Bakento zole ya jeune vandá tambula na kati ya Baguio, ville mosi ya Philippines. Ba talá presentware mosi ya batemwe ya Yehova, kasi ba kwendá ve pene-pene na yawu. Helen, mpangi ya kento yina vandá sala presentware, pesá bawu sourire ya nene. Bakento yango kontinyeke nzila ya bawu. Kasi sourire yina Helen salá bawu, simbá ntima ya bawu.

Na manima, bakento yango kotá na bus samu na kuvutuka na yinzo ya bawu. Mpe na bor ya nzila, ba talá Salle du Royaume mosi na bisoni ya jw.org. Ba serapeleke ti bisoni yina, ba talá yawu mpe na presentware yina ba talá na kisika yina ba katukaka. Ba zonzá na bus na kubika bawu kuna mpe ba kwendá na Salle du Royaume. Na mur ya Salle du Royaume ba talá programe ya balukutakanu.

Bakento zole yayi kwizá na mosi ya balukutakanu yina landá. Ntangu ba vandá kota na kati ya Salle du Royaume, ba pamuká ntangu ba talá Helen! Ba kwizá zaba na mbala mosi ti ni yandi salá bawu sourire ya nene. Helen me zonza: “Mu kumá na mwa boma samu mu zabá ve samu na yinki ba vandá kwiza na kote ya munu.” Kasi bakento yina zonzá na Helen ti, ba talá yandi ntangu yandi vandá sala presentware.

Bakento yayi vandá na kilengi ya kuvanda na balukutakanu, ba vandá tala nete ba vandá kaka na yinzo ya bawu, na bampangi ya bawu. Na manima ya lukutakanu, ntangu ba talá faso bampangi ya nkaka vandá sukula Salle du Royaume, ba lombá si ba lenda sala mpe yawu. Mosi ya bakento zole yayi ke vandá dyaka ve na Philippines, kasi ya nkaka me banda kukwiza na balukutakanu mpe me banda kulongoka Biblia. Nyonso yayi, kaka samu na sourire!