ARO kʉ ná jadda isɨ nrŭ ngʉ bbi d’uka kalu Baguio dhi bbagʉ, Philippines nǎ. Kpa njangʉe lo le adi d’ra na ná prezatware da ngana ro. Ro fø prezatware na ngʉ lod’ra ná le-ve Helen gbongʉe nga bblo kpa dho. Aro ngʉe ná fø isɨ nrŭ rangʉe ra ndima dho, ro kpa ddingʉe nga bbo ko dhi ve na Helen gbongʉe nga ndima dho nari djo.

Fø isɨ nrŭ ngʉngʉ bis nǎ abba ná saa na, nrŭ njangʉe ddikpa Pidhinga dzá dza djó le li ddikpa bbo alama jw.org nari. Nrŭ nongʉenga nari kʉ ndima njae ná prezatware djó ma le lie fø alama i. Kpa vʉngʉe bis nǎ ro ndirigoti kpa tsungʉe Pidhinga dzá dza na. Fø ga kpa singʉe njonjo kʉ ná kutaniko dhio njudha dhi programu le dho ro.

Fø aro kʉ ná isɨ nrŭ singʉe mukusanyiko na. Ro fø isɨ nrŭ singʉe Pidhinga dzá dza na saa na kpa nanga kengʉeni bbo le-ve Helen ndima nja nari dho. Kpa nongʉe nga nari kʉ rie le-ve Helen i gbongʉe nga ndima dho ri. Le-ve Helen pori “Kpa ngʉ si ma dhi ngana ná saa, ma na do tangʉe, dhonalo ma nzá chungʉe kpa si dho nalo ro ri.” Ro fø isɨ nrŭ pongʉe ri Helen dho ndima njangʉe le prezatware kuso.

Mukusanyiko na kpa njangʉe nalo thongʉe kpa nyo bbo, kpa mbungʉe ndima ndima bba kʉ naribbai. Kpa njangʉe nja nrŭ usafi nji mukusanyiko goti nari ná saa na, kpa ma jingʉe ndima nji usafi ddi. I ddoro fø isɨ nrŭ kana ddikpa le nga kʉ Philippines nǎ ri, ro ddikpa le nga njudha dhi ngana ndi si nari tso ndirigoti Biblia nǎ lo ndi jifunza nari tso​—føri krʉ njini le gboenga nari dho!