣ်ဟဲထီၣ်တၢ်အိၣ်ဖှိၣ်​ ဒီးစးထီၣ်မၤလိလံာ်စီဆှံလီၤ. တၢ်​ခဲလၢာ်​မၤ​အသး ခီဖျိ​လၢ တၢ်​နံၤကမှံ တထံၣ်​ဖိ​အဃိ​လီၤ.