VAKADONA vavali kwa gendere kumwe mevango limwe lyongesefa mositata saBaguio moPhilippines. Awo kwa mwene sitoroli, nye kapi va pitire ko. Munazinyetukadi Helen ogu ga sikeme positoroli kwa menywine unene ngomu va pitire vakadona owo. Vakadona owo kwa twikilire kugenda, nye kwa va tetwire emenyuno lyaHelen.

Konyima, apa vakadona owo va zire kembo nombesa, awo kwa mwene silikido sosinene sointaneta zetu jw.org poSinyanga soUhompa. Makura tava diworoka asi ado kuna kara nondanda edi kava mono muhowo positoroli. Makura navenye mouvali wawo tava humburuka mo mombesa nokutara mazuva aga adi pongo nombungakriste dokulisiga, aga va rameka poheka zoSinyanga soUhompa.

Vakadona owo kwa zire kepongo mosivike esi sa kweme ko. Apa va hwililire moSinyanga, awo kwa mwene Helen. Tupu va mu mwene, tava mu dimburura usimbu asi mukadi gemenyuno lyewa. Helen kwa tanta asi: “Apa va wizire kwange, ame kwa kere nosinka morwa kwa gazarere asi nampo koyili yimwe eyi nina rugana.” Makura vakadona tava tantere Helen asi ka va mu mwene positoroli.

Vakadona owo kwa haferere epongo ntani awo kwa lizuvhire uwaawa pokukara kumwe novanavazinyetu. Apa va mwene vanavazinyetu vamwe kuna kuzeresa moSinyanga, nawo tava pura nsene kuvhura va vatere kuzeresa. Gumwe po govakadona owo, ga za kosirongo sapeke ano ogu gumwe ga tameka kuwiza komapongo nokulironga Bibeli. Emenyuno kwa reta yitundwa mo yoyiwa!