BANSONGAKAJI bakuabu babidi bavua bapitshila mu tshitupa kampanda tshia bangenda mushinga mu tshimenga tshia Baguio, mu ditunga dia Philippines. Bobu kumona kaditempu ka mikanda muaba au, kadi kabavua bayaku to. Muanetu Helen uvua muimane ku kaditempu aku wakabatuila mimuemue ya dikema. Bansongakaji abu bakapita ne njila, kadi mimuemue ivua Helen mubatuile ne disanka dionso ivua mibakemeshe.

Pashishe, pakavuabu bapingana kumabu mu mashinyi, bakamona tshilatalata tshinene ku Nzubu wa Bukalenge kampanda tshifunda jw.org. Bobu kuvuluka ne: maleta au avua a buena avuabu bamone ku kaditempu ka mikanda. Ke bobu kutuluka ne kubangabu kutangila programe wa bisangilu uvua ku tshiibi tshia Nzubu wa Bukalenge au bua bisumbu bivua bienzelamu bisangilu.

Bayaya abu bakabuela mu bisangilu biakalonda. Kadi udi mumanye muntu uvuabu bamone pavuabu babuele mu Nzubu wa Bukalenge anyi? Helen! Bakamumanya diakamue ne: yeye ke uvua mubatuile mimuemue au. Helen udi wamba ne: “Pavuabu balua batangile kundi, muoyo wakanji kungaba. Meme kudiebeja ne: kah, mbualu kayi bungenji bakuetu?” Ke bayaya abu kumuambila tshivua tshienzeke.

Bayaya abu bakabuela mu bisangilu ne bavua basanke bua kuikala munkatshi mua bantu bavuamu; bakadiumvua anu bu bavua kuabu. Pakajika bisangilu, bakamona bana betu bakuabu balongolola mu nzubu wa Bukalenge bua kumushiya ne mankenda, bobu kulomba bua kuenzabu pabu mudimu au. Umue wa kudibu ukadi mumbuke mu ditunga adi, kadi mukuabu yeye mmutuadije kubuela mu bisangilu ne ukadi mubange kulonga Bible. Bionso abi anu bua mimuemue yetu eyi!